Tok Bilong God i Gat Laip
Pasin Bilong Mangal Long Mani i Bagarapim Wanpela Man
NEMAN i amamas tru, long wanem sik lepra bilong em i pinis. Em i pilim tru dispela gutpela samting i bin painim em, olsem na em i laik givim bikpela mani na ol gutpela laplap long Ilaisa, olsem presen, bilong tenkyu long em. Tasol Ilaisa i no laik kisim ol dispela samting. Jehova yet i bin wokim mirakel na oraitim bek skin bilong Neman, olsem na Ilaisa i no laik kisim pe long dispela.
Tasol olsem wanem long wokboi bilong Ilaisa, em Gehasi? Gehasi i mangalim ol gutpela bilas na mani Neman i laik givim long Ilaisa. Sapos Gehasi i laik tumas long kisim ol dispela samting, wanem samting bai kamap? Dispela laik nogut inap grisim em na pulim em long mekim pasin nogut.—Jems 1:13-15.
Neman na ol wokboi bilong em ol i lusim Ilaisa na ol i wokabaut i go bek long ples bilong ol long Siria. Tasol Gehasi i tingim yet ol dispela gutpela gutpela bilas na mani. Lukim dispela piksa! Gehasi i ran i go we?
Gehasi i bihainim Neman. Em i bungim Neman long rot na Neman i tok: ‘Olsem wanem? I gat hevi?’ Na Gehasi i tok: ‘Yes. Ilaisa i salim mi i kam bilong tokim yu, nau tasol tupela man i kam long em. Na Ilaisa i laik bai yu givim laplap long tupela na sampela mani silva.’ Tasol Gehasi i giaman. Em yet i laik kisim ol dispela samting. Neman i no save long tingting nogut bilong Gehasi. Em i givim ol samting long Gehasi olsem Gehasi i tok na em i strong long givim sampela mani moa.
Gehasi i go bek long haus na Ilaisa i askim em: “Gehasi, yu go we na yu kam?”
Gehasi i tok: ‘Nogat’ Tasol Jehova i givim save pinis long Ilaisa na Ilaisa i save long dispela samting nogut Gehasi i bin mekim. Olsem na Ilaisa i tok: ‘Nau em i no taim bilong kisim mani na laplap. Nau bai sik lepra bilong Neman i kalap long yu wantaim lain bilong yu.’ Wantu sik lepra i kamap long skin bilong Gehasi na dispela sik i stap long em inap long taim em i dai. Ol samting i painim Gehasi i helpim yumi long save, pasin bilong mangal long mani, dispela pasin inap bagarapim yumi.—2 King 5:5, 15-27, NW.