Kisim Save na Bosim Gut Laik Bilong Bodi
“Kisim save long God, na . . . bosim gut laik bilong bodi.”—2 PITA 1:5-8.
1. I hatwok tru long tok wanem na dispela i as bilong planti hevi?
LONG wanpela bikpela kempein bilong daunim pasin bilong kisim drak long Amerika, ol i tokim ol yangpela: “Tok nogat.” Tru tumas, ol samting bai i gutpela moa sapos olgeta manmeri i tok nogat long pasin bilong kisim drak, dring planti tumas, pasin pamuk, pasin giaman insait long wok bisnis, na ol “laik nogut bilong bodi”! (Rom 13:14) Tasol yumi olgeta i save, sampela taim i hatwok tru long tok nogat.
2. (a) I hatwok long tok nogat, tasol wanem ol stori long Baibel i soim olsem dispela i no nupela samting? (b) Ol dispela stori i mas kirapim yumi long mekim wanem?
2 Yumi olgeta man bilong graun i save hatwok long bosim gut laik bilong bodi, olsem na yumi mas i gat laik long save long rot bilong sakim ol laik nogut. Baibel i stori long sampela man husat i bin wok strong long mekim wok bilong God tasol sampela taim ol i hatwok long tok nogat. Tingim Devit na rong em i mekim long pamuk wantaim Batseba. Dispela i mekim na pikinini ol i bin kamapim long pasin pamuk, na man bilong Batseba—em tupela i no gat asua—ol i dai. (2 Samuel 11:1-27; 12:15-18) O tingim aposel Pol, em i tok: “Gutpela pasin mi laik mekim, em mi no save mekim. Na pasin nogut mi no laik mekim, em mi save mekim.” (Rom 7:19) Olsem wanem? Sampela taim yu tu i gat wankain hevi? Pol i tok moa: “Tru, long tingting bilong mi, mi laikim tumas lo bilong God. Tasol mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi. O sori, dispela hevi i bagarapim tru tingting bilong mi! Husat bai i helpim mi na mi lusim dispela bodi bilong i dai?” (Rom 7:22-24) Ol dispela stori bilong Baibel i mas strongim tingting bilong yumi olsem yumi no ken les long wok strong long bosim gut laik bilong bodi.
Bosim Laik Bilong Bodi —Pasin Yumi Mas Lain Long Kisim
3. Stori long olsem wanem yumi ken ting olsem i no isi long bosim gut laik bilong bodi.
3 Pasin bilong bosim laik bilong bodi—em pasin bilong tok nogat i insait long en—em wanpela pasin 2 Pita 1:5-7 i stori long en wantaim pasin bilong bilip, gutpela pasin, kisim save, sanap strong na karim hevi, wokabaut long pasin bilong God, pasin bilong i stap pren tru bilong ol arapela manmeri bilong God, na pasin bilong givim bel long ol arapela. Ol dispela narapela pasin i no stap taim mama i karim yumi. Em ol samting yumi mas lain long kisim. Bilong kamapim tru tru ol dispela gutpela pasin, yumi mas tingting strong na wok strong. Olsem na yumi ken ting olsem pasin bilong bosim gut laik bilong bodi em tu i no isi long kisim.
4. Wanem samting i soim olsem planti man i pilim olsem ol i no hatwok long bosim laik bilong bodi? Tasol dispela em wanpela mak bilong wanem samting?
4 Tru, planti man i pilim olsem ol i no hatwok long bosim laik bilong bodi. Ol samting ol i laik mekim, ol i mekim tasol. Ol i bihainim ol laik nogut bilong skin na ol i no tingim tumas wanem samting bai kamap long dispela—long ol yet o long ol narapela. (Jut 10) Long nau, winim olgeta taim bipo, ol man i no laik tok nogat. Dispela em wanpela mak i soim olsem yumi stap long “taim bilong las de” em Pol i bin stori long en taim em i tok profet: “Planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. . . . Ol bai i no bosim laik bilong bodi bilong ol.”—2 Timoti 3:1-3.
5. I gat wanem as na ol Witnes Bilong Jehova i gat laik long kisim save long pasin bilong bosim gut laik bilong bodi? Wanem gutpela tok i stret long nau tu?
5 Ol Witnes Bilong Jehova i save gut olsem i hatwok liklik long bosim laik bilong bodi. Olsem Pol, ol i save olsem laik bilong mekim ol samting God i laikim na bihainim ol lo bilong em, dispela i pait wantaim ol laik nogut bilong skin i kirapim ol long mekim rong. Olsem na longtaim pinis ol i gat laik long save long rot bilong winim dispela pait. Long 1916, nius Wastaua i stori “long rot yumi mas bihainim bilong bosim gut yumi yet—ol tingting na tok na pasin bilong yumi.” Wastaua i tok i gutpela long tingim Filipai 4:8. Gutpela tok bilong dispela skripsa i stret yet, maski ol i bin raitim 2,000 yia i go pinis na ating i hatwok moa long bihainim long nau, winim dispela taim ol i raitim Buk Filipai o long yia 1916 taim ol i raitim dispela Wastaua. Tasol maski i hatwok liklik, ol Kristen i save wok strong long tok nogat long ol laik nogut bilong graun—ol i save olsem taim ol i tok nogat, i olsem ol i tok yes long Man bilong wokim ol.
6. I gat wanem as na yumi no ken les taim yumi wok long kisim pasin bilong bosim laik bilong bodi?
6 Galesia 5:22, 23 i tok, pasin bilong daunim laik bilong olpela bel, olsem bosim laik bilong bodi, em wanpela pasin ‘holi spirit’ i kamapim. Sapos yumi kamapim dispela pasin wantaim pasin bilong ‘laikim tru ol arapela, amamas, stap bel isi, no ken belhat kwik, helpim ol man, mekim gutpela pasin long ol, wokabaut stret oltaim, stap isi,’ dispela bai helpim gut yumi. Taim yumi mekim olsem, orait olsem Pita i tok, bai yumi no “stap nating”—bai yumi mekim wok bilong God na “karim planti kaikai.” (2 Pita 1:8) Tasol yumi no ken les o kotim yumi yet sapos yumi no kamapim hariap ol dispela pasin o mekim gut tru olsem yumi yet i laikim. Ating long skul yu bin lukim olsem wanpela sumatin i save lain hariap, winim narapela. O long ples wok wanpela i lainim wanpela nupela wok hariap, winim ol narapela wanwok. Na olsem tasol, sampela i lain hariap long kamapim ol pasin Kristen, winim ol narapela. Bikpela samting i olsem: Yumi mas wok inap tru long skel bilong yumi long kisim ol pasin God i laikim. Yumi ken mekim olsem long rot bilong kisim olgeta helpim Jehova i save givim long rot bilong Baibel na kongrigesen. Strongpela tingting long wok yet long kisim ol pasin Kristen, dispela i winim pasin bilong winim mak hariap.
7. Wanem samting i soim olsem pasin bilong bosim skin i bikpela samting?
7 Maski pasin bilong bosim laik bilong bodi i laspela long lista bilong ol pasin holi spirit i kamapim, dispela i no makim olsem em i no bikpela samting olsem ol narapela pasin long dispela lista, nogat. Tingim: Sapos yumi inap bosim olgeta laik bilong bodi, orait yumi inap sakim olgeta “pasin bilong olpela bel.” Tasol sin i wok long pulim yumi long mekim “pasin bilong olpela bel . . . , pasin pamuk na pasin doti na pasin bilong bel i kirap long mekim ol pasin nogut, na pasin bilong lotu long ol giaman god na pasin bilong mekim olkain posin na pasin birua na belhat na kros na bel nogut na mangal na pasin bilong ting long yu yet tasol na tok pait na brukim lain.” (Galesia 5:19, 20) Olsem na oltaim yumi mas wok strong long rausim ol laik nogut long bel na tingting.
Sampela i Hatwok Tru
8. Wanem sampela samting i mekim na sampela i hatwok tru long bosim laik bilong bodi?
8 Sampela Kristen i hatwok tru, winim ol narapela, long bosim laik bilong bodi. Bilong wanem i olsem? Ating pasin papamama i bin mekim long skulim ol o sampela samting i bin painim ol bipo, dispela i as bilong dispela samting. Sapos yumi yet i no bin hatwok long kisim na kamapim dispela pasin, orait yumi ken amamas long dispela. Tasol yumi mas isi long ol man i gat hatwok long bosim laik bilong bodi, maski samting ol i mekim i givim hevi long yumi. Yumi yet i no gutpela olgeta, olsem na i no gat as na yumi ken mekim pasin olsem yumi yet i stretpela man.—Rom 3:23; Efesus 4:2.
9. Sampela i gat wanem kain pasin kranki? Wanem taim ol dispela pasin kranki bai pinis olgeta?
9 Olsem: Ating yumi save olsem sampela wanlain Kristen i bin lusim pasin bilong smok o kisim drak, sampela taim ol i gat strongpela laik yet long kisim. O sampela i hatwok long lusim pasin bilong kisim planti kaikai o strongpela dring. Sampela i hatwok long bosim gut maus, olsem na planti taim ol i popaia na mekim sampela tok i no stret. Bilong lusim ol kain pasin olsem, ol i mas wok strong long kisim pasin bilong bosim gut laik bilong bodi. Bilong wanem ol i mas wok strong olsem? Jems 3:2 i tok: “Planti taim yumi save tingting long mekim wanpela samting, na yumi save popaia. Dispela kain samting i save kamap long yumi olgeta. Na sapos i gat wanpela man i stap, em i no save mekim sampela tok i no stret, orait em i gutpela man tru, na em bai inap long bosim gut olgeta hap bilong bodi bilong en.” Sampela i gat strongpela laik long pilai laki. O ol i hatwok long daunim pasin bilong belhat. Ating bikpela hap taim liklik i mas lus bambai ol inap lusim ol dispela pasin kranki o kain pasin olsem. Tru, yumi inap mekim bikpela wok nau long lusim ol laik nogut, tasol bilong lusim tru tru, yumi mas wet inap long taim yumi kamap gutpela olgeta. Inap long dispela taim i kamap, sapos yumi wok strong long bosim gut laik bilong bodi, dispela bai helpim yumi long abrusim pasin bilong kirap gen long mekim pasin nogut. Taim dispela pait i stap yet, yumi mas strongim ol narapela long ol i no ken givap.—Aposel 14:21, 22.
10. (a) Olsem wanem na sampela i hatwok long bosim laik bilong bodi long ol samting bilong maritpasin? (b) Wanpela brata i bin mekim wanem bikpela senis? (Lukim blok long pes 16.)
10 Narapela samting em sampela i hatwok long bosim, em ol samting bilong maritpasin. God Jehova i wokim yumi na bai yumi gat laik long mekim maritpasin. Tasol sampela i hatwok long bosim gut dispela laik na bai i stret wantaim ol lo bilong God. Sampela i hatwok tru, long wanem, ol i gat strongpela laik tru long mekim maritpasin. Yumi stap long dispela graun i gat kain kain pasin i kirapim bel long mekim maritpasin. Dispela inap givim hatwok long ol Kristen husat i gat laik long stap singel—inap sampela hap taim—bambai ol i ken mekim wok bilong God na i no gat ol samting bilong marit i pulim nabaut tingting bilong ol. (1 Korin 7:32, 33, 37, 38) Tasol sampela ol i tingting long marit, long wanem, ol i tingim dispela tok bilong Baibel: “Mobeta ol i marit. Nogut bel bilong ol i skrap long mekim pasin pamuk.” Tasol ol i gat strongpela tingting long maritim “man i bilip long Bikpela,” olsem Baibel i tok. (1 Korin 7:9, 39) Yumi ken bilip olsem Jehova i amamas tru long ol i gat laik long bihainim ol stretpela lo bilong em. Na ol wanlain Kristen i amamas long ol inap bung wantaim kain man olsem em ol i lotu tru long God na bihainim ol stretpela lo bilong em.
11. Olsem wanem yumi ken helpim wanpela brata o sista i gat laik long marit tasol em i no bin painim poroman?
11 Olsem wanem sapos yu no inap painim gutpela poroman bilong maritim? Ating man inap bel hevi sapos em i gat laik long marit tasol em i no bin painim poroman! Ating em i lukim ol pren bilong em i marit na kisim amamas, tasol em i wok yet long painim gutpela poroman. Long sampela i gat dispela hevi, pasin bilong pilai long sem bilong ol inap kamap wanpela pasin i hatwok long lusim. Olsem na ol Kristen i mas tingting gut, nogut ol i mekim sampela tok na man i pait strong long stap klin em i bel hevi. Yumi inap bagarapim bel bilong narapela sapos yumi mekim kain tok olsem, “Wanem taim bai yu marit?” Ating yumi no gat tingting nogut taim yumi mekim dispela tok, tasol mobeta yumi bosim gut maus! (Song 39:1) Yumi mas mekim gutpela tok amamas long ol brata sista namel long yumi em ol i stap stret taim ol i stap singel. Yumi no ken mekim sampela tok i daunim bel bilong ol; yumi mas wok long strongim ol. Olsem: Taim yumi singautim sampela strongpela Kristen i kam bung na kaikai wantaim, yumi ken singautim ol singel tu.
Bosim Laik Bilong Bodi Insait Long Marit
12. Wanem samting inap mekim na ol marit tu i mas bosim laik bilong bodi?
12 Taim yu marit, dispela samting yet i no mekim na yu no gat wok long bosim laik bilong bodi long ol samting bilong maritpasin, nogat. Olsem: Long sampela man na meri marit, laik bilong tupela long ol samting bilong maritpasin i no wankain tumas. O ating wanpela i gat sik na sampela taim i hatwok long mekim maritpasin o ol i no inap. O ating sampela samting i bin painim wanpela long bipo na em i hatwok long bihainim dispela tok: “Bodi bilong man i bilong meri bilong en, na man i no ken pasim. Olsem tasol, bodi bilong meri i bilong man bilong en, na meri tu i no ken pasim.” Long kain taim olsem, poroman bilong em i mas bosim gut moa laik bilong bodi. Tasol tupela wantaim i ken tingim dispela gutpela tok Pol i givim long ol Kristen marit: “Sapos yutupela i marit, orait wanpela i no ken givim baksait long arapela na pasim bodi bilong en. Tru, sapos yutupela i wanbel na i laik tambuim bodi long sotpela taim, bai yutupela i ken mekim wok bilong prea, orait dispela pasin em i orait. Tasol bihain yutupela i mas bungim bodi gen. Nogut yupela i no inap bosim laik bilong bodi bilong yupela yet, na Satan i traim yupela.”—1 Korin 7:3, 5.
13. Yumi ken mekim wanem bilong helpim ol narapela i gat hatwok long bosim laik bilong bodi?
13 Sapos tupela marit i bin lain long bosim laik bilong bodi long ol samting bilong maritpasin, orait tupela i ken amamas. Tasol ol i mas pilim hevi bilong ol wanlotu em ol i gat hatwok long bosim laik bilong bodi long dispela samting. Yumi no ken lusim tingting long beten askim Jehova long givim ol brata spirit bilong yumi gutpela tingting, strongpela bel, na strongpela tingting long wok yet long bosim bodi na lusim ol laik nogut bilong skin.—Filipai 4:6, 7.
Wok Yet Long Helpim Ol Narapela
14. Bilong wanem yumi mas pilim tru hevi bilong ol wanbilip Kristen na sori long ol?
14 Sampela taim ating i hatwok long pilim tru hevi bilong ol wanbilip Kristen em ol i hatwok long bosim gut skin long samting yumi no gat hatwok long en. Tasol pasin bilong yumi ol man i narapela narapela kain. Tingting bilong bel i save bosim sampela, tasol sampela nogat. Sampela i no hatwok tumas long bosim gut laik bilong bodi, tasol sampela i hatwok liklik. Tasol tingim, Kristen i hatwok long bosim laik bilong bodi em i no wanpela man nogut. Yumi mas pilim hevi bilong ol wanbilip Kristen na sori long ol. Yumi ken amamas taim yumi wok yet long marimari long ol narapela i wok strong long bosim laik bilong bodi. Tok bilong Jisas long Matyu 5:7 i kamapim klia dispela samting.
15. Bilong wanem tok bilong Song 130:3 inap mekim gut bel bilong yumi long samting bilong bosim laik bilong bodi?
15 Yumi no ken kisim tingting kranki long wanpela wanbilip Kristen em sampela taim em i no kamapim pasin Kristen. Tru, taim yumi pundaun long bosim skin, Jehova i save lukim, tasol yumi ken amamas long save olsem em i lukim tu olsem planti taim yumi no pundaun, maski ol wanlotu Kristen i no lukim. Tok bilong Song 130:3 inap mekim gut bel bilong yumi, em i tok: “Sapos yu kaunim olgeta sin bilong mipela bai husat inap long winim kot bilong yu?”
16, 17. (a) Olsem wanem yumi inap bihainim tok bilong Galesia 6:2, 5 long ol samting bilong bosim laik bilong bodi? (b) Bihain bai yumi stori long wanem ol samting bilong pasin bilong bosim laik bilong bodi?
16 Bilong mekim pasin Jehova i laikim, yumi wan wan i mas bosim gut laik bilong bodi, tasol yumi ken bilip olsem ol brata Kristen bai helpim yumi. Tru, yumi wan wan i mas karim hevi bilong pasin yumi yet i mekim, tasol yumi mas helpim tu ol narapela long karim hevi bilong ol. (Galesia 6:2, 5) Yumi ken tenkyu tru long narapela—papa, mama, poroman marit, o pren—i pasim yumi long go long ol hap yumi no ken i go long en, o long lukim ol samting yumi no ken lukim, o long mekim ol samting yumi no ken mekim. Long dispela rot em i helpim yumi long bosim gut laik bilong bodi. Taim em i mekim olsem, em i helpim yumi long tok nogat na bihainim tru tru dispela tok!
17 Ating planti Kristen i bihainim pinis ol dispela tok yumi bin mekim long pasin bilong bosim laik bilong bodi, tasol ating ol i pilim olsem ol i mas mekim gut moa yet. Ol i laik mekim moa yet inap long mak ol i ting i stret long man i no gutpela olgeta i ken mekim. Olsem wanem? Yu tu i pilim olsem? Sapos olsem, orait yu ken mekim wanem na bai yu inap mekim moa yet dispela pasin em spirit bilong God i kamapim? Na taim yu mekim olsem, olsem wanem dispela inap helpim yu long winim sampela mak Kristen moa? Stori i kamap bihain long dispela bai toktok long dispela.
Yu Inap Tingim?
Pasin Bilong Bosim Laik Bilong Bodi, Bilong Wanem . . .
• i bikpela samting long ol Kristen i mas kisim?
• sampela i hatwok long kisim?
• i mas i stap insait long marit?
• em wanpela pasin yumi ken helpim ol narapela long kisim?
[Blok/Piksa long pes 16]
Em i Lain Long Tok Nogat
Wanpela Witnes Bilong Jehova long Jemani i bin mekim wok olsem teknisen. Em i lukautim 30 program bilong televisen na redio. Taim wanpela samting i no wok stret, em i mas lukim program bambai em i ken stretim. Em i tok: “I olsem ol dispela samting i save kamap long taim ol man i pait o mekim maritpasin. Ol dispela piksa mi lukim i save stap long tingting bilong mi inap planti de, na planti wik tu. I olsem ol i pas pinis long tingting bilong mi na mi no inap rausim.” Em i tok dispela i bin nogutim em long ol samting bilong spirit: “Mi man bilong kirap kwik na mekim ol samting, olsem na taim mi lukim program i kamapim ol piksa bilong pait, dispela i mekim na mi hatwok long bosim bel. Pasin pamuk mi lukim i kamapim hevi namel long mi na poroman marit. Olgeta de mi mas hatwok long sakim ol dispela samting nogut. Bilong mi no ken pundaun, mi tingting long painim nupela wok mani, maski mi no kisim bikpela pe long en. I no longtaim i go pinis mi painim pinis nupela wok. Laik bilong mi i kamap tru.”
[Ol Piksa long pes 15]
Save yumi kisim long stadi long Baibel i helpim yumi long bosim gut laik bilong bodi