Tok Bilong God i Gat Laip
Bihainim Pasin Bilong Hana na Pikinini Bilong Em
SAPOS yu wanpela mama na yu hap yangpela yet, ating ol pikinini bilong yu i stap wantaim yu long haus. Tasol lukim Hana na pikinini man bilong em Samyuel. Hana i bringim Samyuel i kam long haus lotu bilong Jehova long Sailo. Ol pris i save stap long dispela haus na ol i mekim wok bilong Jehova. Bilong wanem Hana i kisim pikinini bilong em i kam i stap olgeta long dispela haus lotu? Ating Hana i no laikim em, o olsem wanem?
Nogat. Hana i laikim tumas Samyuel. Tasol bipo em i no gat pikinini na em i bin beten askim Jehova long givim wanpela pikinini man long em, na em i tok promis long Jehova olsem: “Bai mi givim em long Jehova inap long olgeta taim em i stap laip.” (1 Samyuel 1:10, 11) Em nau, Hana i mekim olsem. Em i givim Samyuel long Jehova na em bai mekim wok long haus lotu bilong Jehova i go inap long taim em i dai.
Hana bai sori tru long Samyuel i lusim em, na Hana bai tingting oltaim long em. Tasol Hana i larim em i go mekim dispela wok, long wanem, Hana i save laikim tumas Jehova na em i save, pikinini bilong em bai mekim wok bilong Jehova. Sapos yu wanpela papa o mama, yu inap larim pikinini bilong yu i go mekim wok bilong Jehova?
Taim Samyuel i wok long i go bikpela, em i mas kisim ol nupela nupela klos samting i stret long mak bilong skin bilong em. Lukim Hana hia. Em i kisim wanpela nupela klos i kam, em Hana yet i bin samapim. Hana i save go lukim Samyuel long olgeta yia, na ating em i givim sampela gutpela tok long Samyuel bilong strongim bel bilong em na bai em i ken stap gut long wok bilong em long haus lotu bilong Jehova. (1 Samyuel 2:18, 19)Dispela pasin bilong Hana long strongim bel bilong pikinini bilong em na helpim em long mekim wok bilong Jehova long olgeta taim, dispela em i gutpela pasin tru ol papamama bilong nau ol i ken bihainim, a?
Na yumi olgeta i ken bihainim gutpela pasin bilong Samyuel tu. Em i orait long mekim wok bilong Jehova. Ating planti taim em i tingim papamama na em i laik i go bek long ples na i stap wantaim papamama, tasol em i stap mekim wok bilong em long haus lotu. Na sampela traim moa i painim Samyuel na i traim bilip bilong em.
Lukim ol pikinini man bilong hetpris Ilai! Ol i kisim ol dispela meri i save mekim wok long dua bilong haus lotu! Ol i laik mekim pasin pamuk wantaim ol dispela meri! Taim Samyuel i manki yet na i wok long i go bikpela, ol i save mekim ol dispela kain pasin nogut, tasol Samyuel yet i bihainim pasin i stret tasol. (1 Samyuel 2:22-26) Yumi mas bihainim pasin bilong Samyuel. Yumi no ken bihainim pasin nogut bilong ol man yumi stap namel long ol.