Rait i Kamap Long Wol

Bihain, Belsasar i kamap king bilong Babilon. Wanpela nait, em i invaitim planti tausen bikman long kantri i kam long wanpela bikpela kaikai. Em i tokim ol wokman bilong em long bringim ol gol kap Nebukatnesar i bin kisim long tempel bilong Jehova. Belsasar na ol man i kam long bung i dring long ol dispela kap na preisim ol god bilong ol. Kwiktaim, han bilong wanpela man i kamap na i raitim ol narakain tok long wol bilong ples kaikai.

Belsasar i pret nogut tru. Em i singautim ol man i save wokim mejik na promisim ol: ‘Sapos wanpela man inap kamapim mining bilong ol dispela tok, bai mi mekim em i kamap namba 3 bosman long kingdom bilong Babilon.’ Ol i traim, tasol no gat wanpela inap kamapim mining bilong ol tok. Bihain kwin i kam insait na tok: ‘I gat wanpela man nem bilong em Daniel, em i save kamapim mining bilong ol samting long Nebukatnesar. Em inap kamapim mining bilong ol dispela tok long yu.’

Daniel i kam long king. Belsasar i tokim em: ‘Sapos yu inap ritim na kamapim mining bilong ol dispela tok, bai mi givim yu wanpela gol nekles na mekim yu kamap namba 3 bosman long kingdom bilong Babilon.’ Daniel i tok: ‘Mi no laikim ol presen bilong yu, tasol bai mi tokim yu long mining bilong ol dispela tok. Papa bilong yu Nebukatnesar i gat pasin antap, na Jehova i daunim em. Yu save long olgeta samting i kamap long em, tasol yu no rispektim Jehova na dring wain long ol gol kap bilong tempel bilong Em. So God i raitim ol dispela tok: Mene, Mene, Tekel, na Parsin. Ol dispela tok i makim olsem ol Midia na Pesia bai pait na daunim Babilon, na yu no inap stap king moa.’

I luk olsem no gat man inap daunim Babilon. Dispela taun i gat ol strongpela banis na wara i daun tru. Tasol long dispela nait, ol Midia na Pesia i kam pait long ol. King Sairus bilong Pesia i senisim ron bilong wara i go long narapela sait na bai ol soldia inap mats i go stret long geit bilong taun. Taim ol i go, ol geit i op i stap! Ol ami i ran i go insait, pait na kisim taun, na kilim king. Na Sairus i kamap king bilong Babilon.

Insait long wanpela yia, Sairus i tok: ‘Jehova i bin tokim mi long wokim gen tempel bilong em long Jerusalem. Ol manmeri husat i laik helpim ol i ken go.’ Olsem Jehova i bin tok promis, 70 yia bihain long Jerusalem i bagarap planti Juda i go bek long ples. Sairus i salim i go bek gol na ol silva kap na plet samting em Nebukatnesar i kisim long tempel. Yu inap luksave hau Jehova i yusim Sairus long helpim ol manmeri bilong Em?