Tok Bilong God i Gat Laip
Man Bilong Pasin Antap Em i Bihainim Pasin Daun
NEMAN em i kepten bilong ol ami bilong Siria. Em i man bilong pasin antap. Lukim piksa hia: Em i raun wantaim ol wokboi bilong em. Em i go long hap bilong Isrel bilong oraitim sik lepra bilong em. Wanpela yangpela meri Isrel i wok long meri bilong em i bin tokim em long ol strongpela wok o mirakel wanpela profet bilong Jehova i wokim long Isrel.
Neman i kisim pas bilong King bilong Siria i go givim long King bilong Isrel. Dispela pas i tokim King bilong Isrel long helpim Neman long sik bilong em. Neman i kamap long hap bilong Isrel na em i givim dispela pas long King Jehoram. King i tingting planti, long wanem em i no inap oraitim sik bilong Neman. Em i tok, ‘Ating King bilong Siria i laik kirapim pait.’ Tasol Ilaisa, em profet bilong Jehova, em i harim tok long dispela samting na em i tokim king long salim Neman i kam long em.
Olsem na Neman wantaim ol hos na karis pait bilong em i go long haus bilong Ilaisa. Tasol Ilaisa i no kam ausait na toktok wantaim em. Ilaisa i salim wanpela man i go givim tok long Neman olsem: ‘Yu mas i go long Wara Jodan na waswas 7-pela taim na bai sik bilong yu i pinis.’
Neman i bel nogut long dispela tok, long wanem em i gat pasin antap. Em i belhat na lusim haus bilong Ilaisa i go. Em i tok, ‘Mi ting dispela man bai i kam lukim mi na beten long Jehova na putim han bilong em long skin bilong mi. Mi inap waswas long ol wara bilong Siria.’ Tasol wanpela wokboi bilong Neman i laik givim gutpela tingting long Neman, em i tok: ‘Bikpela, sapos profet i bin tokim yu long mekim wanpela samting i hatwok tru long yu mekim, bai yu mekim, a? Orait, bilong wanem yu no laik waswas olsem em i tokim yu na bai sik bilong yu i pinis?’
Neman i harim tok bilong wokboi bilong em. Em i go long Wara Jodan na waswas 7-pela taim long dispela wara. Namba 7 taim sik bilong em i pinis na skin bilong em i kamap klin. Em wanpela mirakel! Neman i pilim tru dispela gutpela samting i painim em na em i go bek lukim Ilaisa bilong tok tenkyu long em. Em longwe, em i mas wokabaut inap 48 kilomita samting.
Neman i laik givim planti gutpela gutpela samting long Ilaisa i gat bikpela pe bilong en na em i tokim Ilaisa: ‘Mi laik pulimapim sampela graun bilong Isrel long bek bilong tupela donki na karim i go long ples bilong mi.’ Bilong wanem em i laik mekim olsem? Em i laik sanap long graun tru bilong Isrel na mekim ofa long Jehova. Na Neman i mekim tok tru antap olsem em bai lotuim God Jehova wanpela tasol na em i no ken mekim ofa long ol narapela god.—2 King 5:15-17.
Neman i senisim tru pasin bilong em, a? Em i makim gutpela pasin yumi ken bihainim. Na ol samting i kamap taim Neman i go lukim Ilaisa, dispela i lainim yumi long narapela samting tu. Long narapela Wastaua bihain bai yumi stori long dispela samting.