No Ken Pret Long Autim Tok Bilong God Long Dispela Taim Bilong Nuklia
‘Lusim pret na strong moa long autim tok bilong God.’—FILIPAI 1:14
1. Man bilong wokim atom, inap 49 yia pinis em i kirapim ol man long mekim wanem wok bilong autim tok?
YUMI stap long taim bilong nuklia. Pait nuklia inap bagarapim olgeta hap bilong graun! God I Gat Olgeta Strong, em i Man bilong wokim dispela samting (atom) ol i kisim strong bilong nuklia long en, em i save long dispela samting. Orait, em i laik bai yumi autim wanem tok long dispela taim nau? Long taim bilong yumi em i givim wok long wanpela ‘man i gat klos linen na pen bilong kuskus’ na em i putim mak long pes bilong ol man.
2. Wanem wok bilong putim mak i kamap gutpela? Ol man i mas kisim dispela mak bambai ol inap mekim wanem?
2 Dispela ‘man’ i putim mak long pes i ol manmeri ol i hevi long ol samting nogut ol man i mekim. Ol i hevi tru long ol samting nogut ol lain bilong Krisendom i mekim, em ol i tok ol i lotuim God. (Esikiel sapta 9) Ol dispela manmeri i tingim ol samting ol pris pasto i bin mekim long taim bilong Namba Wan na Namba Tu Pait Bilong Olgeta Hap, na ol i hevi long ol samting ol i ting ol dispela hetman bilong lotu bai mekim sapos pait nuklia i kamap long olgeta hap. Ol i tingting planti long ol samting ol pris pasto i orait long en nau long dispela taim bilong pasin nogut na pasin pait na ol man i bruk bruk long ol narapela narapela lotu. Dispela taim i laik pinis nau na ol manmeri i gat gutpela bel ol i mas kisim mak bambai ol inap i stap long nupela stretpela taim em bai kamap.
3. Ol man i hevi, nogut olgeta manmeri i bagarap, tasol ol i mas hevi tru long wanem samting? Ol man bilong putim mak, ol i mas mekim wanem bambai ol inap mekim dispela wok?
3 Pasin bilong dispela graun i no kamap gutpela. I gat wanem samting bilong mekim isi bel bilong ol gutpela manmeri insait na ausait long Krisendom na ol i no ken pret long pait bai bagarapim olgeta manmeri liklik taim bihain? Tru, ol i hevi long dispela samting i kamap long graun. Tasol bikpela samting em olsem: Ol i hevi, long wanem nem bilong God bilong Baibel em i insait long dispela? Ol i hevi, long wanem ol man i tok ol i lotuim God, pasin bilong ol i bagarapim nem bilong God? Na dispela ‘man i gat klos linen’ em i makim husat? Em i putim mak long pes bilong planti manmeri moa nau long dispela taim, ol i krai na hevi long ol samting i Kamap. Em i mekim olsem wanem? Ol pris pasto bilong Krisendom i no laikim dispela wok em i mekim. Ol i birua tru long en. Olsem na dispela ‘man’ i mas strongim bel na em i no ken pret long mekim dispela wok.
4. Husat i olsem piksa bilong dispela lain ol i mekim wok bilong putim mak long pes bilong ol man? Olsem wanem ol i wankain olsem em?
4 Tasol maski, dispela wok i kamap strong moa bihain long 1935. Wanpela lain Kristen ol i dediket long God Jehova long rot bilong Krais Jisas, ol i mekim dispela wok. Profet Esikiel, em wanpela pris bilong Isrel, em i olsem piksa bilong dispela lain. Esikiel i lukim ol samting olsem driman na em i lukim dispela ‘man i gat klos linen na pen bilong kuskus.’ Dispela lain, em Esikiel i olsem piksa bilong ol, ol i dediket long dispela God Esikiel i dediket long Em. Olsem na ol i witnes bilong Jehova olsem Esikiel. Lain Esikiel long nau ol i wanpela lain pris. Ol i bilong lain Isrel bilong spirit, em Pita i raitim tok long ol, olsem: “God i makim yupela pinis, na yupela i stap lain manmeri bilong em. Yupela i stap pris bilong lain bilong king. Yupela i stap lain manmeri i holi. Yupela i stap manmeri bilong God stret, bai yupela i ken telimautim olgeta gutpela pasin em i bin mekim long yupela. I olsem: Em i bin singautim yupela na yupela i lusim tudak pinis, na em i bringim yupela i kam insait long gutpela lait bilong em.”—1 Pita 2:9.
5. 1 gat hamas namba tu pris aninit long Hetpris Jehova i makim?
5 Olsem na yumi save, dispela lain Esikiel long nau em ol manmeri i mekim wok pris bilong spirit aninit long Hetpris Krais Jisas. God Jehova i tok promis long Krais Jisas, olsem: “Yu ken i stap . . . wankain pris olsem Melkisedek.” Melkisedek em i “king bilong Selem na pris bilong God Antap Tru.” (Sam 110:4; Jenesis 14:18; Hibru 5:10; 6:20; 7:10, 15-17) Kirap long taim bilong ol aposel, em taim aposel Pita i raitim pas bilong em, God Jehova i bin makim ol manmeri ol i bilong dispela ‘lain pris bilong king.’ Ol inap olsem 144,000 aninit long Hetpris Krais Jisas.—Revelesen 7:1-8; 14:1-4.
6. Hamas manmeri bilong ‘lain pris bilong king’ ol i stap yet long graun? Olgeta wantaim i mekim wok olsem husat?
6 Long nau liklik hap lain tasol bilong dispela ‘lain pris bilong king’ ol i stap yet long graun, olsem lain remnan. Ripot bilong Memorial bilong 29 Mas 1983 i soim yumi, liklik hap lain tasol ol stap yet long graun. Olgeta wantaim ol i olsem dispela ‵man gat klos linen,’’ em i putim mak long pes bilong ol man ol inap long kisim mak.
7. Dispela lain long nau ol i olsem man i gat klos linen na pen bilong kuskus, ol i mas wetim Jehova i mekim wanem long ol?
7 Ol Isrel i birua tru long profet Esikiel na em i mas strongim bel bambai em i no ken pret. Tasol God I Gat Olgeta strong em i mekim tok promis long Esikiel. Em i tok em bai mekim pes bilong Esikiel i strong wankain olsem pes bilong ol birua bilong em. Em bai mekim pes bilong Esikiel i moa strong. m na Esikiel i no ken pret long ol dispela birua bilong em ol i man tasol. (Esikiel 2:4; 3:8; Aisaia 51:12) Olsem tasol lain remnan long nau, ol i olsem dispela man i gat klos linen pen bilong kuskus, ol i no ken pret. Ol mas givim bel long dispela God bilong Esikiel na wetim em i helpim ol na mekim pes bilong ol i strong. Ol i no ken pret long ol birua bilong ol i stap insait o ausait long Krisendom.
8. Jisas i givim wanem tok long ol disaipel bilong em na dispela i stret long nau tu?
8 Krais Jisas em i nambawan Man bilong, autim tok bilong God. Na naintin handet yia bipo em i salim ol disaipel bilong em i go autim tok long lain bilong ol yet. Ol i mas strongim bel na i no ken pret. Taim em i laik salim ol i go, em i tokim ol: “Yupela i no ken pret long ol man i save kilim i dai bodi, tasol i no inap kilim [laip] bilong yupela. Nogat. Yupela mas pret long dispela em inap bagarapim [laip] wantaim bodi long [Gehena].” (Matyu 10:28) Na long laspela hap bilong Baibel, Jisas i tokim lain remnan nau long taim bilong yumi: “Bihain liklik bai yupela i karim pen, tasol yupela i no ken pret long dispela. Harim! Seten em bai i kalabusim sampela man namel long yupela, bilong traim yupela. Na bai yupela i karim hevi na pen inap long 10-pela de. Tasol yu mas holim bilip, i go inap long taim yu dai, na bai mi givim yu laip olsem prais.” (Revelesen 2:10) Em gutpela tok bilong strongim ol!
9. (a) Long nau planti Witnes Bilong Jehova i stap kalabus, olsem na yumi save ol i bihainim wanem tok, em yumi stori long en long paragraf 8 ? (b) Tasol ol narapela Kristen i pret? Olsem wanem taim Pol i stap kalabus?
9 Long 40 kantri long nau, gavman i tambuim wok bilong ol Witnes o putim sampela lo bilong pasim wok bilong ol. Bikpela lain Kristen i stap long ol dispela ples, winim ol Kristen i bin i stap kalabus long bipo. Tasol ol Witnes Bilong Jehova long nau ol i no pret long ol hevi ol i mas karim. Ol i no pret long kalabus tu. Ol birua i ting, sapos ol i kalabusim sampela kristen, bai ol narapela Kristen i pret. Tasol nogat. Taim aposel Pol i stap kalabus em i raitim wanpela pas na em i tok: “Planti brata i bilip long Bikpela, ol i ting long mi stap kalabus, na bel bilong ol kisim strong long dispela. Na ol i lusim pret na i strong moa long autim tok bilong God.”—Filipai 1:14.
10. (a) Ol Witnes Bilong Jehova long nau i gat wok long autim tok bilong husat? (b) Ol i bihainim wanem pasin bilong ol aposel bilong pastaim?
10 Long taim bilong Pol, ol Kristen i no autim tok bilong ol man. Na long nau tu, ol witnes bilong Jehova i no autim tok bilong ol man. Ol i autim tok bilong Baibel, em tok bilong Nambawan Bikpela God, Jehova. Long Baibel God i tokim lain bilong em, em ol i dediket na baptais, ol i mas autim tok bilong Em, olsem ol witnes bilong Em. Ol i mas autim tok long em i God na King. (Aisaia 43:10, 12) God yet i tokim ol long mekim dispela wok, olsem na i no gat wanpela man i gat strong bilong pasim dispela wok. Maski man i gat nem o em i no gat nem, tasol i no stret ol i tokim ol Witnes long lusim dispela wok o subim ol long lusim. Yumi save bihainim pasin bilong ol aposel Kristen bilong pastaim, em ol i tokim ol hetman: “Mipela i mas bihainim tok bilong God tasol. Mipela no ken bihainim tok bilong ol man.”—Aposel 5:29.
11. Ol man i wokim ol bom nogut bilong nuklia dispela samting ol i mekim i litimapim nem bilong ol? Olsem wanem long strong bilong ol man long pasim wok bilong autim tok bilong Kingdom?
11 Ol man i bin wokim bom nogut bilong nuklia, tasol dispela samting ol i mekim i no litimapim nem bilong ol olsem ol i “god.” Na ol i mas tokaut long Nambawan Bikpela God long wok ol i mekim long dispela bom. (Lukim Sam 82:6, 7.) Ol i wokim dispela bom bilong pasim pait, tasol long dispela rot ol gavman i laik holim yet wok bilong bosim dispela graun. Ol i no helpim wok bilong Kingdom bilong God i stap long han bilong Krais Jisas. Ol i no laikim wok bilong autim tok bilong Kingdom, em ol disaipel tru bilong Jisas i mekim nau long dispela taim. Ol i laik pasim dispela wok. Olsem na tok profet bilong Jisas i stret yet nau long dispela taim bilong nuklia, em i bin tok: “Dispela samting em i olsem pen i save kamap pastaim long meri i laik karim pikinini. Yupela yet i mas lukaut gut. Bambai ol i kotim yupela long kaunsil bilong ol. Na bai ol i paitim yupela insait long ol haus lotu. Bai ol i ting long daunim mi, na ol i sanapim yupela long pes bilong ol gavman na ol king. Olsem na bai yupela i ken autim gutnius long ol. Olgeta lain man i mas harim man i autim gutnius pastaim. Na taim ol i pasim yupela na bringim yupela i go long kot, yupela i no ken pret na ting, ‘Bai yumi mekim wanem tok?’ Nogat. Olgeta tok God bai i givim long yupela long dispela aua yet, em yupela i mas autim. Long wanem, i no yupela yet bai i autim tok. Nogat. Spirit em bai i autim.”—Mak 13:8-11
12. Ol man i mekim pasin birua tru, tasol yumi mas autim wanem tok pastaim? Na dispela samting i mak tru bilong wanem samting?
12 Ol dispela hevi, olsem pen i save kamap pastaim long meri, ol dispela hevi i kirap long kamap long yia 1914. Na bihain long dispela taim na i kam inap long nau, ol man i birua long ol disaipel bilong Krais olsem Krais i tok profet pinis. Olgeta samting i bin kamap i soim yumi,yumi stap long ‘taim bilong pinis bilong dispela taim nau.’ (Matyu 24:3; Mark l3:3, 4) Tasol yumi mas “autim gutnius pastaim” na bihain bai las de i kamap. Olsem na dispela wok bilong autim tok bilong God, em tok bilong Kingdom, em i soim yumi tru, yumi stap long taim bilong pinis bilong dispela taim nau.—Matyu 24:14.
Kisim Tok Bilong God na Autim long Olgeta Hap Bilong Graun
13. Wanem samting, olsem Revelesen sapta 10 i stori long en, i painim lain remnan bihain long Namba Wan Pait Bilong Olgeta Hap? Ol i kisim pinis dispela samting i strongim ol long spirit na bihain ol i mas mekim wanem?
13 Ol narapela aposel Jisas i bin makim, ol i dai pinis na laspela, em Jon, em i dai long yia 98 C.E. samting. Taim bilong pinis bilong dispela taim nau i kirap long yia 1914 C.E. Long dispela taim bilong pinis i gat liklik hap lain bilong ol Kristen em spirit bilong Jehova i bin makim ol spirit bilong Jehova i bin makim ol, ol i stap yet long graun. Em lain remnan, ol i dediket na baptais. Jon, man bilong raitim ol tok bilong Revelesen long Baibel, em i olsem piksa bilong dispela lain remnan. Namba Wan Pait Bilong Olgeta Hap i pinis na long yia 1919 ol samting i painim dispela lain remnan olsem i bin painim Jon na em i stori long en long Revelesen sapta 10. Dispela samting i mas kamap taim God i “mekim tru” dispela samting “God i laik mekim na i no inap ol man i lukim.” Revelesen 10:7) Ol i kisim strong long spirit, long wanem ol i kisim “dispela liklik buk” na ol i kaikai. Bihain, dispela lain bilong nau, em Jon i olsem piksa bilong ol, ol i mas “autim gen tok bilong God long ol samting bai i kamap long planti lain manmeri bilong planti ples, na bilong planti tok ples, na long planti king tu.”—Revelesen 10:10, 11.
14. Husat i mekim dispela wok ol i tokim Jon long mekim taim em i stap long ailan Patmos?
14 Aposel Jon i stap kalabus long ailan Patmos na em i lapun, olsem na em inap mekim dispela wok ol i tokim em long mekim o nogat, em yumi no save. Baibel i no tok. Tasol olsem wanem long dispela lain em Jon i olsem piksa bilong ol? Dispela lain i mekim tru dispela wok ol i tokim Jon long mekim. Ol i bin tokim Jon, “Yu mas autim gen tok bilong God.” Olsem na yumi save, em i stap kalabus long ailan Patmos na em i no inap autim tok olsem bipo em i mekim. Dispela tok em i tok tru bilong dispela lain long nau Jon i olsem piksa bilong ol. Olsem na yumi laik save: Ol Witnes Bilong Jehova i autim tok bilong God long hamas ples na tok ples taim ol i wok long “autim dispela gutnius bilong kingdom long olgeta hap” na ol i no pret?—Matyu 24:14.
15. Long nau ol i autim tok long hamas kantri? na long hamas tok ples?
15 Yearbook bilong 1983 i tok, ol i autim tok long 205 kantri, na ol i wokim ol buk na nius bilong Baibel long 190 samting tok ples. Ol manmeri bilong ol dispela kantri ol i blakskin na waitskin na yeloskin na retskin na braunskin, na ol i bilong kain kain lain na lotu, na ol i gat kain kain tok ples. Bihain long taim bilong Namba Wan Pait Bilong Olgeta Hap i no gat planti “king” moa i stap. Tasol i gat ol narapela kain hetman bilong gavman ol i stap. Maski ol man i kolim wanem bikpela nem long ol o ol i bilong wanem kain tingting politik, tasol tok bilong ol Witnes Bilong Jehova em i bilong ol na ol i mas harim. Tasol ol i no laik harim, olsem na long planti kantri long nau ol i tambuim wok bilong ol Witnes.
16. Maski beten bilong ol hetman bilong graun, tasol wanem wok i kamap strong na i no gat man inap pasim?
16 Maski ol man i bin kamapim Lig ov Nesen na senis bilong en, em Yunaitet Nesen, bilong helpim ol man na kamapim gutaim, tasol wok bilong autim tok long Kingdom bilong God na Krais, em dispela Kingdom tasol inap helpim ol man, dispela wok i kamap strong. No gat man inap pasim. Ol hetman bilong dispela graun i no tingim dispela tok bilong Kingdom i gutpela tok o “gutnius,” long wanem em narapela kain tru long ol samting ol yet i ting bai helpim ol man. Ol i ting ol yet ol inap bosim graun na helpim ol man. Na sapos ol i pilim olsem wanpela man i gat bikpela strong winim bilong ol man bilong graun em i mas helpim ol, ol i save beten, tasol ol i beten long “god giaman bilong dispela graun.” God tru, em i as bilong “dispela gutnius bilong kingdom,” em no laikim “dispela graun,” em Seten i god bilong en—2 Korin 4:4.
17. (a) Olsem wanem na ol birua i no inap bagarapim Baibel, em Tok Bilong God? (b) Kirap long yia 1919 na i kam inap long nau, husat ol i bin autim dispela tok?
17 Baibel i tok klia, tok bilong God bilong i stap oltaim oltaim. (1 Pita 1:23-25) Na dispela tok i stret inap long nau. Maski ol lotu i bin tambuim Baibel kukim planti Baibel long paia, tasol Baibel i stap yet. Ol i no inap bagarapim dispela Tok Bilong God. Na wok bilong autim dispela tok, dispela wok tu i stap yet. Maski ol man i birua long ol Witnes na i laik pasim maus bilong ol, tasol ol Witnes i bin wok strong long autim Tok Bilong God na ol i no pret long mekim.
18. Jehova bai strongim ol dispela manmeri i go inap long wanem taim?
18 Olsem na yumi save, Man bilong heven em i givim dispela Tok long yumi, em bai wok yet long mekim pes bilong lain Esikiel long nau i kamap strong. Na em bai strongim tu ol poroman bilong ol. Bai ol i no pret long ol strongpela birua bilong ol i go inap long taim ol dispela birua i bagarap. God i givim rot long lain bilong em na inap long nau ol i autim tok bilong em na wok bilong ol i kamap gutpela. Em bai helpim yet ol i go inap long taim wok bilong ol i pinis, em wok bilong ‘autim gen tok long ol lain manmeri bilong planti ples na planti tok ples na ol king.’ Yumi ken bilip tru God bai mekim olsem, na long dispela rot bai em i litimapim nem bilong em, em i king bilong heven na graun.
Yu Inap Tingim?
□ Wanem samting i mas kamap long taim bilong yumi na ‘man i gat klos linen na pen bilong kuskus’ em i makim dispela samting? Em i mekim wanem wok long nau?
□ Bilong wanem ol Witnes Bilong Jehova i mas strongim bel na ol i no ken pret?
□ Aposel Jon i kaikai “dispela liklik buk.” Kaikai pinis na bihain em i mas mekim wanem? Dispela samting i makim wanem samting nau long taim bilong yumi?
[Piksa long pes 11]
Long dispela taim bilong nuklia wanpela lain ol i olsem dispela man i gat klos linen, ol i mekim wok na ol i no pret long mekim. Yu insait long dispela wok?
[Piksa long pes 13]
Jon i kisim wanpela “liklik buk” na ol i tokim em long “autim gen tok,” na olsem tasol ol kristen long nau i no pret long autim tok bilong God