“Wasman . . . i Mas Bosim Gut Laip Bilong Em Yet”
“Wasman bilong [kongrigesen] . . . i mas bosim gut laip bilong em yet.”—TAITUS 1:7, 8.
1, 2. Wiliam bilong Orens i makim wanem gutpela pasin bilong bosim gut skin? Wanem ol gutpela samting i kamap long dispela rot?
I GAT stori bilong wanpela man bilong bipo em i bin bosim gut tru bel bilong em. Dispela man em pikinini man bilong King bilong Netelan, ol i kolim em Wiliam bilong Orens. Long yia 1550 samting, dispela yangpela man i go wantaim King Henri Namba 2 bilong Frans bilong painim abus long bus. Tupela i raun wantaim na nau king i tokim Wiliam long wanpela samting em wantaim king bilong Spen i pasim tok long mekim, em tupela i laik kilim i dai olgeta Talatala i stap long Frans na long Netelan, na long olgeta hap i gat nem Kristen. King Henri i ting yangpela Wiliam em i strongpela Katolik olsem em yet, olsem na em i tokim Wiliam long olgeta samting tupela i tingting long mekim. Wiliam i kirap nogut tru na tingting planti long samting tupela i laik mekim, long wanem, em i gat planti gutpela pren ol i Talatala, tasol em i bosim gut bel na em i no kamapim dispela long king. Em i pasim maus na putim gut yau long olgeta tok bilong king.
2 Wiliam i no lusim taim—kwiktaim em i kirap mekim ol samting bilong pasim rot bilong tupela, olsem na bihain ol Katolik bilong Spen i no inap bosim moa Netelan. Taim King Henri i bin tokim Wiliam long samting nogut em i laik mekim, Wiliam i harim na em i bosim gut skin na em i no mekim wanpela tok, olsem na em i kisim nem olsem “Wiliam, Man i No Toktok.” Wok bilong Wiliam i kamap gutpela tru, olsem na wanpela buk i tok: “Em yet em i man bilong helpim ripablik bilong Netelan long kisim independens na kamap strong.”
3. Taim ol elda Kristen i bosim gut skin, dispela i helpim husat?
3 Wiliam i bosim gut skin na dispela i helpim em yet wantaim lain bilong em. Olsem tasol ol elda o wasman Kristen long nau i mas bihainim dispela pasin bilong bosim gut skin, em wanpela pasin spirit holi i kirapim yumi long bihainim. (Galesia 5:22, 23) Taim ol i bihainim dispela gutpela pasin, ol i helpim ol yet wantaim kongrigesen. Sapos ol i no bihainim, dispela inap kamapim bikpela hevi.
Bosim Skin—Em Wanpela Pasin Ol Elda i Mas Bihainim
4. Wanem tok bilong Pol i kamapim klia olsem ol elda i mas bosim gut skin?
4 Pol em i wanpela elda na em i save, pasin bilong bosim gut skin em bikpela samting. Ol elda bilong Efesus i kam long em na em i givim tok long ol olsem: “Yupela i mas was gut long yupela yet, na long olgeta manmeri bilong [kongrigesen].” Bilong was gut long ol yet, ol i mas bosim gut skin, olsem was gut long pasin ol i mekim. Pol i kamapim dispela samting long pas em i raitim long Timoti, em i tok: “Yu mas was gut long ol pasin bilong yu yet na long wok yu mekim bilong skulim ol manmeri.” Dispela tok bilong Pol i kamapim klia olsem Pol i save long pasin bilong ol man, em sampela i strong long skulim ol narapela man long ol pasin ol i mas bihainim, tasol ol i no strong long ol yet i mas bihainim ol dispela pasin. Olsem na taim em i givim tok long ol, namba wan samting em i tok long en em olsem ol i mas was gut long pasin bilong ol yet.—Aposel 20:28; 1 Timoti 4:16.
5. Husat i makim ol elda Kristen long kisim wok? Wanem hap bilong Baibel i kolim ol gutpela pasin ol i mas bihainim bambai ol inap kisim dispela wok?
5 Bipo yumi no klia tumas long wok elda olsem Baibel i stori long en, tasol nau yumi save gut long en. Yumi save, brata i no kisim nating dispela wok—i gat ol man bilong makim em long kisim. Lain Bilong Bosim Ol Witnes Bilong Jehova o ol maus tru bilong dispela lain ol i save makim ol elda. Dispela lain yet ol i olsem maus bilong ‘gutpela wokboi.’ (Matyu 24:45-47) Long 1 Timoti 3:1-7 na Taitus 1:5-9, aposel Pol i kolim planti gutpela pasin brata i mas bihainim bambai em inap kamap wanpela wasman Kristen o elda.
6, 7. Ol elda i mas bosim gut skin bambai ol inap bihainim wanem ol gutpela pasin?
6 Long 1 Timoti 3:2, 3, Pol i tok wasman i mas sindaun gut, na em i mas mekim ol gutpela pasin, olsem na em i mas bosim gut skin. Na Pol i tok, man em inap kisim wok wasman em i no ken belhat kwik o pait long ol narapela man. Elda i mas bosim gut skin bambai em inap bihainim ol dispela gutpela pasin tu. Na elda i mas bosim gut skin bambai em i no ken spak o dring planti.
7 Long Taitus 1:7, 8, Pol i tokaut klia olsem wasman i mas bosim gut skin o bosim gut laip bilong em yet. Tasol dispela tupela ves i kolim planti narapela gutpela pasin wasman i mas bihainim, na em i mas bosim gut skin bambai em inap mekim. Olsem: Wasman i mas wokabaut stret, na ol manmeri i no ken lukim sampela rong long em; em i mas bihainim ol stretpela pasin tasol. Tru tumas, elda i mas bosim gut skin bambai em inap bihainim ol dispela pasin.
Pasin Em i Mekim Long Ol Narapela
8. Taim elda i laik givim tok long wanpela man, em i mas bihainim wanem ol gutpela pasin na dispela i kamapim klia olsem em i mas bosim gut skin?
8 Wasman i mas mekim pasin isi long ol wanlotu bilong em na em i no ken les kwik long ol. Olsem na em i mas bosim gut skin. Olsem: Long Galesia 6:1, Baibel i tok: “Ol brata, sapos yupela i save olsem wanpela bilong yupela i bin mekim sin, orait yupela man i bihainim Holi Spirit [olsem ol elda], yupela i mas mekim pasin isi long dispela man na helpim em long stretim pasin bilong em. Tasol yupela i mas lukaut gut long yupela yet. Nogut Satan i traim yupela na yupela tu i pundaun long sin.” Bilong mekim pasin isi, man i mas bosim gut skin. Na sapos man i laik lukaut gut long em yet, dispela tu i hap wok bilong bosim gut skin. Na olsem tasol taim elda i wok long helpim man i gat hevi, pasin bilong bosim gut skin i bikpela samting. Maski elda i gat wanem tingting long dispela man, em i mas wok long helpim em, na mekim pasin isi long em, na pilim gut tingting bilong em. Elda i no ken kirap kwik na givim tok long em; elda i mas harim gut ol tok em i mekim na helpim em long kamapim hevi bilong em.
9. Taim ol elda i laik helpim brata i tingting planti long wanpela hevi na bel bilong em i bagarap stret, ol i mas tingim wanem gutpela tok bilong Baibel?
9 Sapos man i tingting planti long hevi bilong em na bel bilong em i bagarap stret, orait taim elda i laik helpim em, elda i mas bihainim tok bilong Jems 1:19, olsem: “Yupela olgeta i mas putim yau kwik long harim tok, tasol yupela i no ken hariap long mekim toktok, na yupela i no ken kros kwik.” Na sapos bel bilong man i hat, orait elda i mas was gut moa yet, nogut em tu i belhat. Sapos wanpela man i belhat long elda na mekim ol tok kros, elda i mas bosim gut skin bambai em i no bekim wankain tok. Baibel i tok: “Sapos ol i mekim pasin nogut long yupela, orait yupela i no ken bekim pasin nogut long ol.” (Rom 12:17) Sapos elda i bekim wankain tok, bai bikpela kros i kamap. Olsem na Baibel i givim gutpela tok long ol elda, olsem: “Sapos man i belhat long yu, orait bekim tok isi long em, na bai belhat bilong en i dai.”—Sindaun 15:1.
Bosim Skin Long Miting Bilong Ol Elda na Long Taim Bilong Harim Kot
10, 11. Long sampela miting bilong ol elda, wanem samting i bin kamap na dispela i makim olsem ol i mas bosim gut skin taim ol i miting?
10 Taim ol elda i mekim miting bilong ol yet, ol i mas was gut na bosim gut skin. Taim ol elda i miting, sampela taim elda i mas bosim gut skin bambai em inap i stap isi na kamapim ol tok bilong helpim tok i tru na stretpela pasin. Na sampela taim elda i mas bosim gut skin bambai em i no ken mekim bikpela toktok tumas na pasim rot bilong ol narapela elda long toktok. Sapos wanpela elda i gat dispela pasin, gutpela sapos narapela elda i givim sampela tok long em long dispela.—Lukim 3 Jon 9.
11 Na long miting bilong ol elda, sapos wanpela elda i strong tumas long wanpela samting, dispela inap kirapim em long belhat o bikmaus liklik. Tasol sapos em i mekim olsem, em i no bosim gut skin! Na dispela i nogutim em yet long tupela rot, olsem: Sapos em i no bosim gut skin, bai ol narapela i ting bel bilong em i kirap nating na em i mekim ol tok, olsem na dispela tok i no gat as bilong en. Na tu, sapos em i no bosim gut skin na em i belhat samting, bai em i bagarapim bel bilong ol narapela elda na bai ol i no laik harim tok bilong em. Na ol elda i mas was gut, nogut narapela i tok kros long narapela, na bai lain bilong ol i bruk. Dispela bai nogutim ol yet na kongrigesen tu.—Lukim Aposel 15:36-40.
12. Long wanem kain taim ol elda i mas was gut na bosim gut skin?
12 Ol elda i mas bosim gut skin bambai ol i no ken bihainim pasin wantok, olsem helpim sampela man tasol na sampela nogat. Na ol i mas was gut, nogut ol i mekim wok nogut long namba ol i holim. Traim inap painim ol long dispela na sapos ol i no was gut, ating bai ol i larim laik nogut bilong skin i kirapim ol long mekim tok kranki o pasin kranki! Planti taim ol elda i no bin stretim gut rong taim wanpela pikinini o wanpela famili bilong ol i mekim dispela rong. Long kain taim olsem, ol elda i mas bosim gut skin bambai ol i no larim bel sori bilong ol long pikinini o famili i pasim ol long bihainim stretpela pasin.—Lo 10:17.
13. Ol elda i harim kot, bilong wanem ol i mas wok strong moa long bosim gut skin?
13 Na taim ol elda i harim kot bilong wanpela brata o sista, ol i mas bosim gut skin bambai bel bilong ol i no sori nating long dispela brata o sista. Nogut aiwara bilong em i kirapim ol elda long sori nating long em. Na sapos wanpela brata o sista i kirap na sutim tok long wanpela elda, olsem sampela i mekim taim ol i bikhet na lusim bilip, orait elda i mas bosim gut skin na i stap isi. Tok bilong aposel Pol i stret long kain taim olsem, em i tok: “Wokman bilong Bikpela i no ken tok pait na tok kros. Nogat. Em i mas mekim gutpela pasin long olgeta man.” Em i mas bosim gut skin bambai em inap mekim olsem. Olsem na Pol i tok: “Sapos ol man i bikhet long em [wokman bilong Bikpela], em i mas daunim belhat na painim ol gutpela rot bilong skulim ol manmeri long ol pasin God i laikim.” Taim man i bikhet o birua long em, em i mas bosim strong tru skin bilong em bambai em inap daunim belhat na mekim pasin isi.—2 Timoti 2:24, 25.
Ol i Mas Bosim Gut Skin Taim Ol i Helpim Ol Sista
14. Taim ol elda i wok long helpim ol sista, ol i mas bihainim wanem ol gutpela tok?
14 Ol elda i mas was gut tru long pasin ol i mekim taim ol i wok long helpim ol sista—ol i mas bosim gut skin. I no gutpela sapos elda wanpela i go lukim wanpela sista bilong helpim em. Gutpela sapos em i kisim narapela elda o wanpela wokman bilong kongrigesen i go wantaim em. Ating Pol i save, hevi inap kamap long dispela rot, olsem na em i tokim elda Timoti: “Yu mas stretim . . . ol lapun meri olsem yu save mekim long ol mama bilong yu. Na yu mas mekim wankain pasin long ol yangpela meri olsem yu save mekim long ol susa bilong yu, em long pasin i klin tru long ai bilong God.” (1 Timoti 5:1, 2) Sampela elda i putim han long sol bilong sista, olsem papa i holim sol bilong pikinini. Tasol nogut ol i giamanim bel bilong ol yet. Yumi save, ol Kristen i mas laikim tru ol brata, tasol nogut pasin bilong bel i kirap i as bilong dispela pasin elda i mekim long sista.—Lukim 1 Korin 7:1.
15. Wanem samting i bin kamap na yumi ken save, sapos elda i no bosim gut skin, dispela inap bagarapim tru nem bilong Jehova?
15 Sampela elda i bin bagarapim tru nem bilong lain bilong Jehova, long wanem, ol i no bosim gut skin taim ol i wok long helpim ol sista! Sampela yia bipo, ol i bin rausim wanpela elda long kongrigesen, long wanem, em i pamuk wantaim wanpela sista Kristen, em man bilong em i no Witnes. Man bilong dispela sista i belhat nogut tru long dispela samting, na taim ol i tokaut long kongrigesen olsem ol i bin rausim dispela elda, long dispela apinun stret, wantu tasol dispela man i wokabaut strong i kam insait long Haus Kingdom na sutim long gan dispela brata na sista i gat asua. Em i no kilim tupela i dai, na kwiktaim ol brata i holim em na kisim dispela gan, tasol long de bihain wanpela bikpela niuspepa bilong dispela hap i stori long dispela samting long namba wan pes. Dispela elda i no bosim gut skin na em i bagarapim tru nem bilong kongrigesen na nem bilong Jehova!
Ol Narapela Taim Ol i Mas Bosim Skin
16. Taim elda i mekim pablik-tok, bilong wanem em i mas bosim gut skin?
16 Taim elda i mekim pablik-tok, em i mas bosim gut skin. Brata i mekim pablik-tok em i mas sanap gut na mekim tok na em i no ken pret na guria. Tasol sampela i save mekim kain kain tok pilai bilong kirapim ol man long lap lap. Ating ol i laik amamasim ol man i harim tok na ol i larim dispela laik i pulim ol long mekim dispela pasin. Long olgeta samting, sapos yumi larim laik bilong skin i pulim yumi long mekim, yumi no bosim gut skin. Na sapos brata i pulim tok na kalapim ol minit bilong en, ating yumi ken tok, em i no bosim gut skin, na tu em i no bin redim gut tok.
17, 18. Olsem wanem pasin bilong bosim gut skin inap helpim elda long skelim gut ol wok bilong em?
17 Olgeta elda i save wok strong ol i mas skelim gut ol wok bilong ol inap long taim na strong bilong ol. Nogut elda i lusim bikpela hap taim na strong long mekim wanpela wok na em i no gat taim o strong inap long mekim ol narapela wok bilong em. Olsem na ol elda i mas bosim gut skin. Sampela elda i tingting tumas long mekim ol wok bilong ol insait long kongrigesen, na ol i no tingim famili bilong ol. Wanpela sista i bin tokim meri bilong wanpela elda olsem dispela elda i bin kam lukim em na helpim em gut, na meri bilong elda i kirap na i tok: “Mi laik bai sampela taim em i kam lukim mi na helpim mi!”—1 Timoti 3:2, 4, 5.
18 Na elda i mas bosim gut skin bambai em i ken skelim stret hamas aua em i lusim long stadi na hamas aua em i lusim long autim tok o long i go lukim ol brata na strongim ol. Bel bilong yumi i save giaman tru, olsem na i no hatwok long elda i kirap lusim bikpela hap taim moa long mekim wok em i save amamas long mekim. Sapos em i save amamas long stadi, nogut em i lusim bikpela hap taim tumas long stadi. Sapos em i painim hatwok long mekim wok bilong autim tok, em i mas was gut, nogut em i laik haitim dispela na planti taim em i lusim dispela wok na tok em i gat wok long i go lukim sampela brata bilong strongim ol.
19. Ol elda i gat wanem wok na ol i mas bosim gut skin?
19 Ol elda i no ken tokim ol narapela man long ol samting i no samting bilong ol i mas save long en, olsem na ol i mas bosim gut skin. Wanpela tok bilong Baibel i stret long dispela samting, olsem: “Sapos yu bin harim tok hait . . . , yu no ken autim dispela tok.” (Sindaun 25:9) Dispela em i wanpela pasin ol elda i mas bihainim, tasol mipela i save pinis, planti elda i popaia long en. Sapos meri bilong elda i gat gutpela tingting na tupela i save pas gut wantaim na toktok gut wantaim, ating elda i save kamapim wanpela tok i no samting bilong meri i mas save long en, o em i stori long meri long kain samting olsem. Tasol i no stret elda i mekim olsem, na em i no bihainim savepasin. Long wanem, em i kamapim tok long samting bilong narapela man em dispela man i ting elda i no inap kamapim. Ol brata sista bilong spirit i save go kamapim hevi bilong ol long ol elda, long wanem, ol i bilip olsem ol elda i no ken tru kamapim dispela long narapela man. Sapos elda i tokim meri bilong em long samting i no gat wok long meri i save long en, em i mekim rong na em i no bihainim savepasin, na tu em i no bihainim pasin sori, long wanem, dispela i putim hevi nating long meri bilong em.—Sindaun 10:19; 11:13.
20. Bilong wanem i bikpela samting long ol elda i mas bosim gut skin?
20 Tru tumas, pasin bilong bosim gut skin em bikpela samting, na em bikpela samting moa long ol elda! Ol elda i kisim wok long i go pas long lain bilong Jehova, olsem na ol i gat bikpela wok moa. God i givim bikpela wok long ol, olsem na ol i mas lukautim gut na taim God i skelim pasin bilong ol manmeri, em bai i skelim gut tru wok bilong ol elda. (Luk 12:48; 16:10; lukim tu Jems 3:1.) Ol elda i kisim gutpela wok long makim gutpela pasin ol narapela i ken bihainim, na ol elda i mas i stap gutpela piksa olsem. Sapos ol elda i bosim gut skin, ol inap helpim tru ol narapela. Na sapos ol i no bosim gut skin, ol inap nogutim tru ol narapela. Olsem na i stret Pol i tok: “Wasman . . . i mas bosim gut laip bilong em yet.”
Yu Tingim?
◻ Baibel i kolim wanem ol pasin ol elda i mas bihainim na bilong mekim olsem ol i mas bosim gut skin?
◻ Taim ol elda i wok long helpim ol wanlotu bilong ol, bilong wanem ol i mas bosim gut skin?
◻ Olsem wanem ol elda i mas bosim gut skin long miting bilong ol?
◻ I gat wanem hatwok bilong ol elda long ol i no ken kamapim samting i no bilong ol narapela i save long en?
[Piksa long pes 20]
Taim ol elda yet i miting, ol i mas bosim gut skin
[Piksa long pes 23]
Ol elda Kristen i mas bosim gut skin na no ken kamapim samting i no bilong ol narapela i save long en