I Stap na Wok Bilong Jisas

Mama i Karim Jisas Long Wanem Hap na Wanem Taim?

KLOSTU NAU na Maria i laik karim pikinini, olsem na bilong wanem Josep i laik wokabaut i go long longwe ples? Long dispela taim Sisa Ogastas i putim wanpela lo long ol i mas kisim nem bilong olgeta manmeri. Olsem na Josep i laik i go bek long ples mama i karim em, long Betlehem.

Planti manmeri tru i go long Betlehem bilong putim nem long rejista, olsem na ol pasendia i pulap long olgeta haus pasendia. Josep tupela Maria i painim ples slip long haus bilong ol donki na bulmakau na ol narapela animal, na long dispela hap Maria i karim Jisas. Em i karamapim Jisas long laplap na slipim em insait long bokis kaikai bilong ol bulmakau.

God yet i bin givim tingting long Sisa Ogastas na em i putim dispela lo long ol manmeri i mas i go bek long as ples bilong ol na putim nem long rejista. Long dispela rot Maria inap karim Jisas long Betlehem na truim dispela tok profet i tok long dispela king bai kamap long Betlehem.

Dispela em i bikpela taim tru! Long dispela hap sampela wasman bilong sipsip ol i stap ausait long taun na ol i was long sipsip bilong ol long nait, na bikpela lait i kamap na i raunim ol. Dispela em strong bilong Jehova! Na ensel bilong Jehova i tokim ol: ‘Long dispela de long taun bilong Devit, wanpela meri i karim pikinini. Em i man bilong kisim bek yupela. Em i Krais. Em i Bikpela. Yupela bai lukim wanpela pikinini ol i pasim em long laplap, na em i slip long bokis kaikai bilong bulmakau.’ Orait, wantu tasol planti ensel moa i kamap na ol litimapim nem bilong God, i spik, “Litimapim nem bilong God long antap tru! Na long graun ol manmeri i ken bel isi. God i belgut long ol.”

Taim ol ensel i lukim ol na i go bek pinis, orait ol wasman bilong sipsip ol i toktok olsem, “Goan, yumi go long Betlehem na yumi lukim dispela samting i kamap, nau Bikpela i soim pinis long yumi.” Na ol i go kwiktaim na lukim Jisas i slip long bokis kaikai bilong bulmakau olsem ensel i tok. Na olgeta man i harim dispela tok ol wasman bilong sipsip i mekim, ol i tingting planti long en. Tasol Maria i putim dispela olgeta tok long bel bilong em, na em i tingim i stap.

Planti manmeri long nau ol i bilip olsem Maria i karim Jisas long Desemba 25. Tasol mun Desemba long Betlehem em i taim bilong ren na bikpela kol. Ol wasman bilong sipsip i no inap i stap ausait na was long sipsip bilong ol long dispela taim. Na ol manmeri i bel nogut long Sisa bilong Rom, olsem na em i no inap singautim ol long i kam na putim nem bilong ol long rejista long taim bilong bikpela kol. Olsem na yumi save mama i bin karim Jisas long taim bilong san, olsem long kirap bilong mun Oktoba samting. Luk 2:1-20; Maika 5:2.

◆ Bilong wanem Josep tupela Maria i go long Betlehem?

◆ Wanem gutpela samting tru i bin kamap long taim mama i karim Jisas?

◆ Olsem wanem yumi save mama i no bin karim Jisas long Desemba 25?

[Full-page picture on page 11]