I Stap na Wok bilong Jisas

Long Haus Lotu Long As Ples Bilong Em

TAIM Jisas i kam bek long as ples bilong em, ating bel bilong olgeta manmeri long Nasaret i kirap na ol i tingting long em. Em i bin lusim Nasaret inap olsem wanpela yia bipo bilong kisim baptais long Jon. Long dispela taim ol i save long em, em i wanpela kamda. Tasol nau ol man long planti hap ol i save long em, em i man bilong wokim ol mirakel. Ol man bilong Nasaret i laik bai em i wokim sampela mirakel namel long ol.

Ol i wet i stap na long sabat Jisas i go insait long haus lotu, olsem em i save mekim oltaim. Ol i mekim lotu na nau Jisas i kirap sanap bilong kaunim sampela tok bilong God, na ol i givim buk bilong profet Aisaia long em. Em i opim buk na painim rait i stori long wanpela Man, em spirit bilong Jehova i stap long em. Long Baibel bilong ol man long nau dispela tok i stap long Aisaia sapta 61.

Jisas i kaunim ol tok i stori long God i makim dispela Man bilong telimautim tok olsem ol kalabusman i ken lusim kalabus na ol man i aipas ol i ken lukluk gen, na i stori long gutpela taim bilong Jehova. Kaunim pinis, orait em i bekim buk long wasman, na em i sindaun. Na olgeta manmeri i stap long haus lotu ol i lukluk long em wanpela tasol. Orait, em i kirap na em i tokim ol: “Tude dispela rait bilong God em i kamap tru, na yupela i harim pinis.”

Ol man i litimapim nem bilong em long “ol gutpela tok” i kamap long maus bilong em. Tasol ol i tok: “Olsem wanem? Ating dispela man em i no pikinini bilong Josep, a?” Jisas i save ol i laik lukim em i wokim sampela mirakel, olsem na em i tokim ol: “Tru tumas, yupela bambai i mekim dispela tok long mi, ‘Dokta, yu mas mekim orait skin bilong yu yet. Kain pasin yu mekim long Kapaneam, em mipela i harim pinis. Na yu mas mekim olsem tasol hia tu long as ples bilong yu.’” Ol dispela manmeri bipo Jisas i stap wantaim ol, ol i no amamas. Ol i pilim olsem Jisas i mas helpim ol wanples bilong em pastaim na oraitim sik bilong ol.

Jisas i save long tingting bilong ol, olsem na em i stori long sampela samting i bin kamap long bipo i stret long ol. Em i tok, long taim bilong Ilaija, planti meri i stap long Isrel, na man bilong ol i dai pinis, tasol God i no salim Ilaija i go long wanpela meri bilong Isrel. Nogat. God i salim em i go long wanpela meri em i no bilong Isrel, em i stap long hap bilong Saidon na man bilong em i dai pinis. Ilaija i wokim mirakel na kirapim bek pikinini bilong dispela meri. Olsem tu long taim bilong profet Ilaisa planti lepraman i stap long Isrel. Tasol namel long ol i no gat wanpela man sik bilong em i pinis. Nogat. Ilaisa i oraitim sik lepra bilong Neman bilong Siria tasol.

Dispela tok bilong Jisas i kamapim long ples klia pasin nogut bilong ol dispela manmeri, olsem ol i tingim ol yet tasol na ol i no bilip. Olsem na ol i belhat nogut na ol i kirap na rausim Jisas i go ausait long taun. Dispela taun bilong ol i stap antap long wanpela maunten, olsem na ol i bringim em i go long arere bilong dispela maunten na ol i laik tromoi em i go daun. Tasol Jisas i wokabaut namel long ol na em i go pinis. Luk 4:16-30; 1 King 17:8-16; 2 King 5:8-14.

◆ Bel bilong ol manmeri long Nasaret i kirap na ol i tingting long husat?

◆ Ol manmeri i ting olsem wanem long tok Jisas i mekim? Tasol wanem samting i mekim na ol i belhat?

◆ Ol i laik mekim wanem long Jisas?