Ripot Bilong Wok Bilong Kingdom

“Ol Ailan” i Amamas

JISAS i tokim ol disaipel bilong em: “Bambai yupela i autim tok bilong mi . . . i go inap long olgeta hap graun.” (Aposel 1:8) Dispeia tok i makim olsem ol i mas autim tok long hap bilong Wes Pasifik tu. Nau Brens-ofis bilong Sosaiti Wastaua long Guam i lukautim wok bilong autim tok long olgeta ailan Maikronisia. Planti manmeri bilong ol dispela ailan nau ol i amamas. Bilong wanem ol i amamas? Sam 97:1 i stori long as bilong amamas bilong ol, olsem: “[Jehova] i stap king. Graun, yu mas amamas. Na ol ailan, yupela mas belgut.”

Ol manmeri bilong ol ailan long dispela hap ol i gat kain kain tok ples, olsem na ol man i tokaut long Jehova i stap king ol i gat hatwok. Wanpela gutpela samting tru i bin kamap long dispela yia na ol i amamas long en, em olsem: Long olgeta mun ol i kisim Wastaua long faipela bikpela tok ples bilong ol dispela ailan, na ol i bin tanim tok bilong buk Baibel Stori Buk Bilong Mi, na buklet Stap Amamas Oltaim long Graun long planti tok ples bilong ol manmeri bilong ol dispela ailan. Ol i wokim ol dispela buk samting long tok ples bilong ol manmeri long ol dispela longwe ples, na dispela samting i heipim ol tru. Ol i amamas long kisim ol dispela buk samting, long wanem ol narapela lotu i no save tanim tok bilong ol buk long tok ples bilong ol man bilong ol dispela ailan.

◻ Ol misineri long ailan Moen long hap bilong Trak ol i raitim pas na ol i tok taim ol i tilim buk Baibel Stori long tok ples Trak, ol manmeri i kirap nogut, na planti ol i kisim dispela buk na soim long ol wantok na wanblut bilong ol. Ol man i save pasim ol misineri long rot na tokim ol ol i laik kisim dispela buk. Sampela man i go long haus bilong ol misineri long 6:30 long moningtaim bambai ol i ken kisim dispela buk. Na sampela manmeri moa ol i go long Dipatmen bilong Edukesen, long wanem wanpela witness Bilong Jehova i wok long dispela dipatmen, na ol i tokim em ol i laik kisim dispela buk.

Wanpela tisa i laik save olsem wanem na ol Witnes Bilong Jehova i wokim dispela buk long tok ples Trak, tasol ol Katolik na Talatala i stap longtaim long dispela hap na ol i no bin wokim wanpela buk olsem. Sampela man pastaim ol i no laik harim tok, nau ol i kisim dispela buk.

◻ Wanpela samting i bin kamap long ol ailan Masel, na dispela samting i heipim yumi long save tok bilong Baibel inap helpim famili long i stap wanbel na amamas. Papa bilong haus em i man bilong dring spak na em i man bilong smok, tasol em i givim bel long lotu Katolik. Tupela yangpela Witnes i autim tok long em taim em i stap long haus na maski meri bilong em i krosim em, tasol em i tok em i laik stadi. Inap tripela yia meri bilong dispela man i wok long krosim em na givim hevi long em. Tasol meri i lukim pasin bilong man i senis. Tok i tru i helpim em na em i lusim pasin bilong smok, na em i no save dring spak moa, na em i save poroman gut wantaim famili bilong em. Meri i lukim dispela samting, olsem na em i kirap harim tok na em i tokim ol narapela man long ol tok em i kisim save long en. Tupela marit hia i stretim marit bilong ol na ol i kisim baptais bilong makim ol i dediket long Jehova. Nau dispela man i mekim wok elda na meri bilong em i tingting long mekim wok painia.

Nau dispela famili na planti narapela manmeri long ol dispela ailan ol i stap bel isi na ol i stap amamas, olsem man bilong raitim sam i tok. Em i tok bai ol manmeri i amamas, long wanem Jehova i kamap King.—Sam 144:15.

[Ol Mep long pes 24]

(Lukim Wastaua 1985)

Belau

Yap

Rota

Guam

Saipan

Trak

Ponape

Kosre

Nauru

Ailan Masel

Kiribati

Ailan Midwe

Solwara Pasifik