I Stap na Wok Bilong Jisas

Pikinini Bilong Promis

JOSEP tupela Maria i stap long Betlehem; tupela i no go bek long Nasaret. Maria i karim pinis Jisas na 8-pela de bihain ol i katim skin bilong em olsem Lo bilong Moses i tok. Na ating em pasin bilong ol Juda long givim nem long pikinini long namba 8 de, olsem na ol i kolim nem bilong pikinini Jisas olsem ensel Gebriel i bin tokim ol long mekim.

Winim wanpela mun pinis na Jisas i gat 40 de. Orait, nau papamama i kisim em i go we? Ol i kisim em i go long Jerusalem, em klostu liklik long ples ol i stap long en. Lo God i givim long Moses i tok long namba 40 de bihain long taim mama i karim pikinini man, mama i mas givim ofa bilong mekim em wantaim pikinini i kamap klin.

Orait Maria i mekim olsem. Josep tupela Maria i no gat planti mani, olsem na Maria i kisim tupela liklik pisin i go bilong mekim ofa. Lo bilong Moses i tok mama i mas givim wanpela pikinini sipsip olsem ofa, tasol sapos em i no gat pikinini sipsip, orait em i ken givim tupela namba wan balus olsem ofa.

Insait long tempel, wanpela lapun man, nem bilong em Simion, em i holim Jisas long han bilong em. Spirit holi i tokim em pinis, bai em i no i dai kwik. Nogat. Em i mas lukim Krais pastaim. Orait, spirit holi i kirapim em na em i go insait long tempel na em i lukim dispela pikinini bilong Josep tupela Maria.

Simion i holim Jisas long han bilong em na em i tenkyu long God na i tok: ‘Yu bin truim tok promis bilong yu, long wanem ai bilong mi i lukim pinis samting yu mekim bilong kisim bek mipela.’ Josep tupela Maria i tingting planti taim ol i harim dispela tok. Bihain Simion i givim blesing long ol na em i tokim Maria olsem dispela pikinini “em i bilong mekim planti bilong Isrel i pundaun, na bilong mekim planti i kirap gen tu” na bikpela belhevi olsem wanpela bainat bai i sutim lewa bilong Maria.

Wanpela profet meri i stap, nem bilong em Ana na nau em i gat 84 krismas bilong em. Em i no save lusim tempel. Long dispela taim em tu i kam klostu na em i tenkyu long God na em i telimautim tok bilong dispela pikinini long olgeta man i laik harim.

Olgeta dispela samting i kamap long tempel i mekim Josep tupela Maria i amamas! Nau tupela i save tru, dispela pikinini em dispela Man God i tok promis long salim em i kam. Luk 2:21-38; Levitikas 12:1-8.

◆ Wanem taim ol Isrel i save givim nem long pikinini?

◆ Taim mama i karim pinis pikinini man, orait 40 de bihain em i mas mekim wanem? Na olsem wanem ofa bilong Maria i soim yumi Maria i no gat planti mani?

◆ Husat i bin luksave long Jisas em i dispela Pikinini Bilong Promis? Olsem wanem em i save?