Go Telimautim Tok Bilong Kingdom Bilong God
“Ol daiman i ken planim daiman bilong ol yet. Tasol yu go telimautim tok bilong kingdom bilong God.”—LUK 9:60.
1. Tok bilong Jisas long Luk 9:60 i kirapim yumi long tingim wanem ol askim?
KINGDOM bilong God—em nambawan bikpela samting long tingting bilong Jisas! Na i wankain long yumi olgeta long nau, em yumi bihainim tru lek bilong em. Yumi Kristen na yumi mas wok long bihainim tru lek bilong Jisas—yumi mas bihainim ol tok bilong Baibel. (1 Pita 2:21) Nau yumi stap long yia 1986 na ating yumi mas skelim gut tingting bilong yumi—yumi tingim wanem samting i nambawan bikpela samting? Olsem: Wanem insait bilong tok bilong Jisas em i tokim wanpela man “ol daiman i ken planim daiman bilong ol yet”? Yu save? Bilong wanem Jisas i tok dispela man i mas i go autim tok bilong Kingdom na maski long dispela wok bilong famili ating i stret em i mekim? Yu ting olsem wanem?
2. Jehova i kirap mekim wok king long wanem taim? Wok king bilong em bai pinis o olsem wanem?
2 Paslain tru long taim Jisas i kolim dispela tok olsem “kingdom bilong God,” spirit bilong God i bin kirapim Devit long raitim tok olsem: “[Jehova] i stap king long heven, na em i bos bilong olgeta samting.” (Sam 103:19) Taim Jehova i kirap wokim ol samting, em i kirap mekim wok king—em i bosim ol samting em i bin wokim. Wok king bilong em i no ken pinis. I stret em i mas i stap bos bilong heven na graun na i no gat wanpela man bai tekewe dispela wok long em. Olsem na man bilong raitim sam i tok: “Yupela telimautim tok bilong biknem bilong en long ol lain manmeri. . . . [Jehova] i gat biknem. Yumi mas litimapim nem bilong en moa yet”!—Sam 96:3, 4; 109:21; Danyel 4:34, 35.
3. (a) Wanem samting i kamap na bihain wanpela i sutim tok long wok king bilong Jehova? (b) God i laik mekim wanem bilong stretim dispela tok?
3 Tasol sampela ol i no litimapim nem bilong Jehova. Ol i bikhet na lusim Jehova. Namba wan man bilong mekim olsem em Seten. Seten i gat tok long pasin bilong Jehova long bosim ol man hia long graun. (Jenesis 3:1-5; Jop 1:6-12; 2:1-5) Olsem na sampela man long graun na bihain sampela ensel long heven ol i kirap bihainim pasin bikhet bilong Seten. Seten i kirapim ol man long kamapim kain kain gavman na long dispela rot em i sutim tok long wok king o wok bos bilong Jehova, olsem em i tok i no stret Jehova i stap Bos. (Revelesen 13:1-6) Bilong stretim dispela tok, Jehova i laik mekim wanpela narapela kain wok, olsem Danyel 2:44 (NW ) i tok profet long en: “Long taim bilong ol dispela king God bilong heven bai kamapim wanpela kingdom i no inap bagarap. . . . Em bai bagarapim na pinisim ol dispela narapela kingdom, na em wanpela bai stap inap long taim bihain bihain.”
Jehova i Kamap King Bilong Isrel
4. Olsem wanem Devit inap tok Jehova i “kamap king”? Dispela gutpela samting i kamap na ol i laik mekim wanem?
4 Nau wanpela samting i kamap ples klia, em olsem: Tru, Jehova i mekim wok king kirap long taim em i bin wokim olgeta samting, tasol nau em i laik mekim dispela wok long rot bilong wanpela kingdom bambai em i ken stretim dispela tok Seten i bin sutim long em, olsem i stret Jehova i stap Nambawan Bos bilong olgeta samting o nogat. Long dispela rot bai Jehova i stretim dispela tok inap long olgeta taim bihain. Dispela kingdom Jehova i laik kamapim em Kingdom i stap long han bilong Krais long heven. Liklik kingdom God i kamapim bilong bosim lain Isrel long bipo em i olsem piksa bilong dispela Kingdom tru bilong God long heven, em dispela Kingdom “i no inap bagarap.” Olsem na taim King Devit i kisim bokis kontrak i kam insait long taun Jerusalem, em inap mekim singsing na litimapim nem bilong Jehova na tok olsem: “Heven i mas amamas na graun i mas amamas, na ol i mas tokim olgeta lain manmeri olsem, ‘Jehova yet em i kamap king!” ’ (1 Kronikel 16:31, NW ) Tru tumas, long dispela taim Jehova i “kamap king”—em i kamap king bilong olgeta Isrel. Em taim bilong amamas na Devit i laik telimautim tok bilong dispela gutpela samting long olgeta man!
5, 6. (a) Olsem wanem Devit i narapela kain long ol narapela king? (b) Devit i olsem gutpela piksa na em i makim husat? Olsem wanem em i makim em?
5 King Devit em i narapela kain long ol Narapela king, long wanem pastaim em i bin mekim wok olsem wanpela wasman bilong ol sipsip. Em i wasman na king! Man bilong raitim sam em i stori long God i makim Devit bilong mekim dispela wok na em i tok: “God i makim Devit, wokman bilong en, na i kisim em long wok bilong lukautim ol . . . sipsip. Na God i putim em i stap king bilong Isrel, na em i stap wasman bilong ol manmeri bilong God. Devit i tingting long wok bilong em tasol, na i lukautim ol gut. Na em i stap gutpela lida bilong ol.”—Sam 78:70-72.
6 Devit i lukautim gut lain bilong em na em i givim bel long God na em i stap gutpela lida bilong ol, olsem na em i gutpela piksa bilong dispela Krais i laik i kam, em God i laik givim wok long em olsem Wasman na King long dispela Kingdom em bilong kamapim long ples klia olsem Jehova em i Nambawan Bos bilong heven na graun. Bihain Esikiel i tok profet long dispela gutpela samting God i laik mekim, olsem: “Bai mi kamapim wanpela wasman bilong bosim [Isrel], na em bai givim kaikai long ol, em boi bilong mi Devit, . . . Na mi yet, mi Jehova, mi bai stap God bilong ol; na boi bilong mi, em Devit, em bai stap bos namel long ol. Mi Jehova, mi yet mi tok pinis.”—Esikiel 34:22-24, NW.
Dispela Wasman na King i Kam
7, 8. (a) Dispela Wasman na King em i husat, olsem ensel i tok? Taim em i kamap pinis, i stret ol man i mas mekim wanem? (b) God i ‘orait’ long Jisas bambai Jisas i mekim wanem wok?
7 Dispela Man Jehova i tok promis long salim em i kam, em Pikinini bilong em yet, Jisas. Ensel Gebriel i tokim meri singel Maria long dispela Man na em i tok: “Harim, bambai yu kisim bel na yu karim wanpela pikinini man. Na yu mas kolim nem bilong en Jisas. Em bai i stap bikpela man. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong lain bilong Jekop oltaim. Na kingdom bilong en bai i no pinis.” (Luk 1:31-33) Long rot bilong dispela Man bai wok king bilong Jehova i kamap ples klia! Olsem na i stret ol man i mas telimautim tok bilong dispela samting em bai kamap na tokim olgeta lain manmeri olsem “Jehova yet em i kamap king!”
8 God i wokim mirakel na Jisas i kamap man long graun. Mama i karim em na em i wok long kamap bikpela. Taim em i bikpela pinis em i go kisim baptais long Wara Jodan. Long dispela taim God i tokaut olsem Jisas em i Pikinini bilong em. God i kapsaitim spirit bilong em long Jisas na em i tok: “Yu Pikinini bilong mi. Mi laikim yu tumas. Bel bilong mi em i gutpela long yu.” God i orait long Jisas; bel bilong em i gutpela long Jisas. (Luk 3:22) God i ‘orait’ long Jisas bambai Jisas i mekim wanem wok? Luk i tok: “Taim Jisas i kirapim wok bilong en, yia bilong en inap olsem 30.” (Luk 3:23) Long liklik tok daunbilo long wanpela Baibel (New World Translation Reference Bible) ol i tanim dispela tok olsem: “Taim Jisas i kirap [skulim ol man].” Orait, wanem dispela wok bilong Jisas? Em i skulim ol man long wanem samting? Matyu i bekim tok olsem: “[Jisas] i go raun long olgeta hap bilong Galili. Em i skulim ol manmeri insait long haus, lotu bilong ol. Em i telimautim gutnius bilong kingdom, na i mekim orait olgeta sik na olgeta samting i bagarapim bodi bilong ol manmeri.”—Matyu 4:23.
9. Olsem wanem Jisas i wankain olsem tumbuna bilong em Devit?
9 Jisas i givim bel long ‘telimautim tok bilong kingdom bilong God.’ Olsem tumbuna bilong em, Devit, em i givim bel tru long God; em i stap gut long Kingdom bilong Jehova na em i no lusim lo bilong en liklik. (Luk 9:60; 4:3-13; Jon 16:33) Jisas i kamap dispela “wanpela wasman” em Jehova i tok promis long kamapim. Em i amamas long givim kaikai bilong spirit long ol manmeri em ol bikman bilong lotu i no bin lukautim ol na ol i stap olsem “sipsip i no gat wasman”—“tingting bilong ol i paul nabaut, na ol i stap nogut tru.” (Matyu 9:36) Jisas i lukautim gut ‘ol sipsip’ na bihain em i mas lukautim planti sipsip moa, long wanem em i tok: “Mi gutpela wasman bilong sipsip. Mi save long ol sipsip bilong mi, na ol sipsip bilong mi ol i save long mi . . . Mi gat arapela sipsip tu, na ol i no bilong dispela banis. Mi mas bringim ol dispela tu. Na bai ol i harim maus bilong mi. Na bambai i gat wanpela lain sipsip tasol na wanpela wasman tasol bilong ol sipsip.”—Jon 10:14, 16.
10. Taim Jisas i singautim ol Juda i go bihainim em, ol i mekim kain kain samting na dispela inap lainim yumi olsem wanem?
10 Taim Jisas i singautim ol Juda i kam bihainim em olsem “ol sipsip,” ol i mekim wanem? Ol i mekim kain kain samting. Orait, nau yumi ken skelim sampela samting ol i bin mekim na bai yu inap skelim ol samting yu bin mekim kirap long taim yu harim tok bilong Kingdom bilong God.
“Yu Kam Bihainim Mi”—Yu Mekim Wanem?
11. Taim Jisas i tokim Saimon na Andru na Jems na Jon na Matyu, “Yu kam bihainim mi,” ol i mekim wanem?
11 Jisas i wokabaut arere long raunwara Galili na em i lusim Saimon wantaim brata bilong em Andru. Tupela i kisim pis. “Na Jisas i tokim tupela, ‘Yutupela i kam bihainim mi, na bai mi lainim yutupela long kisim man.’ Na kwiktaim tupela i lusim umben na i go bihainim em. Em i wokabaut i go moa liklik, na em i lukim Jems, pikinini bilong Sebedi, wantaim brata bilong en Jon. . . . Na em i singautim tupela, na tupela i lusim papa Sebedi i stap long bot wantaim ol wokman, na tupela i go bihainim Jisas” (Mak 1:16-20) Taim Jisas i singautim Livai o Matyu, em man bilong kisim takis, em tu i kirap kwik na bihainim Jisas. Em i “lusim olgeta samting i stap, na em i go bihainim Jisas.”—Luk 5:27, 28.
12. Wanem hevi bilong man i tokim Jisas: “Olgeta ples yu go long en, bai mi bihainim yu i go wantaim”?
12 Tasol sampela man, taim Jisas i tokim ol “Yu kam bihainim mi,” ol i no kirap kwik na bihainim em. Tingim dispela man Luk sapta 9 i stori long em, em Jisas i bungim em taim Jisas i wokabaut long rot i go long narapela ples. Dispela man i tokim Jisas: “Olgeta ples yu go long en, bai mi bihainim yu i go wantaim.” Taim Matyu i stori long dispela samting, stori bilong em i mekim olsem dispela man em i wanpela saveman bilong lo. Ol man i save litimapim nem bilong ol saveman bilong lo na kolim ol “Tisa.” Tasol Jisas i bekim wanem tok long dispela man? Jisas i tok: “Ol weldok i gat hul long graun, na ol pisin i gat haus. Tasol Pikinini Bilong Man i no gat ples bilong slipim het bilong en.” (Luk 9:57, 58) Jisas i laik tokim dispela man, sapos em i bihainim Jisas bai em i no gat gutpela sindaun; sampela taim bai em i no save em bai slip we long nait. Ating dispela man i gat pasin antap na em i no laik i stap nogut olsem.
13. Wanem insait bilong tok Jisas i bekim long narapela man em inap kamap disaipel bilong Jisas?
13 Na Jisas i tokim narapela man i sanap klostu: “Yu kam bihainim mi.” Tasol dispela man i tok: “Ating yu ken orait long mi go planim papa bilong mi pastaim.” Jisas i bekim tok olsem: “Maski, ol daiman i ken planim daiman bilong ol yet. Tasol yu go telimautim tok bilong kingdom bilong God.” (Luk 9:59, 60) I no olsem papa bilong dispela man i dai pinis na em i laik i go planim em. Nogat. Sapos tru papa bilong em i dai pinis, orait bai dispela man i no i stap long rot harim tok bilong Jisas. Nogat. Tasol dispela man i laik wet pastaim na bihain, taim papa i dai pinis, orait bai em i kirap mekim wok bilong Kingdom bilong God. Em i no laik kirap kwik na tingim Kingdom bilong God pastaim.—Matyu 6:33.
14, 15. (a) Tok namba tri man i mekim i soim yumi em i gat wanem kain tingting? (b) Tok Jisas i bekim long dispela man inap lainim yumi long wanem samting long nau?
14 Na Baibel i stori long namba tri man em i tok: “Bikpela, mi laik bihainim yu. Tasol ating yu ken orait long mi go pastaim na sekan wantaim ol lain bilong mi.” Dispela man i laik bihainim Jisas, tasol em i no givim bel olgeta long mekim. Orait, Jisas i bekim wanem tok long em? Jisas i tok: “Man i laik holim stia, tasol oltaim em i lukluk i go long baksait, em i no inap long kingdom bilong God.” (Luk 9:61, 62) Taim man i laik wokim wanpela baret long gaden, ai bilong em i mas lukluk i go tasol na bai baret i stret. Sapos em i lukluk i go long baksait, ating bai baret i krungut nabaut. O ating bai em i pundaun! I wankain tasol long ol man i bihainim Jisas. Sapos ol i lukluk i go long baksait, olsem tingim gen ol samting bilong olpela pasin bilong dispela graun, maski ol i mekim kwik tumas, tasol hevi inap painim ol. Ating bai ol i pundaun na bai ol i lusim dispela ‘liklik rot i go long laip.’—Matyu 7:14; lukim tu Luk 17:31-35.
15 Olsem wanem? Yu bin harim singaut bilong Jisas, em i tok “Yu kam bihainim mi”? Orait, yu mekim wanem? Yu kirap kwik bihainim em olsem Saimon na Andru na Jems na Jon na Matyu i bin mekim? Yu redi long lusim olgeta samting, olsem ol i bin mekim, bambai yu ken bihainim Jisas? Sapos yu tok, ‘Tru, mi redi long mekim,’ orait bai yu amamas long mekim tu wok bilong telimautim tok bilong Kingdom bilong God.
16. Jisas i mekim wanem bilong redim ol disaipel bambai ol inap wok wantaim em long autim tok bilong Kingdom?
16 Taim Jisas i no salim yet ol disaipel i go autim tok bilong Kingdom, em yet i autim tok na pasin bilong em i lainim ol gut long pasin ol i mas bihainim. Na bihain em i givim planti tok long ol long ol samting ol i ken mekim bambai ol inap painim ol sipsip long kain kain ples ol i stap long en. Ol dispela tok o lo Jisas i givim long ol disaipel em inap helpim yumi long nau tu. Olsem na gutpela sapos yumi skelim ol dispela tok em i stap long Matyu sapta 10.
Ol Lo Bilong Wok Bilong Autim Tok Bilong Kingdom
17. Olsem wanem long tok bilong Kingdom ol Kristen bilong pastaim i autim na tok bilong Kingdom yumi autim long nau?
17 Ol disaipel i mas autim wankain tok olsem Jisas i autim: “Yupela i go na telimautim tok olsem: ‘Kingdom bilong heven em i kam klostu pinis.” ’ (Matyu 10:7) Tasol nau dispela Kingdom i kamap pinis long heven. Dispela man, em Jehova yet i putim em i stap Wasman na King, em Krais Jisas, em i kirap pinis long mekim wok king! Olsem na tok bilong Devit i stret tru long nau, em i tok: “Heven i mas amamas na graun i mas amamas, na ol i mas tokim olgeta lain manmeri olsem, ‘Jehova yet em i kamap king!” ’ (1 Kronikel 16:31, NW ) Long nau yumi amamas, long wanem yumi inap insait long wok bilong autim tok bilong dispela Kingdom Jehova i bin kamapim bilong litimapim nem bilong em, em i Nambawan King bilong heven na graun; na yumi amamas, long wanem yumi stap long taim bilong stretim dispela tok Seten i bin sutim long wok king bilong Jehova. Nau bai Jehova i stretim dispela tok inap long olgeta taim bihain.
18. Long Matyu 10:8-10 Jisas i helpim ol disaipel bilong em long tingim wanem samting pastaim? Husat long nau ol i pilim tru tok bilong Jisas long Matyu 10:10?
18 Matyu 10:8-10 i stori long tingting bilong ol man i insait long wok bilong autim tok. Ol i mas tingim Kingdom bilong God pastaim; ol samting bilong skin i namba tu. Bilong wanem ol i no ken tingting tumas long ol samting bilong skin? Jisas i tok: “Man i wok, em inap long kisim kaikai bilong en.” Papa bilong yumi long heven em i save lukautim ol manmeri i bilip long em. Planti handet painia long lain Witnes long nau ol i pilim tru dispela tok; ol i save God i mekim olsem.—Nambas 18:30, 31; Diuteronomi 25:4.
19. Yumi save mekim wanem long nau bilong painim ol “gutpela na stretpela” man? Husat i bosim dispela wok?
19 Nau Jisas i tokim ol disaipel: “Sapos yupela i go insait long wanpela taun o wanpela ples, orait yupela i mas luksave gut, wanem man bilong dispela ples em i gutpela na stretpela. Na yupela i mas i stap wantaim dispela man inap long taim yupela i lusim dispela ples.” (Matyu 10:11) “Gutpela na stretpela” man em inap long mekim wanem? Em inap long lukautim dispela wokman bilong Jehova long haus bilong em na harim dispela tok bilong Kingdom bilong God. Tru, long dispela taim bipo ol disaipel i save stap wantaim ol man i laik harim tok; ol i save stap long haus bilong kain man olsem na wok long painim ol narapela “gutpela na stretpela” man long dispela ples. Long nau tu ol Witnes Bilong Jehova i mekim wankain wok. Ol i save wok strong na lusim planti milion aua long painim ol “gutpela na stretpela” man long kain kain ples. Taim ol i painim pinis kain man olsem, ol i save go bek lukim em na toktok wantaim em long ol tok bilong God long Baibel. Olsem na, long nau, Jisas i mekim gut wok wasman bilong em. Em i bringim planti “sipsip” moa i kam na putim ol i stap long han sut bilong em—dispela i makim olsem em i belgut long ol.—Matyu 25:31-33.
20. Olsem wanem “gutpela na stretpela” man i kisim dispela bel isi man bilong autim tok bilong Kingdom i tok em i mas kisim?
20 “Sapos yupela i go insait long wanpela haus, orait yupela i mas tok long ol manmeri bilong haus: ‘Gutpela taim i ken kam long yupela.’ Na sapos ol manmeri bilong dispela haus i orait long yupela, bai gutpela tok bilong yupela i ken i stap long ol.” (Matyu 10:12, 13) Long taim bilong Jisas, taim ol man i go lukim ol manmeri bilong wanpela haus, ol i save tok: “Ol manmeri bilong dispela haus ol i ken i stap bel isi.” (Luk 10:5) Taim mama i karim Jisas, ol ensel i singsing na ol i tok: “Litimapim nem bilong God long antap tru! Na long graun ol manmeri i ken bel isi. God i belgut long ol.” (Luk 2:14) Ol manmeri i orait long ol disaipel ol i kisim dispela bel isi, long wanem ol i harim na bilipim tok bilong Kingdom ol disaipel i autim long ol. Long nau tu, tok bilong Kingdom i mekim wankain wok. Em i helpim ol man long kamap wanbel wantaim God long rot bilong Krais Jisas, na i helpim ol bilipman long sindaun gut wantaim.—2 Korin 5:20, 21; Filipai 4:7; Efesas 4:3.
21. Teks bilong yia 1986 i helpim yumi olsem wanem?
21 Long yia 1986, insait long ol Haus Kingdom bilong ol Witnes Bilong Jehova ol i raitim wanpela tok bilong Baibel, em teks bilong dispela yia. Ol i kisim dispela tok long Luk 9:60, em olsem: “Go telimautim tok bilong kingdom bilong God.” Dispela tok i kirapim tingting bilong olgeta wokman tru bilong God na ol i wok strong long autim tok bilong Kingdom bilong God long olgeta taim! Dispela Kingdom i kamap pinis! Em i bin kamap long yia 1914. Em i olsem “tul” God i putim long han bilong King Krais Jisas bilong krungutim olgeta kingdom bilong Seten long dispela graun. Olsem na dispela Kingdom bilong God i mas i stap olsem nambawan bikpela samting long tingting bilong olgeta Witnes Bilong Jehova. Yumi save, long dispela rot bai yumi inap kisim laip!—1 Timoti 4:16.
Bai Yu Bekim Wanem Tok long Ol Dispela Askim?
◻ Wok king bilong Jehova bai pinis o olsem wanem?
◻ I gat wanem bikpela tok God i mas stretim long nau?
◻ Olgeta man i bihainim Jisas ol i mas redi long mekim wanem?
◻ Olsem wanem na i stret tru yumi ken tok long nau “Jehova yet em i kamap king”?
◻ Dispela hap tok bilong Baibel ol Witnes i laik tingim long yia 1986, em bai helpim ol olsem wanem?
[Piksa long pes 14]
Matyu i lusim olgeta samting i stap na em i go bihainim Jisas