Husat Ol i Kamap Nupela Gen?

YU TING olgeta gutpela man i save go long heven? Planti man i ting olsem, tasol Krais Jisas i no wanbel long dispela tingting. Em i bin tokim wanpela hetman bilong ol Juda, em Nikodemus: “I no gat narapela man i bin i go antap long heven.”​—⁠Jon 3:⁠13.

Dispela tok bilong Jisas i makim olsem bihain sampela man inap i go insait long Kingdom bilong heven. Jisas i stori long dispela lain olsem: “Sapos man i no kamap nupela long wara na long Holi Spirit, em i no inap i go insait long kingdom bilong God. . . . Mi tokim yu, ‘Yupela i mas kamap nupela gen.’ ” Nikodemus i tingting: Olsem wanem man inap kamap nupela gen?​—⁠Jon 3:​1-9.

Ating yu tu yu no klia long dispela tok bilong Jisas, a? Yumi tingim samting i save kamap long nau, em sampela man i tok, spirit holi i go insait long bel bilong ol, na dispela i mekim na wantu ol i tanim bel. Olsem wanem? Tok bilong Jisas i makim dispela samting?

Bel na Tingting

Sampela i tok, bilong save gut olsem man i bin kamap nupela gen, em i mas pilim tru strong bilong spirit holi. Tasol bel na tingting bilong yumi inap giamanim yumi, na taim bel bilong yumi i kirap, em nau, bel inap giamanim yumi moa yet.​—⁠Jeremaia 17:⁠9.

Wanpela man i gat wok long skelim ol samting bel i save mekim long tingting, em Wiliam Sajen (William Sargent), em i tok, yumi mas ‘lukaut gut long ol bilip yumi kisim taim bel bilong yumi i kirap, long wanem, long dispela taim tingting bilong yumi inap giamanim yumi.’ Sajen i tingim ol samting i kamap taim sampela lain i autim tok na i singaut long ol man i mas kamap nupela gen, na sapos nogat, bai ol i go long bikpaia. Taim ol man i harim dispela tok, ating ol bai guria na kwiktaim ol i laik kamap nupela gen, nogut ol i go long bikpaia na kisim pen oltaim! Na olsem Sajen i tok, taim bel bilong man i guria olsem, tingting bilong em i paul na em i no inap tingting gut, olsem na em bai kisim nating ol nupela kain tingting o bilip na em i no skelim gut pastaim.​—⁠Buk The Mind Possessed.

Orait, olsem wanem man i ken save, em i bin ‘kisim nating’ wanpela bilip long dispela tok bilong kamap nupela gen na em i no skelim gut pastaim? Man i mas larim olgeta tok bilong Baibel i stiaim tingting bilong em, long wanem, spirit holi bilong God i bin kirapim ol man long raitim ol dispela tok. Baibel i tok, ol Kristen i mas “inap long save tru long laik bilong God” na lotuim Em. Na ol i mas save, bilip bilong ol i stret o nogat.​—⁠Rom 12:​1, 2; 1 Tesalonaika 5:21.

Em gutpela samting tru long God i bin givim rot long sampela man na ol inap kamap nupela gen. Dispela i insait long wanpela bikpela samting God i laik mekim. Tasol i gat sampela askim long dispela, olsem: Husat ol i kamap nupela gen? Ol i kamap nupela gen olsem wanem? Ol dispela man bai mekim wanem wok? God bai kisim bek ol dispela man tasol o olsem wanem?

[Piksa long pes 3]

Nikodemus i tingting: Olsem wanem man inap kamap nupela gen?