Armagedon—Mining Bilong En Long Pastaim

DISPELA tok “Armagedon,” ol i kisim long wanpela tok Hibru, em “Har–Magedon,” o “Maunten Bilong Megido.” Em i stap long Kamapim Tok Hait 16:16: “Ol spirit nogut i bringim ol king i kam bung long dispela hap, long tok Hibru ol i kolim Armagedon.” Husat i kam bung long Armagedon? Bilong wanem ol i kam bung? Long Kamapim Tok Hait 16:​14, Baibel i tok: “Ol king bilong olgeta kantri bilong graun” ol i kam bung “bai ol i ken kirapim pait long dispela bikpela de bilong God I Gat Olgeta Strong.” Ol dispela tok i kirapim tingting bilong yumi na yumi laik save long sampela samting moa. Ol dispela “king” bai pait long wanem hap? Ol bai pait long stretim wanem samting? Ol bai pait wantaim husat? Ol bai yusim ol samting bilong pait em inap bagarapim bikpela lain manmeri olsem planti man i ting? Bai i gat sampela man i abrusim bagarap long Armagedon? Yumi ken larim Baibel i bekim ol dispela askim.

Dispela tok, Armagedon, ol i kisim long wanpela tok Hibru i makim “Maunten Bilong Megido,” olsem na yu ting pait bilong Armagedon bai kamap long wanpela maunten tru tru long hap bilong Midel Is? Nogat. Em long wanem, i no gat wanpela maunten olsem i stap long nau​—⁠long ples we Megido bilong bipo i stap long en, em i ples daun tasol na i gat sampela hip graun i go antap inap olsem 20 mita. Na tu, ol hap klostu long Megido em i no bikpela inap long olgeta “king bilong graun, wantaim ol ami bilong ol.” (KTH 19:19) Tasol long hap bilong Midel Is long bipo, Megido em ples ol bikpela pait i bin kamap long en we wanpela lain i pinisim tru narapela lain. Olsem na dispela nem Armagedon, em i olsem tok piksa i makim wanpela bikpela pait we wanpela lain tasol bai i win.​—⁠Lukim blok “Megido​—⁠Tok Piksa i Stret,” long pes 5.

Armagedon i no makim wanpela pait nating i kamap namel long ol lain man, long wanem, Kamapim Tok Hait 16:14 i tok, “ol king bilong olgeta kantri bilong graun” bai i kam bung wantaim bilong “kirapim pait long dispela bikpela de bilong God I Gat Olgeta Strong.” Jeremaia i bin tok profet olsem, “Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun.” (Jeremaia 25:33) Olsem na Armagedon i no makim wanpela pait bilong ol man, na em bai i no kamap long wanpela hap tasol bilong Midel Is, nogat. Em i pait bilong Jehova, na em bai kamap long olgeta hap bilong graun.

Tingim tu olsem long Kamapim Tok Hait 16:​16, Baibel i kolim Armagedon olsem wanpela “hap.” Long Baibel, “hap” inap makim wanpela kain samting i laik kamap​—⁠long dispela ves, em i makim olsem olgeta lain man bai bung wantaim bilong pait long Jehova. (KTH 12:​6, 14) Long Armagedon, olgeta lain man bai bung wantaim bilong pait long “ol ami bilong heven” em ol i stap aninit long “King bilong olgeta king, na Bikpela bilong olgeta bikman,” em Jisas Krais.​—⁠KTH 19:​14, 16.

Olsem wanem long dispela tingting olsem Armagedon i makim wanpela bikpela bagarap we ol man bai yusim ol samting bilong pait em inap bagarapim bikpela lain manmeri? O dispela tingting olsem graun bai bam wantaim ol sta samting bilong ples antap? Yu ting wanpela God em i gat pasin laikim em bai larim kain bagarap olsem i painim ol lain man, na bagarapim ples bilong ol, em dispela graun? Nogat. Em i bin tokaut klia olsem “em i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18; Song 96:10) Long Armagedon, Jehova bai i no inap bagarapim dispela graun bilong yumi long rot bilong paia, nogat. Em bai bagarapim tasol “ol man i bin bagarapim graun.”​—⁠KTH 11:⁠18.

Armagedon Bai Kamap Long Wanem Taim?

Inap planti handet yia nau, wanpela bikpela askim em ol man i wok long tingting planti long en i olsem, Armagedon bai kamap long wanem taim? Taim yumi skelim ol tok bilong Buk Kamapim Tok Hait wantaim ol narapela tok bilong Baibel, dispela inap helpim yumi long save long wanem taim dispela bikpela pait bai kamap. Kamapim Tok Hait 16:15 i tok Armagedon bai kamap wantu olsem stilman​—⁠wankain olsem Jisas bai kam olsem stilman. Jisas i yusim dispela tok piksa bilong stori long taim em bai kam bilong mekim kot.​—⁠Matyu 24:​43, 44; 1 Tesalonaika 5:⁠2.

Truim bilong ol tok profet bilong Baibel i soim olsem taim bilong las de i bin kirap long 1914.a Long laspela hap bilong taim bilong las de, samting em Jisas i kolim olsem “bikpela hevi tru” em bai kamap. Baibel i no tokim yumi long dispela haptaim bai kisim hamas mun o yia samting, tasol ol hevi i kamap insait long dispela haptaim bai i nogut tru winim bilong olgeta taim bipo. Long pinis bilong dispela haptaim bilong bikpela hevi tru, Armagedon bai kamap.​—⁠Matyu 24:​21, 29.

Armagedon em i pait bilong “dispela bikpela de bilong God I Gat Olgeta Strong,” olsem na ol man i no inap mekim wanpela samting bilong surikim taim bilong dispela pait. Jehova i bin makim pinis “taim” bilong kirapim dispela pait. “Yu ting bai em i no inap kamap kwik, tasol yu mas wet liklik na em bai i kamap.”​—⁠Habakuk 2:⁠3.

God Bilong Stretpela Pasin i Mekim Stretpela Pait

Tasol bilong wanem God bai mekim pait long olgeta hap bilong graun? Armagedon i stret wantaim wanpela bikpela pasin bilong em, em stretpela pasin. Baibel i tok: “God i save laikim tumas stretpela pasin.” (Song 37:28) Em i bin lukim olgeta pasin nogut ol man i bin mekim long bipo yet i kam inap long nau, na em i no amamas long ol samting em i lukim. Olsem na em i bin makim Pikinini bilong em long mekim stretpela pait bilong pinisim olgeta pasin nogut.

Jehova tasol em inap tru long mekim stretpela pait, na em bai bagarapim ol man nogut tasol. Olgeta gutpela man, maski ol i stap long wanem wanem hap bilong graun, em bai lukautim ol na ol bai abrusim bagarap. (Matyu 24:​40, 41; KTH 7:​9, 10, 13, 14) Na em tasol i gat rait long stap nambawan bos bilong graun, long wanem, em yet i bin wokim dispela graun.​—⁠KTH 4:⁠11.

Jehova bai yusim wanem ol samting bilong pait long ol birua bilong em? Yumi no save long wanem ol samting em bai yusim. Tasol samting yumi save long en i olsem: Jehova i bosim olgeta samting, na em inap yusim wanem wanem samting em i laik yusim bilong bagarapim ol man nogut. (Jop 38:​22, 23; Sefanaia 1:​15-18) Ol man i stap long graun em ol i lotuim God, ol i no inap insait long dispela pait. Dispela samting olsem driman em Kamapim Tok Hait sapta 19 i stori long en, em i makim olsem ol ami bilong heven tasol bai bung wantaim Jisas Krais long mekim dispela pait. I no gat wanpela wokman bilong Jehova long graun bai insait long dispela pait.​—⁠2 Stori 20:​15, 17.

God i Gat Savetingting i Mekim Tok Lukaut

Olsem wanem? Bai i gat sampela manmeri i abrusim bagarap? I gat rot long olgeta man i ken abrusim bagarap long Armagedon. Aposel Pita i tok, Jehova “i no laik bai wanpela man i lus. Em i laik bai olgeta man i mas tanim bel.” (2 Pita 3:⁠9) Na aposel Pol i tok God “i laik kisim bek olgeta manmeri, bai ol i ken save long as bilong tok tru.”​—⁠1 Timoti 2:⁠4.

Olsem na bilong helpim ol man long abrusim bagarap, Jehova i bin wokim rot na bai ol inap autim “gutnius bilong kingdom” long olgeta hap bilong graun, long planti handet tok ples. Dispela i givim rot long ol manmeri long olgeta hap i ken mekim ol samting na bai God i kisim bek ol na ol i ken abrusim bagarap. (Matyu 24:14; Song 37:34; Filipai 2:12) Ol manmeri i harim na bihainim tok bilong gutnius, ol inap abrusim bagarap long Armagedon, na ol bai kamap gutpela olgeta, na stap oltaim long paradais long graun. (Esekiel 18:​23, 32; Sefanaia 2:3; Rom 10:13) Em nau, God i gat pasin laikim, em bai mekim olsem, a?​—⁠1 Jon 4:⁠8.

Yu Ting God Bilong Pasin Laikim Inap Mekim Pait?

Tasol planti man i tingting planti long bilong wanem wanpela God husat i as bilong pasin laikim, em inap kilim i dai ol man na bagarapim planti lain man. Yumi ken tok piksa long dispela samting long wanpela haus i gat planti kokoros na musmus long en. Orait, sapos papa bilong haus em i gutpela man, em bai tingim helt bilong famili bilong em na em bai kilim i dai ol dispela kokoros na musmus, a?

Olsem tasol, Jehova i tingim tru ol lain man, olsem na em bai mekim pait bilong Armagedon. God i tingting pinis long mekim dispela graun i kamap wanpela ples paradais na olgeta lain man bai kamap gutpela olgeta na ol bai stap bel isi, na “i no gat wanpela man bai i mekim ol i pret.” (Maika 4:​3, 4; KTH 21:⁠4) Orait em bai mekim wanem long ol man i save mekim ol pasin i bagarapim sindaun bilong ol manmeri? Ol dispela man i olsem ol dispela kokoros na musmus, na God i mas rausim ol na bai ol i no ken nogutim ol stretpela manmeri.​—⁠2 Tesalonaika 1:​8, 9; KTH 21:⁠8.

Planti pait i kamap long nau na ol man i kisim bagarap long en, as bilong dispela em olsem, ol man yet i mekim wok bos na ol i laik mekim ol samting bilong helpim kantri bilong ol yet. (Saveman 8:⁠9) Ol gavman bilong graun i painim rot bilong mekim wok bos bilong ol i kamap bikpela, na dispela i mekim na ol i sakim Kingdom Bilong God. I no gat wanpela samting i soim olsem ol i redi long lusim wok bos bilong ol yet na daun long wok bos bilong God na Krais. (Song 2:​1-9) Olsem na God i mas rausim ol dispela gavman na redim rot bilong Kingdom bilong em, long han bilong Krais, i ken mekim stretpela wok bos bilong en. (Daniel 2:44) Pait bilong Armagedon i mas kamap na em bai stretim dispela tok long husat i gat rait long i stap nambawan bos bilong graun na ol lain man.

Dispela pait Jehova bai mekim long Armagedon i bilong helpim ol lain man. Ol samting long graun i wok long bagarap, olsem na stretpela wok bos bilong God tasol bai inapim ol man long olgeta samting ol i mas kisim. Kingdom Bilong God tasol inap kamapim gutaim na bel isi. Ol samting long graun bai stap olsem wanem sapos God i no mekim wanpela samting? Ating pasin bilong bel nogut, kros na bagarapim ol samting, na ol bikpela pait bai wok yet long nogutim i stap bilong ol man, a? Pait bilong Armagedon em i wanpela gutpela samting tru bilong helpim yumi!​—⁠Luk 18:​7, 8; 2 Pita 3:⁠13.

Pait Bilong Pinisim Olgeta Pait

Armagedon bai mekim samting we i no gat narapela pait i bin mekim​—⁠em bai pinisim olgeta pait. Yumi olgeta i wetim tru dispela taim i kamap na olgeta pait bai pinis olgeta. Ol man i bin mekim ol samting bilong pinisim ol pait, tasol olgeta wok bilong ol i bin lus nating. Dispela i kamapim klia olsem tok bilong Jeremaia i tru olgeta, em i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Baibel i stori long ol samting Jehova bai kamapim, olsem: “Em i save mekim i dai pait long olgeta hap graun. Em i save brukim olgeta banara na spia, na em i save kukim ol hap plang long paia.”​—⁠Song 46:​8, 9.

Ol lain man bai yusim ol samting bilong pait bilong bagarapim narapela narapela na bagarapim graun, win, na wara, tasol taim ol i mekim olsem, Man i bin wokim graun em yet bai kirap mekim pait​—⁠long dispela ples em Baibel i kolim olsem Armagedon! (KTH 11:18) Dispela pait bai kamapim samting em ol man i pret long God, long bipo yet i kam inap long nau, ol i bin wetim. Dispela pait bai stretim bek gutnem bilong God Jehova, em Man i bin wokim graun, olsem i stret long em tasol i stap bos bilong olgeta samting.

Olsem na ol man husat i laikim stretpela pasin, i no gat wok long ol i pret long Armagedon. Armagedon i opim rot bilong ol gutpela samting i ken kamap bihain. Pait bilong Armagedon bai pinisim olgeta pasin nogut long graun, na stretim rot bilong nupela taim i ken kamap. Dispela nupela taim bai i gat stretpela pasin tasol long en na Kingdom Bilong God long han bilong Mesaia bai bosim graun. (Aisaia 11:​4, 5) Olsem na Armagedon i no makim olsem graun bai pinis olgeta, nogat. Taim Armagedon i kamap, dispela bai makim kirap bilong wanpela nupela taim we ol stretpela manmeri bai stap long paradais long graun.​—⁠Song 37:⁠29.

[Futnot]

[Blok/Piksa long pes 5]

MEGIDO​—⁠TOK PIKSA I STRET

Megido bilong bipo i bin stap long wanpela ples i antap liklik na i lukluk i go daun long Ples Daun Bilong Jesril, long hap not bilong Israel. Taun Megido i bosim ol rot em ol ami na ol man bilong wok bisnis i save i go i kam long en. Olsem na Megido i kamap olsem ples em ol bikpela pait i bin kamap long en we wanpela lain i bin daunim tru narapela lain. Profesa Graham Davies i raitim long buk Cities of the Biblical World​​—⁠Megiddo olsem: “Taun Megido . . . i stap long wanpela ples i isi tru long ol man bilong wok bisnis na ol man bilong ol narapela kantri i kam long en; tasol sapos dispela taun i strong liklik, em inap bosim raun bilong ol ami na ol man bilong wok bisnis. Olsem na yumi no kirap nogut olsem . . . planti kantri i save pait long kisim dispela taun, na taim ol i kisim, ol i save wok strong tru long holimpas dispela taun.”

Stori bilong taun Megido i bin kirap winim 3,500 yia i go pinis taim King Tutmos Namba 3 bilong Isip i daunim ol king bilong Kenan long dispela ples. Dispela taun i stap i kam inap long yia 1918 taim bikman bilong Briten, em Jeneral Edmund Allenby i daunim ami bilong Teki. Long dispela taun, God i bin helpim Hetman Barak long daunim King Jabin bilong Kenan. (Hetman 4:​12-24; 5:​19, 20) Hetman Gideon i bin daunim tru ol Midian long dispela taun. (Hetman 7:​1-22) Na tu, ol i bin kilim i dai King Ahasia na King Josaia long dispela taun.​—⁠2 King 9:27; 23:​29, 30.

Olsem na i stret long kolim dispela taun olsem tok piksa bilong makim Armagedon, long wanem, planti bikpela pait i bin kamap long dispela taun. Em i wanpela tok piksa i stret tru bilong makim pait em God bai mekim bilong daunim tru olgeta birua bilong em.

[Kredit Lain]

Pictorial Archive (Near Eastern History) Est.

[Ol Piksa long pes 7]

Long olgeta hap bilong graun, ol man i wok long harim toksave bilong Armagedon na rot i op long ol i ken abrusim bagarap

[Piksa long pes 7]

Taim Armagedon i kamap, dispela i makim kirap bilong wanpela nupela taim