Kamapim Ples Klia Ol Tingting Hait Bilong Seten
“Seten, birua bilong yupela, em i olsem wanpela laion i krai strong. Em i save wokabaut i go, na i laik painim sampela man bilong kaikai.”—1 PITA 5:8.
1, 2. (a) Wanem samting nogut inap kamap na i bin kamap long Jisas yet? (b) Bilong wanem sampela man i laik kilim Jisas i dai?
SAPOS yu harim tok olsem ol i bin baim wanpela man bilong kilim yu i dai. Na yu save dispela man i bihainim yu na em i wet tasol long gutpela taim bilong kilim yu i dai. Bai yu pret nogut tru, a? Yu save kain samting nogut olsem i bin kamap long Jisas?
2 Baibel i tok: “Jisas i wokabaut long hap bilong Galili. Ol Juda ol i laik kilim em i dai, olsem na em i no laik wokabaut moa long hap bilong Judia.” Maski sampela man i laik kilim Jisas i dai, tasol long 32 CE em i go long Jerusalem long De Holi Bilong Haus Sel. Long dispela taim “sampela manmeri bilong Jerusalem ol i tok, ‘Olsem wanem? Em i dispela man ol i laik kilim i dai.’” (Jon 7:1, 25) Bilong wanem sampela man i laik kilim i dai Jisas? Seten i kirapim ol long mekim! Jisas yet i tok: “Bipo yet [Seten] em i man bilong kilim man i dai.”—Jon 8:44.
3. Toksave bilong Pita long Seten, bilong wanem dispela toksave i stret tru long nau?
3 Olsem na yumi no ken kirap nogut long nau taim Seten i birua long ol manmeri bilong God. Seten i kam daun pinis long graun na Baibel i tok: “Yu graun, na yu solwara, yupela lukaut! Bikpela hevi i laik kamap long yupela! Seten i go daun pinis long yupela, na em i gat bikpela belhat tru. Em i save, em i gat sotpela taim tasol.” (Revelesen 12:7-12) Nau Seten wantaim ol spirit nogut i mekim pait long yumi! Na dispela toksave i stret, olsem: “Seten, birua bilong yupela, em i olsem wanpela laion i krai strong. Em i save wokabaut i go, na i laik painim sampela man bilong kaikai.” Sapos yu wanpela Witnes Bilong Jehova yu wanpela bilong ol dispela “sampela man.” Olsem na Pita i tok: “Yupela i mas tingting stret na was gut.”—1 Pita 5:8.
4. (a) Seten i laik mekim wanem na em i hait i kam klostu long yumi? (b) I gat wanem wanpela rot tasol na Seten inap pundaunim yumi?
4 Tasol Seten i gat wanem laik o tingting na em i hait hait i kam klostu long yumi? Em i no laik kilim yumi i dai wantu tasol. Nogat. Taim em i hait i go klostu long Jisas, em i laik mekim Jisas i lusim stretpela pasin bilong lotuim Jehova. (Matyu 4:3-10) Em i traim Jisas, tasol em i no inap pulim Jisas long sakim tok bilong God. Olsem na em i kirapim ol man long tok long kilim Jisas i dai. Em i laik bai Jisas i ,painim rot bilong abrusim ol samting ol man i tok long mekim na bai em i lusim lo bilong God liklik. Olsem tasol long nau, as tru bilong ol wok Seten i mekim em olsem: Em i laik pundaunim yumi bambai yumi no stap gut moa wantaim God. Yu ting em inap mekim? I gat wanpela rot tasol bilong mekim. Baibel i kamapim dispela rot, Baibel i tok: “Jehova i stap wantaim yu long olgeta taim yu stap wantaim em; … tasol sapos yu lusim em bai em i lusim yu.”—2 Kronikel 15:2, NW.
5. (a) Wok bilong Seten i pundaunim sampela o nogat? (b) Sapos yumi laik sanap strong, oltaim yumi mas tingim wanem samting?
5 Sori tumas, tasol long olgeta yia Seten i pundaunim sampela. Ol i lusim Jehova. Planti bilong ol em kongrigesen Kristen i rausim ol, long wanem ol i mekim pasin i no stret long lo bilong God. (1 Korin 5:13) Na Seten i ‘kalabusim’ sampela—pasin bilong dispela graun em Seten i kamapim i kalabusim ol. Olsem wanem? Bai yu sanap strong na sakim olgeta samting Seten i mekim bilong pundaunim yu bambai yu lusim Jehova? Sapos yu laik sanap strong, oltaim yu mas tingim ol tingting hait bilong Seten na ol samting em i wok hait long mekim.
Seten i Mekim Wok Olsem Wanem?
6. Olsem wanem yumi inap save long tingting bilong Seten?
6 Yumi inap save long ol wok Seten i mekim. Aposel Pol yet i tok: “Yumi save pinis long tingting bilong [Seten] (2 Korin 2:11) Olsem na yumi save Seten i tingting long yumi. Em i putim olgeta tingting bilong em long tingim rot bilong pulim yumi bambai yumi lusim wok bilong God. Tasol yumi no ken pret, long wanem Baibel i tokim yumi long olgeta tingting na wok bilong Seten, olsem na yumi inap save long ol samting em i laik mekim. Gutpela soldia i save skelim ol samting ol ami i bin mekim long bipo bilong winim pait na em i bihainim dispela. Olsem tasol yumi ol “gutpela soldia bilong Krais,” yumi ken skelim ol samting Seten i bin mekim long bipo, na bai yumi inap was gut na ol wok em i mekim i no inap pundaunim yumi.—2 Timoti 2:3.
7. (a) Sampela taim Seten i kirapim pait long yumi olsem wanem? (b) Em i save bihainim wanem ol narapela pasin tu? Em i bihainim ol dispela pasin bilong mekim wanem?
7 Ol wokman bilong Seten i bin paitim Jisas na kilim em i dai. (Jon 19:1; Matyu 27:49, 50) Na Jisas i tok profet long ol samting bai painim ol disaipel bilong em, olsem: “Bai ol i kisim yupela bilong givim pen na hevi long yupela na bai ol i kilim yupela i dai.” (Matyu 24:9) Tasol planti taim, taim Seten i kirapim pait long ol wokboi bilong God long ples klia olsem, na em i kirapim ol man long mekim nogut long ol, dispela samting i kik bek long Seten, long wanem ol wokboi bilong God i kirap na wok strong moa long mekim wok bilong God. (Aposel 5:41, 42) Olsem na planti taim Seten i bihainim ol narapela pasin—ol tingting hait—na em wok long pundaunim ol wokboi bilong God bambai ol i no i stap gut long God.
8. Baibel i tok wanem na yumi ken save, Seten bai bihainim pasin hait?
8 Baibel i makim ol dispela tingting hait taim em i tok: “Sanap strong na sakim olgeta pasin hait bilong Seten.” (Efesas 6:11) Tok Grik ol i tanim hia olsem “olgeta pasin hait,” insait bilong dispela tok Grik i olsem: “Ol pasin giaman.” (Kingdom Interlinear Translation of the Greek Scriptures) Seten em i save tru long pasin bilong giaman, olsem na Baibel i tok: “Seten yet i save senisim pasin bilong en na long skin tasol em i kamap olsem ensel bilong lait.”—2 Korin 11:14.
9, 10. (a) Taim yumi skelim namba wan pasin giaman bilong Seten, dispela i lainim yumi olsem wanem? (b) Olsem wanem yumi save Seten i wok yet long mekim ol pasin hait na pasin giaman?
9 Tingim namba wan pasin giaman Seten i mekim na i wok gut. Taim em i go klostu long Iv em i no tok olsem God bai orait long Iv sapos Iv i kisim pikinini bilong diwai tambu. Nogat. Long wanem Iv i save, God i no ken orait liklik long dispela samting. Olsem na Seten i giamanim Iv na Iv i lukim pikinini bilong dispela diwai i gutpela na em i laik kisim. Seten i tok, sapos Iv i kisim dispela pikinini bilong diwai, dispela samting bai helpim em. Olsem na Iv i laik tru long kisim. Seten i tok: ‘Bai yu kamap olsem God’ (Jenesis 3:5) Iv i bihainim tok gris bilong Seten. Em i no daunim dispela laik nogut i kamap long bel bilong em. Dispela laik nogut i pulim em na em i mekim sin.—Jems 1:14, 15.
10 Seten i wok yet long mekim ol pasin hait na giamanim ol man, olsem Pol i tok: “Tasol mi pret. Mi ting long dispela snek i save tumas long pasin bilong giaman, na bipo em i giamanim Iv. Nogut pasin olsem i kamap long yupela. Nogut tingting bilong yupela i bagarap, na yupela i lusim dispela pasin bilong i stap klin na tingting long Krais tasol.” (2 Korin 11:3) Seten i wok long pasin hait na planti man i lus long pait. Sapos em i no wok hait olsem, ating ol i no ken pundaun. Tasol oltaim em i save putim ol samting bilong grisim yumi. Em i wok hait long pulim tingting bilong yumi i go long ol samting em inap bagarapim yumi long spirit long bihain. Em i laik mekim ol samting bambai yumi no i stap strong moa long spirit na isi isi yumi lusim Jehova o bai em inap kirapim pait long yumi long ples klia na pundaunim yumi.
11. (a) Olsem wanem pasin bilong Seten i kain olsem pasin bilong man bilong pulim pis? (b) Yumi no ken lusim tingting long wanem samting?
11 Pasin bilong Seten i kain olsem pasin bilong man bilong kisim pis em i save pasim samting long string bilong giamanim pis na pulim pis i kam. Man bilong kisim pis i traim planti samting bambai em inap save wanem samting tru inap pulim pis i kam. Pis i kam kaikaim dispela samting na em i no save huk i hait i stap. Orait, olsem wanem long yumi? Yumi save long ol samting Seten i mekim wok long en bilong pulim yumi? Yumi save long ol samting bai painim yumi sapos em i “hukim” yumi? Olsem na was gut, nogut Seten i giamanim yu! Seten na ol spirit nogut ol i birua tru bilong yumi na ol i laik bagarapim yumi! Yu no ken lusim tingting: “Seten i stap het bilong olgeta man bilong graun.” Em i giamanim planti man na ol i no save em i giamanim ol. Nogut em i giamanim yu tu.—1 Jon 5:19; 2 Korin 4:4.
Laikim Tumas Mani Kago
12. (a) Wanem wanpela bikpela samting Seten i mekim wok long en bilong pulim ol manmeri? (b) Ol manmeri i save aigris long wanem wanem ol samting?
12 Wanpela samting Seten i mekim bikpela wok long en bilong pulim ol man em pasin bilong laikim tumas mani kago na ol amamas bilong skin. (1 Timoti 6:10) Baibel i stori long pasin bilong “aigris” na i toksave olsem: Dispela pasin “i no kam long Papa. Nogat. … i kamap long pasin bilong graun.” (1 Jon 2:16) Nau, long dispela taim, i gat planti samting moa ol manmeri i save aigris long en, olsem ol nupela haus, na ka, na trak, na bot, na klos, na televisen, na pikap, na hanwas, na kompiuta, na video samting. Na i gat kain kain amamas tu, olsem musik na danis na piksa wokabaut na lukim video na kain kain spot samting.
13. (a) I gat sampela samting em inap helpim yumi, tasol olsem wanem Seten i mekim wok long en bilong pulim yumi na bai yumi lusim wok bilong God? (b) Bilong wanem yumi mas was gut long birua bilong yumi, Seten?
13 Ol samting bilong skin na pasin bilong amamas, i no gat rong long ol dispela samting yet. Jehova i bin wokim ol gutpela samting, ol diwai na plaua samting tu, bilong yumi ken amamas long en. Na spot na ol narapela samting yumi mekim bilong painim gutpela amamas, em inap helpim yumi sapos yumi bosim gut. (1 Timoti 4:8) Tasol yumi mas save planti taim Seten i mekim wok long ol dispela samting bilong pulim ol Kristen na bai ol i lusim wok bilong God. Ating Seten yet i as bilong planti samting bilong nau, olsem ol samting bilong skin na bilong amamas, em i bin pulim tingting bilong planti brata sista na ol i lusim wok bilong Jehova. Yumi mas was gut long birua bilong yumi, Seten. Em i save tru long pasin bilong giaman. Em i save mekim pasin hait na giamanim ol man.
14. (a) Man i mekim wanem na dispela samting i soim olsem pasin hait bilong Seten i pulim em na em i laikim tumas mani kago samting? (b) Olsem wanem na sampela taim i hatwok long save wanpela man i wok long lusim God?
14 Olsem wanem yu ken save, pasin hait bilong Seten long pulim ol manmeri long laikim tumas mani kago, dispela pasin i pulim yu? Ol samting yu mekim bilong painim amamas o ol wok yu mekim bilong kisim ol samting bilong skin, sapos dispela samting i pasim yu long stadi na lainim tok bilong Baibel o long i go long ol miting o long autim tok, orait dispela pasin hait bilong Seten i pulim yu. Olsem na yumi mas was gut. Samting bilong pulim yumi long laikim tumas ol samting bilong skin em inap mekim na bai yumi slek long wok bilong God. Dispela samting bai wok long pulim bikpela hap taim moa bilong yumi na bikpela hap tingting moa na bikpela hap strong moa, na isi isi bai yumi lusim wok bilong God. (Hibru 2:1) Taim wanpela bot i drip, ating pastaim yu no lukim dispela bot i drip i go, long wanem isi isi em i go. O ating bai yu ting bot i no drip i go, em i sanap i stap. Tasol nogat. Isi isi bot i drip i go na bihain yu lukim em i drip i go longwe pinis. Na i wankain tu long man i lusim God na lain bilong God. Isi isi dispela samting i kamap na bihain em i lusim olgeta.
15, 16. (a) Sapos yumi bihainim gutpela tingting bai yumi skelim wanem samting? (b) Wanem samting i painim planti Kristen long nau na i gutpela yumi skelim ol samting yumi save mekim?
15 Sapos yumi bihainim gutpela tingting, orait planti taim bai yumi skelim ol wok Kristen yumi save mekim. Bai yumi askim skin bilong yumi yet, olsem: ‘Mi save wok oltaim long stadi na lainim tok bilong Baibel olsem bipo mi save mekim? Oltaim mi save go long ol miting olsem bipo mi save mekim? Mi save lusim bikpela hap taim long autim tok wankain olsem bipo mi save mekim?’ Ating bai yu tok, ‘Nau mi save mekim planti wok moa.’ Tasol yu save mekim wanem ol planti wok moa? Ating nau yu save lusim bikpela hap taim moa long painim amamas? Ating yu save lusim bikpela hap taim long lukim video samting? O ating yu bin kisim planti samting bilong skin na nau yu mas lusim bikpela hap taim long lukautim ol dispela samting? Olsem na ol dispela samting i no helpim yu long mekim wok bilong God, ol i pasim yu long mekim, a? Olsem wanem? Yu bihainim tru tok bilong Jisas em i tok yumi no ken tingting planti long ol samting bilong skin, yumi mas wok long painim kingdom bilong God pastaim?—Matyu 6:31-33.
16 Long olgeta hap bilong graun, planti brata sista i lus long pait—pasin hait bilong Seten i pulim ol long laikim tumas mani kago na ol i lusim wok bilong God. Ating long kongrigesen bilong yu yet yu inap tingim sampela brata sista bipo ol i stap gut long wok bilong Jehova, tasol pasin bilong laikim tumas mani kago i pulim ol na ol i slek long wok bilong God na isi isi ol i lusim. (Filipai 3:18) Olsem na “yupela i mas tingting stret na was gut.” Nogut Seten i kaikai yu!—1 Pita 5:8.
Wanpela Pasin Hait Bilong Ol Spirit Nogut i Giamanim Ol Manmeri
17. (a) Bilong wanem sampela ensel i lusim wok bilong ol long heven? Wanem samting i painim ol long taim bilong Tait? (b) Ol dispela ensel nogut i kirapim ol man long mekim wanem?
17 Wanem taim sampela ensel i kirap bihainim Seten na ol tu i bikhet long Jehova? Yu tingim? Em paslain liklik long taim bilong Bikpela Tait Wara. Baibel i tok, sampela ensel long heven i lukim pikinini meri bilong ol man long graun ol i naispela. Dispela samting i pulim ol na ol i lusim wok bilong ol long heven na ol i kam daun long graun na maritim ol dispela meri. Ol i mekim bikpela rong. Ol i mekim pasin sem wankain olsem bilong ol Sodom na Gomora. (Jenesis 6:1, 2; Jut 6, 7) Taim Bikpela Tait i kamap, ol dispela ensel i lusim skin bilong man na ol i tanim i kamap spirit gen na ol i go bek long heven. Ol i no inap tanim i kamap man gen na inapim laik nogut bilong bel bilong ol, olsem na ol i wok long pulim ol manmeri long bihainim laik nogut bilong bel na mekim pasin pamuk na pasin sem samting. Long nau ol manmeri i mekim kain kain pasin olsem na as bilong dispela samting i olsem: Ol spirit nogut i kam daun pinis long graun.—1 Timoti 4:1; Revelesen 12:9, 12.
18. I gat wanem samting long bipo na long nau tu na yumi ken save, Seten i pundaunim planti wokboi bilong Jehova long rot bilong pasin pamuk?
18 Long bipo na long nau tu Seten i save pulim ol wokboi bilong Jehova long mekim pasin pamuk. Em i bin pundaunim planti long dispela rot. Paslain liklik long taim lain bilong God, em ol Isrel, ol i go insait long Ples Promis, Seten i salim ol meri Moap bilong pulim ol Isrel bambai ol i lusim wok bilong Jehova. Em i “hukim” planti tausen Isrel long dispela rot na ol i pundaun na mekim pasin pamuk. Ol i kisim pe nogut bilong rong bilong ol na ol i dai. (Nambas 25:1-3) Olsem na Baibel i toksave long yumi ol Kristen, olsem: “Yumi no ken mekim pasin pamuk tu, olsem sampela namel long ol i bin mekim, na long wanpela de tasol 23,000 i lus.” (1 Korin 10:7, 8, 11) Dispela tingting hait bilong Seten long pundaunim ol manmeri i wok gut long dispela taim bipo na i wok gut long nau tu. Ol brata sista long nau, em kongrigesen i rausim ol, planti ol i bin mekim pasin pamuk na kongrigesen i rausim ol.
19. (a) Ol wokboi bilong Jehova i save God i no laikim pasin bilong pamuk na pasin bilong bagarapim marit, olsem na bilong wanem planti ol i mekim? (b) Yu ken mekim wanem na dispela samting inap helpim yu na bai yu klia long pasin pamuk?
19 Tasol ol wokboi bilong Jehova i save pinis God i tambuim pamuk na bagarapim marit. Olsem na, bilong wanem planti ol i brukim lo bilong God na mekim ol dispela pasin? Orait, bilong wanem Iv i brukim lo bilong God? Long wanem Seten i pulim Iv long laikim tru samting i tambu. Na nau tu, long rot bilong televisen na video na ol piksa wokabaut na nius samting, Seten i kirapim ol manmeri long laikim tumas pasin pamuk na pasin bilong bagarapim marit. Em i giamanim ol na ol i ting dispela pasin i samting bilong amamas tru na i no gat rong long en. Long rot bilong ol dispela samting Seten i wok long grisim yumi na pulim yumi. Olsem na sapos yu no klia long ol dispela samting, yu ting wanem samting bai kamap? Ating bai Seten i “hukim” yu tu!
Klia long Pasin Bilong Bihainim Tingting Bilong Yu Yet
20. (a) Wanem narapela tingting hait bilong Seten long pundaunim ol man? (b) Olsem wanem Seten i bin bihainim dispela tingting inap 6,000 yia samting?
20 Taim Seten i bikhet long God em i gat tok long pasin bilong God long mekim ol samting. Em i kirapim pasin bilong ‘bihainim tingting bilong yu yet.’ Em i tokim Iv: ‘Yu yet yu inap skelim wanem samting i gutpela na wanem samting i nogut. Yu no ken harim tok bilong God. God i giamanim yu.’ (Jenesis 3:1-5) Na Seten i bihainim yet dispela tingting hait bilong em. Em i wok yet long pulim man long bihainim tingting bilong ol yet.—2 Timoti 3:1, 13.
21. Sampela brata sista long nau ol i mekim wanem na ol i bihainim tingting bilong ol yet? Na wanem samting i bin kamap?
21 Ol man i laik bihainim tingting bilong ol yet ol i save mekim wanem na yu inap save ol i laik mekim olsem? Planti taim ol i no laik harim tok lain bilong God long graun i givim long yumi. Olsem: Sampela taim lain bilong God i bin toksave long yumi long ol musik na singsing yumi save harim. Ol i tok, nogut yumi harim musik o singsing i save kirapim bel long mekim pasin pamuk, na nogut yumi go long ples disko o long sosel samting, em ol i save putim dispela kain musik long kain ples olsem na i kirapim planti manmeri long mekim pasin pamuk. (1 Korin 15:33) Tasol sampela ol i no laik harim dispela tok. Ol i bikhet long dispela tok na ol i mekim pasin ol yet i ting i stret. Na wanem samting i bin kamap? Ol i mekim pasin pamuk na ol i bagarap long spirit. Na sapos dispela samting ol i mekim i no bagarapim ol yet, tasol narapela brata o sista i bihainim pasin bilong ol na ol i bagarap, orait, ol yet i gat asua long dispela samting nogut i painim ol brata sista bilong ol, a?—Matyu 18:6.
22. (a) Oltaim yumi mas tingim wanem samting? (b) Olsem Na nau i stret yumi ken stori long wanem samting?
22 Oltaim yumi mas tingim dispela samting, olsem: Yumi gat pait wantaim ol birua i gat bikpela strong, winim bilong yumi ol man. Seten na ol spirit nogut ol i stap tru. Ol i “strongpela het spirit bilong graun ol i save bosim dispela tudak.” Na yumi gat pait wantaim ol. (Efesas 6:12) Olsem na yumi mas save long ol tingting hait na ol pasin hait bilong ol. Yumi mas save long ol samting ol i laik mekim bilong pundaunim yumi na oltaim yumi mas was gut. Yumi no ken larim ol i winim yumi na pundaunim yumi. Orait, nau yumi ken stori long ol samting yumi ken mekim bambai yumi redi long sakim ol dispela spirit nogut.
Yu Inap Bekim Ol Dispela Askim?
□ Seten i tingting long mekim wanem taim em i hait i go klostu long lain bilong Jehova?
□ Bilong wanem Seten i wok hait?
□ Wanem sampela pasin hait Seten i mekim bilong pundaunim man?
□ Wanem samting inap helpim yumi na bai ol dispela tingting hait na pasin hait bilong Seten i no ken pundaunim yumi?
[Piksa long pes 19]
Taim bot i drip i go isi isi i hatwok long save em i drip i go. Na olsem tasol taim Kristen i wok long lusim God na lain bilong Em i hatwok long save, long wanem dispela samting i kamap isi isi