Bihainim Tingting Bilong God Long Pasin Bilong Marit

GUTPELA Papa bilong yumi long heven em i wokim skin bilong namba wan man na meri bambai tupela i gat laik long marit. Tupela inap marit na kamapim pikinini na long dispela rot ol man i no ken pinis long graun. Taim yumi tingim dispela samting na bikpela amamas man na meri inap kisim long dispela rot, yumi litimapim nem bilong God.—Jenesis 1:27, 28

Olsem na taim Seten i bikhet long God, em i laik bagarapim dispela gutpela samting God i bin kamapim. Seten i givim tingting kranki long ol man na ol i lusim stretpela pasin bilong marit. Baibel i tok, long taim bilong Tait “ol tingting bilong man i nogut yet, long taim em i yangpela.” Jenesis 6:5, 6; 8:21) Pasin bilong ol manmeri i go nogut, ol i kirap mekim kain kain pasin i gat sem, na ol ensel i lukluk i stap.

Ol Ensel Tu i Mekim

God i no wokim ol ensel i gat laik long maritim ol meri bilong graun. Tasol Seten i paulim tingting bilong sampela na laik nogut i kamap long bel bilong ol na ol i laik maritim ol meri bilong graun. God i no wokim ol bilong marit, em samting bilong ol manmeri bilong graun. Tasol ol dispela ensel o “pikinini bilong God” long heven i mekim pasin nogut. Ol i lusim wok bilong ol long heven na ol i kam daun long graun na maritim ol meri. (Jenesis 6:2) Laik nogut i kamap long bel bilong ol na ol i tingim tingim na dispela i kirapim ol long mekim dispela pasin i no stret. Olsem na yumi no ken kirap nogut taim ol manmeri bilong graun i mekim wankain pasin. Spirit holi i givim tingting long Jut na Jut i stori long ol ensel i aigris long ol meri bilong graun, na em i skelim pasin ol dispela ensel i mekim wantaim pasin sampela man i mekim, em bel bilong ol i kirap na ol i mekim pasin sem wantaim ol narapela man. Jut i tok: “Bipo sampela ensel tu, ol i no i stap gut long namba wan bikpela wok bilong ol. Nogat. Ol i lusim ples bilong ol. Olsem na God i kalabusim ol long sen i stap oltaim oltaim, na ol i stap long tudak nogut tru. Ol i wetim bikpela De bilong God, na bai ol i kamap long kot. Bipo ol man bilong Sodom wantaim Gomora na ol taun i stap klostu long ol, ol i bin mekim pasin wankain olsem ol dispela ensel. Ol i bihainim pasin pamuk, na bel bilong ol i kirap na ol i wok long pilai nogut wantaim ol arapela manmeri nabaut. Olsem na God i bekim pe nogut long ol long paia i stap oltaim. Ol i stap ples klia olsem piksa, bilong yumi ken lukim na i no ken bihainim pasin bilong ol.”—Jut 6, 7.

Pasin Doti—long Bipo na long Nau

Yumi save lainim tok bilong Baibel, Olsem na yumi save long ol samting i bin kamap long ples Sodom long bipo. Bel bilong ol man na ol manki i kirap olsem paia na ol i laik mekim pasin sem wantaim tupela man i kam i stap long haus bilong Lot. (Jenesis 19:4-11) Dispela samting i bin kamap 450 samting yia bihain long taim bilong Tait. Long dispela taim bipo, planti man i save goapim animal na planti meri i larim animal i goapim ol. Olsem na 400 samting yia bihain God i givim lo long Isrel na fopela taim em i tambuim ol long mekim dispela pasin doti. Em i tok, ol i mas kilim i dai ol man i kalapim dispela lo. (Eksodas 22:19; Levitikas 18:23; 20:15, 16; Diuteronomi 27:21) Na God i tambuim ol man long mekim pasin olsem meri. Em i tok, man i pilai nogut wantaim man o meri i pilai nogut wantaim meri, ol i mas kilim ol i dai.—Levitikas 18:22; 20:13.

Tasol ol lain man i stap klostu long lain Isrel ol i save bihainim ol dispela pasin doti. Ol i mekim pasin bilong Sodom na dispela samting i paulim ol Isrel na planti taim ol tu i mekim dispela pasin sem.(1 King 14:24; 15:12; 22:46) Wanpela taim, wanpela Livai i go i stap long haus long wanpela man long Gibea, em wanpela taun bilong ol Bensamin. Ol man bilong dispela taun i kam banisim dispela haus na ol i bikmaus na singaut olsem: “Dispela man i stap long haus wantaim yu, salim em i kam ausait. Bai mipela i goapim em.” (Hetman 19:22) Ol Bensamin i mekim dispela pasin nogut na klostu dispela lain i pinis olgeta. Jehova yet i stretim dispela samting olsem.

Tasol ating sampela i ting olsem: ‘Bilong wanem yumi mas tingim dispela samting nogut Baibel i stori long en?’ Long wanem long nau, pasin bilong ol manmeri i go nogut tru, winim olgeta taim bipo. Ol i no gat sem moa. Na dispela pasin i laik bagarapim lain bilong God tu. Long nau planti man na meri i mekim pasin bilong Sodom, olsem man i pilai nogut wantaim man o meri i pilai nogut wantaim meri. Sampela nius i tok:

‘Planti manmeri (inap 30 %) long San Fransisko ol i mekim pasin bilong Sodom.’—Nius Medical Tribune bilong Septemba 23, 1981.

‘Nau long 1980 samting, tingting bilong ol man i senis. Planti manmeri i kirap mekim pasin bilong Sodom na dispela samting i mekim na tingting bilong ol man long stretpela pasin bilong marit i senis.’—Nius Maclean’s bilong Februeri 18, 1980.

‘Planti man bilong singsing na bilong ol piksa wokabaut na bilong ol nius na televisen samting ol i man bilong mekim pasin bilong Sodom. Long dispela rot ol inap senisim tingting bilong ol man.’—Wanpela profesa bilong Yunivesiti bilong Sidni, long Australia, em i tok olsem.

Nau tingting bilong ol man i wok long senis na ol i orait long pasin bilong Sodom. Ol i ting i no gat rong long dispela pasin, long wanem planti man i mekim. Wanpela nius bilong Kanada (The Toronto Star bilong Ogas 24, 1980) i tok: “Ol yangpela long Yunaitet Sios . . . bai ol i amamas sapos misin i orait long ol pasto ol i mekim pasin bilong Sodom.” Na wanpela nius long London, Englan (Daily Mail bilong Jun 5, 1980) i tok: “Misin i tok, sapos man i mekim pasin bilong Sodom, dispela samting i no ken pasim em long kamap pasto long Misin Metodis.” Wanpela meri i raitim pas i go long wanpela nius na em i tok, em i bin kirap nogut tru taim em i harim tok olsem tumbuna pikinini man bilong em i wanpela geligeli, olsem man i mekim pasin olsem meri. Dispela yangpela man i gat 23 krismas. Man bilong bekim pas long nius em i bekim tok olsem: “God i no raitim Baibel. Long bipo yet ol man i bin mekim dispela pasin bilong Sodom . . . Yu no ken tingting planti. Yu mas save tumbuna pikinini bilong yu em i man bilong mekim dispela pasin, tasol maski, em i gutpela yangpela man.”

Baibel i Tok Wanem long Ol Dispela Narapela Kain Pasin i Gat Sem?

Ol manmeri bilong dispela graun i no gat tok long pasin bilong Sodom na ol narapela pasin i gat sem. Tasol sori, dispela samting i paulim tingting bilong sampela long lain bilong God tu na ol i ting i no gat rong tumas long ol dispela pasin. Tasol Lo God i givim long ol Isrel i tok, ol i mas kilim i dai man o meri i mekim pasin bilong Sodom! Na long Nupela Testamen, 1 Korin 6:9, 10 i tok: “Nogut yupela i giamanim bel bilong yupela yet. Ol man i save mekim pasin pamuk, . . . na ol man i save bagarapim marit, na ol man i save laikim pasin olsem meri, na ol man i save mekim pasin i gat sem wantaim ol arapela man, . . . bai ol i no kisim kingdom bilong God.” Na Rom 1:26, 27 i tok: “Ol meri bilong ol ol i lusim stretpela pasin bilong marit, na bihainim pasin i no stret. Na ol man tu ol i lusim stretpela pasin bilong marit, na bel bilong ol i kirap olsem paia, na ol i laik mekim pasin nogut wantaim ol brata. Ol man i mekim pasin i gat sem wantaim ol arapela man.” Na ves 32 i tok moa, olsem: “Ol man i mekim kain pasin olsem ol i mas i dai.”

Yumi kirap nogut, long wanem sampela ol i bin mekim pasin i no stret, olsem goapim animal samting, na ol i pilim olsem ol i no bin mekim bikpela rong. Tasol pasin bilong goapim animal em bikpela rong tru. Man i goapim animal, o meri i larim animal i goapim em, na em i no tanim bel, kongrigesen i mas rausim em. Na sampela ol i tok ol i no save gut pasin bilong Sodom em i wanem kain pasin. Orait, pasin bilong Sodom em wanem kain pasin?

Pasin Bilong Sodom Em Wanem Kain Pasin?

Orait, pastaim yumi ken skelim tok bilong sampela dikseneri.

Wanpela dikseneri i stori long dispela pasin olsem: ‘Pasin bilong bel i kirap na man i pilai nogut wantaim man o meri i pilai nogut wantaim meri’ —Webster’ Third New International Dictionary of the English Language.

Na wanpela dikseneri gen i tok: “1. Man i gat laik long man o meri i gat laik long meri. 2. Man i mekim pasin long narapela man olsem tupela i marit, o meri i mekim long narapela meri.”—The American Heritage Dictionary.

Na wanpela dikseneri bilong tok Inglis i tok: “Man i mekim pasin bilong marit wantaim man, o meri i mekim wantaim meri.”—The Random House Dictionary of the English Language.

Ol dispela dikseneri i stori long dispela pasin, ol i tok man i mekim dispela pasin em I GAT LAIK long man na em i mekim, na meri I GAT LAIK long meri na em i mekim. Tasol Baibel i tok, man i gat laik long mekim pasin nogut na man i mekim pasin nogut, dispela i narapela narapela kain. Ating sampela man o meri i kamap Kristen, ol i wok strong long daunim ol laik nogut long tingting na long skin bilong ol, tasol laik i stap yet. Ating sampela brata sista, taim ol i no kamap Kristen yet, ol i bin mekim pasin bilong Sodom o ol i stap namel long ol manmeri i bin mekim, olsem na sampela taim dispela laik i kamap long bel bilong ol. Tasol ol i wok strong long daunim dispela laik nogut, em Seten i as bilong en. Ol i no larim dispela laik i kamap strong na pulim ol long mekim pasin i no stret long man o meri i mekim. Ol i wok long bosim gut tingting, long wanem ol i save, sapos ol i larim dispela tingting i stap na dispela laik nogut i kamap strong, em bai kirapim ol long mekim sin.—Jems 1:14, 15; Kolosi 3:5-10.

Long Baibel God i tambuim pasin bilong “pilai nogut.” Man i pilai nogut long arapela man na em i no lusim dispela pasin, kongrigesen i mas rausim dispela man. Maski man i no goapim tru narapela man, tasol sapos em i pilai long sem bilong narapela man, o holim sem bilong em, o givim kis long em, o rabim sem bilong em long skin bilong narapela man, olgeta dispela kain pasin i olsem pasin bilong Sodom na man i mekim em i gat rong long ai bilong God. Sampela man i ting ol man tasol i save mekim dispela pasin, tasol ol meri tu i save mekim. Meri i pilai nogut wantaim narapela meri, em i mekim pasin bilong Sodom.

Klia long Ol Dispela Pasin i No Stret

Ol manmeri, em laik bilong mekim pasin bilong Sodom i save kamap long bel bilong ol, ol i mas wok strong tru long daunim. Na yumi yet yumi mas was gut, nogut wanpela man i no daunim ol dispela laik nogut na em i bagarapim yumi. Sampela taim tupela man o tupela meri i mekim sampela samting wantaim na i nogat rong long dispela samting yet, tasol em i kirapim tupela long mekim pasin i no stret, olsem pasin bilong Sodom. Ating narapela i rabim baksait bilong narapela, o tupela i waswas wantaim na narapela i wasim baksait bilong narapela. O sampela taim tupela man bai giaman long pait, olsem pilai nating, tasol bihain bel i kirap. Olsem na yumi mas was gut. Yumi mas save ol dispela kain samting inap kirapim man, Kristen tu, long mekim pasin bilong Sodom.

Bilong wanem sampela i kirap mekim ol dispela pasin i no stret, olsem pasin bilong Sodom, na goapim animal, o lukstil long ol meri samting? Long wanem ol i save tingting tumas long ol pasin bilong marit. Sampela taim ol i man bilong kaunim kaunim ol buk nogut, em ol buk i gat piksa i gat sem i pulap long en, olsem piksa bilong man na meri i stap pui nating na i mekim kain kain pasin. Na klostu olgeta ol i save pilai long sem o skin bilong ol yet. Ol man i mekim ol dispela narapela kain pasin i gat sem, olsem pasin bilong Sodom samting, planti tru ol i tok, ol i save pilai long skin bilong ol yet. Olsem na gutpela sapos yumi save long tok bilong Baibel long dispela samting. Orait, Baibel i tok wanem long pasin bilong pilai long sem o skin bilong yu yet?

Baibel i Tok Wanem long Pasin Bilong Pilai long Skin Bilong Yu Yet?

Sampela man i tok, long Jenesis sapta 38 Baibel i stori long pasin bilong man i pilai long skin bilong em yet na ol i bin kilim i dai Onan long dispela rong. Tasol em i no stret. Baibel i tok, taim Onan i slip wantaim meri bilong brata bilong em, “em i kapsaitim wara nating long graun.” (Jenesis 38:9) Olsem na Onan i no laik kamapim pikinini long dispela meri Tema, na em i kapsaitim wara nating long graun. Onan i no laik kamapim pikinini long nem bilong brata bilong em, olsem lo i tok, na long dispela tasol ol i kilim em i dai.

I gat tupela hap moa bilong Baibel ol man i save kamapim taim ol i stori long ol tok Baibel i mekim long pasin bilong man i pilai long skin bilong em yet. Namba wan em Diuteronomi 23 ves 10 na 11. Dispela tupela ves i stori long ol ami bilong Isrel taim ol i stap long kem na i tok: “Sapos wanpela man i driman long nait na wara i kapsait nating na em i no klin, orait em i mas lusim kem i go ausait na i stap ausait. Na long apinun em i mas waswas, na taim san i go daun em i ken kam bek insait.”(Ol i tanim tok bilong Baibel Today’s English Version) Tasol dispela ol ves i no tok long pasin bilong man i pilai long skin bilong em yet. Nogat. Dispela pasin i olsem man i holim sem bilong em na pilai pilai long en na nau bel i kirap na wara i kapsait. (Webster’s New Collegiate Dictionary, 1981) God Jehova i wokim ol man na taim ol i no slip wantaim meri, sampela taim, taim ol i slip, wara i kapsait nating. Taim ol i slip long nait, ol i driman, olsem driman long meri samting, na nau bel i kirap na wara i kapsait nating. Dispela samting i save kamap long nait, taim man i slip. Tasol i no olsem em i pilai long skin bilong em yet na dispela samting i kamap. Nogat. Em i kamap nating.

Na narapela tok olsem i stap long Levitikas 15 ves 16 na 17 (NW): “Sapos wara bilong man i kapsait, orait em i mas waswas na inap long apinun bai em i no klin. Na klos bilong em o hap skin em dispela wara i kapsait long en, em i mas wasim na inap long apinun i no klin.” Dispela tupela ves tu i no tok long pasin bilong man i pilai long skin bilong em yet. Nogat. Em i wankain tok olsem bilong Diuteronomi 23:10, 11. Em i makim man i slip na em i driman na wara i kapsait nating. Baibel i tok em i no klin, tasol i no olsem em i mekim pasin i no klin. Nogat. Skin tasol i no klin na em i mas waswas. Na i wankain tu taim man i slip wantaim meri bilong em. Taim tupela marit i slip wantaim (na dispela i stret long ai bilong God) na wara bilong man i kapsait, man tupela meri i no klin. Lo bilong Isrel i tok olsem.

Tasol olsem wanem long Nupela Testamen? I gat sampela tok long Nupela Testamen long dispela pasin bilong man i pilai long skin bilong em yet? Nogat. Nupela Testamen i no gat sampela tok long dispela pasin na i no gat sampela tok long man i slip na driman na wara i kapsait nating. Nogat. Tasol i gat sampela tok long Nupela Testamen em inap helpim yumi long kisim stretpela tingting long dispela pasin. Kolosi 3:5 i tok: “Olsem na yupela i mas kilim i dai olgeta pasin bilong dispela graun i stap long bel bilong yupela. Mi tok long pasin olsem: Pasin pamuk, na pasin doti, na pasin bilong bel i kirap na ai i gris long samting nogut, na mangal long samting bilong narapela man.” Na 1 Tesalonaika 4:4, 5 i tok: “Long pasin bilong marit, yupela olgeta i mas save gut long bihainim pasin i holi na i gutpela, na long dispela pasin yupela marit. Bel bilong yupela i no ken mangal nabaut, olsem ol haiden i no save long God.” Dispela gutpela tok i bilong ol Kristen i singel na bilong ol Kristen i marit tu. Tasol ol singel i mas was gut tru long dispela samting, long wanem ol i no marit na taim bel i kirap ol i no ken slip wantaim meri na inapim laik bilong skin.

Sapos yu pilai long skin bilong yu yet, yu no kilim i dai “pasin bilong bel i kirap,” a? Yu sakim tok bilong God. Tru, Jehova i wokim yumi na yumi gat laik long marit. Em i wokim yumi i gat laik long kaikai na dring tu. Baibel i no tok, i gat rong long dispela laik. Olsem i no gat rong long yumi laikim kaikai na dring. Tasol sapos yumi no bosim gut skin na yumi laikim tumas kaikai na dring na yumi kaikai planti tumas o yumi kamap spakman, em nau yumi gat rong. Na i olsem tu long dispela laik bilong skin long pasin bilong marit. Sapos dispela samting i kamap nambawan bikpela samting long tingting bilong man, bai em i kamap wankain olsem ol haiden ol i no save long God, bai ‘bel bilong em i mangal nabaut.’

Man i pilai long skin bilong em yet, em tingting tumas long amamasim skin bilong em. Em i mekim pasin i no stret na kirapim bel bilong em yet na bel i mangal nabaut. Nau planti meri tu i save pilai long skin bilong ol yet. Tasol God i wokim man na meri bilong marit na inapim laik bilong skin. Olsem na dispela pasin bilong man o meri i pilai long skin bilong em yet bilong inapim laik bilong skin, dispela pasin i no stret. Sapos dispela man o meri i laik bai God i amamas long olgeta samting em i mekim, em i mas kilim i dai pasin bilong bel i kirap. Em i mas bosim gut skin na em i no ken pilai liklik long skin o sem bilong em yet. Na taim bel i kirap, bai skin bilong em yet i mekim ol pasin i stret long dispela, olsem kapsaitim nating wara samting.

Jisas i lainim ol man, olsem: “Sapos wanpela man i lukluk tasol long wanpela meri bilong mangalim em, dispela man i kalapim pinis lo bilong marit long bel bilong em.” (Matyu 5:28) Man i save pilai long skin bilong em yet, planti taim kain tingting nogut olsem i save kamap long bel bilong em. Em i save tingim ol meri na i olsem em i driman long slip wantaim ol. Dispela kain man em i no bihainim tok bilong Krais. Ol man (o meri) i save pilai long skin bilong ol yet ol i sakim tok bilong God, em i tok ol i mas KILIM I DAI pasin bilong bel i kirap.

Tasol olsem wanem man o meri i ken mekim olsem? Tru, ol man na meri i save mekim dispela pasin, olsem pilai long skin bilong ol yet, bai ol i hatwok long lusim. Tasol ol inap lusim! Ol i mas wok strong, olsem pait long daunim ol laik nogut, na Jehova bai helpim ol. Man o meri i laik lusim dispela pasin, pastaim em i mas kisim tingting olsem: Dispela pasin em i pasin nogut. Em i mas no laik tru long dispela pasin na givim baksait long en. (Sam 97:10) Na em i mas tingting strong long bel, olsem: Mi no ken mekim dispela pasin. Oltaim em i mas beten askim Jehova long helpim em, na em i mas bihainim ol tok em i mekim long beten na wok strong long lusim dispela pasin. Em i no ken kaunim ol buk o lukim ol piksa samting i save mekim bel bilong em i kirap. Na em i no ken toktok long ol samting i save kirapim em long pilai long skin bilong em yet. Em i mas wok strong long mekim ol wok bilong God, olsem go long ol miting, na autim tok, na mekim Baibel-stadi long ol man, na helpim ol narapela man long ol samting bilong spirit. Long dispela rot bai em i kisim strong na bai em inap bosim gut skin bilong em na kilim i dai dispela laik nogut. Sapos hevi i stap yet, em i ken i go lukim wanpela elda long kongrigesen. Em i no ken pret long i go tokim elda long dispela hevi bilong em. O sapos wanpela sista i gat hevi long dispela samting, em i ken i go toktok wantaim wanpela sista long kongrigesen, em sista i lapun liklik.

Tru tumas, sapos yumi laik holimpas lo bilong Jehova na i stap gut long em, yumi gat pait. Tasol sapos yumi winim dispela pait, bai yumi kisim blesing! Sapos nau yumi wok strong long daunim ol laik nogut bilong skin, bai Jehova i orait long yumi go insait long klinpela Nupela Taim bilong bihain. Bai yumi win tru! Na bai yumi lukim ol gutpela samting i kamap long graun olsem Jehova i tok promis pinis. Ol manmeri bai mekim stretpela pasin bilong marit olsem God i wokim ol bilong mekim long pastaim na bai ol manmeri i pulap long graun na i stap long Paradais.

[Rait long pes 24

Lo bilong God i tambuim ol manmeri long goapim animal o larim animal i goapim ol

[Rait long pes 26]

Bilong wanem sampela i kirap mekim ol dispela pasin i no stret, olsem pasin bilong Sodom, na goapim animal, o lukstil long ol meri samting?