Bilong Kisim Prais, Bosim Gut Laik Bilong Bodi!
“Olgeta man i laik win long resis, ol i save daunim olgeta laik bilong bodi.” —1 Korin 9:25.
1. Olsem tok bilong Efesus 4:22-24 i makim, planti manmeri i bin tok yes long Jehova na mekim wanem?
SAPOS yu bin baptais olsem wanpela Witnes Bilong Jehova, yu bin tokaut long ai bilong ol man olsem yu laik insait long wanpela resis em prais bilong en em laip oltaim. Yu bin tok yes long bihainim laik bilong Jehova. Paslain long yumi dediket long Jehova, planti bilong yumi i bin mekim sampela bikpela senis bambai God i ken orait long dispela dediket. Yumi bin bihainim dispela tok aposel Pol i givim long ol Kristen: “Bipo yupela tu i bin wokabaut long pasin bilong olpela man . . . Tasol nau yupela i mas rausim dispela olpela pasin . . . Yupela i mas kamap ol nupela manmeri, em ol manmeri God i mekim ol i kamap nupela na . . . pasin bilong ol i stretpela olgeta na i holi tru.” (Efesus 4:22-24) Olsem na bilong dediket long God, pastaim yumi bin kirap sakim ol pasin nogut yumi bin wokabaut long en.
2, 3. Olsem wanem 1 Korin 6:9-12 i kamapim klia olsem i gat tupela kain senis man i mas mekim bambai God i ken orait long em?
2 Sampela pasin bilong olpela bel em ol manmeri i laik kamap Witnes Bilong Jehova i mas lusim, em ol samting Baibel i tokaut stret long en olsem i tambu. Pol i kolim sampela long pas em i raitim long ol Korin. Em i tok: “Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, na ol stilman, na ol man i save mangal long ol samting bilong ol arapela man, na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God.” Orait nau em i kamapim klia olsem ol Kristen long taim bilong em i bin senisim pasin bilong ol. Em i tok: “Bipo sampela bilong yupela i stap kain man olsem.” Tingim, bipo ol i kain man olsem, nau nogat.—1 Korin 6:9-11.
3 Orait nau Pol i stori long narapela kain senis: ‘Olgeta samting i orait long yumi mekim, tasol i no olgeta samting i save helpim yumi long i stap gut.’ (1 Korin 6:12) Olsem na planti man long nau husat i laik kamap Witnes Bilong Jehova ol i lukim olsem ol i gat wok tu long tok nogat long ol samting em, maski i orait long ol i mekim, i no inap helpim ol liklik. Ating em ol samting bilong pulim nating taim bilong ol na inap pulim ol long lusim wok bilong mekim ol samting i bikpela samting tru.
4. Ol Kristen i dediket pinis ol i wanbel long wanem tok bilong Pol?
4 Dediket yumi mekim long God em samting yumi amamas long mekim—em i no samting yumi bel hevi long mekim olsem yumi mas lusim planti samting yumi yet i laik mekim, nogat. Ol Kristen i dediket pinis ol i wanbel long dispela tok em Pol i mekim bihain long taim em i kamap disaipel bilong Krais: “Olgeta gutpela samting bilong dispela graun ol i olsem pipia nating. Mi laik bihainim Krais tasol, na mi lusim pinis olgeta arapela samting, bai mi ken holimpas Krais.” (Filipai 3:8) Pol i amamas long tok nogat long ol samting i no inap helpim em tumas bambai em i ken tok yes long mekim wok bilong God.
5. Pol i bin winim wanem kain resis? Olsem wanem yumi yet inap mekim olsem?
5 Pol i bosim gut laik bilong bodi taim em i ran long resis bilong spirit na em inap tok: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God. Nau prais bilong man i winim resis em i redi na i wetim mi i stap. Dispela prais em i olsem. Bikpela bai i kolim mi stretpela man. Bikpela i save bihainim pasin i stret tasol na skelim pasin bilong ol manmeri, na long De bilong bikpela kot bilong em, em bai i givim dispela prais long mi. Na em bai i no givim long mi wanpela tasol. Nogat. Em bai i givim long olgeta man i laikim tumas long lukim em na i wetim em i kamap ples klia.” (2 Timoti 4:7, 8) Olsem wanem? Bihain bai yumi tu inap mekim wankain tok? Bai yumi inap mekim olsem sapos yumi holimpas bilip na bosim gut laik bilong bodi taim yumi ran strong long resis Kristen i go inap long pinis bilong en.
Bosim Skin Bilong Mekim Gutpela Pasin
6. Pasin bilong bosim gut laik bilong bodi i makim wanem samting? Yumi mas kamapim dispela pasin long wanem tupela kain samting?
6 Long Baibel, tok Hibru na tok Grik ol i tanim olsem “bosim gut laik bilong bodi” i makim olsem man i gat strong long bosim em yet. Planti taim ol dispela tok i makim pasin bilong man long pasim em yet long mekim pasin nogut. Tasol yumi mas i gat pasin bilong bosim laik bilong bodi bambai yumi ken mekim ol gutpela wok tu. Skin bilong yumi ol sinman i save pulim yumi long mekim rong, olsem na yumi gat tupela kain pait. (Saveman 7:29; 8:11) Yumi mas sakim pasin bilong mekim rong, na tu, yumi mas subim yumi yet na bai yumi inap mekim gutpela wok. Pasin bilong bosim skin bambai yumi inap mekim gutpela wok, dispela em i wanpela gutpela rot tru bilong abrusim pasin bilong mekim rong.
7. (a) Yumi mas beten long wanem samting olsem Devit i bin mekim? (b) Pasin bilong tingim tingim wanem samting bai helpim yumi long bosim gut moa yet laik bilong bodi?
7 Olsem na yumi mas bosim gut laik bilong bodi bambai yumi inap truim dediket yumi bin mekim long God. Yumi mas beten olsem Devit i bin beten: “God, yu ken wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Song 51:10) Tingim tingim olsem wanem pasin bilong abrusim ol pasin nogut na ol samting bilong bagarapim yumi long skin em inap helpim yumi. Tingim ol hevi inap kamap sapos yumi no abrusim, olsem: bikpela sik, yumi no stap wanbel moa wantaim narapela, na dai tu. Na tingim ol planti gutpela samting bilong helpim yumi sapos yumi bihainim rot Jehova i makim. Tasol yumi no ken lusim tingting olsem bel bilong yumi inap giamanim yumi. (Jeremaia 17:9) Yumi mas strong long sakim tingting bilong bel i laik giamanim yumi long ting olsem pasin bilong bihainim ol lo bilong Jehova i no bikpela samting.
8. Planti bilong yumi i save pinis long wanem samting? Stori long dispela.
8 Planti bilong yumi i save pinis olsem taim bodi i no laik mekim wanpela samting, dispela inap daunim laik bilong bel long mekim dispela samting. Tingim wok bilong autim tok bilong Kingdom. Jehova i save amamas long ol man i givim bel long mekim dispela wok, em wok bilong helpim man long kisim laip. (Song 110:3; Matyu 24:14) Planti bilong yumi i bin hatwok long lain long mekim wok bilong autim tok. Bilong mekim dispela wok, yumi bin bosim gut bodi, olsem “paitim tru” bodi na “mekim em i bihainim laik” bilong yumi—na ating yumi mas mekim yet dispela samting. Yumi no bin larim bodi i bosim yumi na yumi no autim tok, nogat.—1 Korin 9:16, 27; 1 Tesalonaika 2:2.
“Olgeta Laik”
9, 10. Taim Baibel i tok yumi mas “daunim olgeta laik bilong bodi,” dispela inap makim wanem samting?
9 Taim Baibel i tok yumi mas “daunim olgeta laik bilong bodi,” dispela i makim olsem yumi mas sakim pasin bilong pamuk na belhat samting, tasol i no dispela samting tasol. Ating yumi pilim olsem yumi daunim pinis ol dispela laik nogut, na sapos olsem, yumi ken amamas. Tasol olsem wanem long ol narapela samting we i gat wok long bosim gut laik bilong bodi tasol dispela i no stap long ples klia? Olsem: Sapos wanpela man i sindaun long wanpela kantri i gat planti mani, em savepasin sapos em i lain long tok nogat long pasin bilong baim nating nating ol samting. Ol papamama i mas skulim ol pikinini bilong ol olsem ol i no ken baim olgeta samting ol i lukim long wanem ol i laikim tasol o ol i gat mani long baim. Tasol bilong dispela skul i ken kamapim gutpela wok, papamama yet i mas i stap gutpela piksa.—Luk 10:38-42.
10 Pasin bilong lain long tok nogat long sampela samting yumi laik kisim, dispela inap strongim pasin bilong yumi long bosim gut laik bilong bodi. Na em inap helpim yumi long amamas long ol samting bilong skin yumi holim pinis na pilim hevi bilong ol narapela i no gat planti samting, long wanem, maski ol i laik kisim, ol i no gat mani long baim. Tru, pasin bilong holim liklik samting tasol i narapela kain long tingting bilong planti man long nau ol i save tok olsem “mekim gut long yu yet” o “kisim ol samting i nambawan tru.” Ol bisnis i save putim ol tok na piksa long nius na televisen bilong grisim ol man long kisim kwik olgeta samting ol i laikim, tasol ol i mekim olsem bilong kisim winmani tasol. Dispela inap daunim ol wok yumi mekim bilong bosim gut skin. I no longtaim i go pinis wanpela nius bilong wanpela kantri long Yurop i gat planti mani em i tok: ‘Sapos i hatwok long man i stap rabis long daunim laik bilong baim planti samting, bai i hatwok moa long man i gat planti mani long daunim dispela laik!’
11. Bilong wanem i gutpela sapos yumi lain long tok nogat long sampela samting yumi laik kisim? Tasol wanem samting i mekim na dispela i hatwok?
11 Sapos yumi hatwok long skelim wanem samting yumi gat laik long kisim na wanem samting yumi mas kisim, ating i gutpela sapos yumi mekim sampela samting na bai yumi no baim nating nating. Olsem: Sapos yumi laik lusim dispela pasin bilong baim nating tasol, ating yumi ken pasim tok long bel olsem yumi no ken baim ol samting long kredit, o taim yumi laik go long stua, putim mak stret long hamas mani yumi laik kisim i go wantaim yumi. Tingim tok bilong Pol, em i tok sapos yumi givim bel long God, bai “yumi amamas long ol samting God i save givim yumi.” Na em i tok moa: “Taim mama i karim yumi na yumi kamap long graun, yumi no bin karim wanpela samting i kam. Na taim yumi lusim graun yumi bai i no inap karim wanpela samting i go. Tasol sapos yumi gat kaikai na laplap samting, orait yumi ken tok, ‘Em inap long mi.’ ” (1 Timoti 6:6-8) Olsem wanem? Yumi inap mekim wankain tok? Bilong lusim pasin bilong bungim bungim planti samting bilong skin, yumi mas tingting strong na bosim gut laik bilong bodi. Em bai gutpela sapos yumi lain long mekim olsem.
12, 13. (a) Olsem wanem pasin bilong bosim laik bilong bodi i insait long wok bilong ol miting Kristen? (b) Yumi mas lain long bosim laik bilong bodi long wanem sampela samting moa?
12 Na tu, taim yumi stap long ol miting na kibung Kristen yumi mas i gat pasin bilong bosim gut skin. Yumi mas i gat dispela pasin bambai tingting bilong yumi i no ken wokabaut long taim bilong program. (Sindaun 1:5) Yumi mas bosim gut skin bambai yumi inap putim gut yau long tok bilong man bilong mekim tok na abrusim pasin bilong toktok wantaim narapela i sindaun klostu long yumi na pulim tingting bilong ol narapela. Na yumi mas bosim gut skin na bai yumi inap stretim sediul na kamap long miting long taim stret. Na tu, yumi mas bosim gut skin bambai yumi inap makim taim bilong redim ol miting na bekim sampela tok.
13 Pasin bilong bosim gut laik bilong bodi long ol liklik samting i save strongim yumi long mekim olsem long ol bikpela samting. (Luk 16:10) Olsem na i gutpela sapos yumi bosim skin na ritim Tok Bilong God na ol buk bilong Baibel long olgeta taim, na stadi long ol na tingim tingim ol samting yumi lainim! Na i gutpela yumi bosim skin na tok nogat long kisim wok mani na ol pren na ol tingting na ol pasin i no stret, na tok nogat long ol samting em inap mekim na yumi no gat taim long mekim wok bilong God! Sapos yumi wok strong long mekim planti wok bilong Jehova, dispela bai lukautim yumi na yumi no mekim ol samting em inap pulim yumi long lusim paradais bilong spirit em lain bilong Jehova long olgeta hap i insait long en.
Kamap Strong Long Rot Bilong Bosim Laik Bilong Bodi
14. (a) Olsem wanem ol pikinini i ken lain long bosim skin? (b) Wanem ol gutpela samting inap kamap taim ol pikinini i lain long bosim skin taim ol i liklik yet?
14 Nupela pikinini i no gat pasin bilong bosim laik bilong bodi. Wanpela nius bilong ol man i gat save long pasin bilong ol pikinini, em i tok: “Pasin bilong bosim gut skin i no save kamap nating o wantu tasol. Ol liklik pikinini i mas i gat papamama bilong stiaim na sapotim ol na bai wok bilong lain long bosim skin i ken kirap. . . . Papamama i ken stiaim dispela wok, na taim pikinini i stap long skul, dispela pasin bilong bosim skin bai kamap strong moa.” Wanpela lain i bin skelim ol pikinini i gat 4-pela krismas ol i kamapim ripot i tok olsem, taim ol pikinini husat i bin lain long bosim gut skin i kamap bikpela, ol “i save stap gutpela, na ol narapela i laikim na bilip long ol, na ol i no save pret.” Ol pikinini husat i no bin kirap long kisim dispela pasin, “ol i save pilim olsem ol i stap wanpis, ol i save bel hevi hariap, na ol i bikhet. Ol i save hatwok long karim ol hevi, na ol i save abrusim ol samting i gat hatwok long en.” Olsem na bilong kamap gutpela man o meri, pikinini i mas lain long bosim gut skin.
15. Sapos man i no gat pasin bilong bosim gut skin, dispela inap makim wanem samting? Dispela i narapela kain long wanem mak em Baibel i tok yumi mas winim?
15 Na olsem tasol, bilong yumi ken kamap Kristen i bikpela pinis, yumi mas lain long bosim gut laik bilong bodi. Sapos yumi no gat dispela pasin, dispela i makim olsem yumi stap liklik pikinini yet long ol samting bilong spirit. Baibel i tok “tingting bilong yupela i mas i stap olsem tingting bilong ol bikpela man.” (1 Korin 14:20) Yumi laik winim mak bilong kamap ‘wanbel tru long bilip, na save tru long Pikinini Bilong God, na kamap strong na kisim ol wankain gutpela pasin olsem Krais yet.’ Bilong wanem? “[Bai yumi] no inap i stap moa olsem ol liklik pikinini, na ol dispela tok bilong ol grisman i save tumas long olgeta pasin bilong trik na giaman, em bai i no inap sakim yumi nabaut olsem win na si i save sakim kanu.” (Efesus 4:13, 14) Em nau, bilong kamap strong long ol samting bilong spirit yumi mas lain long bosim gut laik bilong bodi.
Kisim Pasin Bilong Bosim Skin
16. Jehova i save helpim yumi long wanem ol rot?
16 Bilong kisim pasin bilong bosim laik bilong bodi, God i mas helpim yumi, na i gat rot long kisim dispela helpim. Tok Bilong God i kain olsem glas bilong lukim pes, em i helpim yumi long save long ol pasin bilong yumi em yumi mas stretim, na i kamapim ol tok bilong helpim yumi long mekim olsem. (Jems 1:22-25) Na tu, gutpela lain brata bilong yumi, na ol elda Kristen, ol i redi na amamas long helpim yumi. Na Jehova bai givim holi spirit long yumi sapos yumi beten askim em. (Luk 11:13; Rom 8:26) Olsem na i gutpela sapos yumi mekim wok long ol dispela samting. Ating ol tok long pes 21 inap helpim yumi.
17. Sindaun 24:16 i strongim bel bilong yumi olsem wanem?
17 Jehova i save tingim tru ol wok yumi mekim bilong amamasim em! Yumi save long dispela samting na dispela i mas kirapim yumi long wok strong yet long bosim gut laik bilong bodi. Maski hamas taim yumi pundaun, yumi no ken les long kirap gen. “Maski sapos stretpela man i save pundaun planti taim, oltaim em bai i kirap gen.” (Sindaun 24:16) Long olgeta wan wan taim yumi kirap gen na mekim pasin Jehova i laikim, i gat as na yumi ken amamas long yumi yet. Na tu, yumi ken bilip olsem Jehova yet i amamas long yumi. Wanpela Witnes i tok olsem taim em i no dediket yet long Jehova, long olgeta wan wan wik taim em i no smok, em i save amamasim em yet na baim wanpela gutpela samting long dispela mani em i no bin tromoi long baim smok.
18. (a) Wanem samting i insait long dispela wok bilong bosim gut skin? (b) Jehova i givim wanem gutpela tok bilong strongim yumi?
18 Na bikpela samting tru yumi mas tingim i olsem: Bel na tingting bilong yumi i insait long pasin bilong bosim skin. Dispela samting i kamap klia long tok bilong Jisas: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:28; Jems 1:14, 15) Man i lain pinis long bosim gut bel na tingting, em bai isi moa long bosim olgeta hap bodi bilong em. Olsem na yumi mas strongim tingting, olsem yumi no ken mekim rong na no ken tingting long mekim rong. Sapos sampela tingting kranki i kamap, sakim kwiktaim. Yumi inap givim baksait long ol traim sapos yumi beten na lukluk i go long Jisas. (1 Timoti 6:11; 2 Timoti 2:22; Hibru 4:15, 16) Taim yumi wok strong long mekim olsem, yumi bihainim tok bilong Song 55:22: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”
Yu Inap Tingim?
• Long wanem tupela samting yumi mas bosim gut laik bilong bodi?
• Olsem wanem long dispela tok “daunim olgeta laik bilong bodi”?
• Wanem sampela samting yu lukim long dispela stadi yu ting i gutpela bilong helpim yumi long bosim gut laik bilong bodi?
• Pasin bilong bosim gut laik bilong bodi i save kirap we?
[Blok/Ol Piksa long pes 21]
Rot Bilong Strongim Pasin Bilong Bosim Laik Bilong Bodi
• Wok long kisim dispela pasin long ol liklik samting tu
• Tingim tingim olsem wanem dispela pasin inap helpim yu long nau na bihain
• Lusim ol pasin God i tambuim na kisim ol pasin God i laikim
• Kwiktaim sakim ol tingting nogut
• Larim ol gutpela tok bilong strongim yu i pulap long tingting bilong yu
• Kisim helpim em ol narapela strongpela Kristen inap givim long yu
• Abrusim ol samting em inap pulim yu long mekim rong
• Taim traim i kamap, beten askim God long helpim yu
[Ol Piksa long pes 18, 19]
Pasin bilong bosim skin i save kirapim yumi long mekim gutpela pasin