Tok Bilong God i Gat Laip
Tupela Kain Kirap Bek
MATMAT i stap nating! Em wanpela mirakel! Jisas i dai pinis, tasol skin bilong em i no i stap moa long matmat! Ol bikpris i givim mani long ol soldia i bin was long matmat bambai ol soldia i mekim tok giaman na tok ol disaipel bilong Jisas i stilim bodi bilong em. (Matyu 28:11-15) Tasol Krais em i kirap bek. Em i namba wan man i kirap bek olsem spirit.—Aposel 26:22, 23;1 Pita 3:18.
Sampela moa tu ol bai kirap bek na kisim laip olsem spirit. Baibel i tok: “Yumi olgeta man wan wan bai yumi kirap bek na kisim laip long taim bilong yumi yet. Namba wan em Krais. Na taim em i kam bek, yumi olgeta lain bilong em bai yumi kirap.” (1 Korin 15:20-23) Husat ol i olsem ‘lain bilong Krais’? Em ol 144,000 gutpela disaipel God i makim ol bilong i stap king wantaim Krais long Kingdom bilong God. Bai ol i bosim graun.—Revelesen 5:10; 14:1, 3; 2 Timoti 2:11, 12.
Ol manmeri i kirap bek olsem spirit na i go long heven, ai bilong ol man i no inap lukim dispela samting. Ol i kisim bodi bilong heven na Baibel i stori long dispela senis olsem: “Bodi yumi planim, em i save bagarap. Bodi i kirap bek, em i no inap bagarap. Bodi yumi planim, em i samting nogut. Bodi i kirap bek, em i gutpela tru. ․․․ Bodi yumi planim, em i bilong graun. Bodi i kirap bek, em i bilong heven.”—1 Korin 15:42-44.
Dispela kain kirap bek, olsem ol man i kirap bek na kisim laip long heven, em namba wan kirap bek. Baibel i tok: “Ol man i kirap bek long dispela namba wan taim, ol i ken amamas na i stap holi. Namba tu dai i no gat strong bilong daunim ol dispela man. Nogat. Bai ol i ․․․ stap king wantaim krais long dispela 1,000 yia.” (Revelesen 20:6) Dispela kirap bek bilong “namba wan taim” o bilong pastaim, em i kamap taim ‘krais i kam bek.’ Krais i kam bek na i stap king kirap long yia 1914. Em i mekim wok king namel long ol birua bilong em.—Hebrews 10:12, 13; Filipai 3:11.
Baibel i tok i gat kirap bek bilong “namba wan taim,” olsem na yumi save i gat narapela kirap bek long bihain. Taim lain bilong i stap king wantaim Krais ol i kirap bek pinis na olgeta birua bilong kingdom bilong God i pinis, bihain ol manmeri bilong kisim laip long graun bai ol i kirap bek. Olsem na i gat tupela kain kirap bek. Namba wan em olsem: Ol manmeri i krap bek na kisim laip long heven. Namba tu i olsem: “Ol stretpela man na ol man nogut” ol i kirap bek na ol inap kisim laip i stap oltaim long graun.—Aposel 24:15.
Ol man i dai pinis bai ol i krap bek—em wanpela mirakel! Na long dispela rot bai laik bilong God i kamap. Taim yumi tingim dispela gutpela samting God bai mekim, dispela samting i kirapim yumi long givim bel long Em na yumi laik mekim wok bilong Em.