Amagedon—Pait Long Hap Bilong Midel-Is o Olsem Wanem?
“AMAGEDON”—Dispela nem long Baibel i makim wanem samting? Long 1985 sampela Wastaua i stori long dispela samting na piksa long namba wan pes bilong dispela ol Wastaua i makim samting bilong Amagedon. Mipela laik bai tok bilong Baibel ol dispela Wastaua i kamapim em i ken helpim yu long save AMAGEDON i wanem samting tru.
‘LASPELA PAIT i laik kamap, tasol yumi no ken lukluk i go long biktaun Nu Yok, o Mosko, o Paris, o Piking, o Kairo. Nogat. Yumi mas lukim ol samting i kamap long Jerusalem!’ Tupela saveman bilong lotu em John F. Walvoord na John E. Walvoord, tupela i tok olsem long buk bilong ol, nem bilong en: Armageddon, Oil and the Middle East Crisis.
Planti manmeri ol i pret na ol i skelim ol samting i kamap long Jerusalem na ol hevi i kamap long hap bilong Jerusalem. Wanpela nius (Times bilong London) i tok, ‘Ol samting i kamap long hap bilong Midel-Is i go moa nogut.’ Sampela man i pret, long wanem ol i ting bihain ol Amerika na Rasia i mas pait long dispela tupela strongpela lain i birua a yet, na long Janueri 1984 wanpela nius (Bulletin of the Atomic Scientists) i tok ol i surikim han bilong “Klok Bilong Las De” i go klostu moa long 12 klok na ol i makim olsem i gat 3-pela minit moa tasol. (Dispela “klok” i makim hamas de o yia moa na bai pait nuklia i kamap na bagarapim olgeta manmeri.) Dispela nius (Bulletin) i tok, ‘Liklik taim bai bikpela pait i kamap namel long ol strongpela lain, na taim yumi tingim ol samting em inap kamap, yumi pret nogut tru.’
Tasol sampela pasto na evanselis na saveman bilong lotu ol i amamas long ol samting i kamap long hap bilong Midel-Is. Ol i lukim olsem pait i laik kamap na ol i tok, em nau tok bilong mipela i stret, em ol i bin tok Amagedon bai kamap long hap bilong Midel-Is! Long ol buk na long televisen samting ol i tokaut long dispela samting na planti man i bihainim tingting bilong ol.
Ol dispela man i tok pait long wanem samting bai kamap pastaim na wanem samting bai kamap bihain. Tasol planti ol i ting ol samting bai kamap olsem: Ol i tok, taim Isrel i kisim Gavman bilong ol yet, taim bilong pinis i kirap na las de i klostu. Olsem na ol i ting klostu nau bai God i kisim olgeta Kristen tru i go long heven. Ol i tok, bihain bai i gat “bikpela hevi” inap 7-pela yia. Planti evanselis i tok, insait long dispela 7-pela yia bai plantiman i stap aninit long strong bilong wanpela man (Birua Bilong Krais) em i gat strong bilong pulim ol man i go bihainim em. Ol i tok, bai i gat 10-pela lain ol i stap gavman na dispela man bai i stap bikpela bos bilong ol. Ol i tok, ol Isrel tu bai wok wantaim dispela man. Tasol sampela lain Arap na sampela lain moa bai ol i bung wantaim na Rasia bai go pas long ol na bai ol i go insait long hap bilong Isrel bilong kisim ples. Tasol God bai wokim mirakel na pasim ol. Em ol dispela evanselis samting i tok olsem. Na ol i tok, bihain liklik dispela “birua bilong Krais” bai kam kirapim pait gen na nau bikpela pait tru bai kamap long hap bilong MidelIs na dispela pait em Amagedon. Em, ol i tok olsem.
Ating sampela man i ting, tru ol samting bai kamap olsem. Long wanem Baibel i tok ol lain man bai bung long pait bilong “Amagedon.” (Revelesen 16:14-16) Tasol Baibel i tok dispela samting bai kamap long hap bilong Midel-Is o olsem wanem? Ples dispela pait i kamap long en i makim wanem samting?