Amagedon—Wanpela God Bilong Pasin Sori i As Bilong En?
“AMAGEDON”—Dispela tok i stap long Baibel em i makim wanem samting? Long 1985 sampela Wastaua i stori long Amagedon na piksa bilong en i stap long namba wan pes bilong ol dispela Wastaua. Mipela laik bai ol tok bilong Baibel ol dispela Wastaua i kamapim em i ken helpim yu long save AMAGEDON i wanem samting tru na bai yu no tingting planti long en.
TAIM yu lukim dispela tok “Amagedon,” yu ting dispela tok i makim wanem samting? Planti ol i ting dispela tok i makim wanpela bikpela pait em bai kamap namel long ol strongpela gavman bilong graun. Na planti tru ol i ting dispela tok i makim bikpela bagarap tru bai painim dispela graun—ol i ting ol bom nuklia bai kukim dispela graun na i paia olgeta na bai ol manmeri tu i bagarap. Tasol dispela tok “Amagedon” i no makim dispela samting.
Dispela tok “Amagedon” i kamap long Baibel. Em i kamap wanpela taim tasol, long Revelesen sapta 16. Dispela tok profet i stori long “ol king bilong olgeta man bilong graun” ol i bung bilong “kirapim pait bilong Bikpela De bilong God I Gat O1geta Strong,” na bihain i tok: “Ol i bungim ol king long dispela hap, long tok Hibru ol i kolim Amagedon.”—Ves 13-16, The Jerusalem Bible.
“Pait bilong Bikpela De bilong God I Gat Olgeta Strong”! Olsem na Amagedon em i pait bilong God. Tru, ol king na ol lain man long graun bai ol i insait long dispela pait. Tasol ol i no bung bilong kirapim pait namel long ol yet. Nogat. Ol i bung bilong kirapim pait long God na long ol ami bilong heven, em King Krais Jisas i go pas long ol—Baibel i tok piksa olsem em i sindaun long waitpela hos. Na wanem samting i kamap? Baibel i stori olsem: “Ol king bilong graun, wantaim ol ami bilong ol, ol i bung pinis. Ol i laik pait wantaim dispela man i sindaun long hos, na ol i laik pait wantaim ami bilong em. . . . Na dispela man i sindaun long hos, em i kilim [ol] i dai . . . long dispela longpela bainat i kamap long maus bilong en. Na olgeta pisin ol i kaikai mit bilong dispela ol man, na bel bilong ol i pulap tru.”—Revelesen 19:19-21.
Blut Bilong Planti Man Bai Kapsait
Amagedon bai bagarapim planti man, olsem na Baibel i tok piksa na i tok i olsem “olgeta kaikai bilong graun i mau pinis” na bai ol i katim long naip. “Orait, dispela ensel em i holim naip bilong en na i tromoi long graun, na i katim olgeta kaikai bilong rop wain, na i bungim i stap. Na em i tromoi dispela kaikai i go insait long bikpela tang ston bilong krungutim wain. Dispela em i olsem belhat bilong God. Na ol i krungutim wain long dispela tang i stap ausait long biktaun. Na blut i kamap ausait long tang, na i ran i go inap long 300 kilomita, na i kam antap inap long ain i stap long maus bilong ol hos.”—Revelesen 14:15-20.
Tru tumas blut bilong planti man bai kapsait long han bilong ol ami bilong God. Long tupela bikpela pait bilong olgeta hap bilong graun inap 69 milion manmeri ol i bin kisim bagarap na i dai. Tasol dispela pait bilong God, em Amagedon, em bai kilim i dai planti moa. Profet Jeremaia i tok long dispela samting, olsem: “Ol man Jehova i kilim ol i dai pinis, skin bilong ol bai stap nabaut long olgeta hap bilong graun. I no gat sampela man bai krai long ol, na ol man i no ken bungim skin bilong ol o planim ol. Ol bai stap olsem pekpek long graun.”—Jeremaia 25:30-33, NW.
Ol spia paia bilong God na ol narapela samting God i mekim wok long en taim em i givim strafe long ol man nogut bai mekim ol man long olgeta hap ol i pret na bai bel bilong ol i guria. Bai ol i longlong nabaut na bai narapela i pait wantaim narapela. Strafe bilong God bai painim ol yangpela na ol lapun, ol man na ol meri. Olsem na God i tokim ol ami bilong em, olsem: “Yupela mas bagarapim ol man. Ai bilong yupela i no ken sori long ol na bel bilong yupela tu i no ken marimari long ol. Maski husat husat—ol lapun, ol yangpela man, na yangpela meri singel, ol liklik pikinini, ol bikpela meri—yupela mas kilim ol i dai na pinisim ol olgeta.”—Esikiel 9:5, 6, NW; Sekaraia 14:12, 13.
Tasol olsem wanem long dispela samting? Olsem wanem wanpela God bilong pasin sori em i ken tokim ol long mekim olsem? O ating em i no sori long ol man na em i laik bekim nogut tasol long ol? Tru wanpela God bilong sori em inap kamapim kain pait olsem dispela Amagedon?