Bikpela King Sairus

Long nait bilong Oktoba 5/6, 539 B.C.E., narapela kain samting i kamap long taun Babilon, em nambawan biktaun bilong Gavman Babilon. Long dispela nait wanpela bikpela samting i bin kamap, ami bilong Midia na Persia, em King Sairus bilong Persia i bosim—narapela nem bilong em Bikpela King Sairus—i kam insait na kisim taun Babilon. Samting em i mekim bilong daunim Babilon em i narapela kain stret.

SAIRUS I KISIM TAUN BABILON

Wanpela buk Ancient World Leaders—Cyrus the Great i tok: “Taim Sairus i tingting pinis long kisim Babilon, Babilon i gat biknem pinis namel long ol taun bilong Midel Is—na ating em i gat nem long olgeta taun long olgeta hap.” Taun Babilon i sindaun antap long wara Yufretis, olsem na wara i pulapim ol baret i raunim ol bikpela banis—ol baret wara na ol strongpela banis i mekim na i luk olsem ol birua i no inap go insait long taun.

Antap liklik long wara, ami bilong Sairus i wokim wanpela baret na i senisim ron bilong wara Yufretis, dispela i mekim na mak bilong wara i raunim taun em i go daun. Olsem na ol soldia i brukim wara na i go insait long ol bikpela dua bilong taun i bin op i stap na ol i kisim taun Babilon na i no gat wanpela samting i pasim ol. Ol saveman bilong Grik, em Herodotus na Senofon, tupela i tok, ol Babilon i ting strongpela banis na baret wara bai i lukautim ol, olsem na long dispela nait taim ami bilong Sairus i kam insait ol manmeri, na king tu, i mekim bikpela kaikai na ol i amamas! (Lukim blok “Hanrait i Stap Long Banis.”) Na taim Sairus i kisim Babilon dispela i truim sampela tok profet bilong Baibel.

Baibel i tok profet olsem Sairus bai daunim Babilon

OL SAMTING BAIBEL I TOK BAI KAMAP

Em i bikpela samting long tingim gut ol tok profet bilong Aisaia, long wanem, em i bin raitim 200 yia paslain tru—ating 150 yia paslain long Sairus i bon! Skelim ol dispela tok profet:

Wanpela man nem bilong em Sairus bai daunim Babilon na larim ol Juda i stap kalabus i go fri.—Aisaia 44:28; 45:1.
Wara Yufretis bai drai, na dispela i opim rot long ami bilong Sairus.—Aisaia 44:27.
Ol i larim ol dua bilong banis bilong taun i op i stap.—Aisaia 45:1.
Ol soldia bilong Babilon bai i “lusim pait.”—Jeremaia 51:30; Aisaia 13:1, 7.

GOD I KISIM BEK OL

Paslain long Sairus i daunim Babilon, ami bilong Babilon i bin kam na bagarapim Jerusalem na kisim planti bilong ol Juda i go kalabus long Babilon long yia 607 B.C.E. Ol Juda bai stap kalabus inap hamas yia? God i tok: “70 yia i pinis, . . . bai mi mekim save long king bilong Babilon na long ol manmeri bilong en, bilong bekim pasin nogut ol i bin mekim. . . . Na bai graun bilong Babilon i stap nating oltaim oltaim.”—Jeremaia 25:12.

Olsem stori i kamapim pinis, Sairus i kisim Babilon long yia 539 B.C.E. I no longtaim na em i larim ol Juda i go fri, na ol i go kamap bek long ples bilong ol long yia 537 B.C.E.—em olsem 70 yia stret bihain long taim Sairus i salim ol long go bek long asples bilong ol. (Esra 1:1-4) Tasol Babilon yet, isi isi em i kamap wanpela ples “nating”—dispela tu i kamapim klia olsem tok profet bilong Baibel i stret tru.

BILONG WANEM YUMI MAS TINGIM DISPELA SAMTING?

Tingim dispela: Baibel i tok profet olsem (1) ol Juda bai stap kalabus inap 70 yia, (2) Sairus bai daunim Babilon na ol samting em i bin mekim bilong kisim Babilon, na (3) Babilon bai stap nating. Ol man yet i no inap tokaut long ol samting bai kamap planti handret yia bihain! Olsem na em i klia tru: “Ol tok profet i no bin kamap long laik bilong ol man yet, nogat, holi spirit i kirapim ol long autim ol tok God yet i bin givim long ol.” (2 Pita 1:21) Tru tumas, em i bikpela samting long yumi mas skelim gut Baibel.

OL SAMTING I KAMAPIM KLIA

Ol saveman i bin ting Sairus i bon long yia 600 B.C.E. Na em i dai long pait long 530 B.C.E.
Ol man inap lukim yet matmat ston bilong Sairus long Pasargade, wanpela taun bilong Persia bilong bipo em Sairus i bin wokim, na long nau em i wanpela hap we ol saveman i wok long digim graun bilong painim ol samting bilong bipo long Iran.
The Cyrus Cylinder

Dispela ston i gat rait (Cyrus Cylinder)—longpela bilong en em 23 sentimita—i makim Sairus i winim pait na kisim taun Babilon na em i larim ol kalabusman, na ol Juda tu, long lusim kalabus. Ol i kolim dispela ston i gat rait olsem “wanpela bikpela samting long wok bilong ol saveman long painim ol samting bilong bipo we i kamapim klia olsem ol stori bilong Baibel em i tru.”
Ol Persia i tingim yet Sairus olsem man i gat biknem tru.

“HANRAIT I STAP LONG BANIS”

Long dispela nait taim Sairus i kam pait, King Belsasar bilong Babilon i mekim bikpela kaikai wantaim ‘1,000 bikman bilong en’ taim wanpela han i kamap nating. Long ai bilong olgeta, dispela han i raitim dispela tok, “KAUNIM, KAUNIM, SKELIM, BRUKIM” long simen bilong banis long haus king.a—Daniel 5:1, 5, 25.

Profet Daniel i kamapim mining bilong dispela tok long Belsasar husat i pret nogut tru. Daniel i tokim king olsem nau em i “las de” bilong yu long stap king, na God i bin “skelim pinis” pasin bilong yu na skel bilong en i soim olsem yu no mekim gutpela pasin, na em i givim pinis kantri Babilon ‘long ol Midia na ol Persia.’ (Daniel 5:26-28) Na ol dispela tok i bin kamap tru. Inap long nau, long sampela tokples dispela tok “Hanrait i stap long banis” i makim olsem bikpela bagarap i kam klostu tru o wok bai i no kamap gutpela.

a Dispela tok i makim hevi bilong wan wan mani long skel. Bilong kisim sampela save moa, lukim sapta 7 long buk Putim Yau Long Tok Profet Bilong Daniel!, em ol Witnes Bilong Jehova i wokim.