Askim

■ Olsem wanem? Samyuel em i wanpela profet, o nogat? Mi bin ting em i wanpela profet, tasol mi lukim tok bilong Hibru 11:32 na nau mi no klia long en.

Samyuel em i wanpela profet, na em i wanpela jas tu. Tru, sampela Baibel i tanim Hibru 11:32 i kamap narapela kain na sampela man i no klia, tasol sapos yumi kaunim, yumi ken save Samyuel em i wanpela profet.

Taim Samyuel i manki yet Jehova i givim wok long em long kamapim tok, olsem na ol Isrel i save Samyuel em i wanpela profet. (1 Samyuel 3:1-21) King Sol i singautim Samyuel bambai Samyuel i ken givim sampela save long Sol. Profet tasol inap mekim dispela wok. (1 Samyuel 9:6, 9; 28:11, 15) Na Baibel i stori long wanpela taim ol lapun profet i autim tok profet na Samyuel i stap bosim ol. (1 Samyuel 19:20) Samyuel i mekim wok profet na wok jas wantaim.—1 Samyuel 7:15-17; 12:6, 7.

Tasol sampela man i kaunim lista bilong ol profet long Hibru 11:32 na ol i ting Samyuel i no wanpela profet. Hibru 11: 32 i tok: “Taim i no inap long mi stori long Gidion, na Barak, na Samson, na Jepta, na long Devit na Samyuel, na long ol profet.” Sampela man i lukim dispela tok na ol i ting, Gidion na Barak na Samson na Jepta na Devit na Samyuel i narapela lain, na ol profet i narapela lain.

Tasol sampela Baibel i save raitim olsem: ‘. . . Gidion, na Barak, na Samson, na Jepta, na Devit, na Samyuel, na ol narapela profet.’ Ol i putim “narapela” namel) long “o” na “profet.” I olsem tu long sampela hap moa long Baibel. Long Luk 21:29 sampela Baibel i tok: ‘Yupela lukim diwai fik na ol diwai tu.” Tasol sampela Baibel i putim “arapela” insait long dispela hap tok na i tok: “Yupela lukim diwai fik na ol arapela diwai tu.” Ol i raitim olsem bilong kamapim klia tok bilong Jisas.—Lukim tu Luk 13:4.

Olsem na Samyuel em i wanpela profet.