Man i Mekim Nogut Long Man—Klostu Bai Dispela Pasin i Pinis!

WANPELA man bilong raitim tok olsem song, nem bilong em Keats, em i tok: “Gutpela samting i save mekim bel i amamas oltaim.” Planti gutpela samting ol man i bin wokim, olsem ol gutpela piksa na samting ol i sapim long ston na ol gutpela buk—ol dispela samting i kamapim sampela pasin na save bilong man i bin wokim. Graun tu, dispela “gutpela samting” em ol kain kain samting i gat laip i pulap long en, na ol diwai i kamap long en, na ol samting i gat kain kain kala na kain kain swit bilong en, na planti samting moa bilong mekim bel i amamas, dispela i soim yumi, Man bilong wokim yumi em i gat olgeta save, na olgeta strong na olgeta pasin bilong sori.

Buk i winim olgeta narapela buk, em Baibel, em tu i wanpela “gutpela samting” na inap longtaim em i bin mekim bel bilong planti milion manmeri i amamas. Baibel i tok: “God i save laikim yumi tru,” na em i God bilong “marimari na sori.” Na Baibel i tok God i wokim man kain,olsem Em. (1 Jon 4:8; Eksodas 34:6; Jenesis 1:27) Planti manmeri ol i bihainim ol pasin bilong God na ol i save sori long ol man na mekim gut long ol. Ol i no laikim pasin bilong mekim nogut na bagarapim narapela man. Orait . . .

Olsem Wanem Pasin Bilong “Man i Mekim Nogut long Man” i Kamap Pastaim?

God i no as bilong dispela pasin. Paslain long taim God i wokim namba wan man na meri, em i redim wanpela gutpela ples bilong tupela i ken i stap long en. Em i bilasim wanpela hap bilong graun na putim ol diwai na purpur na diwai prut na wara na planti animal long en. Em wanpela gutpela ples Paradais! Tasol sapos ol i laik i stap oltaim long dispela gutpela ples, ol i mas bihainim tok bilong God. God i wokim tupela bambai tupela inap skelim na tingim wanem rot ol i laik bihainim. God i wokim ol manmeri i winim tru ol narapela samting em i bin wokim, na em i laik bai ol i givim bel tru long Em na dispela i ken kirapim ol long mekim wok bilong Em na bai ol i amamas long bihainim laik bilong Em.

Taim God wantaim ol ensel bilong em long heven i lukluk i kam daun long graun na lukim man na meri i stap isi long gutpela ples Iden, ating ol i amamas tru. God i laik bai graun olgeta i kamap wanpela gutpela ples Paradais na bai ol manmeri i amamas long i stap long en na bai ol i litimapim nem bilong Em.

Tasol ol ensel tu inap skelim na tingim ol samting ol i laik mekim. Wanpela ensel i laik kisim biknem na em i bikhet. Em i laik kamap wanpela god na bosim olgeta manmeri. (2 Korin 4:4) Olsem na em i painim rot bilong pulim Adam tupela Iv i go bihainim em. Em i laik grisim Iv long bihainim pasin bikhet bilong em na em i tok promis, olsem: “Bai yutupela i kamap olsem God.” Na em i tok moa olsem, “Yutupela i no ken dai.” Em namba wan tok giaman. (Jenesis 3:4, 5) Iv i bilipim tok giaman bilong Seten na Adam i bihainim meri bilong em. Nau dispela ensel i kamap birua bilong God, na em i kisim nem “Seten” (tok Hibru).

God i bin tokim Adam, sapos em i sakim tok em bai “dai.” (Jenesis 2:17) Seten i tok ol i no ken i dai, tasol em i giaman. Tok bilong God i stret—Adam tupela Iv i dai. Olsem na Seten i kamap “man bilong kilim man i dai.” (Jon 8:44) Pasin nogut bilong Seten i bagarapim bel isi bilong ol manmeri, ol i no inap i stap wanbel moa. Bihain namba wan pikinini man bilong Adam, em Ken, em i bel nogut long brata bilong em, Ebel, long wanem Jehova i laikim ofa bilong Ebel, tasol em i no laikim ofa bilong Ken. Olsem na “Ken i kros nogut tru” na em i kilim i dai Ebel. Em nau, pasin bilong “man i mekim nogut long man” i kamap.—Jenesis 4:2-8.

Kirap long taim Ken i kilim i dai Ebel, ol man i bihainim lotu giaman ol i bin birua long ol man i bihainim lotu i tru. Ebel i bihainim lotu i tru na em i dai. Bihain ol man i kilim i dai planti Witnes Bilong Jehova long dispela as tasol.

Bihain liklik long taim Ken i kilim Ebel, Seten i pulim sampela ensel na ol i kam daun long graun na tanim i kamap man na maritim ol meri i gat gutpela skin. Em nau, Seten i bosim ol dispela ensel tu. Ol dispela ensel wantaim meri bilong ol i kamapim pikinini. Ol dispela pikinini i kamap “strongpela man tru,” na ol i save bagarapim ol narapela man. I no longtaim na “pasin nogut na pasin pait em i go pulap pinis long olgeta hap.” Pasin bilong “man i mekim nogut long man,” dispela pasin i wok long kamap bikpela moa. (Jenesis 6:1-11) Jehova em i God bilong stretpela pasin na pasin marimari, olsem na em i no inap larim dispela pasin nogut i stap long graun. Olsem na long taim bilong Noa, Jehova i salim Tait Wara na em i pinisim dispela pasin nogut.—2 Pita 2:5.

Tasol dispela samting i no pinisim strong bilong Seten. Long taim bilong Tait Wara, ol dispela ensel nogut i tanim i kamap spirit gen. Tasol ol i no inap bung moa wantaim ol ensel holi bilong Jehova long heven, olsem na ol i kamap wanpela lain ensel nogut, em Seten i bosim ol. (Efesas 6:12) Ol i giamanim ol man long rot bilong posin na kain kain wok marila, na ol i kirapim ol man long traim toktok wantaim man i dai pinis bilong save long ol samting i laik kamap bihain, na lukluk long sta samting bilong painim save. God i pasim ol spirit nogut long tanim i kamap man gen, tasol planti taim ol i save stap insait long wanpela man o animal o wanpela samting ol man i wokim posin o marila samting long en. Ol spirit nogut na lotu giaman na pasin bilong litimapim ples na pasin bilong birua long man bilong narapela skin, ol dispela samting i kirapim ol man long mekim narapela kain pasin. Ol i no sori liklik long ol narapela man, ol i mekim nogut tru long ol.

Olsem na nau yumi save bilong wanem ol i save mekim nogut long ol man bilong sampela lotu long nau. Pastaim yumi bin stori long sampela Kristen i bung wantaim na ol polis i kam paitim ol nogut tru na klostu ol i dai. Dispela hevi i painim dispela lain, long wanem ol i Witnes Bilong Jehova. Long dispela taim ol dispela Kristen i no i dai. Taim polis i paitim nogut man i lukautim dispela miting, em i wok long beten long Jehova na askim em long ‘lukautim laip bilong ol dispela “sipsip” bilong Em.’ Ol polis i kirap nogut. long wanem i no gat wanpela i dai. Sapos Jehova i laik, em inap lukautim lain bilong Em.—2 Kronikel 16:9.

Long Amerika ol blakskin na waitskin i stap birua birua, na sampela taim bikpela lain i bung na ol i kilim i dai man bilong narapela skin. Long Afrika sampela waitskin i mekim pasin antap na i laik daunim ol blakskin. Ol lotu i bin wok wantaim ol gavman long mekim kain kain pasin nogut long sampela man na stori bilong dispela i pulap long ol buk i stori long ol samting i bin kamap long bipo. Wanpela profesa. em E. Bolaji Idowu, bilong Yunivesiti: Ibadan long Naijiria, em i tok: ‘Ol lotu bilong nau i sem long ol samting nogut ol pris i bin mekim, em ol i tok ol i wokman bilong God, tasol ol i bin giamanim ol man na mekim nogut tru long ol, . . . Ol manmeri i no inap lusim tingting long ol pait ol Kristen i bin mekim bilong daunim ol haiden, na ol pait nogut ol Moslem i bin mekim, na pasin nogut ol Katolik long Spen i bin mekim long ol man i no laik bihainim lotu Katolik. Ol i bin kukim ol man long paia na bagarapim skin bilong man na bagarapim ples bilong ol.’

Dispela Pasin Bai Pinis Olsem Wanem?

Ol man i no inap pinisim dispela pasin nogut. Sampela lain long graun ol i wok long stretim sindaun bilong ol man, tasol pasin bilong ol man i go nogut moa yet, olsem na wok bilong ol dispela lain i lus nating.

Tasol Jisas i tok: “Samting man i no inap mekim, em God inap mekim.” (Luk 18:27) Na em i tokim ol disaipel bilong em: “Bel bilong yupela i ken i stap strong. Mi winim pinis pasin bilong dispela graun.”(Jon 16:33) Seten em i nambawan birua bilong Jehova, olsem na Seten i no laikim tru Jisas. Long rot bilong ol hetman bilong gavman na bilong lotu Seten i wok long kilim i dai Jisas—kirap long taim King Herot i laik kilim em i dai i go inap long taim ol pris i mekim wok long strong bilong gavman bilong Rom na kilim em i dai long pos pen. Na Seten i laik pulim Jisas long bihainim em. Em i tok sapos Jisas i brukim skru long em, em bai givim “olgeta kingdom bilong dispela graun wantaim ol gutpela samting bilong ol” long Jisas. (Matyu 4:8) Tasol Jisas i sakim olgeta samting Seten i mekim, na Seten i no inap pundaunim em. Maski ol i wipim em na hangamapim em long wanpela diwai, tasol Jisas i stap gut long Jehova i go inap long taim em i dai.

Taim Jisas i hangamap long pos na em i laik i dai, ating Seten i ting em i win. Tasol long dispela taim, wanpela samting i bin kamap na yumi ken save Seten i no win. Taim ol i hangamapim Jisas 1ong pos, ol i hangamapim wanpela stilman long wanpela pos klostu long em. Dispela man nogut i tok: “Jisas, bihain bai yu kamap long [kingdom] bilong yu, orait yu tingting long mi.” Long rot bilong Jisas, dispela man nogut i kisim save olsem kingdom bilong God tasol inap helpim ol manmeri. Jisas i tok olsem: “Mi tok tru long yu tude: Bai yu stap wantaim mi long Paradais.”—Luk 23:42, 43, NW.

Jisas i stori long Kingdom bilong em bai inapim laik bilong God bilong pastaim na kamapim bek Paradais long graun. Tasol Paradais bai kamap long wanem taim? Em bai kamap olsem wanem? Ol lain bilong Seten i mas pinis pastaim. Ol samting i kamap nau i soim yumi, klostu nau bai dispela samting i kamap.

Ol disaipel i askim Jisas long wanem taim pinis bai kamap. Na Jisas i tok bai narapela lain i pait wantaim narapela lain, na bai i gat hangre, na guria, na bikpela sik, na pasin nogut, na bai i gat kain kain samting i kamap long heven, na bai ol man i pret long wanem ol i no save long ol samting bai kamap long bihain. Na em i stori long sampela samting moa em i olsem mak bilong dispela pasin bilong nau i laik pinis. (Matyu 24:3-14; Luk 21:10, 11, 25, 26) Ol dispela samting i kamap bikpela bihain long yia 1914. Jisas i tok: “Bihain ol dispela samting i stat long kamap, long dispela taim yupela i mas sanap . . . Taim bilong God i kisim bek yupela em i kam klostu nau. . . . orait yupela i ken save, kingdom bilong God i kam klostu pinis.” (Luk 21:28, 31) Em nau, dispela pasin bilong “man i mekim nogut long man” dispela pasin bai pinis.

Long dispela as tasol ol Witnes Bilong Jehova i save wok strong long lainim tok bilong Baibel na bihainim ol dispela tok na stretim pasin bilong ol. Ol i no insait moa long ol wok politik, na ‘ol i no lain moa long pait’’ Ol i wok long bihainim pasin isi na ol i sori long ol narapela man. Jisas i tok: “Ol man i no save hambak na bikhet,” na “ol man i save mekim dai ol kros na pait, em ol i ken amamas. Bai ol i kolim ol pikinini bilong God.”—Aisaia 2:4; Matyu 5:5, 9.

Paradais i Kamap Bek

Long taim stret olsem God i makim, Krais Jisas bai pait wantaim “ol king bilong graun, wantaim ol ami bilong ol,” na em bai klinim dispela graun na rausim ol samting bilong Seten. Long dispela taim “bai i gat bikpela hevi tru. Long taim graun i nupela yet inap nau, kain hevi olsem i no bin kamap bipo.” Jisas bai winim pait, na em bai kalabusim Seten wantaim ol ensel nogut inap 1,000 yia, na bai ol i no inap mekim nogut moa long ol manmeri.—Matyu 24:21; Revelesen 16:14-16; 19:11-20; 20:1-3.

Na bihain wanem samting bai kamap? Bai i gat “nupela skai na nupela graun, na bai stretpela pasin tasol i stap long en.” Kingdom bilong God bai bosim olgeta hap na bai ol i ‘bihainim laik bilong God long graun olsem ol i mekim pinis long heven.’ (2 Pita 3:13; Matyu 6:10) Taim Kingdom i bosim graun, graun bai wok long kamap ples Paradais gen. Na dispela stilman ol i kilim wantaim Jisas, em bai kirap bek na stap long dispela Paradais. Em bai kirap bek wantaim planti milion manmeri moa, em ol i stap long matmat. Bai ol i harim maus bilong Jisas na “lusim matmat na i kam ausait.”—Jon 5:28, 29.

Taim dispela man bipo em i mekim pasin nogut em i kirap bek, em bai lukim wanem kain pasin long graun? Em bai lukim pasin giaman na pasin nogut bilong Rom na ol narapela gavman i pinis olgeta! Long nau ol manmeri i bihainim pasin bilong Seten na ol i tingim ol yet tasol na bihainim olgeta laik nogut bilong skin na bel nogut long narapela man na ol i pret. Tasol dispela olgeta pasin bai pinis na bai olgeta manmeri long graun i stap bel isi na amamas na bai ol i tingim gut ol narapela man na i stap wanbel. Long nau, ol Witnes Bilong Jehova i stap long paradais bilong spirit, na bihain dispela samting bai kamap long olgeta hap bilong graun. “Pasin bilong olpela bel,” olsem “pasin pamuk, na pasin doti, na bel i kirap, na bihainim god giaman, na posin, na pasin birua, na kros, na bel nogut, na mangal, na hambak, na tok pait, na brukim lain, na tingting nogut, na spak, na singsing nogut, na kain kain pasin olsem,” ol dispela pasin bai pinis. Long wanem, “olgeta man i mekim kain pasin olsem, bai ol i no kisim kingdom bilong God.”—Galesia 5:19-21.

Ating dispela stilman i bin mekim kain pasin olsem, tasol taim em i kirap bek, God i no ken tingim ol dispela samting em i bin mekim. “Long wanem man i dai pinis, em i no pas moa long sin.” Dispela stilman i kisim pinis pe bilong sin. “Dispela pe em dai tasol.” Na nau rot i op na em inap kisim “presen” God i save givim long yumi, em “laip i stap oltaim. Dispela laip yumi kisim long wok bilong Jisas Krais. Bikpela bilong yumi.”—Rom 6:7, 23.

Dispela stilman bai amamas tru! Gutpela samting tru bai painim dispela stilman wantaim ol planti milion manmeri moa! Taim Kingdom bilong God i bosim graun long stretpela na gutpela pasin. Kaikai bai kamap planti na graun bai kamap gutpela ples tru. Bai ol man i bosim gut ol animal olsem long pastaim long taim God i bin wokim ol. (Jenesis, 1:28; Aisaia 11:6-9) Dispela Paradais long graun, em bai kamap wanpela “gutpela samting” bilong amamas oltaim long en.

Na bikpela samting em olsem: Taim Jehova i kapsaitim spirit holi bilong em. bai ol manmeri i bihainim ol gutpela pasin spirit holi i save kamapim—em “pasin bilong sori, na amamas, na bel isi, na pasin bilong larim ol i rongim yumi, na pasin bilong helpim ol man na mekim gutpela pasin long ol, na wokabaut stret oltaim, na pasin bilong isi isi, na daunim laik bilong olpela bel. “(Galesia 5:22, 23) Ol manmeri bilong kain kain skin na kain kain lain, ol bai kamap olsem wanpela bikpela famili, olsem ol brata brata. Dispela samting bai kamap olsem wanem? Bai ol i “kisim dispela pasin bilong sori” i save “pasim olgeta wantaim.” Pasin bilong “man i mekim nogut long man,” dispela pasin bai pinis olgeta.—Kolosi 3:14.