Insait Bilong Ol Tok i Kam Long Olgeta Hap

Gutpela Tok Bilong Bipo i Stap Yet Olsem Gutpela Tok Tru

Taim kros i kamap namel long man na meri marit, tupela i mas mekim wanem? Wanpela profesa bilong Yunivesiti bilong Sauten Kalifonia, nem bilong em Carlfred Broderick, em i tok: ‘Bipo ol man bilong oraitim bek skin bilong man ol save tok, taim man i belhat em i no ken pasim belhat bilong em. Tasol ol i bin skelim dispela samting na nau ol i save, dispela tok i no stret. Ol man i save belhat long narapela man, ol narapela man save bekim wankain pasin long ol.’ Na dispela profesa i tok, ‘Sapos man i kamapim belhat bilong em, em i no daunim, dispela samting bai mekim belhat bilong em i kamap strong moa long bel bilong em.’

Broderick i tok, taim man o meri marit i belhat, gutpela sapos em i daunim belhat bilong em na wok long stretim dispela samting long pasin isi. Em i tok, “Gutpela pasin narapela man i save mekim long narapela man long bipo, em savepasin.” Na em i kolim wanpela tok bilong Baibel i givim gutpela save long yumi long pasin yumi mas bihainim. Em i tok: “Taím Solomon i tok, ‘Sapos man i belhat long yu, orait bekim tok isi long em, na bai belhat bilong em i dai,’ em i tok stret. Dispela tok i bilong bipo tru, tasol em i gutpela tok bilong helpim yumi ol manmeri bilong nau.”—Provep 15:1.

Ol Pikinini i Pret

“Long graun bel bilong olgeta lain man bai i bagarap tru na ol i pret . . . Planti manmeri bai ol i tingting long ol samting i laik kamap long graun, na bai bel bilong ol i pret tru, na ai bilong ol i raun.” Em narapela hap bilong dispela “mak” Krais Jisas i kolim taim em i tok profet long “dispela graun i laik pinis.”—Luk 21:25, 26, Matyu 24:3.

Dispela pret i no kisim ol manmeri i bikpela pinis tasol. Long nau dispela pret i kalap long ol pikinini tu. Dokta Ruth Formanek bilong Yunivesiti Hofstra long Nu Yok em i tok, ol yangpela bilong nau ol i save pret. Wanpela nius (Liverpool Daily Post) i tok, dispela dokta i skelim planti pikinini na em i painim olsem long 1935 ol pikinini i bin pret long sampela animal, na tudak, na ples antap, na man nogut; tasol long nau ol pikinini i save pret long papamama bai brukim marit bilong ol, o sik kensa bai painim papa, o mama bai givim bel long kisim drak, o wanpela pait nuklia bai kamap. Na dokta i tok: “Mi lukim ol pikinini i bel hel hevi tru. Long nau i gat planti samting i mekim na ol i stap bel hevi.”