Amagedon—na Bihain Bai Paradais i Kamap!

ISREL. Taim ol man bilong lotu i stori long bikpela de bilong God, ol i save kolim dispela nem Isrel. Long nau planti man i tingim hap bilong Midel-Is. Aposel Pol em i wanpela Isrel, tasol em i raitim tok, olsem: “Ol man i bin kamap long lain bilong Isrel, olgeta i no Isrel tru. . . . Em i olsem: Ol pikinini i kamap long pasin bilong bodi tasol [ol Isrel bilong skin], ol dispela i no pikinini bilong God. Nogat.” Ol Isrel i sakim Krais Jisas, olsem na ol i no inap kamap olsem “Isrel bilong God.” (Rom 9:6-8; Matyu 21:43) Profet Moses em i wanpela Isrel, na em i bin tokaut long ol samting nogut bai painim Isrel sapos ol i sakim tok bilong God Jehova.—Diuteronomi 28:58-68.

Orait, husat ol i olsem dispela “Isrel” ol i tok long en? Pol yet i tok: “Man i stap Juda long bel, em i Juda tru. Na pasin bilong katim skin, em i samting bilong bel. Em i no samting bilong bihainim rait bilong lo tasol. Nogat. Em i samting bilong spirit” (Rom 2:28, 29) Ol tok profet i stori long Amagedon i no makim dispela pait bai kamap long wanpela hap bilong Midel-Is. Nogat. Amagedon i makim ol samting i mas kamap long graun na nau bai dispela bikpela pait bilong God i kamap.

Rot i Go long Amagedon

Pait bilong olgeta hap, guria, hangre, Pasin nogut i kamap—bikpela Jisas i kolim ol dispela samting olsem “mak” Taim yumi lukim ol dispela samting kamap yumi ken save, Krais i kam pinis na em i stap king na yumi stap long taim bilong pinis. Planti taim dispela nius kamapim ol tok bilong Baibel na makim yia 1914 i olsem kirap bilong taim bilong pinis. Kirap long yia 1914 yumi bin i stap long “las taim.” I gat narapela samting tu i makim dispela taim, em ol samting kamap bilong truim tok bilong Jisas. olsem: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:3-14) Ol manmeri ol i “Isrel tru bilong God,” ol i paslain long mekim dispela wok. Ol i autim tok long 205 kantri. Olsem na yumi save, “las de” klostu pinis.

Tasol dispela “las de” i kamap olsem wanem? Sapos yumi skelim ol narapela narapela tok profet long Baibel, yumi inap save long dispela samting.

Olsem: Danyel i tok, lain komyunis. olsem “king bilong not” na ol lain i no komyunis, olsem “king bilong saut,” ol bai i stap birua. Bai ol i resis long bosim olgeta hap bilong graun. Bihain bai wanem samting i kamap? Danyel i lukim lain komyunis, olsem “king bilong Not,” ol i mekim pait na kisim ol gutpela samting bilong graun, long tok Piksa Baibel i kolim olsem “gol” na “silva” na “olgeta gutpela samting.—Danyel 11:40-43. NW.

Tasol ol hetman bilong graun bai wok long i stap sekan. Bai ol i tok: “Em i gutaim nau, yumi stap gut.” (1 Tesalonaika 5:1-3) Tasol wantu bai amamas bilong ol i pinis. Ol hetman politik bai les long pasin bilong ol lotu bilong dispela graun, em ol i laik insait long wok bilong bosim graun, na bai ol dispela hetman i bung wantaim bilong pinisim ol dispela lotu. Kwiktaim bai ol i pinisim. Tasol Jehova yet i givim tingting long ol na ol i bagarapim dispela hap lain bilong Seten i gat bikpela asua. Olgeta lotu giaman bai bagarap.—Revelesen 17:1-18.

Long dispela taim ‘Isrel tru’ i no ken bagarap. Tasol i no olsem Krais bai kam na kisim ol i go antap long heven samting, olsem sampela pasto long nau i tok. Nogat. Esikiel i makim ol samting bai kamap. Pastaim Esikiel i kolim tok bilong Seten (long dispela hap bilong Baibel ol i kolim Satan olsem Gok), em i tok: “Mi mas i go long dispela hap i no gat banis. Mi mas birua long ol dispela man [lain bilong Jehova] ol i sindaun gut na ol i no pret.” Seten i birua long “meri” bilong God na dispela samting bai kirapim em long mekim pait long ol Kristen tru. (Esikiel 38:2, 11, 12, NW) Na bihain laspela pait bai kamap, olsem Baibel i bin tok profet planti handet yia bipo.

Taim Gok i kirap mekim pait long lain bilong God, God Jehova yet bai kirap lukautim ol. Ol i no ken bagarap. God bai lukautim ol na dispela samting bai litimapim nem bilong Em. Samting bai kamap olsem, long wanem Jehova yet i kamapim pait bilong Amagedon.—Esikiel 38:18-23.

‘Long Dispela Hap Ol i Kolim Amagedon’

Long hap bilong Revelesen, Baibel i tok “ol spirit nogut” bai ol i “go long ol king bilong olgeta man bilong graun,” na bai ol i “bungim ol bilong kirapim pait long dispela bikpela de bilong God I Gat Olgeta Strong.” Ol tok Seten i kirapim ol man long mekim bai pulim “ol king” i go bung “long dispela hap, long tok Hibru ol i kolim Amagedon [Maunten Bilong Megido].”—Revelesen 16:13-16.

No gat wanpela maunten tru i gat i dispela nem Megido. Tasol long taim bilong Baibel ol i bin mekim planti pait long hap bilong wanpela biktaun ol i kolim Megido. Tasol i no gat wanpela maunten i stap long dispela hap. Nogat. Na i no inap olgeta ami bilong graun i go mekim pait long Ples Stret bilong Esdrelon klostu long Megido. Bai ol i pas pas tumas. Tru, ol i kisim dispela tok “Amagedon” long Megido, tasol bikpela samting em olsem: Insait bilong dispela tok. Insait bilong en i olsem: “maunten bilong ol ami i kam bung.” Olgeta dispela samting i soim yumi, Amagedon i no wanpela ples tru na bai pait i kamap long en; nogat; em i makim ol samting i mas kamap na bai pait i kirap, olsem ol lain man bai bung wantaim bilong mekim pait long God Jehova na lain bilong Em.

Taim ol i bung pinis, nau bai Jehova yet i insait long dispela pait. Ol oganaisesen politik bai wok yet, olsem “i stap laip yet,” na bai ol i bagarap. (Revelesen 19:20) Taim strong bilong ol gavman i pinis, bai ol man i pret na tingting planti! Jehova bai mekim wok long ol strongpela samting bilong em na mekim pait na ol manmeri i stap long graun bai pret nogut tru. (Esikiel 38:18-23; Sekaraia 14:12, 13) “Na long dispela taim, ol man Jehova i kilim ol i dai, skin bilong ol bai stap nabaut long olgeta hap bilong graun.”—Jeremaia 25:33, NW.

Krais Jisas em i nambawan “pikinini” bilong lain bilong “meri” bilong God, em oganaisesen bilong God long heven. Krais Jisas bai bringim ol ami bilong em, em ol stretpela ensel long heven, i go long pait na bai ol i winim pait. Seten bai lus na bai ol i kalabusim em long “hul i no gat as” inap 1,000 yia. (Revelesen 20:1-3) Jehova Bai lukautim lain bilong em na bai ol i winim dispela taim bilong pait bilong God.—Matyu 24:21, 22, 37-39.

Bihain Bai Paradais i Kamap

Amagedon i pinis na ol samting long graun i bagarap. Ating yu ting wok bilong stretim bek dispela graun na kamapim Paradais long graun em i bikpela wok tru. Tasol gavman God long heven bai bosim dispela wok na dispela wok bai kamap gutpela. Bai graun olgeta i kamap gutpela ples, olsem Paradais, olsem Iden long taim bilong namba wan man na meri. Ol stretpela manmeri “bai ol i stap gut long graun. Bai ol i sindaun gutpela tumas na amamas i stap.” Pasin sekan na gutaim bai kamap long olgeta hap bilong graun. Bai olgeta manmeri i stap bel isi.—Sam 37:11.

Graun bai kamap gutpela ples paradais na ol manmeri i stap long graun bai ol i kisim planti gutpela samting bilong skin na spirit. Bai “haus bilong God i stap wantaim ol man!” Na taim ol man i bihainim lo bilong dispela gavman bilong heven, God bai “mekim drai olgeta wara i stap long ai bilong ol. Bai ol man i no i dai moa, na ol i no bel hevi moa, na ol no krai na kisim pen gen.” (Revelesen 21:1-4) Bai olgeta manmeri i stap gutpela olgeta, no gat sik o hevi na ol i no ken i dai moa.

I Gat Ples Bilong Hait?

Yu mas tingting tru long winim taim bilong Amagedon na i stap bel isi na amamas long dispela gutpela taim bihain, olsem long Paradais. Tasol yu no inap painim ples hait namel long ol narapela narapela lotu bilong dispela graun. Yu no inap painim namel long ol misin bilong Krisendom tu. Long wanem ol i no save bihainim tok bilong Jisas, em i tok ol Kristen i “no bilong dispela graun.” (Jon 17:l6) Na ol i no save autim dispela gutpela tok bilong Kingdom. (Matyu 24:l4) Ol misin ol i kolim Kristen ol i bruk bruk long narapela narapela lain, na ol i no save bihainim dispela kain pasin bilong sori Jisas i tok i olsem mak bilong ol disaipel tru bilong em.—Jon 13:35.

Orait, yumi ken painim we ples hait? painim wantaim “Isrel tru bilong God.” (Galesia 6:16) Dispela “Isrel tru” o ol Kristen em spirit bilong God i bin makim ol, ol i no stap nabaut insait long narapela narapela lotu bilong Krisendom. Nogat. Ol i wanpela lain tasol na ol i stap wanbel tru. Bikpela inap olsem 2,000,000 samting, ol i bung wantaim dispela lain bilong Jisas. Dispela bikpela lain ol i bilip na wet long winim taim bilong “bikpela hevi tru.” (Revelesen 7:9, 14) Ol dispela manmeri i save litimapim nem bilong God. Ol i save ‘kolim nem bilong Jehova’ na ol i “no ken bagarap.” (Joel 2:32, NW) Ol dispela manmeri bilong lain “Isrel tru” ol i save kolim nem bilong God na ol i save holim dispela nem, ol i Witnes Bilong Jehova. Ol i laik helpim yu bambai yu ken save long rot bilong winim taim bilong pait bilong God na i stap oltaim long gutpela ples Paradais long bihain.

[Ol Piksa long pes 30]

Taim ol i tok, “Em i gutaim nau, yumi stap gut,” bai ol i kirap bagarapim ol lotu!

[Piksa long pes 31]

Amagedon i no dispela hap bilong Medigo; nogat; em i olsem tok piksa na i makim sampela samting i mas kamap