Bilong Strongim Bel Bilong Ol Man i Stap Gut Long God
“Yu bin lukim mi wokabaut stret, olsem na yu lukautim mi.”—SAM 41:12.
1. Bilong wanem i mas i gat samting bilong strongim Bel Bilong lain bilong Jehova?
OL MAN i save mekim nogut long ol witnes bilong Jehova ol i stap gut long God, olsem na i mas i gat samting bilong strongim Bel Bilong ol. Tru, ol i save hevi i mas painim ol, long wanem Krais Jisas i tokim ol disaipel bilong em: “Wokboi em i no antap long bikpela man bilong en. Ol i bin ranim mi, olsem na bai ol i ranim yupela tu.” (Jon 15:20) Nau long dispela taim, winim olgeta taim bipo i mas i gat samting bilong strongim Bel Bilong lain bilong Jehova. Bilong wanem? Long wanem, ol i tromoi Seten i kam daun pinis long graun, em namba wan man bilong lusim stretpela pasin. Em i save em i gat sotpela taim tasol, olsem na em i wok strong moa yet long birua long God na long ol wokboi bilong God.—Revelesen 12:7-9, 17.
2. Ol Kristen i pilim olsem wanem long pen na hevi ol wanlotu bilong ol i karim?
2 Yumi wokboi bilong Jehova na yumi save wok strong long beten bilong helpim ol brata sista bilong yumi, em ol i mekim wok bilong Jehova long ples i gat tambu long wok bilong yumi o ol i karim hevi long han bilong ol man i mekim nogut long ol. (Aposel 12:1; 2 Tesalonaika 1:4) Yumi litimapim nem Bilong ol brata Kristen ol i sanap strong maski ol man bilong givim baksait long tok i tru o ol narapela man i tok nogut long ol. (Matyu 5:11) Yumi wari long ol wanlotu bilong yumi, em ol wanblut o wanhaus bilong ol i birua long ol. (Matyu 10:34-36) Na Bel bilong yumi i sori tru long ol brata i gat sik na ol i karim pen longtaim, tasol ol i stap gut long God. Tasol bilong wanem i gat ol dispela pen na hevi? I gat wanem samting bilong strongim Bel bilong ol manmeri i stap gut long God?
Tingim As Bilong Hevi na Ples Bilong Hait
3. Seten i laik mekim wanem na em i kirapim ol man long mekim nogut long ol Kristen?
3 Long rot bilong sampela man na ol spirit nogut, Seten i wok long “kaikai” ol Kristen. (1 Pita 5:8) Yes, Seten i save kirapim ol man long mekim nogut long yumi na em i putim ol narapela hevi tu long yumi bilong pundaunim yumi bambai yumi lusim God Jehova na stretpela pasin bilong em. Tasol olsem wanem? Ating i no gat man bilong helpim yumi? I gat!
4. Taim ol man i mekim nogut long ol manmeri i stap gut long God o narapela hevi i painim ol, ol i ken save tru long wanem samting?
4 God Jehova i save helpim yumi! Sapos yumi beten askim em long helpim yumi, bai em i mekim. Bai em i lukautim yumi; em i ples hait bilong yumi. Taim ol man i mekim nogut long yumi o narapela hevi i laik pundaunim yumi, yumi ken mekim wankain beten olsem Devit i bin mekim, em i tok: “God, yu marimari long mi. Mi go long yu na mi laik yu lukautim mi. Mi stap wantaim yu na mi stap gut. Olsem ol pikinini kakaruk i save hait na stap gut aninit long wing bilong mama kakaruk. Mi laik i stap olsem inap olgeta samting bilong bagarapim mi i pinis.” (Sam 57:1) Yumi holimpas stretpela pasin na i stap gut long God, olsem na yumi ken save tru, bai Jehova i helpim yumi, em i Ples Hait bilong yumi. Na yumi ken bilip tru olsem Devit taim em i beten long God na em i tok: “Yu bin lukim mi wokabaut stret, olsem na yu lukautim mi, na yu holim mi klostu long yu oltaim.”—Sam 41:12.
5. Ol Kristen i karim hevi ol i mas lain long mekim wanem? Yumi inap kisim wanem gutpela samting?
5 Hevi o traim i no ken pinis kwik, olsem na yumi mas lain long sanap strong na karim hevi. Aposel Pol i laik strongim ol Kristen Hibru na em i tokim ol: “Yupela i mas tingim gen taim bipo, ․․․ Long dispela taim ol i givim bikpela hatwok long yupela, na yupela i karim planti pen. Tasol yupela i sanap strong.” Na em i tok moa, olsem: “Yupela i mas sanap strong, olsem na yupela i ken bihainim tok bilong God. Na yupela i ken kisim gutpela samting, bipo God i tok long givim yupela.” (Hibru 10:32-36) Ol Kristen em spirit holi i bin makim ol, bai ol i kisim ‘gutpela samting bipo God i tok long givim long ol’—bai ol i kisim laip i stap oltaim long heven na bai ol i no inap i dai moa. Na ‘bikpela lain’ bai ol i kisim laip i stap oltaim long paradais long graun. (Revelesen 7:9; Luk 23:43) Olgeta man i sanap strong na i stap gut long God i go inap long pinis, ol inap kisim laip i stap oltaim.—Mak 13:13.
6. Olsem wanem na sampela Witnes Bilong Jehova ol i mas sanap strong tru? Ol i gat wanem samting bilong helpim ol?
6 Ol Witnes Bilong Jehova long sampela kantri ol i bin “sanap strong” inap planti yia. Ol i bin mekim wok bilong God long ples i gat hatwok o ol i bin karim hevi, long wanem gavman i tambuim wok bilong ol. Ating yu yet yu bin karim hevi, long wanem planti taim sik i painim yu o famili bilong yu i birua long wok Kristen bilong yu. Sapos man i mekim wok long strong bilong em yet, bai em i no inap karim ol dispela hevi. Tasol yumi ol Witnes Bilong Jehova, yumi inap karim ol kain hevi olsem na sanap strong, long wanem “[Jehova] i bin wokim heven na graun, em wanpela tasol i save helpim [yumi].”—Sam 121:1-3.
7. (a) Ol hevi na traim i stap longtaim i givim rot long yumi bilong mekim wanem? (b) Olsem wanem na yumi ken bilipim tok bilong Pol long Filipai 4:13?
7 Sampela hevi, ating yumi mas karim i go inap long taim dispela taim nau i pinis. Tasol ol dispela hevi i givim rot long yumi bilong kamapim long ples klia olsem yumi holimpas stretpela pasin na i stap gut long God, na dispela samting i mekim bel bilong Em i amamas. (Provep 27:11) Na tu Jehova i givim strong long yumi inap long yumi ken sanap strong na i stap gut long wok bilong em. Aposel Pol i raitim tok olsem: “[God] i save strongim mi, na long strong bilong em mi inap mekim olgeta samting.” (Filipai 4:13) Yu ken bilipim dispela tok, long wanem long olgeta taim God i strongim “olgeta brata bilong yupela, ol i stap long olgeta hap graun.”—1 Pita 5:9, 10.
Ol Man i Stap Gut long God Ol i Strongim Bel Bilong Yumi
8. Wanem blesing inap painim man o meri i stap gut long God maski poroman bilong em i no bilip?
8 Taim yumi lukim ‘olgeta brata bilong yumi long olgeta hap graun’ ol i sanap strong na i stap gut long God, dispela i strongim bel bilong yumi. Sampela ol i stap gut long Jehova, maski ol wanhaus bilong ol i no bilip, na ol i bin kisim planti blesing. Olsem: Ol Witnes i kirap lainim wanpela meri Katolik long ples Ailan long tok bilong Baibel na man bilong em i birua tru long em. Em i tok em i laik katim marit. Tasol meri hia i no lusim stadi na wanpela taim em i givim wanpela buk bilong Baibel long man bilong em, nem bilong dispela buk em Yu Inap i Stap Oltaim long Paradais long Graun. Ol tok bilong dispela buk i no hatwok long save long en na man i pilim tru na em i laikim ol gutpela piksa bilong dispela buk. I no longtaim na em i kirap long stadi long dispela buk na lainim tok bilong Baibel. Em i lusim smok, na bihain liklik tupela wantaim i lusim misin Katolik na rausim ol piksa long haus bilong ol em misin i tok ol i holi. Meri i kisim baptais na nau em i mekim wok painia haptaim, na man bilong em i kamap strong long wok bilong autim tok. Taim kain samting olsem i kamap, dispela i strongim bel bilong ol narapela brata sista em poroman bilong ol i no bilip na ol i wok long sanap strong.—1 Korin 7:12-16.
9. Ol man i gat sik, tasol ol i stap gut long God, olsem wanem ol inap helpim ol narapela man?
9 Sampela brata sista ol i bin sanap strong na i stap gut long God maski ol i gat sik. Long Englan wanpela Kristen i gat sik na em i sindaun long wilsia, tasol em i kisim bikpela amamas long mekim wok bilong God. Em i raitim pas na em i tok: “Kirap long yia 1949 mi no inap mekim wok mani moa, tasol Jehova i givim wok long mi. Olsem na ol yia i kamap i go pinis kwiktaim. Mi kisim save olsem: Maski man i gat bikpela sik na em i no inap wokabaut, tasol em inap helpim ol narapela man. Mi wantaim meri bilong mi, mitupela i stap olsem anka bilong sampela brata sista long kongrigesen, long wanem mipela i no inap i go long wanpela hap, mipela i stap tasol na oltaim ol i ken i kam long mipela na bai mipela givim gutpela tok samting long ol bilong strongim ol.” Tru tumas, ol Kristen i gat sik o skin bilong ol i no strong, ol i no ken bel hevi. Ol inap strongim bel bilong ol narapela man.
10.Ol man i stap gut long God, sapos ol i no pundaun taim ol man i mekim nogut long ol, olsem wanem ol inap helpim ol wanlotu bilong ol?
10 Ol man bilong i stap gut long God, maski ol man i mekim nogut long ol, tasol ol i no pundaun. Wanpela brata em i no laik insait long pait na ol i putim em long kalabus. Em i tok: “Long olgeta de ․․․ ol i paitim mi. Ol i wok long paitim mi planti taim moa na paitim mi nogut tru. Strong bilong mi i laik pinis, long wanem planti taim ol i no givim kaikai long mi. Oltaim mi beten long Jehova na em i no lusim mi. Taim ol i kirap paitim mi moa yet, nau mi no pilim moa.” Kot i tok dispela Witnes i mas kalabus inap tupela yia, tasol em i stap gut long God na em i no lusim stretpela pasin. (Aisaia 2:2-4; Jon 15:19) Planti narapela brata sista tu, ol i bin sanap strong olsem na i stap gut long God. Pasin bilong ol i strongim tru yumi na i kirapim yumi long i stap gut long God.
God i Save Strongim Yumi Oltaim
11. Baibel i tok wanem na dispela i strongim tru bel bilong ol Kristen?
11 Yumi bin stori long wan wan samting tasol i bin kamap na yumi ken save tru olsem Jehova i save lukautim ol manmeri bilong em ol i stap gut long em. Em i “Papa bilong yumi, na em i as bilong sori. Em i God bilong mekim isi bel bilong olgeta man i gat hevi“ (2 Korin 1:3, 4) Tru tumas, “God em i ples hait bilong yumi, na em i save strongim yumi oltaim. Em i stap klostu na i redi long helpim yumi long taim bilong bikpela hevi.” (Sam 46:1-3) Baibel i tok, God bai strongim yumi na ol wanlotu bilong yumi long olgeta hevi bilong yumi. Yumi save long dispela samting na dispela i strongim tru bel bilong yumi!
12. Pol i karim hevi na sanap strong na dispela i mekim wanem long ol narapela Kristen?
12 Taim yumi save ol brata Kristen bilong yumi ol i stap gut long God maski hevi i painim ol, dispela samting i strongim tru bel bilong yumi. Dispela samting i helpim yumi long i stap gut long God. Taim hevi i painim Pol na em i sanap strong, dispela samting i strongim ol brata. Pol i tok: “Dispela samting i bin kamap long mi em i no pasim gutnius. Nogat. Em i mekim i go moa ․․․ planti brata i bilip long Bikpela, ol i ting long mi stap kalabus, na bel bilong ol i kisim strong long dispela. Na ol i lusim pret na i strong moa long autim tok bilong God.”—Filipai 1:12-14.
13. Sapos yumi yet yumi sanap strong na stap gut long God, dispela inap mekim wanem?
13 Tru tumas, taim yumi save ol narapela Witnes Bilong Jehova i stap gut long God maski hevi i painim ol, dispela i strongim yumi long mekim olsem tu. Na taim yumi yet yumi karim hevi na i stap gut long God, dispela i strongim ol narapela brata na ol i no pret long autim tok bilong God. Na yumi amamas, long wanem dispela pasin bilong yumi long i stap gut long God em i strongim ol brata na ol inap kisim blesing.
14. Kolim tupela samting Jehova i mekim bilong strongim yumi.
14 Jehova i save givim spirit bilong em long yumi bilong strongim yumi. Pita i tok, ‘Yumi holim nem bilong Krais, na sapos long dispela ol i tok nogut long yumi, orait yumi ken amamas, long wanem spirit bilong God i gat biknem na strong em i stap long yumi.’ (1 Pita 4:12-16) Na Jehova i save harim beten bilong yumi na bilong ol brata bilong yumi ol i karim hevi. Dispela samting tu i strongim yumi. Aposel Pol i tok: “Yupela i no ken wari. Nogat. Long olgeta samting yupela i mas tokim God long samting yupela i laikim. Yupela i mas prea long em, na singaut long em, na tenkyu long em. Bel isi God i save givim yumi, em i winim olgeta save bilong man. Long wok bilong Krais Jisas bai dispela bel isi i was gut long bel bilong yupela wantaim tingting bilong yupela.” (Filipai 4:6, 7) Yu save bilip tru olsem long dispela Man i “save harim beten”?—Sam 65:2.
Baibel i Strongim Bel Bilong Yumi
15. Yu inap kolim wanpela stori bilong Baibel i truim tok bilong Rom 15:4?
15 Baibel, em tok holi bilong God, em tu i save strongim bel bilong yumi. Aposel Pol i tok: “Olgeta tok ol i bin raitim bipo, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na bilip na wetim God i kisim yumi.” (Rom 15:4) Olsem: Taim yumi kaunim stori bilong God i wokim ol mirakel na helpim lain Isrel long lusim Isip, o stori bilong ol samting Jehova i mekim bilong lukautim ol Juda long taim bilong Kwin Esta, dispela i strongim tru bilip bilong yumi olsem Jehova em i Man bilong lukautim yumi, a? Na olsem wanem long stori bilong Jop long Baibel? Jop i karim bikpela hevi tru na em i stap gut long God. Olsem na ol wokboi bilong Jehova long nau, ol tu inap karim bikpela hevi long strong bilong God, a? Tru tumas, ol tok bilong Baibel inap “strongim bel” bilong ol man i stap gut long God na ol i no ken pret; ol i sanap strong na bilip na wetim God.
16. Wanem gutpela tok promis i stap long 1 Pita 5:6, 7 na 1 Korin 10:13?
16 Tasol olsem wanem sapos yumi karim hevi na dispela i mekim yumi bel hevi? Gutpela tok promis bilong Baibel inap helpim yumi long bilip tru olsem Jehova bai lukautim yumi na bai yumi no bel hevi moa. Aposel Pita i tok: “Yupela mas daunim laik bilong yupela yet na stap aninit long strongpela han bilong God. Na long taim bilong em yet, bai em i litimapim yupela. Em yet i save lukautim yupela. Olsem na olgeta hevi bilong yupela em yupela i mas putim long han bilong em.” (1 Pita 5:6, 7) Yes, Jehova i “save lukautim” yumi. Dispela tok i strongim tru bel bilong yumi, a? Olgeta samting i kamap em Jehova i lukim na em inap bosim. Na Pol i givim gutpela tok long yumi, olsem: “God i save bihainim promis bilong em, bai em i no larim wanpela traim i winim strong bilong yupela. Nogat. Sapos traim i kamap long yupela, bai God i wokim rot bilong helpim yupela. Dispela rot em i olsem: Bai em i strongim yupela na yupela inap sanap strong long traim.” (1 Korin 10:13) Yu tingting strong long i stap gut long God, olsem na yu ken bilip tru olsem God bai strongim yu na bai yu inap sanap strong long traim!
17. 1 gat wanem samting moa bilong strongim bel bilong yumi?
17 Sapos yu stadi na taim yu stadi yu beten, na yu lainim ol tok bilong Baibel na bilong ol buk na nius bilong Baibel em “wokboi i gat gutpela tingting, na i save lukaut gut long wok bilong en” i givim long yumi, orait dispela inap strongim yu long taim bilong hevi. (Matyu 24:45-47; Sam 119:105) Na gutpela tok bilong Baibel ol elda i givim long yumi long pasin sori, dispela tu inap helpim na strongim yumi. Baibel i kolim wok bilong ol elda na i tok wanpela wok bilong ol em olsem: Ol i mas “strongim bel bilong ol man i save pret. Helpim ol man i no strong. Na [ol] i mas isi isi long olgeta man.”—1 Tesalonaika 5:14.
18. Sapos yumi no gat planti samting bilong skin, wanem samting inap strongim bel bilong yumi?
18 Tasol sapos yumi no gat planti samting bilong skin, olsem wanem yumi ken strongim bel? Tru yumi save, long Nupela Taim bihain bai i gat ol gutpela haus na planti kaikai samting bilong skin na dispela samting i mekim gut bel bilong yumi. (Sam 72:16; 2 Pita 3:13; lukim tu Aisaia 65:17-25.) Tasol nau tu pasin bilong ol Kristen i helpim sindaun bilong ol, long wanem ol i no save tromoi nating mani bilong ol long ol samting nogut, olsem smok na dring planti tumas na pilai laki samting. Long dispela rot ol i gat liklik mani bilong helpim famili bilong ol. Na sapos yumi bihainim tok bilong God long Baibel, bai yumi no tingting long kisim planti samting bilong skin. Liklik samting yumi kisim pinis bai yumi tingim em inap long yumi. Pol i gat dispela kain tingting na em i tok: “Tru, sapos man i bihainim pasin bilong God, na em i tingim olgeta samting bilong em yet em inap, orait em i gat planti gutpela samting. Yumi save, mama i karim yumi na yumi kamap long graun, long dispela taim yumi no bin karim wanpela samting i kam. Na bihain bai yumi lusim graun, long dispela taim bai yumi no inap karim samting i go. Na sapos yumi gat kaikai na laplap samting, orait yumi ken tok, ‘Em inap long mi.”’ (1 Timoti 6:6-8; Filipai 4:11, 12) Sapos yumi tingim gutpela wok bilong Jehova yumi inap mekim, bai yumi kisim planti samting—bai yumi kisim planti blesing.—Provep 10:22.
19. Sapos yumi gat sik na sik i stap longtaim, olsem wanem yumi ken karim dispela kain hevi?
19 Tasol olsem wanem sapos yumi gat sik na yumi karim dispela hevi longtaim? Jehova inap helpim yumi long karim dispela hevi na gutpela tok bilong em long Baibel inap strongim bel bilong yumi. Long Baibel Devit i tok: “Man i save tingting long ol rabisman na i helpim ol, dispela man i ken amamas. ․․․ Taim dispela man i gat sik, Bikpela bai i lukautim em.” (Sam 41:1-3) Nau em i no taim bilong wokim mirakel na oraitim sik. Tasol Jehova i save givim gutpela tingting long ol Kristen na em i strongim ol bambai ol i ken karim hevi bilong sik bilong ol na tingim Kingdom pastaim.—Matyu 6:33; 2 Korin 12:7-10.
20. Taim wanpela famili bilong yumi i dai, olsem wanem yumi ken karim dispela hevi?
20 Olsem wanem yumi ken karim hevi i painim yumi taim wanpela famili bilong yumi i dai? Baibel i tok, ol man i dai pinis bai ol i kirap bek, na dispela tok i strongim bel bilong yumi. (Jon 5:28, 29; Aposel 24:15) Olsem na taim wanpela famili bilong yumi i dai, yumi save bel hevi, tasol yumi no save krai na hevi olsem “ol arapela man i no bilip long God na i no wetim taim bilong kirap gen long matmat.” (1 Tesalonaika 4:13) Dispela tok olsem ol man i dai pinis bai ol i kirap bek, dispela tok i strongim tru bel bilong ol manmeri i stap gut long God!
Bilip Yet long God Bilong Mekim Isi Bel Bilong Olgeta Man i Gat Hevi
21. Taim ol man i mekim nogut long yumi na yumi sanap strong, planti taim wanem samting i kamap?
21 Yumi ken bilip tru olsem Jehova, em “God bilong mekim isi bel bilong olgeta man i gat hevi,” em i no ken lusim ol manmeri i dediket long em na ol i stap gut long em. (2 Korin 1:3; Sam 94:14) Na sapos yumi sanap strong na karim hevi na yumi tingim olsem dispela samting inap litimapim nem bilong God, dispela samting bai helpim yumi. Taim ol man i mekim nogut long lain bilong God na long wok bilong ol bilong autim tok bilong Kingdom, wanem samting i save kamap? Planti taim lain bilong litimapim nem bilong Jehova i go bikpela—planti man moa i kirap litimapim nem bilong Jehova.—Lukim Aposel 8:4-8; 11:19-21.
22. Long pasin bilong i stap gut long God, yumi mas tingting strong long mekim wanem?
22 God bai helpim yumi, olsem na yumi mas tingting strong long sakim ol samting Seten i mekim na i stap gut long God. Yumi mas bilip na givim bel long Jehova. Yumi no ken lusim tingting long ol planti samting Jehova i mekim bilong blesim na strongim na mekim isi bel bilong yumi ol wokboi bilong em. Yumi mas holimpas ol stretpela lo bilong em na litimapim nem bilong em, em i King. Dispela em i samting bilong yumi wan wan. Oltaim yu mas bihainim laik bilong Jehova na wok wantaim oganaisesen bilong em nau long dispela bikpela taim. Yu mas amamas long gutpela wok yu inap mekim, olsem yu inap i stap gut long Jehova na mekim bel bilong em i amamas. Na yu no ken lusim tingting olsem oltaim Jehova i save strongim bel bilong olgeta man i stap gut long em.
Bai Yu Bekim Wanem Tok?
◻ Bilong wanem i mas i gat samting bilong strongim bel bilong ol wokboi bilong Jehova?
◻ Bilong wanem Seten i kirapim ol man long mekim nogut long ol Kristen?
◻ Ol man i stap gut long God, olsem wanem ol i strongim yumi?
◻ Olsem wanem Baibel i ken strongim yumi?
◻ Long 1 Pita 5:6, 7 na 1 Korin 10:13 i gat wanem gutpela tok promis i stap?
[Piksa long pes 14]
Seten i laik kaikai ol wokboi bilong Jehova, tasol yumi gat Man bilong helpim yumi
[Piksa long pes 16]
Jehova i save harim beten bilong ol man i stap gut long em na em i helpim ol. Yu save beten oltaim?
[Rait long pes 19]
“Long wanem, Bikpela i no inap lusim ol manmeri bilong en. Tru tumas, em i no inap givim baksait long ol manmeri bilong en.”—Sam 94:14.