Husat Ol i Man Bilong Autim Tru Tok Bilong God?
“Taim wokman bilong mi i autim tok long wanpela samting, na taim mi givim tok long ol man long samting bai i kamap bihain, orait mi save mekim ol dispela tok i kamap tru tasol.”—AISAIA 44:26.
GOD JEHOVA em i Man bilong kamapim klia husat ol i man bilong autim tru tok bilong em. Em i mekim olsem taim em i truim ol tok em i givim long ol bilong autim. Na tu Jehova em i Man bilong kamapim klia husat ol i giaman long autim tok bilong em. Em i mekim olsem wanem? Em i paulim ol mak na tok profet bilong ol. Long dispela rot em i soim olsem ol i makim ol yet i kamap profet, na tok ol i autim i kamap long tingting bilong ol yet—em tingting longlong, na tingting bilong ol man bilong graun!
2 Aisaia na Esekiel, tupela wantaim i bin tok ol i man bilong autim tru tok bilong God Jehova. Tasol tru ol i man bilong autim tok bilong God? Nau bai yumi stori long dispela samting. Aisaia i mekim wok profet long Jerusalem kirap long yia 778 B.C.E. i go inap long yia 732 B.C.E. samting. Esekiel i stap kalabus long Babilon long yia 617 B.C.E., na em i autim tok profet long ol wantok Juda long dispela hap. Dispela tupela profet wantaim i tokaut strong long Jerusalem bai bagarap. Tasol sampela narapela profet i tok God i no inap larim dispela samting i kamap. Orait, husat ol i autim tru tok bilong God?
Jehova i Kamapim Ol Profet Giaman
3 Taim Esekiel i stap long Babilon, Jehova i givim em wanpela driman na em i lukim ol samting i kamap long haus bilong Jehova long Jerusalem. Long dua i stap long hap is, 25 man i stap. Jasania na Pelatia em tupela lida i stap namel long ol. Jehova i bin ting olsem wanem long ol? Esekiel 11:2, 3 i tok: “Man bilong graun, ol dispela man i save tingting long rot bilong mekim pasin nogut. Na ol i save givim tok kranki long ol manmeri. Ol i save tok olsem, ‘Yumi gutpela manmeri, olsem na bai yumi wokim ol haus na sindaun gut insait long taun bilong yumi.’ ” Ol dispela hambakman bilong autim tok bilong gutaim ol i laik tok, ‘I no gat wanpela samting nogut bai painim Jerusalem. Klostu nau bai yumi wokim sampela haus moa long en, a?’ Olsem na God i tokim Esekiel long autim tok profet bilong daunim tok bilong ol dispela profet giaman. Long ves 13 bilong sapta 11, Esekiel i tokim yumi long samting i bin painim wanpela bilong ol: “Mi wok yet long autim dispela tok bilong God, na mi lukim dispela lida Pelatia i dai.” Ating Pelatia i dai, long wanem, em i bikpela lida tru na man tru bilong lotuim god giaman. Wantu em i dai na dispela i kamapim klia olsem em i wanpela profet giaman!
4 Jehova i givim strafe long Pelatia, tasol dispela i no pasim ol narapela profet giaman long mekim tok giaman long nem bilong God. Ol dispela profet giaman i no lusim dispela longlong pasin bilong autim ol tok profet i no stret long laik bilong God. Olsem na God Jehova i tokim Esekiel: “Ol dispela longlong profet bai i bagarap. Ol i no save lukim ol samting olsem driman. Nogat. Dispela tok ol i save autim, em i kamap long tingting bilong ol yet.” Olsem Pelatia, ol bai “bagarap,” long wanem, ol i bin tokim ol Jerusalem olsem, “olgeta samting i stap gut.” Tasol long dispela taim olgeta samting i no i stap gut.—Esekiel 13:3, 15, 16.
5 Olgeta strongpela toksave bilong God long Jerusalem em Aisaia i bin autim, ol i kamap tru. Long taim bilong san long yia 607 B.C.E., ol Babilon i bagarapim Jerusalem na ol i kisim hap lain Juda i go kalabus long Babilon. (2 Stori 36:15-21; Esekiel 22:28; Daniel 9:2) Olsem wanem? Ol dispela hevi i bin pasim ol profet giaman long mekim planti tok profet giaman long lain bilong God? Nogat! Ol i mekim moa yet!
6 Na lain Israel i stap kalabus, ol i mas harim tu ol tok bilong ol hambak glasman bilong Babilon, na ol man bilong painim save long ol samting i stap hait, na ol man bilong lotuim ol sta. Tasol Jehova i kamapim klia olsem ol dispela man bilong giaman ol i longlong na ol i lus tru, na ol samting ol i tok bai kamap i narapela kain long ol samting tru i bin kamap. Bihain em i kamapim klia olsem Esekiel na Aisaia ol i man bilong autim tru tok bilong em. Jehova i truim olgeta tok em i kirapim ol long autim long rot bilong spirit holi bilong em, olsem em i bin tok promis: “Mi save trikim ol man i save mekim wok bilong tokaut long ol samting bai i kamap bihain, na tok bilong ol i save popaia. Na mi save paulim tingting bilong ol glasman. Na mi save mekim ol saveman i kamap olsem ol longlong man tasol. Tasol taim wokman bilong mi i autim tok long wanpela samting, na taim mi givim tok long ol man long samting bai i kamap bihain, orait mi save mekim ol dispela tok i kamap tru tasol.”—Aisaia 44:25, 26.
Ol Narapela Kain Tok Long Babilon na Jerusalem
7 Juda na Jerusalem bai i bagarap olgeta na bai i no gat man i stap long en inap 70 yia. Tasol long rot bilong Aisaia na Esekiel Jehova i bin tok profet olsem ol bai wokim gen Jerusalem na ol manmeri bai stap gen long dispela graun long taim stret Jehova i bin makim! Dispela em i narapela kain tok profet. Bilong wanem? Long wanem, ol Babilon i gat nem olsem ol i no save larim ol kalabus bilong ol i kamap fri gen. (Aisaia 14:4, 15-17) Olsem na husat inap helpim ol dispela kalabus long kamap fri? Husat inap daunim dispela strongpela taun Babilon i gat traipela banis na wanpela baret wara i raunim bilong pasim ol birua? Jehova i Gat Olgeta Strong em inap mekim! Na em i tok em bai mekim: “Mi tok, ‘Solwara, yu drai,’ [em ol wara i raunim taun] orait em i save drai. Na mi tok olsem, mi yet mi makim Sairus olsem king, bilong em i ken mekim olgeta wok mi laik bai em i mekim. Em bai i tok na ol bai i wokim Jerusalem gen. Na bai ol i stat long wokim haus bilong mi.”—Aisaia 44:25, 27, 28.
8 Man! Tingim dispela samting! Long ol man, wara Yufretis em i wanpela bikpela samting bilong pasim rot bilong ol, tasol long Jehova, em i kain olsem wanpela liklik hap wara tasol antap long wanpela samting i hat nogut tru! Wantu tasol dispela hap wara bai pinis! Babilon bai pundaun! Inap 150 yia paslain long taim Sairus bilong Persia i kamap, Jehova i tokim Aisaia long tok profet olsem dispela king bai daunim Babilon na helpim ol Juda i stap kalabus long kamap fri, na em bai putim tok long ol i mas wokim gen Jerusalem na haus lotu bilong en.
9 Yumi ken kaunim dispela tok profet long Aisaia 45:1-3: “Bikpela i tok olsem, ‘Mi bin makim Sairus bilong kamap king, na mi bin givim strong long em bilong daunim ol arapela kantri . . . Mi yet mi save opim ol dua bilong banis bilong ol taun, bai Sairus i ken i go insait na kisim ol taun. Na mi tokim Sairus olsem, “Bai mi go pas long yu na brukim ol ples maunten na mekim i kamap stretpela ples. Bai mi brukim ol bikpela dua ol i bin wokim long bras, na ol ba ain ol i bin putim bilong strongim ol dua. Bai mi givim yu ol mani na ol gutpela samting ol dispela lain i bin haitim long ol ples ol man i no inap lukim, na bai yu save, mi tasol mi Bikpela. Na bai yu save, God bilong Israel tasol i bin kolim nem bilong yu na singautim yu.” ’ ”
10 Jehova i toktok long Sairus olsem em i stap pinis. Dispela i stret wantaim tok bilong Pol olsem Jehova “i save tok tasol, na mekim kamap ol samting i no i stap yet.” (Rom 4:17) Na God i tok long Sairus olsem em i bin “makim” em. Bilong wanem em i tok olsem? Hetpris bilong Jehova i no bin kapsaitim wel long het bilong Sairus bilong makim em. Tasol long rot bilong tok profet Jehova i makim em. Em i givim wanpela bikpela wok o namba long em. Olsem na God i ken stori long Sairus olsem em i kapsaitim wel long het bilong em.—Skelim wantaim 1 King 19:15-17; 2 King 8:13.
God i Truim Tok Bilong Ol Man i Autim Tok Bilong Em
11 Long taim Sairus i go pait long Babilon, ol lain bilong taun i ting olsem ol i stap gut na ol man bai i no inap kisim taun bilong ol. Wanpela baret wara i op tru na i daun tru em i bin raunim taun, em i olsem wanpela han wara bilong wara Yufretis. Long ol hap em wara i ran namel long taun, na long arere bilong dispela wara long hap is, i gat wanpela longpela bris ol sip i save sua long en. Nebukatnesar i bin wokim wanpela traipela banis i sanap namel long bris na taun, em i kolim olsem “wanpela traipela banis, na i wankain olsem wanpela maunten, ol bai no inap rausim . . . Het bilong en [em] i mekim i go antap tru olsem wanpela maunten.”a Dispela banis i gat ol traipela dua bras. Man i laik go insait em i mas go antap long graun long arere bilong wara. Em nau, i gat as tru na ol kalabus bilong Babilon i save ting i no gat rot bilong lusim dispela ples na stap fri!
12 Tasol ol Juda i stap kalabus na i bilip long Jehova ol i no ting olsem! Ol i amamas long wetim wanpela samting. Long rot bilong ol profet, God i bin tok promis olsem em bai helpim ol long lusim dispela ples. Orait, God i truim dispela tok promis bilong em olsem wanem? Olsem: Sairus i tokim ami bilong em long senisim rot bilong wara Yufretis sampela kilomita longwe long hap not bilong dispela taun. Olsem na dispela nambawan samting bilong lukautim Babilon i kamap olsem ples i no gat wara moa long en. Long dispela nait, ol man i dring spak na amamas long Babilon ol i larim ol strongpela dua bras bilong taun long wara Yufretis i op i stap. Jehova i no bin brukim tru ol dua bras na ol ba ain ol i putim bilong strongim ol dua, tasol samting em i mekim bilong stiaim ol samting na bai ol dua i op i stap, i wankain olsem em i bin brukim. Ol banis bilong Babilon i no pasim ami bilong Sairus liklik. Ol i no gat wok long kalap i go antap long ol banis bilong go insait. Jehova i go pas long Sairus na i rausim ol “ples maunten,” em ol samting i laik pasim rot bilong ol. Dispela i kamapim ples klia olsem Aisaia em i man bilong autim tru tok bilong God.
13 Taim ami bilong Sairus i kisim taun olgeta, em i kisim tu olgeta mani na ol gutpela gutpela samting, maski ol i bin haitim long ol ples ol man i no inap lukim. Bilong wanem God Jehova i larim Sairus i kisim ol dispela samting? Em i mekim bambai Sairus i ken save olsem Jehova em Man i bin ‘kolim nem bilong em na singautim em,’ em i God bilong mekim ol tok profet i tru na em i King bilong heven na graun. Em i mekim bilong Sairus i ken save olsem God i mekim ol samting bilong em i ken kamap king na helpim lain bilong Em, Israel, long kamap fri.
14 Harim tok bilong Jehova i go long Sairus olsem: “Mi bin singautim yu long kam helpim wokman bilong mi, Israel, em ol manmeri mi bin makim bilong mi yet. Tru, yu no save long mi, tasol mi bin kolim nem bilong yu na givim bikpela namba long yu. Mi wanpela tasol mi Bikpela, na i no gat narapela god moa i stap. Yu no save long mi, tasol em mi tasol i save givim strong long yu. Mi mekim olsem, bai olgeta manmeri long olgeta hap bilong graun i ken save olsem, mi wanpela tasol mi Bikpela, na i no gat narapela god moa i stap. Mi tasol mi bin tok na tulait na tudak i kamap. Na mi tasol mi save mekim ol manmeri i stap gut, na mi save mekim ol i painim bikpela hevi. Mi Bikpela tasol, mi save mekim ol dispela samting i kamap.”—Aisaia 45:4-7.
15 Taim Sairus i daunim Babilon, em i mas givim biknem long Jehova long dispela samting, long wanem, Jehova i bin strongim em long kamapim laik bilong Em long daunim Babilon, em dispela taun nogut, na lusim lain bilong Em ol i stap kalabus. Taim em i mekim olsem, God i tokim skai bilong em long kapsaitim stretpela pasin. Em i tokim graun long kamapim ol gutpela samting olsem stretpela pasin namel long ol manmeri bilong em i stap kalabus, na bai God i ken kisim bek ol. Na i olsem skai na graun i bihainim dispela tok. (Aisaia 45:8) Winim wan handet yia bihain long taim Aisaia i dai, ol samting i kamapim klia olsem em i man bilong autim tru tok bilong Jehova!
Man Bilong Autim Tok i Givim Gutpela Tok Long Saion!
16 Tasol i gat sampela tok moa. Aisaia 52:7 (NW) i stori long Jerusalem i harim gutpela tok. Em i tok: “Man i ran i kam long ol ples maunten bilong bringim gutpela tok i kam, lek bilong em i naispela tru; em man bilong autim tok bilong bel isi, na gutpela tok bilong samting i gutpela moa, em man bilong autim tok long God i kisim bek ol, na em i tokim Saion olsem: ‘God bilong yu em i kamap king pinis!’ ” Olaman! Tingim bikpela amamas bilong ol Jerusalem taim ol i lukim wanpela man i kam long hap bilong ol maunten na em i bringim wanpela tok i kam! Em i bringim gutpela tok. Wanem dispela gutpela tok? Em gutpela tok long Saion. Em tok bilong bel isi, em tok bilong God i belgut long ol. Ol bai wokim gen Jerusalem na haus lotu bilong en! Na dispela man bilong bringim tok i kam em i singaut wantaim bikpela amamas na em i tok: “God bilong yu em i kamap king pinis!”
17 Taim Jehova i larim ol Babilon i kapsaitim sia king bilong em, em ol king long lain bilong Devit i bin sindaun long en, i olsem Em i no stap King moa. I olsem Marduk, em nambawan god bilong Babilon, i senisim em na i stap king. Tasol taim God bilong Saion i daunim Babilon, em i kamapim gen olsem em i King bilong heven na graun—em nambawan bikpela King. Na bilong kamapim long ples klia dispela samting, em bai i wokim gen Jerusalem, dispela “taun bilong Nambawan King,” na haus lotu tu. (Matyu 5:35) Dispela man i bringim gutpela tok i kam, long ai bilong ol man i laikim tumas Saion na God bilong en, lek bilong em i naispela tru, maski das i pas long lek bilong em, na lek i doti na i bagarap liklik!
18 Long tok profet, taim Babilon i pundaun dispela i makim olsem Kingdom bilong God i kamap pinis na man bilong bringim gutpela tok em i tokaut long dispela. Na dispela man bilong bringim tok em Aisaia i tok profet long em, em i makim wanpela man i bringim gutpela tok moa—em gutpela tok moa, long wanem, em i stori long Kingdom bai kamapim ol gutpela samting long olgeta manmeri i bilip.
19 Esekiel tu i kisim ol tok profet long ol samting bai kamap gutpela gen. Em i tok: “Mi God, Bikpela, mi tok moa olsem. . . . Bai mi larim yupela i wokim gen ol taun na ples ol birua i bin bagarapim, na bai yupela i stap long ol. Na ol man bilong ol arapela lain bai i tok olsem, ‘Bipo dispela graun i bus pinis, tasol nau i kamap gutpela tru olsem gaden Iden.’ ”—Esekiel 36:33, 35.
20 Taim lain bilong God i stap kalabus long Babilon, ol i bin krai sori long ol samting i kamap long Saion. (Song 137:1) Nau ol i ken amamas. Aisaia i tok: “Yupela ol hap bilong Jerusalem i bagarap pinis, yupela i mas amamas na singaut, long wanem, Bikpela i kisim bek Jerusalem pinis na em i pinisim pinis ol hevi bilong ol manmeri bilong en. Bikpela i soim pinis strong bilong en, bilong ol manmeri bilong olgeta kantri i ken lukim. God bilong yumi bai i kisim bek ol manmeri bilong en, na olgeta manmeri bilong graun bai i lukim.”—Aisaia 52:9, 10.
21 Tru tumas, i gat as tru na lain bilong Jehova i amamas. Ol bai sindaun gen long ol dispela hap em bipo i bagarap, na ol bai wokim gen ol gaden long en na mekim ples i kamap olsem gaden Iden. Jehova i “soim pinis strong bilong en” taim em i kisim bek lain bilong em na ol i kam bek long ples bilong ol em ol i laikim tru. Dispela wok bilong kisim bek lain bilong em i no wanpela liklik samting tasol ol man i no lukim, nogat. Olgeta man i stap long dispela taim ol i lukim ‘strong bilong em’ long stiaim wok bilong ol man bilong graun bambai em i ken kisim bek lain bilong em. Ol inap save tru olsem Aisaia na Esekiel ol i man bilong autim tru tok bilong Jehova. Olgeta man i ken save, long olgeta hap bilong graun God bilong Saion em wanpela tasol em i God tru i stap laip. Aisaia 35:2 i tok: “Ol manmeri bai i lukim strong na biknem na gutpela bilas bilong God, Bikpela bilong yumi.” Ol man i lukim ol dispela samting i kamap na ol i bilip olsem Jehova em i God tru, ol i kirap lotuim em.
22 Yumi mas tenkyu long Jehova i kamapim ples klia husat ol i man bilong autim tru tok bilong em! Tru tumas, em i Man bilong ‘givim tok long ol man long samting bai i kamap bihain, na em i save mekim ol dispela tok i kamap tru tasol.’ (Aisaia 44:26) Tok profet long ol samting i kamap gutpela gen em Jehova i bin givim long Aisaia na Esekiel, em i kamapim long ples klia bikpela pasin sori na marimari Jehova i mekim long ol wokboi bilong em. Tru tumas, Jehova em inap tru long yumi givim biknem long em long dispela samting em i mekim, a? Na yumi long nau i mas tenkyu tru long Jehova, long wanem, em i kamapim ples klia ol man i giaman long autim tok bilong God. Na nau i gat planti bilong ol i stap long olgeta hap. Ol tok ol i mekim i narapela kain long laik bilong Jehova olsem em i bin tokaut long en. Stori i kamap bihain bai helpim yumi long luksave long ol dispela man i giaman long autim tok bilong God.
[Futnot]
a Buk The Monuments and the Old Testament, bilong Ira Maurice Price, 1925.
Yu Inap Stori Long Dispela?
◻ Olsem wanem Jehova i kamapim klia husat ol i man bilong autim tru tok bilong em?
◻ Long rot bilong Aisaia, Jehova i makim husat long givim strafe long Babilon?
◻ Ol tok profet bilong Aisaia long Babilon i pundaun ol i kamap tru olsem wanem?
◻ Babilon i pundaun na dispela i mekim wanem gutpela samting long nem bilong Jehova?
[Askim Bilong Stadi]
1. Olsem wanem Jehova i kamapim klia husat ol i man bilong autim tru tok bilong em? Na olsem wanem em i kamapim klia husat ol i giaman long autim tok bilong em?
2. Long taim bilong ol Israel ol man i autim wanem tok i narapela narapela kain?
3, 4. (a) Ol i autim wanem ol narapela narapela kain tok long ol Israel i stap long Babilon? Na olsem wanem Jehova i kamapim klia husat i giaman long autim tok bilong em? (b) Wanem samting bai painim ol profet giaman olsem Jehova i tok?
5, 6. Maski i gat ol man i giaman long autim tok, olsem wanem Jehova i kamapim klia olsem Aisaia em i wanpela profet tru?
7, 8. Aisaia i autim wanem tok long Babilon? Na wanem insait bilong ol tok bilong em?
9. Jehova i makim husat long givim strafe long Babilon?
10. Jehova i “makim” Sairus long wanem rot? Na winim wan handet yia paslain long taim Sairus i kamap, Jehova inap toktok long em olsem wanem?
11. Bilong wanem ol man bilong Babilon i pilim olsem ol i stap gut?
12, 13. Olsem wanem tok bilong Jehova long rot bilong Aisaia i kamap tru taim Sairus i daunim Babilon?
14, 15. Olsem wanem yumi save taim Sairus i daunim Babilon em i mas givim biknem long Jehova long dispela samting?
16. Maski Jerusalem i bagarap i stap, ol inap autim wanem gutpela tok long en taim Babilon i pundaun?
17, 18. Sairus i daunim Babilon na dispela i mekim wanem long nem bilong Jehova yet?
19. Long rot bilong Esekiel Jehova i autim wanem tok long kantri Israel?
20. Aisaia i givim wanem gutpela tok profet long Jerusalem?
21. Bihain long Babilon i pundaun, olsem wanem ol tok bilong Aisaia 52:9, 10 i kamap tru?
22. (a) Long nau yumi mas tenkyu long wanem samting? (b) Bilong wanem yumi mas tenkyu long Jehova long kamapim ples klia ol man i giaman long autim tok bilong em?
[Piksa long pes 9]
Ol kantri long taim bilong Esekiel i ting i no gat wanpela lain inap daunim Babilon