Autim Tok Bilong God Namel Long Ol Manmeri i Pret
1. Nambawan bikpela profet i tok wanem long bikpela bai pret bai kamap long graun?
NAMBAWAN bikpela profet, em Krais Jisas, em i tok profet long bikpela bilong senis i kamap taim Namba Wan Pait Bilong Olgeta Hap i kirap long 1914. Em i tok profet long tingting na ol manmeri long dispela taim na i tok: “Planti manmeri bai ol i tingting ol samting i laik kamap long graun, bai bel bilong ol i pret tru, na ai bilong ol i raun. Long wanem ol sta samting long skai bai i guria.”—Luk 21:26, 27.
2. Husat ol i no pret? Olsem wanem na ol i no pret?
2 Tasol i gat sampela manmeri ol i no pret o tingting planti. Em ol Witnes Bilong Jehova, ol i stap nau long 205 kantri. Ol i bihainim tok bilong Jisas, olsem: “Bihain ol dispela samting i stat long kamap, long dispela taim yupela i mas sanap na litimapim het bilong yupela. Taim bilong God i kisim bek yupela em i kam klostu nau.”—Luk 21:28.
3. Bilong wanem kingdom bilong Krais i no kamap long Jerusalem? Olsem wanem na Lig ov Nesen na Yunaitet Nesen i no pasim taim bilong nuklia?
3 Nau yumi save tru, taim bilong “ol arapela lain” o taim bilong ol Jentail i pinis long 1914 na Kingdom bilong God na Krais i kamap olsem God i tok promis pinis. Dispela kingdom i kamap long heven na em i mekim wok namel long ol birua. (Luk 21:24) Kingdom bilong Krais i no kamap long graun long Jerusalem. Nogat. Na Lig ov Nesen i no kamap olsem ‘kingdom bilong God long graun’! Senis bilong en tu, em Yunaitet Nesen, i wok i stap inap 36 yia pinis, tasol em i no kamapim ol samting Krisendom i bin beten long en. Taim bilong nuklia i kamap.
4. Ol man i kamapim Lig ov Nesen ol i sakim wanem samting?
4 Taim Namba Wan Pait Bilong Olgeta Hap i laik pinis, nau ol lain man i bung na i pasim tok long kamapim wanpela oganaisesen bilong helpim olgeta lain wantaim em Lig ov Nesen. Kirap long dispela ol Witnes Bilong Jehova i tokaut long kain oganaisesen olsem, em ol man i kamapim na i laik senisim kingdom bilong God na Krais, em i no inap wok gut; wok bilong en bai i lus nating. Ol i no pret long tokaut olsem. Ol i tingim tok bilong Aisaia na ol i mekim. Aisaia 8:12 (NW) i tok: “Yupela i no ken bihainim ol manmeri i bung wantaim na i pasim wanpela tok. Ol samting ol i pret long en, yupela i no ken pret long en.” Ol man i bung wantaim na i pasim tok long kamapim dispela oganaisesen, ol i sakim Kingdom bilong God i stap long han bilong Krais. Olsem na yu ting God Jehova, em King i winim olgeta narapela king, em inap helpim o blesim dispela wok ol i mekim? Nogat, a?
5. (a) Maski ol tok i stap long dispela “buk,” tasol taim Esikiel i kaikai em i swit long maus bilong em o nogat? (b) Taim God i putim tok bilong em long maus bilong yumi bambai yumi autim, yumi pilim dispela samting i gutpela samting o olsem wanem?
5 Ol manmeri bilong dispela graun i hatwok long bilipim tok bilong Kingdom ol Witnes Bilong Jehova i wok yet long autim, long wanem tingting bilong ol i narapela kain. Wanpela samting i painim Witnes olsem i bin painim profet Esikiel taim em i stap kalabus long Babilon. Em sampela yia bihain long taim ol Babilon i bagarapim Jerusalem long 607 B.C.E. Ensel i givim wanpela “buk” long Esikiel, olsem em i givim long aposel Jon em i long ailan Patmos. Esikiel i tok: “Rait i stap long tupela hapsait bilong en; ol tok ol i raitim long en, em tok bilong ol man i krai na bel hevi.” (Esikiel 2:9, 10, NW) Esikiel i bihainim tok bilong God na kaikai dispela buk. Kaikai pinis na nau Esikiel i tok: “Long maus bilong mi em i swit olsem hani.” (Esikiel 3:1-3, NW) God i putim Tok bilong Em long maus bilong yumi bambai yumi autim tok bilong em na dispela wok i gutpela, em i “swit olsem hani.” Maski dispela tok i gat tok bilong krai na hevi tu long en, tasol yumi amamas long autim olgeta tok bilong God. (Skelim wantaim tok bilong Sam 19:7-10.) Bihain long Namba Wan Pait Bilong Olgeta Hap, olsem long yia 1919, ol Witnes Bilong Jehova i “ kaikai” gutpela tok bilong God. Ol i pilim tru dispela tok. Dispela tok i strongim ol olsem hani tru i bin strongim Jonatan long bipo.—1 Samyuel 14:26, 27.
6. De bilong God bilong mekim pe nogut i klostu pinis na bilong wanem yumi mas strongim bel? Tasol yumi lain bilong Jehova yumi ken save long wanem samting?
6 ‘De bilong God bilong bekim pe nogut’ i klostu pinis na yumi ol Witnes Bilong Jehova yumi mas strongim bel, long wanem yumi mas tokim ol man, liklik taim bai olgeta manmeri i “krai na bel hevi.” (Aisaia 61:1, 2) Ol manmeri i laik abrusim hevi tasol ol i no laik harim dispela tok bilong yumi ol Witnes. Tasol God i givim dispela wok long yumi, olsem na yumi ken save em bai sambai long yumi na helpim yumi i go inap long taim em i bekim pe nogut.
7. Jehova i mekim wanem na inapim Esikiel long mekim dispela wok Em i givim long em?
7 Taim ol man i sakim tok bilong yumi na ol i no laik harim, yumi no save amamas, tasol yumi mas tingim ol tok God i givim long Esikiel. God i tok: “Tasol lain Isrel i no ken harim tok bilong yu, long wanem ol i no laik harim tok bilong mi. Pes bilong olgeta Isrel na bel bilong ol wantaim i strong pinis. Harim! Mi mekim pes bilong yu i strong olsem pes bilong ol. Mi mekim pes bilong yu i kamap strong olsem ston daimon, na strong olsem strongpela ston. Yu no ken pret long ol; yu no ken lukim pes bilong ol na yu guria. Ol i lain bilong bikhet . . . Na yu mas i go namel long ol man ol i stap kalabus longwe long ples bilong ol; yu mas wokabaut namel long ol wantok bilong yu; na yu mas toktok wantaim ol, na yu mas tok: ‘Dispela tok em tok bilong Bikpela King Jehova.’ Maski ol i laik harim o ol i no laik harim, yu mas tokim ol.—Esikiel 3:7-11, NW.
8. Wanem samting nogut i painim lain Esikiel bihain long Namba Wan Pait Bilong Olgeta Hap? Olsem wanem sapos ol pris pasto i bin harim tok?
8 Kain samting nogut olsem i painim lain remnan bilong ol Kristen, em spirit bilong God i bin kamapim ol i stap pikinini spirit bilong Em, na spirit bilong Em i bin makim ol bilong autim tok bilong em. Ol i olsem lain Esikiel nau long taim bilong yumi. Olsem Esikiel, olsem tasol lain remnan i no pret long strongpela pes bilong ol pris pasto bilong Krisendom, em ol i save putim bilas bilong lotu na kisim pe na ol i tok ol yet i Isrel bilong spirit. Sapos ol dispela hetman bilong lotu i bin lusim strongpela pasin na daunim bel bilong ol na harim tok bilong Kingdom, em lain remnan i autim kirap long 1919, orait, bai Krisendom i no ken kirapim Namba Tu Pait Bilong Olgeta Hap, em bikpela pait tru, winim Namba Wan Pait.
9. Olsem wanem lain remnan wantaim ol poroman bilong ol, ol inap long mekim wok bilong ol?
9 Long nau, maski wok bilong Yunaitet Nesen, bikpela pait nuklia i laik kamap, tasol ol pris pasto bilong Krisendom i no senisim pasin bilong ol. Pes bilong ol i strong yet long ol manmeri i autim tok bilong Kingdom. Olsem na lain remnan, em ol i maus bilong Kingdom, wantaim ol poroman bilong ol, em ol i bilong olgeta lain na ol i dediket na baptais, ol i bin mekim pes bilong ol yet i strong. Ol pris pasto i birua long ol, tasol i no pret long autim tok bilong God. Ol i wok strong yet.
10. I gat wanem samting na ol pris pasto wantaim lain bilong ol, ol i mas harim tok bilong ol Witnes? Bihain ol dispela manmeri bilong lotu bai save long wanem samting?
10 Ol pris pasto bilong ol misin bilong Krisendom wantaim lain bilong ol, ol inap save gut long ol tok ol Witnes Bilong Jehova i autim long ol. Long wanem ol witnes i kisim ol dispela tok long Baibel. Ol dispela lain i tok ol i Kristen na ol i tok ol i bilip long Baibel na ol i gat planti Sosaiti ol i tilim Baibel long kain kain tok ples i go long olgeta hap. Tasol i olsem God Jehova i tokim Esikiel, em i tok: “Ol pikinini man i pes long mi na bel bilong ol i strong—mi salim yu i go long ol tu, na yu mas tokim ol, ‘Dispela tok em tok bilong Bikpela King Jehova.’ Na maski ol i laik harim dispela tok o ol i no laik harim—long wanem, ol i lain bilong bikhet—ol bai save, wanpela profet i bin i stap namel long ol.”—Esikiel 2:4, 5, NW.
11. Krisendom i mekim wanem long dispela lain man i bin givim wok long ol, em lain remnan? olsem wanem Jehova inapim lain remnan long mekim dispela wok?
11 Ol dispela lain ol i tok ol i Isrel bilong spirit, olsem ol misin bilong Krisendom, “bel bilong ol i strong.” Bel bilong ol i strong long lain remnan, em Bikpela King Jehova em i bin givim wok long ol bilong autim laspela tok bilong em long pinis bilong dispela taim nau. (Matyu 24:3, 14) God I Gat Olgeta Strong em i save em inap strongim lain remnan, em ol i mekim wankain wok olsem Esikiel i bin mekim, na bai ol inap mekim dispela wok na ol i no ken pret.
12. Jehova i mekim ol samting bambai ol man i no ken sutim wanem tok long em? Wanem bikpela samting bai kamap na bai God i no gat asua liklik?
12 God i no gat asua long wanpela samting na em i mekim olgeta samting bambai ol man i no ken sutim tok long em long bihain na i tok em i no bin toksave gut long ol man, em strafe bilong em i laik painim ol. Ol samting i wok long kamap nau na bai olgeta man inap save, yumi mekim wok bilong Jehova. Na ol man i no bin harim tok, bai ol i save wanpela profet bilong Jehova i bin i stap namel long ol. Long dispela taim bai Bikpela Taun Babilon i bagarap olgeta. Ol gavman, em pastaim Bikpela Babilon i mekim pasin pamuk bilong spirit wantaim ol, bai ol i bagarapim em. Na bai God bilong trupela lotu i no gat asua liklik.
13. Jehova i truim wanem tok promis long lain remnan? Dispela samting i helpim ol “arapela sipsip” olsem wanem?
13 Inap long nau lain remnan i wok strong long autim tok bilong God na ol i no pret. Ol inap mekim olsem, long wanem Jehova i bin truim tok promis bilong em, olsem: “Harim! Mi mekim pes bilong yu i strong olsem pes bilong ol. Mi mekim pes bilong yu i kamap strong olsem ston daimon, na strong olsem strongpela ston. Yu no ken pret long ol; yu no ken lukim pes bilong ol na yu guria. Ol i lain bilong bikhet.” (Esikiel 3:8, 9. NW) God i strongim lain remnan na dispela samting i strongim ol “arapela sipsip,” em Gutpela Wasman Krais Jisas i tok em bai bringim ol i kam bung wantaim lain remnan. (Jon 10:16; Revelesen 7:9-17) Ol dispela “arapela sipsip” ol i no pret long autim tok bilong Jehova. Ol i witnes bilong Jehova na ol i kamap strong olsem laion.
14, 15. (a) Ol Witnes Bilong Jehova i narapela kain olsem wanem na long ol hap bilong Krisendom na long ol narapela hap tu ol i stap kalabus (b) Taim sampela brata i kalabus, dispela i mekim wanem long ol brata i stap fri yet?
14 Ol Witnes Bilong Jehova i no bihainim pasin bilong Bikpela Babilon. Olsem na long ol hap bilong Krisendom na long ol narapela hap tu, sampela brata bilong ol i stap kalabus, long wanem ol i no insait long ol wok politik na pait samting bilong dispela graun. Tasol ol narapela Witnes i stap fri, ol i no pret. Ol i olsem ol Kristen long Rom long bipo, em ol i no pret taim Pol i stap kalabus. Pol i kot na em i tok, em i laik bai Sisa i mas harim kot bilong em, olsem na jas i tok: “Yu singaut long Sisa i harim kot bilong yu, orait yu ken i go long Sisa.” (Aposel 25:10-12) Ol i pasim sen long Pol na kisim em i go long Rom. Long Rom em i kalabus na wetim kot. Em i stap olsem na em i raitim pas long ol brata Kristen bilong em long Filipai, long ples Grik, na em i tok:
15 “Planti brata i bilip long Bikpela, ol i ting long mi stap kalabus, na bel bilong ol i kisim strong long dispela. Na ol i lusim pret na i strong moa long autim tok bilong God.”—Filipai 1:14.
16. Sampela brata Kristen i stap kalabus, tasol taim Namba Wan Pait Bilong Olgeta Hap i pinis, ol witnes i stap fri ol i mekim wanem gutpela pasin? Bilong wanem yumi mas i gat wankain gutpela pasin long nau?
16 Wankain samting i kamap taim Namba Wan Pait Bilong Olgeta Hap long 1918. Long dispela taim sampela ofisa bilong Sosaiti Was Taua na lain long Betel ol i stap kalabus. Ol man i bin sutim tok giaman long ol na ol i kalabus. Tasol pait i pinis na nau ol brata i stap fri, ol i no pret, ol i wok long helpim ol brata i stap kalabus bambai ol i ken lusim kalabus. Long 1919 ol i lusim kalabus na kot i tok ol i no gat rong. Ol i kirap na wok strong moa long autim tok bilong Kingdom bilong God na Krais. Ol i no pret long Bikpela Babilon na ol i pren bilong en. Long nau, planti Witnes Bilong Jehova i stap kalabus, winim taim bilong Namba Wan Pait, olsem na ol brata bilong ol, em ol i stap fri, ol i mas ‘lusim pret na wok strong moa long autim tok bilong God.’
Ol Manmeri i Harim Tok Ol i Mekim Krisendom i Sem
17. (a) Jehova i tok wanem long Esikiel long ol manmeri i gat laik long harim tok? (b) Pastaim ol i wok strong long bungim wanem lain? Bihain ol i kirap na tingim wanem lain?
17 Orait, husat ol bai harim tok? Jehova i tokim Esikiel: “Mi no salim yu i go long wanpela lain em yu no save long tok ples bilong ol, o long wanpela lain maus bilong ol i hevi. Nogat. . . . Sapos mi salim yu i go long ol dispela lain, ol bai harim tok bilong yu.” (Esikiel 3:5, 6, NW) Esikiel i mas autim tok long ol wantok bilong em, em ol Isrel ol i stap kalabus long Babilon. Na inap long 1935 samting long taim bilong yumi, lain remnan bilong ol Isrel bilong spirit ol i wok strong long bungim ol “wantok” bilong ol bilong inapim lain Isrel bilong spirit, em dispela “liklik lain” God i laik givim kingdom long ol na ol bai wok king wantaim Krais na helpim ol manmeri God i kisim bek ol. (Luk 12:32) Bihain ol i kirap long tingim tok bilong Jon 10:l6 wantaim tok bilong Revelesen 7:9-17.
18, 19. Long 1935 ol i tokaut long dispela ‘bikpela lain’ em ol “arapela sipsip” ol i mas kamap “wanpela lain sipsip tasol” wantaim lain remnan, tasol bilong wanem ol i mas strongim bel taim ol i autim dispela tok?
18 Long Jon 10:16 Jisas, em Pikinini bilong God, em i tok: “Mi gat arapela sipsip tu, na ol i no bilong dispela banis. Mi mas bringim ol dispela tu. Na bai ol i harim maus bilong mi. Na bambai i gat wanpela lain sipsip tasol na wanpela wasman tasol bilong ol sipsip.”
19 Ol manmeri ol i laik kamap olsem ol “arapela sipsip,” sapos ol i laik harim tok bilong Jisas long dispela taim, ol i mas strongim bel na i no ken pret. Long wanem, long dispela taim bipo, lain bilong Adolf Hitler ol i mekim nogut tru long ol Witnes Bilong Jehova. Hitler em i wanpela Katolik na ol pris Katolik i helpim em long ol dispela wok nogut em i mekim. Olsem na long 1935, taim presiden bilong Sosaiti Was Taua i laik tokaut long dispela ‘bikpela lain’ bilong Revelesen 7:9-17, em ol “arapela sipsip,” na ol bai kamap “wanpela lain sipsip tasol” wantaim lain remnan ol i karim hevi, orait, em i mas strongim bel na em i no ken pret. Na em i mekim olsem. Em i no pret long autim dispela tok bilong God.
20. Ol manmeri i kamap “arapela sipsip” ol i mekim wanem? Lain bilong ol i go bikpela inap hamas?
20 Kirap long dispela taim planti handet handet ol i bin harim tok. Ol i dediket olgeta long God Jehova long rot bilong dispela “wanpela wasman tasol bilong ol sipsip” em God i bin makim em, na ol i kisim baptais. Maski Namba Tu Pait Bilong Olgeta Hap em i bin katim wok, tasol nau ol dispela “arapela sipsip” i kamap bikpela lain, inap olsem 2 milion hap long 205 kantri. Ol i kamap bikpela lain long ol hap i no bilong Krisendom tu, olsem long Japan. Inap 70,000 samting manmeri ol i save autim tok bilong Kingdom long Japan long nau, na 30,000 long Korea, na winim 100,000 long Naijiria.
21. Husat ol i harim tok bilong dispela “wanpela wasman tasol bilong ol sipsip” na ol i mekim ol Krisendom i sem?
21 Pes bilong ol Krisendom i strong na bel bilong ol tu wantaim. Tasol dispela bikpela lain ol i harim tok bilong dispela “wanpela wasman tasol bilong ol sipsip,” ol i mekim ol Krisendom i sem. Long sampela kantri i hatwok long save long tok ples bilong ol man na ol Krisendom i no save long tok lotu bilong ol manmeri bilong ol dispela hap. Tasol ol “arapela sip” bilong Krais ol i mekim gutpela wok. Ol i no pret long ol man bilong dispela graun i ting olsem wanem long ol. Ol i bung long dispela “wanpela wasman” em God i bin makim em i stap Hetman na Man bilong kisim bek ol. Ol i bihainim pasin bilong dispela Wasman bilong ol. Ol i no pret long autim tok bilong God.
22. Ol Witnes Bilong Jehova i mas i gat wanem kain tingting na ol i autim tok bilong God long ol manmeri bilong dispela graun?
22 Ol manmeri bilong dispela graun ol i pret moa yet. Ol spirit nogut i pulim ol i go long Amagedon. Tasol ol Witnes Bilong Jehova i no ken insait long dispela pait. Bai ol i lukluk tasol na ol i no ken bagarap. Bai ol i lukim God bilong ol em i winim pait. Bai ol i winim taim bilong dispela Bikpela Pait na ol yet wantaim ol lain bilong heven bai ol i amamas, na bai ol i litimapim nem bilong dispela God Jehova na strongpela Kepten bilong ami bilong em, em Krais Jisas. (Revelesen 16:13-16, Nau em i no taim bilong surik! Olsem na yumi lain bilong Jehova yumi mas kirap na wok strong yet long ‘autim tok bilong God’ na yumi no ken pret! Yumi mas autim tok i go inap long taim save bilong Jehova i pulap long olgeta hap bilong graun olsem wara inapim ples bilong solwara.—Aisaia 11:9; Esikiel 47:1-5.
Yu Tingim?
□ Wanem samting i painim Esikiel long Babilon? Dispela samting i stret wantaim wanem samting i kamap long nau?
□ Olsem wanem long tingting bilong ol pris pasto na lain bilong God ol i no ken pret long autim tok bilong God?
□ Olsem wanem ol Witnes Bilong Jehova i bin autim tok long wanpela lain ol i “no save long tok ples bilong ol”?
□ Yu mas i gat wanem tingting long nau na long bihain?
[Piksa long pes 17]
Ol pris pasto i no amamas long ol Witnes Bilong Jehova na pes bilong ol i strong, tasol ol Witnes i no pret