Blakpela Hos Bilong Hangre

“MI LUKIM wanpela blakpela hos. Na man i sindaun long en i holim wanpela skel long han bilong en. Na mi harim samting olsem wanpela maus i toktok namel long 4-pela samting i stap laip, na dispela maus i tok olsem: ‘Yu skelim wanpela liklik sospen wit long pe bilong tu kina. Na yu skelim tripela liklik sospen bali long pe bilong tu kina. Tasol yu no ken bagarapim wel wantaim wain!’”—Revelesen 6:5, 6.

Em tok bilong aposel Jon, em i stori long namba tri bilong ol dispela fopela man ol i sindaun long ol hos. Dispela namba tri man em i sindaun long blakpela hos em i makim hangre. Tasol wanem taim dispela man i sindaun long blakpela hos na em i kam? Yu save? Yu mas save long dispela samting, long wanem, dispela i makim wanpela bikpela senis tru i kamap long graun. Bihain bai i no gat bikpela senis olsem i kamap gen.

Sampela man i ting dispela blakpela hos wantaim man i sindaun long en i bin raun long olgeta taim namel long ol man. Tru i gat taim bilong hangre i bin kamap long bipo yet, olsem long taim bilong Ebraham na Josep na i kam inap long wanpela bikpela hangre tru i bin kamap long hap bilong Saina long yia 1878 na 1879. Ol i tok dispela bikpela hangre i winim olgeta bikpela hangre i bin kamap long graun. (Jenesis 12:10; 41:54) Ol i tok, dispela bikpela hangre i bin kilim i dai olsem 9 milion i go inap 13 milion manmeri.

Tasol dispela blakpela hos wantaim man i sindaun long en i no makim olgeta taim bilong hangre i bin kamap long graun. Nogat. Long wanem, taim Jon i lukim piksa bilong ol dispela hos bilong pait i go pas long blakpela hos, na em i lukim wanpela waitpela hos tu i go pas long blakpela hos, na man i sindaun long waitpela hos em i gat hat bilong king long het bilong em. Dispela man em Krais Jisas, na long dispela taim em i bin kamap King, na “em i go na i wok long winim pait nau, na em i gat wok bilong winim planti pait moa.” (Revelation 6:1, 2) Olsem na dispela blakpela hos wantaim man i sindaun long en i makim hangre bai kamap long graun taim Jisas i kamap King pinis long Kingdom bilong God.

Dispela tok piksa bilong Revelesen long 4-pela man i sindaun long 4-pela hos na ol i kam, em i kain olsem wanpela tok profet Jisas i bin mekim. Wanpela taim em i tok profet long ol samting bai kamap long graun bilong makim olsem em i kamap King pinis long heven. Hap tok bilong dispela tok profet bilong Jisas i tok olsem: “Wanpela lain man bai i kirapim pait long narapela lain man. Na lain bilong wanpela king bai i kirapim pait long lain bilong narapela king. Long sampela hap bai ol i gat bikpela hangre, na graun i guria.”—Matyu 24:3, 7.

Ol dispela mak Jisas i bin kolim, wanem taim ol i bin kamap tru? Na dispela blakpela hos wantaim man i sindaun long en, wanem taim ol i raun long graun? Inap planti yia pinis Ol Witnes Bilong Jehova i bin tokaut olsem: Ol man i bin i stap long yia 1914, em dispela lain i bin lukim ol samting dispela blakpela hos wantaim man i sindaun long en ol i mekim taim ol i raun long graun. Tasol olsem wanem? Dispela tok bilong ol i stret?

Ating sampela man bai tok, ‘Nogat. Em i no stret. Dispela graun i save kamapim planti kaikai moa, winim ol taim bipo, long wanem, nau ol i gat planti masin samting na ol i gat save long planim kaikai na kaikai i karim gut. Na i gat sampela lain i wok wantaim Yunaitet Nesen na ol i save skelim gut kaikai na tilim long olgeta man inap long skel bilong ol. Na long sampela hap sindaun bilong ol man i kamap gutpela. Long ol bikpela hap olsem Englan, bipo i gat hangre i save kamap planti taim, tasol nau nogat. Orait olsem wanem yumi ken tok, dispela lain man bilong nau ol tasol i kisim hevi long blakpela hos bilong hangre i raun long graun?’

Em wanpela gutpela askim, a? Tru long bipo yet na i kam inap long nau hangre i bin kamap long sampela taim. Aposel Jon na Jisas tu i save long dispela samting. Tasol ol i tokaut long wanpela taim bilong bikpela hangre tru bai kamap long graun na dispela taim bilong hangre em i narapela kain. Tasol em i narapela kain olsem wanem? Na long nau ol manmeri bilong planti hap ol i gat gutpela sindaun na planti kaikai, olsem na ating yumi no inap tok, hangre i wok long painim dispela lain manmeri nau ol i stap long graun, a?