Ol Man Bilong Autim Tok Long Bel Isi God i Save Givim Ol i Ken Amamas
“Ol manmeri Bikpela i kisim bek pinis, ol bai i amamas na kam bek long Jerusalem, na ol bai i singim song na bikmaus i kam long dispela rot.”—AISAIA 35:10.
LONG nau, winim olgeta taim bipo, i mas i gat man bilong autim gutpela tok long ol manmeri. Taim i sot pinis na i gat bikpela wok bilong mekim, em wok bilong autim tok i tru bilong God na laik bilong em, na man bilong autim tok em i no pret long toksave long ol man nogut olsem bagarap bai painim ol, na em i helpim ol man i gat stretpela bel long painim bel isi God i save givim.
2 Long taim bilong lain Israel bilong bipo, Jehova i tok promis long kamapim ol dispela kain man bilong autim tok. Long yia 800 B.C.E. samting, profet Amos i tok: “Tru tumas, olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” (Amos 3:7) Long ol handet handet yia i kamap bihain long dispela tok, Jehova i bin mekim planti ol strongpela wok. Long yia 607 B.C.E., em i kapsaitim belhat bilong em long dispela lain em i bin makim bilong em yet, long wanem, ol i save bikhet na ol i gat asua long kapsaitim blut bilong man. Na tu em i givim strafe long ol lain i stap klostu long Israel, em ol i bin amamas long ol Israel i karim pen na hevi. (Jeremaia, sapta 46-49) Bihain, long yia 539 B.C.E., Jehova i mekim na bikpela gavman Babilon i pundaun, olsem na long yia 537 B.C.E., hap lain bilong Israel i kam bek long graun bilong ol bilong wokim gen haus lotu.—2 Stori 36:22, 23.
3 Ol dispela samting Jehova i mekim i bikpela samting tru, na olsem Amos i tok, Jehova i kamapim pastaim long ol profet i mekim wok olsem man bilong autim tok bilong em, na ol i toksave long ol Israel long ol samting bai kamap long bihain. Long yia 750 B.C.E. samting, Jehova i makim Aisaia bilong mekim wok profet. Na long yia 650 B.C.E. samting em i makim Jeremaia. Klostu long yia 600 B.C.E., em i makim Esekiel. Ol dispela gutpela profet na sampela moa, ol i bin autim gut tok long olgeta samting Jehova i laik mekim long bihain.
Ol Man Bilong Autim Tok Bilong God Long Nau
4 Orait, olsem wanem long nau? Planti man, taim ol i lukim pasin bilong ol man i wok long go nogut moa, ol i tingting planti long ol samting bai kamap long bihain. Ol man i laikim tumas stretpela pasin ol i bel hevi tru taim ol i lukim ol pasin giaman na pasin nogut tru i save kamap insait long ol lotu i gat nem Kristen. Olsem Jehova i tok profet long rot bilong Esekiel, ol i “bel nogut na i wari long olgeta dispela pasin nogut ol man i save mekim” insait long ol dispela lotu. (Esekiel 9:4) Tasol planti i no save long ol samting Jehova i laik mekim. I mas i gat man bilong tokim ol.
5 Olsem wanem? I gat man long nau i save bihainim pasin bilong Aisaia, na Jeremaia, na Esekiel na i no save pret long autim tok? Tok bilong Jisas i makim olsem bai i gat. Taim em i tok profet long ol samting bai kamap long taim bilong yumi, em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Orait, husat long nau i truim dispela tok profet na i mekim wok olsem man bilong autim tok, na man bilong autim gutnius? Sampela samting long taim bilong yumi na long taim bilong Israel bipo i wankain, na dispela i ken helpim yumi long bekim dispela askim.
6 Long taim nogut bilong Namba Wan Pait, lain bilong Jehova long nau, em lain remnan bilong “Israel tru bilong God” em i makim ol long spirit holi, ol i bin stap kalabus wankain olsem Israel i bin stap kalabus long Babilon. (Galesia 6:16) Long ol samting bilong spirit ol i bin stap kalabus long Bikpela Babilon, em olgeta lotu giaman wantaim, na bikpela hap bilong en em ol lotu i holim nating nem Kristen. Tasol ol tok Jehova i mekim long Esekiel i kamapim klia olsem em i no lusim lain bilong em. Em i tok: “Mi bai kisim yupela long olgeta kantri mi bin rausim yupela i go i stap nabaut long en, na bai mi bringim yupela i kam bek long kantri bilong yupela na givim dispela kantri long yupela gen.” (Esekiel 11:17) Bilong truim dispela tok promis long Israel bilong bipo, Jehova i givim wok long Sairus bilong Persia na em i daunim Bikpela Gavman Babilon, na dispela i opim rot bambai liklik hap lain bilong Israel i ken i go bek long ples bilong ol. Tasol olsem wanem long nau?
7 Bihain long yia 1914, wanpela bikpela samting i kamap bilong makim olsem dispela Man Sairus i Makim i kirap pinis long mekim sampela wok. Em husat? Em Krais Jisas tasol, em i kamap King long Kingdom bilong heven long yia 1914. Dispela bikpela King i bin mekim gut long ol brata spirit bilong em long yia 1919, taim em i lusim ol dispela Kristen long kalabus bilong spirit na ol i go bek long “graun” bilong ol, em i makim i stap bilong ol long ol samting bilong spirit. (Aisaia 66:8; KTH 18:4) Olsem na Esekiel 11:17 i gat truim long taim bilong yumi. Long taim bipo, Babilon i bin pundaun na dispela i opim rot long ol Israel i ken i go bek long graun bilong ol. Long nau “Israel tru bilong God” i bin kam bek long ‘graun’ bilong ol, na dispela i kamapim klia olsem Bikpela Babilon i pundaun pinis long han bilong dispela Man Sairus i Makim. Long Kamapim Tok Hait sapta 14, namba tu ensel i bin toksave long dispela samting taim em i singaut olsem: “Bikpela taun Babilon em i bagarap [olsem pundaun] pinis! . . . Dispela taun Babilon tasol em i bin mekim olgeta lain manmeri ol i bihainim strongpela pasin pamuk bilong em. I olsem em i bin givim strongpela wain long ol na ol i dringim.” (KTH 14:8) Em narapela kain samting tru i painim Bikpela Babilon, na i painim moa yet ol lotu i holim nating nem Kristen! Tasol em i bikpela blesing tru long ol trupela Kristen!
8 Long Esekiel 11:18-20, profet Esekiel i stori long amamas bilong lain bilong God taim em i kisim ol i kam bek long graun bilong ol. Long namba wan truim bilong tok bilong em long taim bilong Esra na Nehemia, ol Israel i bin mekim sampela samting bilong kamap klin. Na wankain samting olsem i bin kamap bilong truim dispela tok long taim bilong yumi. Yumi ken stori long olsem wanem dispela samting i bin kamap. Jehova i tok: “Taim yupela i kam bek, bai yupela i rausim olgeta giaman god na olgeta arapela stingpela samting i stap long dispela graun.” Olsem dispela tok profet i makim, kirap long 1919 Jehova i klinim lain bilong em na givim nupela strong long ol bilong mekim wok bilong em. Long ‘graun’ bilong ol, olsem i stap bilong ol long ol samting bilong spirit, ol i kirap long rausim olgeta pasin na bilip bilong Babilon i bin mekim ol i kamap doti long ai bilong Jehova.
9 Olsem yu inap lukim long ves 19, Jehova i tok moa olsem: “Bai mi givim nupela tingting na nupela bel long yupela. Bipo het bilong yupela i strong olsem ston. Tasol bai mi rausim dispela tingting nogut na bai mi givim gutpela nupela tingting long yupela.” Olsem dispela ves i tok pinis, long yia 1919 Jehova i givim “nupela bel” long ol wokman em i bin makim ol long spirit holi, na dispela i mekim ol i kamap wanbel long lotuim em. (Sefanaia 3:9) Na tu, Jehova i givim spirit holi long lain bilong em bilong strongim ol long mekim wok autim tok na bilong helpim ol long kamapim ol gutpela pasin olsem i stap long Galesia 5:22, 23. Na Jehova i givim nupela tingting long ol—nau het bilong ol i no strong moa olsem ston, nogat; ol bai redi long harim tok, na senisim tingting, na bihainim laik bilong Jehova.
10 Bilong wanem em i mekim olsem? Jehova yet i tokim yumi. Long Esekiel 11:20 em i tok olsem: “Olsem na bai yupela i bihainim gut olgeta lo na olgeta tok bilong mi. Na bai yupela i kamap lain manmeri bilong mi stret, na bai mi stap God bilong yupela.” Lain Israel tru bilong God i lain pinis olsem ol i mas bihainim lo bilong Jehova na no ken bihainim tingting bilong ol yet. Ol i lain pinis long mekim laik bilong God na no ken pret long ol man. Olsem na ol i stap narapela kain long ol Kristen giaman em ol i insait long ol lotu i gat nem Kristen. Ol i lain bilong Jehova. Long dispela as, Jehova i redi long mekim wok long ol olsem man bilong autim tok bilong em, em dispela lain “wokboi i gat gutpela tingting.”—Matyu 24:45-47.
Ol Man i Autim Tok Bilong God Ol i Amamas
11 Tingim bikpela amamas bilong ol taim ol i save gut olsem, Jehova i bin makim ol tasol bilong mekim dispela bikpela wok! Olsem wanpela lain, ol inap mekim wankain tok olsem i stap long Aisaia 61:10: “Bai mi singsing amamas long God, Bikpela bilong mi. Bai mi amamas moa yet, long wanem, em i bin kisim bek mi.” Dispela tok promis bilong Aisaia 35:10 i bin kamap tru long ol: “Ol manmeri Bikpela i kisim bek pinis, ol bai i amamas na kam bek long Jerusalem, na ol bai i singim song na bikmaus i kam long dispela rot. Na bai ol i gat gutpela sindaun tru na ol i amamas moa yet, na dispela amamas bilong ol bai i no inap pinis. Na pen na bel hevi bai i no inap i stap wantaim ol moa.” Yes, long yia 1919, ol man Jehova i bin salim bilong autim tok long bel isi em i save givim, ol i bin kisim kain amamas olsem taim ol i kirap long autim gutnius long olgeta man. Kirap long dispela taim na i kam inap nau, ol i no bin lusim dispela wok, na amamas bilong ol i go bikpela. Long bikpela tok Jisas i mekim antap long maunten, em i tok: “Ol manmeri i save mekim dai ol kros na pait, em ol i ken amamas. Bai ol i kolim ol pikinini bilong God.” (Matyu 5:9) Truim bilong dispela tok i bin kamap long lain remnan bilong “ol pikinini bilong God” kirap long yia 1919 na i kam inap nau.
12 Insait long sampela yia, namba bilong lain Israel tru bilong God i wok long go bikpela inap long 1935 samting; long dispela taim wok bilong bungim ol narapela bilong dispela lain God i makim i wok long pinis. Olsem wanem? Ating bihain lain bilong autim tok i stap olsem tasol na i no go bikpela moa? Nogat tru. Bikpela lain Kristen em ol i tingting long i stap long graun ol i bin stat long kamap, na ol i kirap autim tok wantaim ol brata bilong ol em God i bin makim ol. Aposel Jon i lukim dispela bikpela lain long driman, na yumi ken tingim gut dispela tok em i mekim long ol, olsem: “Ol i save sanap long pes bilong sia king bilong God. Na long san na long nait ol i save stap long haus bilong en na mekim wok bilong en.” (KTH 7:15) Yes, dispela bikpela lain i kirap long mekim wok bilong God. Olsem na taim namba bilong ol lain remnan i wok long i go daun bihain long yia 1935, ol dispela gutpela poroman bilong ol i wok strong i go moa yet long mekim dispela wok bilong autim tok.
13 Long dispela rot Aisaia 60:3, 4 i kamap tru olsem: “Ol arapela lain manmeri bai i lukim dispela lait bilong yu na ol bai i kam long yu. Na ol king tu bai i lukim dispela strongpela lait bilong yu, na ol bai i kirap i kam. Yu mas apim het bilong yu na lukluk nabaut, na bai yu lukim ol pikinini bilong yu i bung wantaim na ol i kam long yu. Ol pikinini man bilong yu bai i wokabaut i kam long ol ples i stap longwe. Na ol man bilong ol arapela kantri bai i putim ol pikinini meri bilong yu long bros bilong ol na karim ol i kam.” Aisaia 60:5 i stori gut long bikpela amamas ol dispela samting i kamapim long lain Israel tru bilong God, olsem: “Yu bai lukim dispela na pes bilong yu bai i lait moa yet. Na lewa bilong yu bai i kalap wantaim bikpela amamas. Ol bikpela sip bai i bringim planti gutpela samting i kam long yu. Na yu bai kisim planti mani samting long olgeta kantri bilong graun.”
Oganaisesen Bilong Jehova i Wok Strong i Go
14 Long yia 613 B.C.E., long wanpela driman Esekiel i bin lukim wanpela karis i wokabaut i go na i makim oganaisesen bilong Jehova long heven. (Esekiel 1:4-28) Bihain, Jehova i tokim em olsem: “Man bilong graun, yu go long ol manmeri bilong Israel na autim olgeta tok mi givim yu.” (Esekiel 3:4) Nau long dispela yia 1997, i olsem yumi inap lukim oganaisesen bilong Jehova long heven i wokabaut strong i go yet bilong kamapim laik bilong God. Olsem na dispela i kirapim yumi long wok yet long tokim ol man long ol dispela samting i mas kamap. Long taim bilong Esekiel, Jehova yet i bin givim ol tok long Esekiel na em i autim dispela tok. Long nau, yumi autim ol tok i stap long Baibel em Jehova i kamapim long spirit holi bilong em. Na dispela buk i gat gutpela tok tru ol man i mas harim! Planti man i tingting planti long ol samting bai kamap long bihain, tasol Baibel i kamapim klia olsem ol samting bai kamap i nogut tru, winim tru ol samting ol i ting bai kamap—na sampela samting i gutpela tru.
15 Sampela samting i laik kamap i nogut tru, long wanem, olsem yumi kisim save pinis long ol narapela stori i kamap pastaim, klostu nau ol lotu i holim nating nem Kristen na olgeta narapela lotu giaman bai bagarap olgeta, wankain olsem Jerusalem i bin bagarap olgeta long yia 607 B.C.E. Na i no dispela tasol, nogat. Olgeta lain politik bilong graun, em Buk Kamapim Tok Hait i tok piksa long ol olsem wanpela wel abus i gat 7-pela het na 10-pela kom, liklik taim na bai ol i bagarap—wankain olsem ol lain haiden i stap klostu long Jerusalem ol i bin bagarap. (KTH 13:1, 2; 19:19-21) Long taim bilong Esekiel Jehova i stori gut long bikpela pret tru bai kisim ol man taim ol i lukim Jerusalem i laik bagarap. Tasol ol man bai pilim moa yet ol tok bilong em taim ol i save olsem bagarap i laik painim ol lain bilong dispela graun. Jehova i tokim Esekiel olsem: “Man bilong graun, yu mas go long ples klia, na krai strong, olsem lewa bilong yu i laik bruk stret, na bai olgeta man i ken lukim yu. Na sapos ol i askim yu bilong wanem yu krai olsem, orait yu mas tokim ol olsem, ‘Bikpela hevi bai i kamap, olsem na mi krai. Na long dispela taim bai yupela i pret nogut tru na lek bilong yupela bai i seksek na bai yupela i no gat strong moa. Na dispela taim nogut i laik kamap nau. Dispela i tok bilong God, Bikpela.’ ” (Esekiel 21:6, 7; Matyu 24:30) Tru tumas, klostu nau ol samting bilong mekim ol man i pret nogut tru bai kamap long graun. Yumi tingim tru ol narapela man, na dispela i kirapim yumi long toksave long ol long belhat bilong Jehova i laik painim ol man.
16 Tasol long ol man i gat stretpela bel, ol samting i laik kamap bai i gutpela moa yet, winim ol samting ol i bin ting bai kamap. Gutpela moa olsem wanem? Olsem: Krais Jisas i bin dai bilong rausim sin bilong yumi na nau em i mekim wok king long Kingdom bilong God. (1 Timoti 1:15; KTH 11:15) Ol hevi bilong ol manmeri, em ol yet i no gat rot bilong stretim, liklik taim bai ol i pinis long rot bilong dispela Kingdom bilong heven. Indai, sik, pasin bilong paulim mani samting, hangre, pasin raskol—ol dispela samting bai pinis olgeta na Kingdom bilong God tasol bai bosim graun, em i kamap Paradais. (KTH 21:3, 4) Olgeta manmeri bai kisim bel isi bilong God; ol bai stap bel isi wantaim God na ol narapela man.—Song 72:7.
17 Long sampela hap bilong graun, ol bikpela lain manmeri i gat pasin daun ol i wok long bihainim dispela tok bilong bel isi God i save givim. Olsem: Long yia i go pinis namba bilong ol pablisa long Yukren i go antap inap 17 pesen, long Mosambik inap 17 pesen, long Lituenia inap 29 pesen, long Rasia inap 31 pesen, na long Albenia inap 52 pesen. Namba bilong ol pablisa i go antap tru na dispela i makim olsem planti tausen manmeri i gat stretpela bel ol i laik kisim bel isi God i save givim na ol i kamapim long ples klia olsem ol i laikim stretpela pasin. Lain pablisa i go bikpela hariap na dispela i givim amamas long ol bikpela lain brata Kristen i stap long olgeta hap.
18 Olsem wanem? Ol manmeri long hap bilong yu ol i save harim gut tok bilong Kingdom? Sapos ol i harim gut, mipela i amamas wantaim yu. Tasol long sampela teritori, ol Witnes i mas wok strong tru long autim tok inap planti aua bambai ol inap painim wanpela man i laik harim tok. Olsem wanem? Ol pablisa i wok long kain teritori olsem ol i les long mekim wok o bel bilong ol i bagarap? Nogat. Ol Witnes Bilong Jehova i tingim tok God i bin givim long Esekiel taim em i kirapim dispela yangpela profet long autim tok long ol wanlain bilong em ol Juda olsem: “Maski ol i harim tok bilong yu o nogat, bai dispela lain bikhet manmeri i ken save olsem, wanpela profet bilong mi i bin i stap wantaim ol.” (Esekiel 2:5) Wankain long Esekiel, yumi wok yet long tokim ol man long dispela bel isi God i save givim, maski ol i laik harim o nogat. Taim ol i harim, yumi amamas tru. Tasol taim ol i sakim yumi, o tok bilas long yumi, o mekim nogut long yumi, yumi mekim yet dispela wok, yumi no lusim. Yumi laikim tumas Jehova, na Baibel i tok: “Man i save givim bel bilong en long ol arapela . . . long taim bilong hevi em i save sanap strong.” (1 Korin 13:4, 7) Yumi sanap strong na i no les long mekim wok autim tok, olsem na ol man i save gut long ol Witnes Bilong Jehova. Ol i save long wanem tok yumi autim. Bihain, taim pinis i kamap, ol bai save olsem ol Witnes Bilong Jehova i bin traim long helpim ol long kisim dispela bel isi God i save givim.
19 Olsem wanem? I gat wanpela wok i winim dispela gutpela wok bilong Jehova yumi mekim? Nogat tru! Nambawan samting i save givim amamas long yumi, em yumi stap pren bilong God na yumi save olsem yumi mekim laik bilong em. “Ol manmeri i save mekim song na lotu long yu, na i save wokabaut long marimari bilong yu olsem ol i wokabaut long lait, ol i ken amamas.” (Song 89:15) Yes, oltaim yumi mas holimpas dispela amamas bilong yumi long i stap olsem man bilong autim tok long ol man long bel isi God i save givim. Na inap long taim Jehova i tok dispela wok i pinis, yumi olgeta wan wan i mas wok strong yet long mekim.
Yu Tingim Yet?
◻ Long nau husat ol i man bilong autim tok long bel isi God i save givim?
◻ Olsem wanem yumi save Bikpela Babilon i bin pundaun long yia 1919?
◻ Wanem samting em i nambawan bikpela samting long ol ‘bikpela lain manmeri’?
◻ Bilong wanem ol samting i laik kamap long nau i moa nogut, winim ol samting planti man i ting bai kamap?
◻ Long ol man i gat stretpela bel, bilong wanem ol samting i laik kamap i gutpela moa, winim ol samting planti man i ting bai kamap?
[Askim Bilong Stadi]
1. Long nau ol manmeri i sot tru long wanem samting?
2, 3. Olsem wanem Jehova i truim tok promis bilong em long Amos 3:7 long lain Israel bilong bipo?
4. Wanem samting i kamapim long ples klia olsem ol manmeri i mas i gat man bilong autim tok bilong gutaim long ol?
5. Olsem wanem Jisas i soim olsem long taim bilong yumi bai i gat man bilong autim tok?
6. (a) Stori long ol samting i painim lain “Israel tru bilong God” long taim bilong Namba Wan Pait. (b) Olsem wanem tok bilong Esekiel 11:17 i kamap tru long lain Israel bilong bipo?
7. Wanem samting i bin kamap long yia 1919 na dispela i soim olsem Jisas i bin daunim Bikpela Babilon? Stori long dispela.
8. Buk Esekiel i stori olsem wanem long amamas i painim lain bilong God bihain long taim ol i kamap fri long yia 1919?
9. Kirap long yia 1919, Jehova i givim wanem ol gutpela blesing long lain bilong em?
10. Bilong wanem Jehova i wok long blesim lain bilong em kirap long yia 1919?
11. Buk Aisaia i stori olsem wanem long amamas bilong lain bilong Jehova?
12, 13. (a) Husat i bung wantaim lain Israel tru bilong God bilong mekim wok bilong Jehova? Na ol i mekim wanem wok? (b) Ol wokman God i bin makim ol long spirit holi ol i kisim wanem bikpela amamas?
14. (a) Esekiel i lukim wanem driman long ol samting bilong heven? Jehova i givim wanem tok long em? (b) Long nau lain bilong Jehova i kisim wanem save? Na ol i pilim olsem ol i mas mekim wanem wok?
15. Bilong wanem ol samting i laik kamap long nau i moa nogut, winim ol samting planti man i ting bai kamap?
16. Long ol man i gat stretpela bel, bilong wanem ol samting i laik kamap i gutpela moa, winim ol samting planti man i ting bai kamap?
17. Namba bilong ol pablisa i go antap olsem wanem na dispela i givim amamas long ol man bilong autim tok long bel isi God i save givim?
18. Yumi gat wanem tingting long wok bilong autim tok, maski ol manmeri i harim tok bilong yumi o nogat?
19. Yumi ol wokman bilong trupela God, yumi amamas long mekim wanem bikpela wok?
[Ol Piksa long pes 21]
Ol man i tingting planti taim ol i lukim ol pasin bilong dispela graun i wok long go nogut moa
[Ol Piksa long pes 23]
Ol man bilong autim tok long bel isi God i save givim, ol i amamas tru, winim ol narapela lain