Ol i Mekim Laik Bilong Jehova

Elaija i Litimapim Nem Bilong Trupela God

EM NAMBAWAN man long Israel ol i wok long painim bilong holim em. Sapos king i painim em, em bai kilim em i dai tasol. Husat dispela man ol i wok long painim bilong holim em? Em Elaija, profet bilong Jehova.

King Ahap na meri haiden bilong em, Jesebel, i mekim na pasin bilong lotuim Bal i go bikpela long Israel. Olsem na Jehova i pasim ren, na bikpela san tasol i stap, na nau em namba 4 yia bilong dispela hevi. Jesebel i belhat nogut na i putim tok long kilim i dai ol profet bilong Jehova, tasol Ahap i gat bikpela laik tru long kilim i dai Elaija. Elaija yet i bin tokim Ahap inap 3-pela yia bipo olsem: “Bai ren na wara bilong nait i no ken kam daun long graun inap long sampela yia. Na bai i stap olsem inap long taim mi tok.” (1 King 17:⁠1) Em nau, taim bilong bikpela san i stap yet.

Long dispela taim nogut, Jehova i tokim Elaija olsem: “Yu go lukim King Ahap, na bai mi salim ren i kam daun gen.” Maski em inap kisim bagarap, Elaija i bihainim tok bilong Jehova.​—⁠1 King 18:​1, 2.

Tupela Birua i Bung

Taim Ahap i lukim Elaija, em i tok: “Em nau, mi lukim yu pinis. Asua bilong yu tasol na dispela bikpela hevi i stap long Israel.” Elaija i bekim tok strong olsem: “Yu giaman. Em i no asua bilong mi. Em asua bilong yu wantaim lain bilong papa bilong yu, long wanem, yupela i bin sakim tok bilong Bikpela na yupela i save lotuim ol giaman god Bal.” Orait nau Elaija i toksave olsem olgeta Israel i mas bung long maunten Karmel, na “450 profet bilong Bal na ol 400 profet bilong god meri Asera,” ol tu i mas bung. Na Elaija i toksave long ol olsem: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.”​—⁠1 King 18:​17-21.

Ol manmeri i no toktok. Ating ol i save pinis long rong ol i mekim olsem ol i no givim bel long lotu long Jehova wanpela tasol. (Kisim Bek 20:​4, 5) O ating bel bilong ol i pas pinis na ol i no ting ol i mekim sin taim ol i givim bel long Jehova na Bal wantaim. Maski ol i ting olsem wanem, Elaija i tokim ol manmeri long kisim tupela yangpela bulmakau​—⁠wanpela bilong ol profet bilong Bal na wanpela bilong em. Ol bai redim tupela bulmakau wantaim bilong mekim ofa, tasol ol i no ken wokim paia. Elaija i tok: “Yupela i ken prea long god bilong yupela na mi bai prea long Bikpela. Na wanem god i harim prea na i salim paia i kam daun na i kukim dispela ofa, orait em tasol em i God tru.”​—⁠1 King 18:​23, 24.

Jehova i Kisim Biknem

Ol profet bilong Bal i kirap “singsing na kalap kalap raunim dispela alta ol man i bin wokim.” Long moning olgeta ol i krai olsem: “Bal, mipela i laik bai yu mas harim beten bilong mipela.” Tasol Bal i no harim beten bilong ol. (1 King 18:26) Na Elaija i kirap tok bilas long ol olsem: “Yupela i no ken slek. Em god ya. Olsem na traim beten strong moa.” (1 King 18:27) Ol profet bilong Bal i kirap na katim nabaut skin bilong ol yet long bainat na naip​—⁠dispela pasin em ol haiden i save mekim bilong kirapim god bilong ol long sori long ol.a​—⁠1 King 18:⁠28.

Nau em belo bek pinis, na ol lain i lotuim Bal ol i wok long “singaut yet olsem ol longlong man,” olsem tromoi nabaut skin bilong ol na i no bosim gut skin. Na long apinun, Elaija i kirap tokim ol manmeri olsem: “Yupela kam klostu long mi.” Olgeta manmeri i sanap na lukluk i go long Elaija taim em i wokim gen alta bilong Jehova, na wokim baret raunim alta, na katim yangpela bulmakau na putim antap long alta wantaim paiawut bilong wokim paia. Bihain, em i kapsaitim wara antap long dispela bulmakau, alta, na paiawut, na em i kapsaitim wara i go long baret na wara i pulap long en; ating dispela wara em i kisim em solwara bilong hap bilong solwara Mediterenian. Bihain, Elaija i beten long Jehova olsem: “Nau mi laik bai yu soim ol manmeri olsem, yu tasol yu God bilong Israel. Na tu yu ken soim ol olsem, mi wokman bilong yu na mi bihainim tok bilong yu tasol na mi mekim olgeta dispela samting. Bikpela, harim beten bilong mi na mekim olsem mi askim yu, na bai dispela ol manmeri i ken save, yu tasol yu God tru na yu wok long tanim bel bilong ol i kam bek long yu.”​—⁠1 King 18:​29-37.

Wantu paia i kam daun long heven na i “kukim tru dispela ofa na ol paiawut na ol ston bilong alta na graun long arere bilong alta. Na wara long baret tu i drai olgeta.” Ol manmeri i sanap lukluk i stap, kwiktaim ol i tromoi skin bilong ol i go daun long graun na ol i tok: “Bikpela tasol em i God tru. Bikpela tasol em i God tru.” Orait Elaija i tokim ol na ol i holimpas ol profet bilong Bal na kisim ol i go daun long arere bilong wara Kison, na long dispela hap ol i kilim i dai ol profet bilong Bal.​—⁠1 King 18:​38-40.

Yumi Kisim Wanem Save Long En?

Elaija i mekim samting i olsem man i gat narapela kain strongpela bel. Tasol man bilong raitim Baibel, em Jems, em i tokim yumi olsem “Elaija em i man wankain olsem yumi.” (Jems 5:17) Em i save pret na bel hevi tu. Olsem: Bihain, taim Jesebel i tok strong long kilim em i dai olsem em i bin kilim ol profet bilong Bal, em i ranawe na krai long Jehova long rot bilong beten, olsem: “Bikpela, mi inap pinis long ol dispela hevi i kamap long mi. Nau mi laik bai yu larim mi i dai.”​—⁠1 King 19:⁠4.

Jehova i no kilim Elaija i dai. Nogat. Long pasin sori Jehova i helpim em. (1 King 19:​5-8) Ol wokman bilong Jehova long nau i mas save olsem Jehova bai mekim wankain pasin taim hevi bilong tingting planti i painim ol, olsem ol man i birua long ol o narapela kain hevi i painim ol. Tru tumas, sapos ol i beten askim Jehova long helpim ol, em inap givim bikpela strong long ol, winim moa yet strong bilong ol. Olsem na maski ‘ol kain kain hevi i kamap’ long ol bilong daunim ol, bai em ‘i no pinisim tru strong bilong ol.’ Jehova bai helpim ol long karim hevi na sanap strong, olsem em i bin mekim long Elaija.​—⁠2 Korin 4:​7, 8.

[Futnot]