I Stap na Wok Bilong Jisas

Lainim Nikodimas

JISAS i go long Pasova bilong 30 C.E. na em i wokim sampela bikpela mirakel. Olsem na planti man i bilip long em. Nikodimas em i wanpela hetman bilong ol Juda, em i kirap nogut long ol dispela mirakel na em i laik kisim sampela save moa. Em i go long Jisas long nait. Ating em i pret, nogut ol narapela hetman bilong ol Juda i lukim em.

Em i tok: “Tisa, mipela i save, God i bin salim yu i kam olsem tisa. Sapos God i no i stap wantaim wanpela man, em i no inap wokim ol dispela mirakel yu save wokim.” Jisas i bekim tok long em na em i tok, sapos man i laik i go insait long kingdom bilong God, em i mas “kamap nupela gen.”

Tasol olsem wanem man inap kamap nupela gen? Nikodimas i tok: “Ating em inap i go insait gen long bel bilong mama bilong en na mama i karim em gen?”

Tru, em i no inap mekim olsem. Olsem na nau Jisas i kamapim gut insait bilong dispela tok bilong em. Em i tok: “Sapos man i no kamap nupela long wara na long Holi Spirit, em i no inap i go insait long kingdom bilong God.” Taim Jisas i kisim baptais na spirit holi i kam daun long em, em i kamap nupela “long wara na long Holi Spirit.” Long dispela taim God i tok, “Dispela em i Pikinini bilong mi. Mi laikim em tumas. Bel bilong mi em i gutpela long em.” Long dispela rot God i tokaut olsem em i kamapim pinis wanpela pikinini bilong spirit em inap i go insait long Kingdom bilong heven. Bihain, long Pentikos 33 C.E., sampela moa ol i baptais na ol i kisim spirit holi, olsem na ol i kamap nupela gen olsem ol pikinini spirit bilong God.

Tasol wok bilong dispela Pikinini God i salim em i kam long graun, em i bikpela wok tru. Jisas i tokim Nikodimas: “Bipo Moses i litimapim snek long ples nating. Olsem tasol bai ol i litimapim Pikinini Bilong Man. Na olgeta man i bilip long em, ol i ken kisim laip i stap gut oltaim oltaim.” Yes, taim ol snek i kaikaim ol Isrel, ol i mas lukim snek bras bambai ol i no ken bagarap, na olsem tasol olgeta man i mas bilip long Pikinini Bilong God bambai ol i no ken bagarap.

Jisas i stori gut long bikpela pasin sori bilong God, em i tokim Nikodimas: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Olsem na hia long Jerusalem, 6-pela mun bihain long taim Jisas i kirap mekim wok bilong God, Jisas i tokaut klia olsem long rot bilong em bai God Jehova i kisim bek ol man. Jon 2:​23–3:21; Matyu 3:​16, 17; Aposel 2:​1-4; Nambas 21:⁠9.

◆ Wanem samting i kirapim Nikodimas long i go lukim Jisas? Bilong wanem em i go long nait?

◆ Wanem insait bilong dispela tok “kamap nupela gen”?

◆ Jisas i tok wanem bilong makim wok God bai mekim long rot bilong em bilong kisim bek yumi?