Amagedon, Midel-Is, na Baibel
“OLGETA tok profet i makim ples Isrel tasol.” Wanpela man bilong raitim buk, em Hal Lindsey (The 1980’s: Countdown to Armageddon), em i tok olsem. Na sampela man bilong lotu ol i ting taim Baibel i tok long Isrel em i tok long Isrel tru, em i no tok piksa liklik. Ol dispela man i ting lain Isrel ol i lain bilong God na Amagedon bai kamap long hap bilong Midel-Is. Ol i tok, taim ol birua i kirapim pait long Isrel na i laik bagarapim ol, long dispela taim bai God i kirap na pasim ol.
Tasol Baibel i tok, taim lain Isrel i sakim Pikinini bilong God, em Krais Jisas, long dispela taim God i lusim ol na em i no orait long ol moa o lukautim ol. (Ap. 3:13, 14, 19) Jisas yet i tok klia long ol, olsem: “Bai God i tekewe kingdom bilong em long yupela, na givim long wanpela lain manmeri ol i save kamapim kaikai bilong dispela kingdom.”—Matyu 21:43.
Em i Sakim Ol Olgeta?
Tasol tupela saveman bilong lotu, em John F. na John E. Walvoord (em pastaim mipela bin kamapim sampela tok bilong tupela), ol i tok: “Pol i tok klia olsem ol tok promis Olpela Testamen i mekim long lain Isrel ol i no kamap tru yet. Pol i tok: ‘Ating God i rausim pinis lain bilong em? Nogat tru!’ (Rom 11:1).” Tasol tupela i no kolim ol narapela tok bilong dispela ves, em Pol i tok: “Mi tu mi man bilong Isrel. Mi wanblut bilong Ebraham. Mi lain bilong Bensamin.” Wanem insait bilong dispela tok bilong Pol?
Pol i no ting ol Isrel i stap yet olsem lain bilong God. Nogat. Pol i ‘bel hevi na pilim nogut,’ long wanem ol Isrel i bin i stap olsem lain bilong God na kisim ol lo na tok promis bilong Em, tasol ol i no pilim dispela samting. (Rom 9:2-5) Long Rom 9:6 Pol i tok moa olsem: “Tasol tok bilong God [long Ebraham] i no olsem i lus nating. Nogat. Ol man i bin kamap long lain bilong Isrel [bilong skin], olgeta i no Isrel tru.” Pol i tok olsem: Ol Juda i sakim Krais, olsem na God i no tingim ol i Isrel tru! Nau ol disaipel bilong Krais, em spirit holi i makim ol, ol i kamap “Isrel” tru. Long rot bilong dispela lain bai God i blesim olgeta manmeri.—1 Pita 2:9; Galesia 3:29; 6:16; Jenesis 22:18.
God i sakim lain Isrel, tasol em i no sakim olgeta wan wan Isrel, long wanem Pol i tok: “Mi tu mi man bilong Isrel.” Ol wan wan man bilong lain Isrel, olsem Pol, sapos ol i bilip long Krais ol inap insait long lain Isrel bilong spirit. Sampela Isrel tasol, olsem “hap lain,” ol i bilip.—Rom 11:1, 5.
Bihain Bai Ol i Tanim Bel?
Sampela man i ting bihain bai olgeta Isrel bilong skin i tanim bel. Wanpela man i ting olsem, em i tok: “God bai kisim Sios i go antap long heven na bihain bai bikpela hevi tru i kamap na long dispela taim bai olgeta Isrel i tanim bel [na kamap Kristen].” Na long Rom 11:25, 26, Pol i tok: “Hap lain bilong ol Isrel bel bilong ol i pas, na dispela pasin bai i stap long ol, i go inap long dispela taim ol man bilong ol arapela lain bai ol i kam insait na inapim namba bilong ol. Na long dispela pasin bai God i kisim bek olgeta Isrel.”
Olsem wanem? Ating Pol i tok olgeta Isrel bai tanim bel na kamap Kristen? Nogat. Em i tok pinis “hap lain” tasol bai ol i bilip. (Rom 11:5) Tru, Pol i tok bai ‘bel bilong ol Isrel i pas’ inap long dispela taim ol man bilong ol arapela lain i kam insait long kongrigesen Kristen na “inapim namba bilong ol.”a Tasol wanpela saveman bilong tok Grik, em Richard Lenski, em i tok, i no olsem dispela tok “inap long dispela taim” i makim wanpela taim bihain bai olgeta i tanim bel. Nogat. (Lukim Aposel 7:17, 18 na Revelesen 2:25.) Pol i tok, bai bel bilong ol Isrel bilong skin “i pas i go inap long pinis. Bai bel bilong ol i pas i stap. Tasol God i bihainim gutpela tingting na em i kisim ol bilipman bilong “ol arapela lain” i kam insait long kongrigesen Kristen bilong “inapim namba” bilong ol Isrel bilong spirit (144,000). “Na long dispela pasin [i no long pasin bilong lain Isrel olgeta i tanim bel] bai God i kisim bek olgeta Isrel [bilong spirit].”
Kisim Graun Bilong Promis—Bilong “Oltaim Oltaim”?
Tasol olsem wanem long graun bilong Isrel? Ating God i tingim dispela hap graun Gavman Bilong Isrel i bosim na em i gat wanpela wok em i laik mekim long en? Planti man i ting olsem. Wanpela pasto i gat dispela tingting, em William Hurst, em i tok: ‘Planti lain i bin wok long kisim graun bilong Isrel, winim graun bilong ol narapela lain. Planti taim ol lain man i harim tok long graun bilong Isrel.’ Em i kamapim tok bilong Jenesis 13:14, 15 na em i tok, God i tok promis long givim dispela graun long lain bilong Ebraham inap “oltaim oltaim.”
Olsem na ating God i mas lukautim graun bilong ol Isrel na ol birua no ken kisim? Sapos olsem, orait ating liklik taim tasol na bai Amagedon i kamap long hap bilong long Midel-Is. Tasol God i tok tasol lain bilong Ebraham bai stap long dispela graun inap long “taim bihain bihain,” i no bilong “oltaim oltaim.”b (Jenesis 13:14, 15, NW) Ol i sakim Krais Jisas, olsem na dispela graun i no bilong ol moa—na God i no ken lukautim moa.
Amagedon—Bai Kamap We?
Long Revelesen 16:14, 16 Baibel i tok, tok gris bilong ol spirit nogut i pulim ol bikman bilong graun i go long “pait long dispela bikpela de bilong God I Gat Olgeta Strong.” Na Baibel i tok moa, olsem: “Ol i bungim ol king long dispela hap, long tok Hibru ol i kolim Amagedon.” Olsem na ating dispela samting i makim laspela pait bai kamap long Midel-Is, a? Nogat. Long wanem i no gat wanpela hap long graun ol i kolim Amagedon (insait bilong dispela nem i olsem “Maunten bilong Megido”). Long taim bilong Baibel i gat wanpela taun, nem bilong en Megido, em i stap long hap bilong Midel-Is. Em i bin i stap long dispela ples stret, em piksa bilong en i stap long karamap bilong dispela Wastaua. Planti bikpela pait i bin kamap klostu long Megido. Tasol i no gat wanpela maunten long dispela hap. Olsem na “Amagedon” em i no wanpela ples tru, em i makim wanpela samting. Orait, em i makim wanem samting?
Tok profet bilong Esikiel i makim Amagedon bai kirap taim ami bilong planti lain i kam pait wantaim “Isrel.” “Gok bilong hap bilong Megok” i bosim dispela ami. Ol bai lusim “hap bilong not” longwe na i kam pait. “Gok” em i husat? Wanpela saveman bilong lotu, em Hal Lindsey, em i tok: “I gat wanpela lain tasol i stap long hap bilong not, em Rasia.” (Sampela man moa ol tu i ting olsem.) Na dispela man i tok, ol dispela lain olsem ami bilong “Gok” (em Baibel i kolim ol olsem Misek na Tubal na Pesia na Itiopia na Put na Goma na Togama) em ol lain i wok wantaim Rasia, olsem ol lain Arap.—Esikiel 38:1-9, 15, NW.
Ol dispela lain Baibel i tok ol i poroman bilong Gok, ol i no gat nem namel long ol narapela lain long taim bilong Esikiel. Olsem na dispela tok profet i mas kamap tru “long taim bilong bihain tru,” taim ol birua bilong lain Isrel bilong bipo ol i no i stap moa long graun. (Esikiel 38:8, NW) Long nau Rasia i gat nem na ol i no i stap longwe long ol narapela lain, olsem na Rasia i no makim dispela ples bilong Gok, em “hap bilong Megok.”
Orait, husat i stap long ples ‘longwe’ na i birua tru long lain bilong God? Long Revelesen 12:7-9, 17 Baibel i bekim tok olsem: “Nau bikpela pait i kirap long heven. Maikel wantaim ol ensel bilong en ol i pait wantaim bikpela snek. ․․․ ol i tromoi dispela snek i go daun. Em i dispela snek bilong bipo yet, na ol i kolim em Seten.” Taim ol i rausim Seten long heven, em i gat wanem tingting? Baibel i tok: “Dispela bikpela snek em i belhat long dispela meri [oganaisesen bilong God long heven], na em i go na i laik kirapim pait wantaim ol arapela pikinini bilong en. Em ol dispela manmeri i save bihainim olgeta lo bilong God, na ol i autim tok bilong Jisas na bihainim em.”
Olsem na “Gok” i makim Seten. Inap longtaim Seten wantaim ol ensel nogut bilong em ol i bin pait wantaim hap lain bilong ol Isrel bilong spirit (lain remnan)—em kongrigesen Kristen spirit holi i bin makim ol. (Galesia 6:16) Ol dispela Kristen i stap long olgeta hap bilong graun; ol i no i stap long wanpela hap tasol na bai wanpela lain ami bilong Midel-Is inap i kam pait wantaim ol. Tasol Esikiel i tok ol i “sindaun gut na ol i no pret,” long wanem God i lukautim ol. (Esikiel 38:l1, NW) Long nau planti birua i raunim ol Isrel bilong skin, na planti hevi i kamap insait long lain bilong ol yet, olsem ol hevi bilong wok politik na bilong sindaun bilong ol. Ol i no “sindaun gut.”
Baibel i tok bikpela senis bai kamap. Wantu bai “bikpela taun Babilon” em olgeta lotu giaman i bagarap. (Revelesen sapta 18) Taim olgeta lotu giaman i bagarap, bai Seten o “Gok” i ting em inap bagarapim ol Kristen tru, na em bai kirap mekim olsem. Em bai kirapim ol spirit nogut long bungim “ol king bilong olgeta man bilong graun” long “pait long dispela bikpela de bilong God I Gat Olgeta Strong,” em pait bilong “Amagedon.”—Esikiel 38:12-16; Revelesen 16:14, 16.
Olsem na “Amagedon” em i no wanpela liklik ples long hap bilong Midel-Is. Nogat. Em i wanpela samting i kamap long olgeta hap bilong graun. Olgeta manmeri bilong olgeta hap bai birua long God Jehova na lain witnes bilong em. (Aisaia 43:10-12) Taim Seten i kirapim pait long ol Kristen tru, dispela samting—i no wanpela pait long hap bilong Midel-Is—bai kirapim God long mekim pait bilong helpim lain bilong em!—Esikiel 38:18-23; Sekaraia 2:8.
Ol Kristen tru long nau ol i no sindaun nating na was tasol long ol samting i laik kamap long hap bilong Midel-Is. Nogat. Namba wan tingting bilong ol, em olsem: Ol i laik helpim ol man bambai ol i ken save long ol tok bilong Baibel long dispela pait. Long olgeta hap bilong graun ol manmeri i save, ol Witnes Bilong Jehova i no pret long i go long haus bilong ol man na autim dispela tok. Tasol ating yu laik save, sapos God em i Man bilong pasin sori na em i laikim tru ol manmeri, bilong wanem em bai kamapim kain pait olsem? Na ating yu laik save, yu inap winim dispela taim bilong pait na yu no ken bagarap? Orait, narapela Wastaua bihain bai bekim ol dispela askim.
[Ol Futnot]
a O1 lotu bilong Krisendom i no ting Baibel i makim namba bilong lain Isrel bilong spirit, em olsem 144,000. (Revelesen 7:4) Olsem na sampela ol i kranki na ol i ting olgeta Isrel na olgeta “haidenman” (The Jerusalem Bible) bai tanim bel. Tasol sapos i no gat namba tru bilong dispela lain, orait, tok piksa bilong Pol long Rom sapta 11 long diwai oliv em i no gat as bilong en.
b Long Baibel Pisin ol i tanim tok Hibru ’oh·lam olsem “oltaim” o “oltaim oltaim.” Tasol wanpela saveman bilong tok Hibru, em William Gesenius, em i tok, dispela tok Hibru i makim “taim i hait,” olsem wanpela hap taim yumi no save long kirap bilong en o pinis bilong en. Na Nelson’s Expository Dictionary of the old Testament i tok: “Taim ol i skruim tok Hibru ‘ad’ long dispela tok, yumi ken tanim olsem ‘inap long taim bihain bihain.’”—Skelim Diuteronomi 23:3; 1 Samuel 1:22.
[Piksa long pes 6]
Ol samting nau i kamap long Midel-Is, ating dispela i makim Amagedon i laik kamap?
[Piksa long pes 7]
Olsem wanem? Jerusalem i as bilong ol samting i kamap na i kirapim Amagedon?