Tok Bilong God i Gat Laip
Bai Yu Lotuim Wanem God?
INAP 3,000 yia bipo ol man i mas tingim dispela askim, na i stret yumi mas tingim long nau tu. Long dispela taim bipo, profet bilong Jehova, em Ilaija, em i tokim lain Isrel: “Wanem taim bai yupela i lusim tupela tingting?” Ol i no save ol i laik lotuim wanem God. Olsem na Ilaija i tokim ol: “Sapos Jehova em i God tru, orait bihainim em; tasol sapos Bal em i God tru, orait bihainim em.”
Olsem wanem ol manmeri inap save ol i laik lotuim wanem God? Ilaija i tok ol i ken mekim wanpela traim long paia. Em i tok: ‘Tokim ol 450 profet bilong Bal long kisim wanpela yangpela bulmakau man, na katkatim, na putim antap long diwai olsem ofa. Tasol ol i no ken wokim paia. Na bai mi tu mi kisim wanpela yangpela bulmakau man na mekim olsem. Bihain ol i ken singaut long Bal na bai mi singaut long Jehova. Na God i salim paia i kam daun, em yet i God tru.’ Olgeta manmeri i amamas long dispela samting.
Pastaim ol profet bilong Bal i redim wanpela yangpela bulmakau man na putim long alta bilong ol. Kirap long moningtaim i go inap long belo ol i wok long singaut, olsem: “O Bal, bekim tok long mipela!” Tasol Bal i no mekim wanpela samting. Long belo, Ilaija i kirap sutim tok bilas long ol, em i tok: “Singaut strong moa, ating em i go pekpek. O ating em i slip na yu mas kirapim em.” Olsem na ol profet bilong Bal i wok long singaut strong moa na ol i katim nabaut skin bilong ol wantaim naip na blut i kapsait. Tasol Bal i no bekim tok long ol. Em i no salim paia i kam.
Orait, nau Ilaija i stretim alta bilong Jehova, em ol i bin brukim. Em i kisim yangpela bulmakau man na katkatim na putim antap long alta. Na tripela taim em i tokim ol man long kapsaitim wara antap long ofa na diwai na ol ston bilong alta. Na em i kapsaitim wara i go long baret i raunim alta.
Apinun pinis na Ilaija i beten long Jehova, olsem: “O Jehova, plis yu mas harim tok bilong mi, na bai ol manmeri i save, yu Jehova, yu God tru.” Na wantu Jehova i salim paia i kam daun na kukim ofa na diwai na ston na das bilong alta na wara i stap long baret. Taim ol manmeri i lukim dispela samting, ol i brukim skru na ol i tok: “Jehova em i God tru! Jehova em i God tru!”—1 King 18:21-40, NW.
Olsem wanem? Yu tingim pinis wanem God yu laik lotuim? Yu no ken bihainim tupela tingting. I gat wanpela rot tasol i stret. Ol manmeri long nau ol i save lotuim god bilong dispela graun, em Seten. Tasol ol i no lotuim em olsem ol manmeri i bin lotuim Bal long bipo. Nogat. Tasol man i tingim mani kago pastaim, o em i bihainim laik bilong em yet na em i no bihainim laik bilong Man i bin wokim em, em God Jehova, orait dispela man i lotuim Seten. Olsem na yu yet yu mas tingim wanem God yu laik lotu long em. Tasol Jisas i kolim Tok bilong God, em Baibel, na em i makim dispela God tru yumi mas lotu long em. Jisas i tok: Yu mas lotu long [Jehova] tasol. Em i God bilong yu, na yu mas holim wok bilong em wanpela tasol.”—Matyu 4:10.