Mekim Beten Bilong Helpim Ol Brata

“Yupela i mas prea long God i helpim mipela.”—2 TESALONAIKA 3:1.

1-3. (a) Olsem wanem na lain bilong Jehova ol i no ken pret long i go klostu long Em long rot bilong beten? (b) I gat wanem ol samting na ol Witnes Bilong Jehova i mas kamap man bilong beten?

JEHOVA em i Man bilong “harim beten.” (Sam 65:2) Olsem na ol gutpela wokboi bilong em i no ken pret long i go klostu long em na beten long em na tok tenkyu long em. I gat planti samting na ol Witnes Bilong Jehova i kamap man bilong beten.

² Wanpela samting em olsem: Krais Jisas i lainim ol disaipel bilong em long mekim beten. Em i tokim ol: “Taim yupela i beten, yupela i ken tok olsem: ‘Papa, nem bilong yu i mas i stap holi. Kingdom bilong yu i mas i kam. Kaikai bilong mipela inap long de, yu ken givim mipela long olgeta de. Lusim sin bilong mipela olsem mipela tu i lusim sin bilong olgeta man i bin mekim sin long mipela. Yu no bringim mipela long traim.’” (Luk 11:2-4) Yumi lukim dispela beten na yumi save, yumi mas beten long ol samting bilong God pastaim, na yumi ken beten askim God long samting bilong yumi yet. Na ol tok bilong dispela beten i soim yumi, taim yumi beten yumi mas tingim ol narapela man tu.

³ Ol aposel bilong Jisas i kirapim ol brata long mekim beten. Aposel Pol i tok: “Yupela mas beten long olgeta taim,” na “Yupela i mas beten oltaim oltaim.” (Rom 12:12; 1 Tesalonaika 5:17) Na aposel Pita i tok: “Taim bilong olgeta samting i laik pinis em i klostu nau. Olsem na yupela i mas tingting gut, na tingting klia, na mekim prea oltaim.” (1 Pita 4:7) Tupela i givim gutpela tok long yumi!

Beten Inap Helpim Yumi Olsem Wanem?

4. Ol gutpela wokboi bilong Jehova i mas mekim wanem na bai Em i harim beten bilong ol?

⁴ Wanpela man bilong raitim tok olsem song, em Alfred Tennyson, em i tok: ‘Ol manmeri i no save, tasol strong bilong beten i kamapim planti samting.’ Dispela tok i stret! Tasol sapos yumi laik bai God Jehova i harim beten bilong yumi, yumi mas bilip na beten long em long rot bilong Krais Jisas. Na ol samting yumi beten askim God long en, em i mas stret wantaim laik bilong God, na yumi mas beten long pasin i stret. (Jon 14:6; 1 Jon 5:13-15) Wanpela man i tok: ‘Taim yumi beten, maski yumi mekim ol gutpela gutpela tok, na mekim longpela beten, na beten planti taim, na kamapim tok i gat save, tasol God i no tingim dispela samting. God i save skelim bel bilong yumi—yumi bilip tru na yumi beten o nogat.’—Pasto Thomas Brooks bilong Englan long namba 17 senseri.

5. (a) Beten inap helpim yumi olsem wanem? (b) Orait, nau yumi laik tingim wanem askim long beten?

⁵ Sapos yumi beten long olgeta taim na yumi bilip tru na yumi beten, dispela samting bai helpim yumi long pas moa yet long Jehova. Sapos long pasin daun yumi beten long God na yumi givim bel long beten, dispela bai helpim yumi long mekim wok bilong yumi, em wok bilong autim tok. (Matyu 24:14; 28:19, 20; 2 Korin 2:17) Beten i helpim yumi long tingim gut ol samting yumi laik mekim na mekim pasin i stret long ai bilong Papa bilong yumi long heven. Beten i helpim yumi long karim hevi na sanap strong. (Sam 109:3, 4; 119:86) Na beten i givim rot long yumi bambai yumi ken tenkyu long God Jehova. Na yumi ken mekim beten bilong helpim ol brata. Tasol olsem wanem dispela kain beten inap helpim yumi yet na ol brata tu?

Bilong Wanem Yumi Mas Beten Bilong Helpim Ol Brata?

6. Jisas i beten bilong helpim husat? Olsem na i stret yumi ken beten bilong helpim husat?

⁶ Jisas, dispela Man i makim pasin yumi mas bihainim, em i beten bilong helpim ol disaipel bilong em. Em i beten strong long Jehova na em i tok: “Mi beten bilong helpim ol. Mi no beten bilong helpim ol manmeri bilong graun. Mi beten bilong helpim ol dispela man yu bin givim mi. Long wanem ol i bilong yu.” Jisas i dai bilong helpim ol manmeri bilong graun, tasol em i no beten bilong helpim ol manmeri i givim baksait long God. Ol manmeri i lusim pasin bilong dispela graun na ol i bilip long Jisas, Jisas i beten bilong helpim ol. (Jon 3:16, 17; 17:8, 9; skelim wantaim tok bilong 2 Pita 2:5; 3:6.) Yumi ken bihainim pasin bilong Jisas na beten bilong helpim ol kain manmeri olsem, em ol i bilip long God.

7. Wanem pasin bilong ol aposel i kirapim lain bilong Jehova long mekim beten bilong helpim ol brata?

⁷ Aposel Pol i beten bilong helpim ol brata Kristen. Em i tokim ol Kristen long Efesas: “Mi harim tok long yupela i bilip tru long Bikpela Jisas, na yupela i save givim bel bilong yupela long olgeta manmeri bilong God. Olsem na oltaim mi tenkyu long God long yupela. Mi no save lusim. Long prea bilong mi, oltaim mi tingting long yupela na mi prea bilong helpim yupela.” (Efesas 1:15, 16) Pol i kirapim ol brata long mekim beten bilong helpim em na ol narapela tu. Em i tokim ol Efesas ol i mas “pasim olgeta klospait God i save givim long yumi,” na ol i mas “holim bainat bilong Holi Spirit, em tok bilong God,” na bihain Pol i tok “Long strong bilong Holi Spirit yupela i mas prea oltaim. Yupela i mas strong long mekim kain kain beten na singaut long God. Oltaim yupela i mas was gut. Yupela i no ken malolo. Oltaim yupela i mas prea bilong helpim ol Manmeri bilong God. Na yupela i mas prea bilong helpim mi tu. Mi laik bai yupela i prea olsem: God i ken putim tok long maus bilong mi, na mi ken daunim pret na autim tru tok hait bilong gutnius.” (Efesas 6:11-19) Dispela pasin bilong ol aposel tu i kirapim lain bilong Jehova long beten bilong helpim ol brata.

8. Bilong wanem i stret ol Kristen bilong “liklik lain” na ol Kristen bilong ‘bikpela lain’ narapela i ken beten bilong helpim narapela?

⁸ Ol Witnes Bilong Jehova i stap long olgeta hap bilong graun na ol i stap olsem ol brata brata. Ol disaipel bilong Krais ol i bilong lain bilong heven, ol i “wanbel wantaim” God na Pikinini bilong Em na ol wanlain bilong ol. (1 Jon 1:3, 7) Tasol Jisas i tok olgeta disaipel bilong em i mas i stap wanbel wantaim na laikim tru ol brata. Aposel Pita i tok: “Yupela i mas ․․․ givim bel bilong yupela long ol Kristen brata.” (1 Pita 2:17; Jon 13:34, 35) Olsem na i stret ol Kristen bilong lain bilong heven wantaim ol poroman bilong ol bilong ‘bikpela lain,’ ol i mas beten bilong helpim ol brata! (Revelesen 7:9) Tasol ol i mas beten askim God long helpim ol brata long wanem ol samting?

Bilong i Stap Wanbel, Soim Rot, Givim Save

9. Bilong wanem yumi mas beten bilong ol brata i ken i stap wanbel?

⁹ Yumi mas beten askim God long helpim ol brata bambai yumi ken i stap wanbel. Jisas i beten bilong ol disaipel bilong em ol i ken i stap wanbel wantaim em na Papa bilong em. Na Pol i tokim ol brata, ol i mas i stap “wanlain tru long wankain tingting na wankain laik.” (1 Korin 1:10; Jon 17:20, 21) Ol manmeri i givim bel tru long Jehova, ol i save stap wanbel olsem ol brata tru. Em i olsem wanpela mak bilong ol. Baibel i tok: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas.” (Sam 133:1-3) Wanpela rot bilong helpim ol brata long i stap wanbel em olsem: Yumi ken beten askim God long helpim ol long i stap wanbel.

10. Bilong wanem yumi mas beten askim God long givim spirit bilong em bilong soim rot long ol brata na helpim ol?

¹⁰ Yumi mas beten askim God long givim spirit bilong em long lain bilong em bilong soim rot long ol na helpim ol wok bilong ol. Ating sampela brata i kisim sampela wok bilong God i hatwok liklik long mekim na ol i no inap mekim long strong bilong ol yet. Long rot bilong spirit holi Jehova i mas helpim ol dispela gutpela Kristen, na em i mas helpim yumi tu.—Sekaraia 4:6; skelim wantaim Luk 11:13; Aposel 8:14, 15.

11. Yumi ken beten olsem wanem long save na gutpela tingting?

¹¹ Yumi ken beten askim God long givim gutpela save na tingting long ol brata. Pol i tokim ol Kristen long Kolosi: “Mitupela i save beten long God i ken helpim yupela, na yupela i ken save long laik bilong em. Na bai Holi Spirit i ken givim yupela ol kain gutpela save na tingting. Na dispela i ken pulap tru long yupela. Olsem na bai yupela inap wokabaut olsem man tru bilong Bikpela, na bai em i laikim olgeta pasin bilong yupela.” (Kolosi 1:9, 10) Na i stret yumi ken beten askim God long givim “gutpela tingting” long ol brata i bosim wok bilong autim tok bilong Kingdom na redim ol buk bilong yumi. (Efesas 1:15-17) Yu save beten askim God long helpim ol brata i bosim wok bilong autim tok na wok bilong redim ol buk na magasin, em ol dispela buk na magasin i givim kaikai bilong spirit long yumi “long taim bilong en.”—Matyu 24:45-47

Bilong Mekim Gut Wok Autim Tok Maski Hevi

12. Olsem wanem long tok bilong 2 Tesalonaika 3:1 na pasin bilong beten bilong helpim ol brata?

¹² Yumi mas beten tu bilong ol brata i ken mekim gut wok bilong autim tok bilong Kingdom. Pol i tok: “Ol brata, ․․․ Yupela i mas prea long God i helpim mipela, na bai tok bilong Bikpela i ken ran i go long olgeta hap na kisim biknem, olsem em i mekim namel long yupela.” (2 Tesalonaika 3:1; skelim wantaim Efesas 6:18, 19.) Yes, Pol i tokim ol brata long beten bilong helpim em wantaim ol poroman bilong em bambai ol i ken mekim gut wok bilong autim “tok bilong Bikpela.” Yumi tu i ken beten askim God long helpim yumi bambai tok bilong God na wok bilong Kingdom i ran i go long olgeta hap. Taim yumi beten olsem yumi tingim olgeta brata sista ol i wok strong long mekim wok bilong Jehova nau long “las taim.”—2 Timoti 3:1-5.

13. (a) Long 1 Timoti 2:1, 2 Baibel i tok wanem long beten bilong helpim ol gavman samting?

¹³ I stret lain bilong Jehova ol i ken beten long God i ken helpim ol hetman na gavman tu. Pol i tok: “Orait, dispela wok mi laik kirapim yu long mekim, namba wan tok bilong em i olsem: Yupela i mas singaut long God long prea, na beten long em i helpim olgeta man, na ol king na ol gavman tu.” Tasol ol dispela beten i bilong helpim tru ol manmeri bilong God, long wanem Pol i tok moa olsem: “Yupela i mas beten olsem bai yumi olgeta i ken i stap bel isi, na yumi ken bihainim tru stretpela pasin bilong God.” (1 Timoti 2:1, 2) God i tokim ol Juda i stap kalabus long Babilon ol i mas ‘beten askim Jehova long helpim dispela taun, long wanem, bel isi bilong en bai helpim ol long i stap bel isi tu.’ (Jeremaia 29:7) Olsem na i stret yumi ol Witnes Bilong Jehova i ken beten askim God long helpim ol hetman na ol gavman bambai yumi yet na ol narapela brata tu i ken i stap bel isi na mekim wok bilong autim tok bilong Kingdom. Tasol sapos ol man i mekim nogut long yumi, yumi ken beten askim God long helpim yumi na ol narapela brata long daunim pret na autim tru tok bilong God. Na yumi ken save, God bai harim beten bilong yumi na helpim yumi.—Aposel 4:29-31; 5:29.

14. Yumi tingim wanem ol tok bilong Baibel na yumi beten askim God long strongim ol brata i karim hevi?

¹⁴ I stret yumi ken beten askim God long helpim na strongim ol brata i karim hevi, long wanem ol man i mekim nogut long ol. Long hap bilong Esia, em biktaun Efesas i stap long dispela hap, ‘bikpela hevi moa’ i laik daunim Pol na i winim tru strong bilong em na em i ting bai em i dai. Ating em i bin pait long ol wel abus long Efesas! Olsem na Pol i tokim ol Kristen long Korin: “Yupela i mas helpim mipela long prea. Olsem na bai God i harim prea bilong planti manmeri na em i helpim mipela. Na bai planti manmeri i ting long mipela na tenkyu long God long dispela samting em i mekim.” (2 Korin 1:8-11; Aposel 19:23-41; 1 Korin 15:32) Long nau tu yumi mas beten askim Jehova long helpim na strongim ol brata i karim hevi.—2 Korin 1:3-7.

15. Maski yumi yet yumi stap kalabus, tasol yumi inap mekim wanem bilong helpim ol brata ol man i mekim nogut long ol?

¹⁵ Taim hevi i painim ol brata o ol man i mekim nogut long ol, yumi mas beten bilong helpim ol. Long kain taim olsem, ating yumi stap longwe long ol na i no gat narapela rot bilong helpim ol. Ating yumi yet i stap kalabus! Tasol sapos yumi beten askim God long helpim ol brata, dispela inap helpim ol tru. Taim yumi stap laip yet yumi inap beten. Ol birua i no inap pasim ol dispela beten. Maski yumi beten long bel tasol, tasol ol dispela beten i gat strong na i mekim wok.—Skelim wantaim Niemaia 2:4-6.

Bilong i Stap Strong long Spirit

16. Yumi ken beten olsem wanem bilong helpim ol brata, olsem 2 Korin 13:7 i tok?

¹⁶ Na tu, i stret yumi ken beten bilong helpim ol brata bambai ol i ‘no mekim wanpela pasin nogut, ol i mekim stretpela pasin’.(2 Korin 13:7) Kain gutpela beten olsem i soim olsem yumi laikim tumas ol brata na yumi laik bai ol i ken wokabaut stret na God i ken amamas long ol. Aposel Pol i tok: “Olgeta taim mipela i prea long God bilong yumi bai em i helpim yupela. Mipela i ting long yupela i bihainim singaut bilong God, na mipela i beten long em i ken mekim yupela inap tru long pasin em i bin singautim yupela long mekim. Mipela i prea long God i ken givim strong long yupela, na yupela ken mekim olgeta gutpela pasin yupela i laik mekim, na yupela i ken mekim tru olgeta wok yupela i bilip long Krais na i mekim.” (2 Tesalonaika 1:11) Epafras i beten bilong ol Kristen long Kolosi i ken “sanap olsem man tru, na bel bilong [ol] i ken save tru long olgeta laik bilong God.” (Kolosi 4:12) Ol dispela tok i bilong lain bilong heven, tasol i stret yumi tu i ken mekim kain beten olsem bilong helpim olgeta manmeri i givim bel tru long Jehova.

17. I stret yumi ken mekim wanem kain beten bilong helpim ol brata long i stap strong long spirit?

¹⁷ Yumi ken beten bilong ol brata i ken i stap strong long spirit. Sapos sampela brata o sista i gat sik long spirit, i stret ol elda i ken beten bilong helpim ol na beten wantaim ol bambai ol i ken kamap strong gen. Disaipel Jems i tok: “Sapos ol i bilip long God na ol i prea, orait bai Bikpela i mekim orait dispela sikman na kirapim em gen.” (Jems 5:13-16; 1 Samuel 12:18-25) Taim yumi yet yumi beten yumi ken kolim nem bilong sampela brata na tokim God yumi laik bai ol i stap strong long bilip. (Taitas 1:13; 2:1, 2) Tasol yumi no ken beten bilong helpim ol man long laik bilong ol yet ol i sakim ol samting God i bin mekim bilong baim bek ol man.—Hibru 10:26-29.

Gutpela Samting i Kamap long Pasin Bilong Beten Bilong Helpim Ol Brata

18, 19. Taim yumi beten bilong helpim ol brata, dispela i helpim yumi yet olsem wanem?

¹⁸ Sapos yumi beten bilong helpim ol brata, gutpela samting bai kamap. Olsem: Bai ol beten bilong yumi i kamap gutpela moa. Na sapos yumi beten bilong helpim ol brata bai yumi no tingting nogut long ol. Dispela kain beten bai helpim yumi bambai yumi no les kwik long ol brata, bai yumi sori moa long ol na tingim gut ol. Na taim yumi beten bilong helpim ol brata sista Kristen, Jehova i save yumi tingim lain bilong em na ol wok ol i mekim na yumi laik bai ol i stap gutpela.

¹⁹ Yumi save beten bilong helpim ol brata sista na ol i save beten bilong helpim yumi. Yumi save long dispela samting na dispela i strongim bel bilong yumi. Na gutpela samting tru em olsem: God Jehova yet i save harim ol beten yumi mekim bilong helpim ol wanlotu bilong yumi! Olsem na bilong helpim wok bilong Kingdom na bilong helpim yumi long laikim tru ol brata na i stap wanbel wantaim ol, yumi mas beten bilong helpim ol brata.

Bai Yu Bekim Wanem Tok?

□ Bilong wanem ol Witnes Bilong Jehova i mas beten?

□ Beten inap helpim yumi olsem wanem?

□ Bilong wanem yumi mas beten bilong helpim ol brata?

□ Yumi ken beten askim God long helpim ol brata long wanem wanem ol samting?

□ Sapos yumi beten bilong helpim ol brata, wanem sampela gutpela samting inap kamap?

(b) Sapos ol man i mekim nogut long yumi, long wanem yumi autim tok bilong Kingdom, yumi ken beten olsem wanem?

[Piksa long pes 10]

Yu save beten bilong wok bilong ol brata long autim tok bilong Kingdom em i ken kamap gutpela?

[Piksa long pes 11]

Planti taim yu save beten bilong helpim ol Kristen ol man i mekim nogut long ol?