‘Tingting Long Ol Elda Bilong Yupela’
“Yupela i mas tingting long ol [elda] bilong yupela, bipo ol i autim tok bilong God long yupela. Yupela i mas tingting long wokabaut bilong ol, na bihainim pasin bilong bilip bilong ol.”—HIBRU 13:7.
1. Wanem senis i kamap long namba 19 senseri? Ol i makim ol elda olsem wanem?
KLOSTU long pinis bilong namba 19 senseri lotu Kristen tru i wok long kamap bek long rot bilong wanpela liklik lain sumatin bilong Baibel ol i bung wantaim Charles Taze Russell na ol i dediket pinis long God. Ol i stap long hap bilong Pitsbeg long Pensilvenia. Pastaim ol i wok long kamapim bek ol tok o bilip tru bilong Baibel insait long kongrigesen, i no gat ol tok na bilip giaman bilong Babilon i stap insait long en. Tasol ol i no inap stretim hariap ol lo na pasin bilong bosim kongrigesen. Ol i holim yet liklik hap tingting kranki bilong lotu giaman. Ol i gat ol elda na dikon (olsem wokman bilong kongrigesen), tasol lain bilong kongrigesen yet ol i makim husat husat i ken holim wok elda; ol i putim han, olsem vot, bilong makim ol.
2.Man i mas i gat wanem pasin na bai ol i ken givim wok elda long em?
2 Tasol ol i putim bikpela mak, na ol man i mas bihainim stret ol lo bambai ol i ken kamap elda. Wastaua bilong Novemba 1, 1909, pes 325 i tok, taim ol i laik makim husat man i ken kamap elda, pastaim ol i mas tingting gut long ol lo bilong God na laik bilong God, na ol i mas beten long God i helpim ol long makim tupela man em inap tru long kisim wok elda. Na dispela Wastaua i kolim 3-pela samting man i mas winim pastaim na bai em i ken kamap elda: (1) Em i mas save gut long skulim man, olsem mekim wok tisa. (2) Em i mas lainim man long tok i tru tasol; em i no ken lainim ol long sampela tok giaman. (3) Em i mas i gat pasin daun na i stap aninit long God.
Ol i Kirapim Gen Lo Bilong God long Kongrigesen
3, 4. Bilong makim ol man bilong lukautim ol kongrigesen, wanem ol senis i bin kamap long (a) 1919? (b) 1932? (c) 1938? (d) 1971?
3 Long 1919 ol i kirap long stretim pasin bilong makim ol elda. Ol i singautim ol kongrigesen long makim wanpela brata em i strong long autim tok, na bai em i ken bosim wok bilong autim tok. Long olgeta yia kongrigesen i ken tingim wanpela brata bilong holim dispela wok, tasol Sosaiti Was Taua yet bai givim namba long em. Na long yia 1932 senis i kamap gen, na nau kongrigesen i makim sampela strongpela brata bilong holim ol wok insait long kongrigesen, na ol i no kolim moa olsem “elda”; wanpela em i “wasman bilong kongrigesen,” na wanpela em i “wasman bilong wok Baibel-stadi,” na i gat sampela moa bilong holim ol narapela wok.
4 Na long 1938 narapela senis i kamap. Kongrigesen i no vot moa bilong makim husat brata i ken bosim ol wok. Em wok long Lain Bilong Bosim Kongrigesen Kristen long olgeta hap bilong graun. Long dispela taim na i kam inap long nau, Sosaiti yet i makim ol “wokman” bilong lukautim ol wok insait long kongrigesen. Orait, long 1971 narapela senis i kamap. Wastaua bilong Novemba 15 na Desemba 1, 1971 long tok Inglis, em i kolim klia wok bilong ol elda na wasman na i tok, nau yumi ken kirap gen long kolim lapun man o elda (presbýteros) na wasman (epìskopos) long ol brata i lukautim kongrigesen.
5. (a) Taim lain elda i tingim wanpela brata inap kamap elda, bilong wanem ol i mas tingting gut pastaim? (b) Taim lain elda i tingting long.wanpela brata inap kamap elda, ol i mas tingim wanem ol samting?
5 Nau man i mas winim bikpela mak tru bambai em inap holim wok elda, olsem spirit holi i makim na i stap long Baibel. Long wanem, paslain long ol i makim man i kamap elda, em i mas bihainim tru pasin bilong Kristen na em i mas i go pas long wok bilong autim tok. (Hibru 13:7, 17) Olsem na lain elda i no ken hariap tumas long tingim wanpela brata i ken kamap nupela elda. (1 Timoti 3:6; 5:22) Nogut ol i makim em hariap na bihain ol i lukim em i sot long sampela pasin bilong gutpela elda na ol i tingting long pinisim em long wok elda, na nau ol i mas lusim bikpela hap taim na hatwok long bung na toktok long ol i mas pinisim em na i gat wanem wanem as na ol i mas mekim olsem. Taim lain elda i tingting long makim wanpela brata long kamap elda, wanpela samting ol i ken tingim i olsem: Long tingting bilong kongrigesen, dispela brata i bihainim pasin olsem elda? Ol yet i pilim em i olsem wanpela elda maski em i no kisim yet namba bilong elda? Ol i lukim em i bihainim gut ol lo bilong Baibel na em i gat gutnem long ai bilong ol?
‘Em i Bosim Gut Meri Pikinini Bilong Em’
6. Elda i mas mekim wanem ol pasin long famili bilong em?
6 Nau yumi ken skelim sampela man i mas winim bilong kamap elda, olsem aposel Pol i kolim:
“Sapos i gat wanpela man i no gat rong long ai bilong ol manmeri, na sapos em i gat wanpela meri tasol, na sapos ol pikinini bilong en ol i bilip long Krais, na i no gat tok long ol i mekim pasin doti, na ol i no save sakim tok bilong papamama, orait kain man olsem yu ken putim i stap hetman [olsem elda]”—Taitas 1:6.
“Wasman i mas . . . bosim gut meri pikinini bilong em yet, na mekim ol pikinini ol i bihainim tok bilong em. Man i no save bosim meri pikinini bilong em yet, em i no inap i stap hetman [olsem elda] bilong sios [olsem kongrigesen] bilong God.”—1 Timoti 3:2, 4, 5.
7. Elda i gat wok long famili bilong em na long kongrigesen wantaim, olsem na em i m wanem long dispela tupela wok?
7 Em nau, dispela em i wanpela bikpela mak tru ol elda i mas winim. Olsem wanem elda inap lukautim ol wok bilong kongrigesen na em i ken lukautim tu meri pikinini long ol samting bilong spirit na helpim ol bambai ol i ken i stap belgut? Em i bikpela wok tru bilong elda. Man i mas strong long ol samting bilong spirit bambai em inap mekim dispela tupela wok wantaim. Sampela taim sampela bilong kongrigesen i laik bai elda i ken helpim ol long wanpela hevi samting bilong ol, na dispela bai pulim hap taim bilong elda na em i no inap i stap wantaim meri pikinini bilong em long dispela taim. Bilong wanem em i bikpela samting long em i mas tingim gut meri pikinini bilong em olsem? Long wanem, sapos em i no mekim wok bilong em long helpim famili na pas gut wantaim ol, o sapos ol pikinini bilong em i bikhet long ol samting bilong spirit, em i no inap i stap elda moa, maski em i gat gutpela save na em i gat bikpela laik long i stap elda. Olsem na nau yumi save, elda i mas mekim wok wasman long famili bilong em pastaim! Tasol nogut famili i pulim bikpela hap taim tumas bilong elda, na nogut kongrigesen i pulim bikpela hap taim bilong elda. Elda i mas skelim gut dispela tupela wok bilong em.—Efesas 5:28-33; 6:4; 1 Timoti 5:8; 1 Pita 3:7.
‘No Ken Bikhet; Mas Isi long Ol’
8, 9. Elda i mas bihainim wanem ol pasin bambai em i ken i stap gut wantaim ol narapela?
8 Pol i raitim pas i go long Taitas na Timoti na em i kolim sampela mak moa elda i mas winim bambai em inap wok gut wantaim ol narapela elda na ol manmeri long kongrigesen. Pol i tok:
“Wasman bilong [kongrigesen] em i man bilong lukautim wok bilong God. Olsem na em i mas wokabaut stret, na bai ol manmeri ol i no inap painim wanpela rong long em. Em i no ken bikhet. Em i no ken belhat kwik. . . . Em i no ken paitim man nabaut. . . . Em i mas bosim gut olgeta laik bilong em yet.”—Taitas 1:7, 8.
“Em i no ken belhat kwik. Nogat. Em i mas isi long ol man. Em i no ken pait nabaut.”—1 Timoti 3:3.
9 Olsem na elda i mas i gat pasin olsem bilong Krais. Dispela mak elda i mas winim em i antap moa, long wanem, pasin bilong Krais i gutpela tru. Tasol olgeta Kristen i mas wok long winim dispela mak! Yumi olgeta i mas bihainim pasin bilong Krais. Bilong mekim olsem yumi mas i stap isi wantaim ol man. (1 Korin 11:1) Jems i tok: “Ol man i kisim dispela save i kam long God, ol i save mekim pasin olsem: Namba wan, ol i bihainim klinpela tingting. Na namba tu, ol i stap wanbel wantaim ol man, na ol i save isi long ol, na ol i save harim tok bilong narapela man. Ol i save sori tru na mekim gutpela pasin. . . . Sapos yumi stap wanbel, dispela em i olsem yumi planim pikinini kaikai. Na long dispela pasin bilong wanbel, bai stretpela pasin i kamap olsem gutpela kaikai.”—Jems 3:17, 18.
10, 11. (a) Pasin bilong elda inap mekim wanem long kongrigesen? (b) Sapos ol elda i gat narapela narapela tingting, ol i mas mekim wanem?
10 Olsem wanem? Yumi ol elda i save kamapim “pasin bilong wanbel”? Yumi no laik kamapim pasin bilong kros na pait, a? Lain elda i mas wok long kamapim pasin bilong i stap wanbel na ol narapela i ken lukim na bihainim. Nogut kongrigesen i lukim kros i stap namel long ol elda na kongrigesen i gat hevi long dispela pasin. Yumi ken tingim tok bilong Pol, em i tok: “Mi laik bai ol man bilong olgeta ples ol i mekim [beten]. Mi laik bai ol i stap holi, na lusim belhat na kros.”—1 Timoti 2:8.
11 Sampela taim ol elda i gat narapela narapela tingting. Tasol sapos elda i gat pasin isi, orait maski em i gat strongpela tingting, em i no ken bikhet na bihainim laik bilong em yet. Sapos tingting bilong ol narapela elda i no narapela kain long ol lo i stap long Baibel, em i ken daunim laik bilong em yet na larim laik bilong ol narapela elda i kamap. Na sapos ol lo bilong Baibel i no insait long ol samting ol elda i toktok long en, orait em i ken bihainim gutpela tingting na bosim bel bilong em. Em bai tingim wanpela lo i stap long Baibel long 1 Korin 13:4, 5 i tok, man i gat pasin sori “em i no save belhat kwik.”—Kolosi 3:12-14.
“Holim Strong Dispela Gutpela Tok”
12. Pol i kolim wanem ol narapela samting ol elda i mas mekim?
12 Wanem sampela samting bai helpim elda long bihainim moa yet ol mak bilong elda? O wanem samting elda i ken mekim bilong bihainim yet ol dispela gutpela mak bilong elda em i holim pinis? Yumi ken larim Pol yet i bekim ol dispela askim. Em i tok:
“Em i mas holim strong dispela gutpela tok tru ol i bin skulim em long en. Olsem na bai em inap long skulim ol man na strongim bel bilong ol long stretpela tok. Na bai em inap long tok strong long ol man bilong sakim tok, na bai ol i pilim tru rong bilong ol.”—Taitas 1:9.
“Em i mas i stap gutpela tisa.”—1 Timoti 3:2.
13. Elda i mas mekim wanem bambai em i ken i stap strong long spirit?
13 Elda i ken mekim wanem bilong “holim strong dispela gutpela tok” na “i stap gutpela tisa”? Wanpela samting em i mas mekim i olsem: Oltaim em i mas makim hap taim bambai em i ken stadi long Baibel. Em i mas redim gut tok bilong ol miting, na em i mas redim gut tok em yet bai mekim long miting. Em i mas stadi tru na wok long kisim save bambai em i ken i stap strong long spirit. Nogut em i katim tasol ol bekim bilong ol askim long Wastaua. Em i mas stadim tu ol dispela tok na putim gut long bel na tingting na bai em i pilim tru. Olsem wanem? Em i save gut long as bilong ol dispela tok bilong Wastaua? Na ol skripsa ol i bin raitim namba bilong en tasol long paragraf na ol i no kamapim tok bilong en, em i bin painim na kaunim ol dispela skripsa? Em i no inap mekim ol dispela samting insait long sotpela taim tasol. Nogat. Yumi mas makim bikpela hap taim liklik bilong yumi yet i stadi na bilong wokim stadi bilong famili.—Josua 1:8; Sam 1:2; 77:6, 12.
14. Elda i mas mekim wanem bambai em i ken mekim gutpela wok tisa?
14 Tru elda i gat planti wok em i mas mekim, tasol em i mas tingting tru long stadim ol buk Kristen bambai “em inap long skulim ol man na strongim bel bilong ol long stretpela tok. . . . na . . . tok strong long ol man bilong sakim tok.” I gutpela sapos elda i gat laibreri bilong em yet, olsem ol buk, na sapos em i laik painim kwik sampela save o tok orait em i ken lukluk insait long ol dispela buk. Em i ken mekim wok long ol indeks bilong helpim em long painim ol tok insait long ol dispela buk. Bilong wanem em i bikpela samting long elda i mas mekim olsem? Long wanem aposel Pol i tok: “Was gut long pasin yu yet yu mekim, na long wok bilong skulim ol man. Oltaim yu mas wok strong long dispela. Sapos yu mekim olsem, bai wok bilong yu em i mekim gut yu yet, na bai em i mekim gut ol man i harim maus bilong yu tu.”—1 Timoti 4:16.
15. Sapos elda i givim tok long man na Baibel i no as bilong ol dispela tok, em inap mekim wanem?
15 Tru tumas, ol tok elda i givim long man em i bikpela samting, long wanem, em inap helpim man long kisim laip oltaim o em inap long nogutim ol na bai ol i no ken kisim laip. Olsem: Sapos wanpela i kam askim elda long pasin bilong rausim bel, o kisim blut, o givim blut, o pasin bilong vot o ol samting bilong politik, na sapos elda i givim sampela tok i kranki liklik na i no stret tru wantaim ol lo bilong Baibel, na sapos brata o sista i bihainim dispela tok, orait bai bel bilong elda yet i gat tok, na bel bilong brata o sista tu bai i gat tok long dispela samting, na ating nau ol i no ken i stap wanbel wantaim Jehova olsem pastaim. Olsem na sapos elda i no save gut long em bai bekim tok olsem wanem, na em i no save wanem lo bilong Baibel i stret long dispela askim ol i bin givim long em, orait em i no ken bekim hariap sampela tok. Sapos elda i bekim long tingting bilong em yet, na Baibel i no as bilong ol dispela tok bilong em, dispela inap bagarapim man long ol samting bilong spirit na em i no inap kamap strong gen.—Filipai 1:9, 10.
16. Olsem wanem na sampela elda i bin pundaun na mekim bikpela rong? Dispela em i liklik samting tasol o olsem wanem?
16 Na i gat narapela samting tu na elda i mas was gut long pasin em yet i mekim. Em i mas tingim Jehova na wok long i stap wanbel tru wantaim Jehova. Sori tumas! Sampela elda i no bin wok strong tumas! Sampela elda i no bin wok strong long i stap wanbel wantaim Jehova na ol i no tingim em oltaim, na sampela rong i painim ol olsem pamuk na bagarapim marit samting. Olsem wanem na ol i mekim rong olsem? Long wanem, ol i no putim Jehova long tingting bilong ol na tingim em oltaim, na ol i no tingting tumas long ol tok promis bilong em. Ol i wok long lusim tingting long ol dispela samting. Ai bilong tingting bilong ol i go tudak na ol i no lukim gut ol samting long spirit long tingting bilong ol. Olsem na ol i kirap long tingim ol laik nogut bilong skin na dispela laik i kamap strong long bel bilong ol. Sampela elda marit ol i no tingim pasin bilong ol i nogutim nem bilong Jehova na i givim bikpela hevi na pen long famili bilong ol, na ol i bin mekim pasin pamuk na bagarapim marit bilong ol. Ol dispela man ol i bin bagarapim bilip bilong sampela brata sista na pundaunim ol. Ol i no inap tok, dispela rong ol i bin mekim i no bikpela rong tru, long wanem nau olgeta man i save mekim. Em i no inap tok olsem bilong karamapim rong bilong em.—Matyu 13:41; 18:7-9; Hibru 13:4.
Ol Gutpela Elda na Meri Bilong Ol
17. Klostu olgeta elda i mekim wanem ol gutpela wok?
17 Tasol klostu olgeta elda long olgeta hap bilong graun ol i sanap strong long ol samting bilong spirit na holimpas tok i tru. Ol i stap long 45,000 kongrigesen, na gutpela pasin bilong ol i olsem piksa na lain bilong God i ken bihainim. Nau long dispela taim bilong “planti hevi nogut tru” ol gutpela wasman i save wok strong long san na long nait, olsem aposel Pol i bin mekim. (2 Timoti 3:1; Aposel 20:31) Ol dispela elda i laik tru long i go lukim ol brata sista i gat sik bilong spirit, na ol i no tingim longwe rot o ren samting. Ol i amamas long i go long haus bilong ol na helpim ol. Na yumi amamas tru long lukim ol dispela “lapun man” i strong long autim tok long olgeta taim!
18. Ol meri bilong ol elda i mekim wanem gutpela wok?
18 Na ol meri bilong ol elda tu ol i mekim gutpela wok! Ol i save lusim sampela amamas bilong ol bambai man bilong ol i ken mekim wok elda bilong ol. Sampela taim ol elda i mas i go long miting bilong ol elda o ol i mas i go lukim sampela man bilong helpim ol, na meri bilong ol i mas i stap long haus. Sampela taim elda wantaim meri bilong em i stretim tok pinis long mekim wanpela samting, tasol wanpela hevi i kamap long kongrigesen na nau elda i gat wok, na tupela i no inap mekim dispela samting tupela i laik mekim. Na ol dispela sista i no save askim man bilong ol long ol hevi i save kamap insait long kongrigesen. Nogat. Ol i save, i no stret long elda i kamapim ol dispela samting long meri bilong em. Tru tumas, ol dispela sista i gutpela samting tru insait long kongrigesen.—Skelim wantaim Rom 16:12; Taitas 2:3-5.
19. (a) Elda i mas mekim wanem ol Samting? (b) Sapos man i dediket pinis, em i ken givim wanem askim long em yet?
19 Yumi skelim wok ol elda i mekim na yumi save, klostu olgeta ol i givim bel long mekim wok bilong ol na ol i wok strong, na ol i go pas long wok bilong Jehova. Ol i mekim gutpela wok, olsem na yumi tenkyu long Jehova, em i sori long yumi na em i putim ol dispela pasin long ol kongrigesen bilong helpim yumi. Ol dispela elda i gat gutpela save na ol i tingim ol samting bilong spirit na ol i redi long helpim kongrigesen. Olsem na Pol inap long tokim Timoti: “Sapos man i laik i stap wasman bilong [kongrigesen], em i laikim gutpela wok.” Dispela “gutpela wok” i no olsem ol i laikim biknem na namba na bai ol i antap long ol narapela bilong kongrigesen, olsem ol bikpela man bilong Krisendom i mekim. Nogat. Ol elda i no tingim tumas laik bilong ol yet; ol i daunim laik bilong ol bambai ol i ken helpim ol narapela man na mekim wok bilong Jehova. Sapos yu man na yu dediket na baptais pinis na yu no elda, yu laik wok long kamap wanpela elda na bai yu inap mekim gutpela wok?—1 Timoti 3:1; Luk 17:10.
20, 21. (a) Yumi mas mekim wanem long ol elda? (b) Sapos yumi mekim dispela samting, i olsem yumi mekim wanem tu?
20 Ol manmeri bilong kongrigesen ol i save harim tok bilong ol elda i mekim tru wok bilong ol, na ol i daun long ol dispela elda. Bel bilong ol i kirap tru long gutpela pasin sori ol elda i mekim long ol, na ol i bihainim tok bilong Pol, em i tok: “Yupela i mas tingting long ol hetman [elda] bilong yupela, bipo ol i autim tok bilong God long yupela. Yupela i mas tingting long wokabaut bilong ol, na bihainim pasin bilong bilip bilong ol. Ol hetman [elda] bilong yupela ol i laik helpim yupela, na ol i save was long yupela oltaim. Na bihain bai ol i mas autim tok long God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait bai ol i ken amamas na holim wok bilong ol, na ol i no ken bel hevi. Sapos ol i bel hevi long lukautim yupela, bai dispela i no helpim yupela.”—Hibru 13:7, 17.
21 Yumi olgeta i mas daun na i stap aninit long ol dispela lo bilong oganaisesen em Jehova i bin putim, na yumi mas harim tok bilong ol elda ol i save wok strong na ol i go pas tru long wok bilong Jehova. Sapos yumi mekim olsem bai ol i ken amamas long mekim wok elda bilong ol na ol i no ken hevi long mekim dispela wok. Na sapos yumi harim tok bilong ol na i stap aninit long ol, i olsem yumi daun long Namba Wan Wasman, em Jehova, na Wasman Helpim bilong em, Krais Jisas.—1 Pita 2:25; Revelesen 1:1; 2:1-3:22.
Yu Inap Tingim?
□ Ol dispela elda kongrigesen i bin vot na makim ol, ol i mas winim wanem bikpela mak?
□ Kirap long yia 1919 na í go inap 1938, ol i mekim wanem bilong kamapim bek ol pasin Jehova yet i bin putim long oganaisesen Kristen bambai ol samting i ken wok stret?
□ Bilong mekim stret wok bilong em long famili na long kongrigesen wantaim, elda i mas mekim wanem?
□ Wanem ol pasin elda i mas bihainim na bai em i ken i stap gut wantaim ol narapela?
□ Bilong wanem em i bikpela samting long elda í mas “holim strong dispela gutpela tok”?
□ Bilong wanem yumi mas tenkyu long dispela pasin bilong putim ol elda long lukautim kongrigesen?
[Piksa long pes 16]
Elda i mas makim hap taim bilong kisim famili bilong em i go wantaim em long autim tok
[Piksa long pes 17]
Na em i mas makim hap taim tu long mekim sampela gutpela amamas wantaim famili bilong em
[Rait long pes 21]
“Yupela i mas bihainim tok bilong ol [elda] na i stap aninit long ol.” “Yupela i kam bek pinis long wasman i save lukautim . . . yupela.”—Hibru 13:17; 1 Pita 2:25.