Armagedon​​—Woa Bilong God Bilong Pinisim Olgeta Woa

“Ol i ting em samting nogut tru long kilim narapela man i dai, olsem na long ai bilong ol, woa em i samting nogut nogut tru na long tok ples bilong ol i no gat wanpela tok i makim woa.” ​—FRIDTJOF NANSEN BILONG NOWE I MEKIM DISPELA TOK LONG OL INUIT BILONG GRINLAN TAIM EM I RAUN LONG DISPELA HAP LONG 1888.

YUMI olgeta i laik stap wantaim wanpela lain we woa “em i samting nogut nogut tru.” Yumi olgeta i laik bai wanpela taim i ken kamap na i no gat dispela tok “woa,” long wanem, pasin bilong pait bai i no stap moa. Ating yumi hatwok long bilip olsem kain taim olsem inap kamap, na moa yet sapos yumi wetim ol man bilong graun long kamapim.

Tasol long tok profet bilong Aisaia, God yet i tok promis long kamapim kain taim olsem: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”​​—Aisaia 2:4.

Long nau, i gat 20 milion soldia na 20 woa i stap, olsem na bilong dispela promis i ken kamap tru, bikpela senis i mas kamap. Bilong kamapim dispela senis, God i gat olgeta strong, Jehova, i mas kirap na pinisim olgeta pasin nogut. Dispela samting Jehova bai mekim, Baibel i kolim Armagedon.​​—KTH 16:​14, 16.

Tru, ol man long nau i tok “Armagedon” i makim bikpela pait nuklia, tasol wanpela dikseneri i kamapim mining bilong en olsem: “Em ples we wanpela bikpela pait bai kamap namel long ol gutpela lain na ol lain nogut.” Olsem wanem? Wanpela taim bai kamap na ol gutpela lain bai daunim ol lain nogut, o yu ting kain pait olsem em wanpela stori nating tasol?

Yumi ken amamas olsem planti taim Baibel i tok ol pasin nogut bai pinis. Man bilong raitim song i tok: “Bikpela, yu ken bagarapim olgeta manmeri i save mekim sin. Mi laik bai ol man nogut i lus tru.” (Song 104:35) Buk Sindaun i tok: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”​​—Sindaun 2:​21, 22.

Baibel i tokaut tu olsem ol man nogut bai i no gat laik long lusim namba na wok bos bilong ol; olsem na i mas i gat wanpela laspela woa bilong pinisim olgeta pasin nogut, na woa tu. (Song 2:2) Nem em Baibel i givim long dispela pait, em Armagedon, na i gat bikpela mining bilong en.

Ol Pait Long Bipo Klostu Long Megido

Mining bilong dispela tok “Armagedon” em “Maunten Bilong Megido.” Long taun Megido long bipo, na long Ples Daun Bilong Jesril i stap klostu, ol pait i bin kamap we wanpela lain i winim na daunim tru narapela lain. Long buk The Battles of Armagedon, saveman Eric H. Cline i tok: “Inap planti handet yia, taun Megido na Ples Daun Bilong Jesril i bin i stap olsem ples bilong pait na ol dispela pait i bin kamapim ol bikpela senis hia long graun.”

Olsem Cline i tok, long planti pait i bin kamap klostu long Megido, wanpela lain i bin winim na daunim tru narapela lain. Inap 700 yia i go pinis ol ami bilong Mongol i bin bosim bikpela hap bilong Esia, tasol namba wan taim ol i lus long pait em long dispela ples daun. Klostu long Megido, ol ami bilong Briten aninit long Jeneral Edmund Allenby i daunim ol Teki long Wol Woa 1. Wanpela saveman i tok, dispela pait Allenby i winim “i bin daunim tru dispela lain insait long liklik hap taim tasol.”

Baibel tu i stori long ol bikpela pait i bin kamap klostu long Megido. Long dispela hap, Hetman Barak i daunim ol ami bilong Kenan em Sisera i bosim. (Hetman 4:​14-​16; 5:​19-​21) Gideon, wantaim 300 man tasol, i daunim wanpela bikpela ami bilong ol Midian long dispela hap. (Hetman 7:​19-​22) King Sol na pikinini man bilong em Jonatan i bin dai long maunten Gilboa i stap klostu, long taim ol Filistia i daunim ami bilong Israel.​​—1 Samuel 31:​1-7.

Megido na ples daun bilong en i stap long wanpela hap we ol ami i gat rot long winim pait, olsem na planti bikpela pait i bin kamap long dispela hap insait long 4,000 yia i go pinis. Wanpela saveman i bin kaunim inap olsem 34 pait!

Ol samting i bin kamap long Megido bipo i helpim yumi long save long mining bilong dispela tok “Armagedon.” Maski dispela nem i stap wanpela taim tasol long Baibel, ol tok Buk Kamapim Tok Hait i mekim long en i kamapim klia olsem Armagedon bai mekim bikpela samting long i stap bilong olgeta manmeri long graun.

Ol Tok Baibel i Mekim Long Armagedon

Tru, long hap klostu long Megido planti pait i bin kamap we narapela lain i daunim tru narapela lain, tasol i no gat wanpela bilong ol dispela pait i bin pinisim pasin nogut. I no gat wanpela bilong ol dispela pait we i gat ol gutpela lain tasol i pait wantaim ol lain nogut. God tasol inap mekim kain pait olsem. Jisas i tok, “God wanpela tasol em i gutpela.” (Luk 18:19) Baibel i tok Armagedon em i pait bilong God.

Long Baibel, Buk Kamapim Tok Hait i tok “ol king bilong olgeta kantri bilong graun” bai bung wantaim bilong “pait long dispela bikpela de bilong God I Gat Olgeta Strong i kotim ol manmeri.” (KTH 16:14) Dispela tok profet i tok moa: “Ol spirit nogut i bringim ol king i kam bung long dispela hap, long tok Hibru ol i kolim Armagedon.”a (KTH 16:16) Bihain, Buk Kamapim Tok Hait i tok “ol king bilong graun, wantaim ol ami bilong ol,” ol bai kam bung bilong “pait long dispela man i sindaun long hos na long ol ami bilong em.” (KTH 19:19) Dispela man i sindaun long hos em Jisas Krais.​​—1 Timoti 6:​14, 15; KTH 19:​11, 12, 16.

Ol dispela ves i givim wanem save long yumi? Armagedon em wanpela pait namel long God na ol man nogut. Tasol bilong wanem Jehova na Pikinini bilong em, Jisas Krais, bai mekim kain pait olsem? Wanpela as i olsem: Armagedon bai “bagarapim ol man i bin bagarapim graun.” (KTH 11:18) Na tu, em bai kamapim gutaim tru, olsem God i bin tok promis long en, olsem “em bai i wokim . . . nupela graun, na stretpela pasin tasol bai i stap long en.”​​—2 Pita 3:​13.

Bilong Wanem Armagedon i Mas Kamap?

Olsem wanem? Yu hatwok long bilip olsem Jehova, God bilong pasin laikim, bai makim Pikinini bilong em, “King bilong kamapim gutpela sindaun na bel isi,” long mekim wanpela pait? (2 Korin 13:11; Aisaia 9:6) Bai yu kliagut long dispela samting sapos yu save long as na ol i mekim olsem. Buk Song i stori long Jisas olsem wanpela man i sindaun long hos na i pait. Bilong wanem em i pait? Man bilong raitim song i tok long Krais olsem: “Yu sindaun long hos na yu go long pait na winim pait. Yu laik pait bai ol man i no inap daunim tok tru. Na yu pait bilong helpim ol man bai ol i ken wokabaut stret.” Em i pait, long wanem, em i laikim stretpela pasin na em i nolaik tru long pasin nogut.​​—Song 45:​4, 7.

Baibel i stori tu long tingting bilong Jehova long ol man i no mekim stretpela pasin. Profet Aisaia i tok: “Bikpela i lukim ol manmeri i no mekim stretpela pasin, na em i no belgut long ol.” “Em i bin pasim stretpela pasin olsem siot kapa i karamapim bros bilong en. . . . Em i bin pasim strong bilong mekim save long ol man nogut olsem klos bilong en.”​​—Aisaia 59:​15, 17.

Taim ol man nogut i bosim graun, ol stretpela man i no gat bel isi na gutpela sindaun. (Sindaun 29:2; Saveman 8:9) Korapsen na kain kain pasin nogut i stap yet, long wanem, ol man i save mekim kain pasin olsem ol i stap yet. Olsem na bilong kamapim bel isi na stretpela pasin, ol man nogut i mas pinis. Solomon i tok: “Sapos hevi i laik kamap long ol stretpela man, orait ol man bilong mekim pasin nogut i save senisim ol na kisim dispela hevi.”​​—Sindaun 21:18.

God em i Jas, olsem na yumi ken bilip olsem long olgeta taim em i givim strafe long ol man nogut, em i save bihainim stretpela pasin tasol. Abraham i tok: “Jas bilong olgeta graun, em i mas bihainim stretpela pasin.” Na tru tumas, olsem Abraham i kisim save long en, oltaim Jehova i save bihainim stretpela pasin tasol! (Stat 18:25) Baibel i tok Jehova i no save amamas long bagarapim ol man nogut; em i save mekim tasol long taim i no gat narapela rot.​​—Esekiel 18:32; 2 Pita 3:​9.

Armagedon Em Wanpela Pait Tru

Taim dispela pait i kamap, yu bai stap long sait bilong husat? Ating yumi ting olsem yumi stap long sait bilong ol gutpela man. Tasol olsem wanem yumi inap save tru tru? Profet Sefanaia i tok: “Yupela i mas daunim yupela yet na mekim pasin i stret.” (Sefanaia 2:3) Aposel Pol i tok, God i laik “kisim bek olgeta manmeri, bai ol i ken save long as bilong tok tru.”​​—1 Timoti 2:4.

Namba wan samting yumi mas mekim bilong God i ken kisim bek yumi, em yumi mas kisim stretpela save long Jehova na long ol samting em bai mekim bilong rausim ol pasin nogut long dispela graun. Namba 2 samting bilong God i ken orait long yumi na lukautim yumi, em yumi mas bihainim pasin i stret.

Sapos yumi mekim dispela 2-pela bikpela samting, yumi ken amamas long wetim Armagedon i kam, em wanpela pait bilong pinisim tru olgeta pait. Taim pait bilong Armagedon i pinis, ol man long olgeta hap bai tingim woa em i samting nogut nogut tru. “Bai ol i no skul moa long pait.”​​—Aisaia 2:4.

[Futnot]

[Rait long pes 5]

Armagedon em pait bilong God bilong pinisim pasin nogut

[Piksa long pes 6]

Megido

[Piksa long pes 6]

Gideon na ol lain bilong em i bin winim wanpela pait klostu long Megido

[Piksa long pes 6, 7]

Taim Armagedon i pinis, ol man long olgeta hap bai tingim woa em i samting nogut nogut tru

[Piksa long pes 8]

Kisim stretpela save long Jehova na long laik bilong em, dispela em i namba wan samting long em i ken kisim bek yumi