Milion Milion Ol i Redi Bambai Ol Inap i Stap Oltaim Long Graun
1. (a) I stret bikpela lain manmeri long nau ol i mas tingim wanem tok Jisas i givim long Mata bilong Betani? (b) Ol dispela milion milion manmeri i amamas Long wanem hap bilong dispela ol i amamas long en?
BIKPELA lain manmeri nau ol i stap laip i mas tingim ol tok Krais Jisas i givim long Mata bilong Betani. Jisas i tok: “Kirap bek, em mi yet. Na laip, em mi yet. Man i bilip long mi, sapos em i dai, em bai i stap laip. Na olgeta man i stap laip na i bilip long mi, bai ol i no i dai. Bai ol i stap laip oltaim oltaim.” (Jon 11:25, 26) Ol milion milion manmeri long nau ol i laik kisim laip i stap oltaim long stretpela pasin, ol i amamas long dispela hap tok olsem: “Olgeta man i stap laip na i bilip long mi, bai ol i no i dai. Nogat. Bai ol i stap laip oltaim oltaim.” Ol i amamas long dispela hap tok, long wanem ol i save, dispela tok i makim ol manmeri nau ol i stap laip.
2. (a) Taim Jisas i stap yet long graun, em i kamap olsem “kirap bek” long husat? (b) Ol tok Jisas givim long Mata i makim wanem taim? Olsem wanem em i mas kamap olsem “laip” long planti milion manmeri ol i stap laip long dispela taim bihain?
2 Taim Jisas i stap long graun, em i “kirap bek” bilong Lasaras na ol narapela manmeri em i kirapim bek ol. Tasol tok em i mekim paslain em i kirapim bek Lasaras, dispela taim bipo. Nogat. Jisas i makim wanpela taim bihain bihain na long dispela taim bai em i kamap olsem “kirap bek“na “laip” bilong ol manmeri ol i bilong wok king wantaim em long Kingdom bilong heven: Na bai em i kamap olsem “kirap bek” na “laip” bilong ol manmeri i dai pinis. Bai ol i kirap bek na kisim laip long graun aninit long Kingdom. Na ol manmeri i Stap laip long graun long dispela taim, ol i no ken kirap bek long matmat, tasol Jisas i mas kamap olsem “laip” long ol. Olsem wanem? Long wanem ol i kalabus yet long sin na i dai, em ol i bin kisim long bikhetman Adam. Ol i bilong i dai, olsem na Jisas i mas helpim ol tu bambai ol i ken i stap laip.—Rom 5:12.
3. Planti manmeri nau ol i stap laip, ol i mekim wanem na Jisas i kamap olsem “laip” long ol? Ol i mekim wanem wok bilong kamapim dispela samting?
3 Ol manmeri nau ol i stap laip long graun na ol i bilip long King Krais Jisas, em i kamap olsem “laip” long ol. Na ol i mas mekim ol wok bilong kamapim bilip bilong ol. Wanpela wok ol i mas mekim nau long ‘taim bilong pinis’ em olsem: Ol i mas bihainim tok bilong Jisas long Matyu 24:14 na autim dispela gutpela tok bilong Kingdom na bihain bai “las de” i kamap. (Matyu 24:3; Mak 13:3, 4) Ol manmeri i bilip na mekim wok na ol i winim taim bilong pinis bilong dispela taim nogut, bai ol inap i stap oltaim long Paradais long graun. Ol i no ken i dai. (1 Jon 2:17) Bai ol i ‘kamap yangpela gen.’ Skin na tingting bilong ol bai kamap gutpela olgeta olsem bilong Adam long pastaim. I gat as tru na yumi ken bilip olsem milion milion manmeri nau ol i stap laip ol i no ken i dai, bai ol i stap oltaim oltaim long graun.
4. (a) Jisas i tok wanem na yumi ken bilip olsem ol manmeri inap i stap oltaim long graun? (b) Husat ol i no ken “lus,” na bai ol i go insait long nupela taim bihain?
4 Wanpela tok bilong Jisas i as bilong dispela samting yumi bilip na wet long en. Taim Jisas i stori long ol hevi i mas kamap long taim bilong pinis bilong dispela taim nau, em i tok: “Long dispela taim bai i gat bikpela hevi tru. Long taim graun i nupela yet inap nau, kain hevi olsem i no bin kamap bipo. Na bihain tu bai i no gat hevi olsem. Na sapos God i no bin sotim dispela taim, bai olgeta manmeri i lus. Tasol God i tingting long ol manmeri em i makim ol pinis. Olsem na bai em i sotim dispela taim.” (Matyu 24:21, 22) God bai sotim dispela taim bambai sampela manmeri ol i no ken lus, ol i ken kisim laip long nupela taim bihain. Sampela ol i olsem “ol manmeri [God] i makim ol pinis.” Bai ol i winim taim bilong “bikpela hevi tru” na i stap long graun na wet long kisim biknem wantaim Krais long Kingdom bilong heven. Tasol planti manmeri ol i no “lus,” ol i narapela lain. Dispela bikpela lain manmeri bai ol i winim taim bilong “bikpela hevi tru” na i stap long graun aninit long dispela King em bai stap Papa bilong ol oltaim oltaim.—Matyu 24:31; Mak 13:20, 22, 27; Revelesen 17:14; Aisaia 9:6, 7.
Was Gut long Dispela Wel Abus
5. God i no raitim nem bilong husat long “buk bilong laip”?
5 Nem bilong husat bai stap long “buk bilong laip,” em Revelesen 17:8 i stori long en? Nem bilong yu? Nem bilong mi? Dispela ves i givim toksave long yumi, olsem: “Yu lukim pinis dispela wel abus. Bipo em i stap, na nau em i no i stap. Tasol bihain bai em i lukim dispela hul i no gat as, na em i kam antap, na bai em i lus olgeta. Sampela man bilong graun, God i no raitim nem bilong ol long buk bilong laip . . . Ol dispela man bambai ol i lukim dispela wel abus, na bai ol i tingting planti. Long wanem bipo em i stap, na nau em i no i stap, na bihain bai em i kamap.”
6. (a) Wanem taim “wel abus” i go daun insait long hul i no gat as? Taim em i lusim hul, em i kamap olsem wanem samting? (b) Yumi mas was gut long wanem samting?
6 Pastaim dispela “wel abus” i makim Lig ov Nesen. Em i go insait long hul i no gat as long taim bilong Namba Tu Pait, long 1939-1945. 1 olsem em i dai, em i no wok moa. Bihain em i lukim hul i kam antap na i kamap Yunaitet Nesen. Dispela samting i bin kamap long 1945, em inap pasim man long kisim laip i stap oltaim long Paradais long graun. Dispela samting inap giamanim em na bai God i no inap raitim nem bilong em long “Buk bilong laip.” Olsem na yumi mas “i gat gutpela tingting” na yumi mas was gut long dispela “wel abus.”—Revelesen 17:9.
7. (a) Dispela retpela wel abus Revelesen sapta 17 i stori long en, Revelesen sapta 13 i makim dispela wel abus em wanem samting? (b) Olsem wanem dispela “piksa bilong wel abus” i kain olsem namba wan wel abus? Sevenpela het bilong en i makim wanem samting?
7 Dispela “retpela wel abus” bilong Revelesen sapta 17, em i piksa bilong namba wan “wel abus,” em Revelesen sapta 13 i stori long en. Revelesen 13 i makim dispela retpela wel abus olsem “piksa bilong wel abus.” (Revelesen 17:3; 13:14-18) Dispela “piksa bilong abus,” em tu i gat 7-pela het olsem nambawan wel abus. Dispela 7-pela het i makim 7-pela king.” Faipela king i bagarap pinis, em Bikpela gavman bilong Isip, Asiria, Babilon, Midia na Pesia, na bikpela gavman bilong ol Grik em Alexsanda i bin kamapim. Namba sikis “king” i stap long taim bilong aposel Jon, em bikpela gavman bilong Rom. Na namba seven king i mas kamap bihain long taim bilong Jon, Bikpela Gavman bilong Englan wantaim Amerika. Namba et king em dispela “wel abus,” em i piksa bilong namba wan “wel abus.” Dispela retpela wel abus i kamap pastaim olsem Lig ov Nesen.—Revelesen 17:9-14.
8. (a) Dispela “10-pela kom”bilong wel abus i makim wanem samting? (b) Dispela “10-pela kom” bai stap king wantaim wel abus inap longtaim o olsem wanem? Wanem samting bai painim ol manmeri ol i amamas long dispela wel abus?
8 Dispela “10-pela kom” i stap long 7-pela het bilong retpela wel abus, ol i makim “10-pela king” olsem olgeta gavman politik insait long Yunaitet Nesen. Ol dispela “king” i gat bikpela nem na namba long dispela graun, tasol em i bilong liklik taim tasol, inap olsem “wanpela aua tasol.” Ol i gat liklik hap taim moa tasol bilong amamas long dispela “Piksa bilong wel abus” em i kirap bek, na bilong helpim wok bilong en. God i no raitim nem bilong ol dispela man long “buk bilong laip.” Olsem na ol manmeri i laik i stap oltaim long dispela graun, ol i no lotuim dispela “piksa bilong wel abus” olsem ol dispela man i mekim.
9. Husat ol i laik pait nau? Husat bai winim pait?
9 Nau pait i laik kamap. Dispela “10-pela kom” ol i redi bilong kirapim pait. Revelesen 17:14 i tok: “Bai ol i pait wantaim Pikinini Sipsip, na bai Pikinini Sipsip em i winim ol tru. Em i Bikpela bilong olgeta bikpela man, na em i King bilong olgeta king. Na olgeta man i stap wantaim em, na i bihainim singaut bilong em, na em i bin makim ol bilong em yet, na ol i save bihainim tru tok bilong em, bai ol dispela man ol i win wantaim Pikinini Sipsip long dispela pait.” Dispela tok i makim olsem dispela “10-pela kom” bai kirapim pait long lain remnan, em ol i stap laip yet long graun. Tasol Pikinini Sipsip bai winim dispela “10-pela kom” na dispela “piksa bilong wel abus” bai em i “lus olgeta.” (Revelesen 17:8) O1 man i amamas long dispela wel abus na ol i helpim wok bilong en, ol tu bai lus olgeta. God i no ken raitim nem bilong ol long “buk bilong laip.”
10. Lain remnan ol i mas mekim wanem?
10 Lain remnan ol i liklik lain, tasol ol i no pret. Krais i “makim ol bilong em yet, na ol i save bihainim tru tok bilong em,” tasol ol i mas i stap gut long wok bilong ol i go inap long taim Krais i winim pinis dispela “piksa bilong wel abus” na dispela wel abus yet na olgeta manmeri ol i save lotu long en. Long dispela taim bai pasin bilong dispela graun i pinis! Tasol ol manmeri bilong graun ol i no ken pinis!
Bilong Wanem Yumi Tok “Planti Milion Manmeri Nau Ol i Stap Laip”?
11. Wanem samting i no as bilong dispela tok olsem “Planti milion manmeri nau ol i stap laip ol i no ken i dai”? Tasol i gat wanem as na yumi ken bilip olsem planti milion manmeri nau ol i stap laip ol i no ken i dai?
11 Planti manmeri i kirap nogut long dispela tok olsem “Planti milion manmeri nau ol i stap laip ol i no ken i dai.” Tasol dispela i no wanpela tingting bilong ol dispela man. Nogat. I no olsem ol i skelim hamas manmeri i stap nau long graun na ol i tok wanpela long olgeta wan tausen wan tausen bai kisim laip. Nogat. God Jehova, em i As bilong laip, em i no ken skelim dispela bikpela samting olsem! Em i no mekim olsem long taim bilong Bikpela Tait Wara long taim bilong Noa, na em i no ken mekim olsem long nau! Baibel yet i makim olsem “planti milion manmeri nau ol i stap laip” ol i no ken bagarap.
12. Long 1935 husat ol i redi long sanap wantaim dispela lain em God i bin makim ol? Ol i mekim wanem na ol i kamapim dispela samting?
12 Fopela yia paslain long taim Namba Tu Pait Bilong Olgeta Hap i kirap na “piksa bilong wel abus” i go daun insait long hul i no gat as, sampela manmeri moa ol i redi i stap na ol i laik insait long lain bilong Pikinini Sipsip na wok wantaim lain remnan. Long 1935, long wanpela kibung bilong ol Witnes Bilong Jehova long Wosington, long Amerika, ol dispela manmeri i kamapim tru bel bilong ol, ol i givim bel tru long dispela King i winim olgeta narapela king na ol i no laik helpim dispela “piksa bilong wel abus.” Ol i mekim wanem? Ol i kisim baptais long ai bilong ol man. Inap 840 ol i kisim baptais olsem mak bilong dediket bilong ol, ol i dediket long God Jehova. Ol i mekim dispela samting wanpela de bihain long taim ol i bin harim wanpela tok, nem bilong en: “Bikpela Lain Manmeri.” Dispela tok i kamapim as bilong ol tok bilong Revelesen 7:9-17. Taim rot i op ol i kirap kwik na insait long dispela ‘bikpela lain manmeri’ ol i wasim klos bilong ol long blut bilong Pikinini Sipsip, na bai ol i winim taim bilong “bikpela hevi tru.” Long rot bilong Krais, God i bringim dispela “bikpela hevi tru” i kam long “piksa bilong wel abus” na long olgeta manmeri i bihainim dispela samting na long “10-pela kom” bilong en.
13. (a) God bai sotim taim bilong “bikpela hevi tru” na dispela bai mekim wanem long lain remnan? (b) Sapos lain remnan i no ken bagarap long pinis bilong dispela taim nau, orait olsem wanem long ol manmeri bilong ‘bikpela lain’?
13 Jehova i tingim ol manmeri em i bin makim ol na bai em i sotim taim bilong dispela “bikpela hevi tru.” (Matyu 24:21, 22) Olsem na hap lain bilong ol i stap yet long graun, em lain remnan, bai ol i winim taim bilong “bikpela hevi tru,” na bai ol i lukim dispela narapela kain samting Jehova i mekim bilong stretim bek nem bilong em, em i king bilong heven na graun. (Aisaia 28:21) God i tingim ol na em i sotim taim bilong “bikpela hevi tru,” olsem na sampela “manmeri” ol i no ken lus. Sapos Jehova i lukautim ol dispela manmeri em i bin makim ol, olsem lain remnan, na ol i no bagarap, orait olsem tasol bai em i lukautim ol manmeri bilong ‘bikpela lain’ bambai ol i no ken bagarap long Amagedon, em “bikpela de bilong God I Gat Olgeta Strong.”—Revelesen 16:14-16.
14. Dispela ‘bikpela lain manmeri’ i bikpela olsem wanem? Skelim lain bilong ol wantaim lain bilong olgeta manmeri nau ol i stap long graun.
14 Long nau ol man i tok olgeta manmeri long olgeta hap bilong graun ol inap olsem 4.6 bilion manmeri. Bihain long 1935 C.E. lain bilong dispela ‘bikpela lain manmeri’ i mas i go bikpela na kamap olsem planti milion. Olsem wanem? Lain bilong ol i kamap bikpela olsem? Lain remnan ol inap olsem sampela tausen. Ol i liklik lain tru sapos yumi skelim wantaim ol tausen tausen witnes bilong Jehova long nau, em ol i baptais na ol i wok strong long autim ‘dispela gutpela tok bilong kingdom’ long olgeta hap bilong graun. (Matyu 24:14; Mak 13:10) Namba wan ofis bilong Sosaiti Was Taua wantaim ol 95 namba tu ofis o brens-ofis bilong en, ol i save wokim ripot long olgeta yia na ol i tok i gat 2.4 milion manmeri ol i save mekim dispela wok Jehova i makim bilong “las taim.” Ol i wok yet long bungim ol manmeri bilong dispela ‘bikpela lain.’ Olsem na dispela lain i mas i go bikpela yet! Tasol sapos yumi skelim ol manmeri bilong dispela bikpela lain long nau wantaim olgeta manmeri i stap long graun, ol inap olsem wanpela bilong olgeta tu tausen tu tausen manmeri.
15. (a) Olsem wanem na i stret yumi ken ting olsem sampela manmeri nau ol i stap laip bai ol winim taim bilong pinis bilong pasin bilong dispela graun? Olsem wanem na King bilong Nupela Taim em i no ken i stap papa bilong ol bilong liklik taim tasol?
15 Dispela “10-pela kom” i mas i stap king wantaim retpela wel abus, em piksa bilong namba wan wel abus o Yunaitet Nesen. Ol i stap king inap “wanpela aua tasol.” Olsem na ating i no gat bikpela hap taim moa bilong en. Na ol manmeri bilong dispela ‘bikpela lain’ bai ol inap winim taim bilong bagarap bilong “wel abus” wantaim “piksa” bilong en. Jehova bai lukautim ol na taim dispela pasin nogut bilong nau i bagarap olsem long paia, bai ol i winim dispela taim na i stap long stretpela nupela taim bilong bihain. (Revelesen 7:l6, 17) O1 i no ken lusim rot bilong laip em God i makim. Olsem na King Krais Jisas bai stap Papa bilong ol oltaim oltaim.—Aisaia 9:6, 7.
Nau Ol i Redi Bilong i Stap Oltaim
16. Olsem na yumi inap tok wanem? Na i stret yumi mas tingim wanem tok bilong Jisas?
16 Olsem na yumi inap tok olsem: “Planti milion manmeri nau ol i stap laip ol i no ken i dai.” I stret yumi mas tingim tok bilong Jisas, em i tok:“Kirap bek, em mi yet. Na laip, em mi yet. Man i bilip long mi, sapos em i dai, maski, em bai i stap laip. Na olgeta man i stap laip na i bilip long mi, bai ol i no i dai. Nogat. Bai ol i stap laip oltaim oltaim.”—Jon 11:25, 26.
17. Ol manmeri bilong ‘bikpela lain’ ol i mekim wanem na i olsem ol i tokaut long God Jehova na Pikinini Sipsip i kisim bek ol? Nau ol i mekim wok we na God i orait long ol?
17 Ol manmeri bilong ‘bikpela lain,’ em ol i stap laip, nau ol i bilip long dispela Man em i “kirap bek” na “laip.” Ol i dediket long God Jehova na kisim baptais bilong makim dispela samting. Long dispela rot ol i tokaut olsem: “God bilong yumi em i sindaun long sia king, na Pikinini Sipsip, tupela i kisim bek yumi.” Ol i sanap long banis bilong haus lotu bilong Jehova, ol i sanap long pes bilong sia king bilong Em. God i orait long ol, long wanem ol i bin wasim klos bilong ol long blut bilong Pikinini Sipsip, em Krais Jisas, na klos i kamap waitpela.—Revelesen 7:9, 10, 14.
18. Nau i olsem ‘bikpela lain’ ol inap kisim wanem samting? Na i olsem ol i stap wanem samting bilong God?
18 I olsem ol i stap stret long ai bilong God, na i olsem ol inap long kisim laip.(Rom 6:13) Ebraham i bilip long God na i mekim ol wok bilong kamapim dispela bilip. God i tingim dispela bilip bilong em i olsem stretpela pasin na em i kolim Ebraham olsem “pren bilong mi.” Na olsem tasol ol manmeri bilong ‘bikpela lain’ ol inap kamap olsem ‘pren bilong God.’. (Rom 4:6-22; Jems 2:23; Sam 32:2) Ol i holimpas dispela stretpela pasin bilong ol long ai bilong God, olsem na bai em i lukautim ol na ol i no ken bagarap taim dispela olpela pasin i pinis long Amagedon, em “bikpela de bilong God I Olgeta Strong.”
19. (a) Olsem wanem na ol i no ken “kirap bek i stap laip”? (b) Olsem wanem ol i no ken i dai?
19 Olsem na ol dispela manmeri i winim taim bilong Amagedon ol i no ken “kirap bek na i stap laip” long graun. Nogat. Bai ol i no i dai. Tok bilong Jisas i stret long ol, em i tok: “Olgeta man i stap laip na i bilip long mi, bai ol i no i dai. Nogat. Bai ol i stap laip oltaim oltaim.” (Jon 11:26) Ol i dediket long God Jehova na sapos ol i stap gut long dediket bilong ol na bihainim laik bilong em olsem King Krais Jisas i lainim ol long en, taim 1,000 yia bilong wok king bilong Krais i pinis, bai ol i kamap stretpela man tru. Long laspela traim, em bai painim olgeta manmeri i kamap gutpela olgeta long skin na tingting, bai ol i sanap strong na kamapim bel bilong ol, ol i givim bel tru long Nambawan Bikpela, na bai nem bilong ol i stap long “buk bilong laip.”—Revelesen 20:7-15.
20. Wok bilong ol na ol samting i painim ol, olsem wanem dispela i narapela kain, i no wankain olsem bilong ol narapela manmeri ol bai stap long Paradais long graun? Yumi mas tenkyu long husat long dispela olgeta samting?
20 Nau ‘bikpela lain’ bilong ol “arapela sipsip” bilong Gutpela Wasman ol i gat gutpela wok tru ol i ken mekim! Em narapela kain wok, bilong dispela taim nau tasol. (Jon 10:16) Na ol i wetim gutpela samting tru i kamap—o1 i wet long kisim laip long gutpela ples Paradais hia long graun na i stap amamas oltaim. I gat as tru bilong i stap bilong ol. Narapela kain samting bai painim ol, em i no ken painim ol narapela manmeri ol bai stap long Paradais long graun. Bai ol i winim taim bilong pinis bilong dispela pasin nogut bilong nau na ol i no ken i dai. Yumi mas tenkyu long God Jehova long dispela olgeta samting. Em i As bilong laip i gutpela olgeta, na Pikinini bilong em, Krais Jisas, em i rot bilong kisim dispela laip.
Ol Askim Bilong Rivyu
□ Jisas i tok “bai ol i no i dai” Dispela tok promis em i bilong husat?
□ Wel abus bilong Revelesen 17 i makim wanem samting? Ol manmeri i mekim wanem long dispela wel abus, ol i no inap kisim laip? Ol manmeri i mekim wanem long en ol inap kisim laip?
□ Olsem wanem na i stret yumi ken ting olsem sampela manmeri nau ol i stap laip bai ol i winim taim bilong pinis bilong dispela pasin nau i stap long graun?
□ God i ting olsem wanem long ol manmeri bilong ‘bikpela lain’? Na i olsem em i tingim ol i wanem kain man?
[Piksa long pes 15]
Olsem wanem tingting bilong yu long dispela “wel abus” inap helpim yu o pasim yu long kisim laip oltaim?
[Piksa long pes 17]
Milion milion manmeri ol i no ken i dai. Olsem wanem yu inap i stap long dispela bikpela lain manmeri?