Ripot long Wok Bilong Kingdom

Ol Liklik Pikinini i Autim Tok

JISAS i tok, “yu bin opim maus bilong ol liklik pikinini na ol bebi i stap long susu, na ol i litimapim nem bilong yu.” (Matyu 21:16) Dispela tok i stret long wanpela liklik pikinini meri i gat 3-pela krismas em i bilong Gwadelup. Mama bilong em i wanpela Witnes bilong Jehova. Planti taim, taim mama i go long wok, dispela liklik pikinini meri i save stap wantaim tumbuna mama bilong em. Na liklik meri i save autim tok long tumbuna mama bilong em.

Mama bilong liklik meri i tok, “Olgeta taim liklik pikinini meri bilong mi i save bihainim tumbuna mama, na planti taim em i save tokim tumbuna mama long stadi wantaim em long dispela buk Baibel Stori Buk Bilong Mi.” Tasol planti taim tumbuna mama i save bekim tok olsem: “Sori tru, yu save mi no gat taim bilong mekim dispela samting, long wanem mi mas mekim wok bilong mama bilong yu.” Tasol wanpela taim liklik meri i strong tru long mekim stadi, olsem na em i opim buk na i wok long stori long tumbuna mama long ol piksa i stap long buk em Baibel i as bilong en. Meri i kirap nogut tru long save bilong tumbuna pikinini bilong em. Olsem na em i kisim buk na kirap kaunim. Na nau em i save ol tok liklik meri i tokim em long en i stret. Na em i laikim dispela tok, olsem na em i kaunim moa yet.

Bihain tumbuna mama i tokim mama bilong liklik meri, olsem: “Bipo yu save tokim mi long tok bilong God, tasol mi no save putim gut yau long en. Tasol nau mi laik harim, long wanem mi yet mi kaunim Baibel.”

Na liklik pikinini hia i strong tru long tumbuna mama i mas i go long miting bilong ol Witnes Bilong Jehova, olsem na meri i go long miting, long wanem em i laik amamasim pikinini. Meri hia i pilim tru ol tok em i harim long miting, olsem na long nau tumbuna mama em wanpela Witnes Bilong Jehova, em i dediket na baptais pinis. Tru tumas, long maus bilong ol pikinini Jehova i save litimapim nem bilong em. Nau 3-pele wantaim, pikinini na mama na tumbuna mama, ol i mekim wok bilong Jehova na ol i amamas tru!

◻ Narapela ekspiriens bilong wanpela yangpela em bilong ples Naijiria. Stori i olsem: Wanpela famili olgeta ol i kirap long stadi na lainim tok bilong Baibel, papa na mama na tupela pikinini meri. Tasol bihain papa i dai, na mama i no tingim moa tok i tru na em i go bek gen long olpela lotu bilong em. Na mama i kirap putim hevi long tupela pikinini; em i tok tupela i mas go wantaim em long lotu. Tupela pikinini hia i gat 7-pela na 12-pela krismas. Tupela i stap strong long bilip na tupela i save tok pait wantaim ol bikpela man bilong lotu na pasto tu. Tupela i winim pasto long ol tok bilong Baibel na em i no i go lukim ol moa long haus. Na sampela taim mama i no save givim kaikai long dispela pikinini i gat 7-pela krismas, long wanem pikinini i no save go wantaim em long lotu bilong em.

Wanpela taim, pikinini hia i go long Haus Kingdom bilong ol Witnes Bilong Jehova, tasol i no gat wanpela man i stap, long wanem olgeta Witnes ol i go long wanpela kibung. Tasol maski, pikinini hia i mekim singsing, na beten na em i mekim stadi olsem ol Witnes i save mekim long olgeta miting.

Na taim pikinini i go bek long haus, em i no bikhet long mama bilong em. Pasin pikinini i mekim i kirapim mama long laikim tok i tru na tingim gen. Na em i kirap stadi gen wantaim ol Witnes na go long ol miting na wok long kisim save long Baibel. Olsem na nau mama i givim bel olgeta long Jehova na em i baptais na i kamap boi bilong Jehova. Na pikinini tu em i stap long tok i tru na mekim gutpela wok.

Tru tumas Jehova i blesim tru dispela pikinini i stap gut long em. Na pikinini i amamas tru long lukim mama i kamap wanpela Witnes Bilong Jehova! Na mama tu i amamas tru, long wanem pikinini bilong em i stap gut long Jehova.