Olsem Wanem Yumi Ken Bihainim Gut Lek Bilong Em?
WANPELA nius (U.S. Catholic) i skelim tingting bilong planti man na bikpela hap lain (inap 89 pesen) ol i tok: “Maski mi beten strong na mi wok strong, tasol mi no inap i stap nambawan olsem Jisas.” Tru, planti man i pilim olsem ol i no inap bihainim gut lek bilong Jisas. Planti misin i lainim ol man olsem Jisas em i God na dispela i mekim na planti man i pilim olsem Jisas em i antap tumas, na holi tumas, na ol i no inap bihainim tru pasin bilong em. Wanpela Katolik i tok: ‘Planti taim mi tingim Jisas i gutpela man bilong pasin sori na pasin isi na em i no pul tumas long mi. Tasol taim mi go long lotu ol i mekim holipasin tumas na litimapim Jisas i stap God na nau mi pilim tru ol liklik pasin kranki bilong mi na mi pilim olsem mi no inap long em.’
Tasol long Gutnius em Matyu na Mak na Luk na Jon i raitim ol i no mekim holipasin tumas na litimapim Jisas i stap God. Nogat. Ol i tok, Jisas i kamap long lain bilong wanpela kamda; em i no kamap long lain bilong ol bikpela man. Waspapa bilong Jisas, em Josep, em i wanpela kamda. Baibel i no stori planti long ol samting i kamap taim Jisas i pikinini yet, tasol Baibel i stori long wanpela samting i bin kamap na dispela i helpim yumi long save long pasin bilong Jisas. Baibel i tok, taim Jisas i gat 12-pela krismas, papamama i kisim em i go long Jerusalem bilong lukim bikpela de holi bilong ol Juda, em Pasova. Long dispela taim em i givim bel long toktok wantaim sampela man long ol tok bilong Baibel, na taim papamama i lusim Jerusalem, em i stap yet. Ol i wokabaut i go wanpela de olgeta na nau tupela i wok long painim em. Tupela i wok long painim em inap long tripela de, na bihain tupela i lukim em i stap insait long haus lotu. “Em i sindaun i stap namel long ol tisa. Em i wok long harim tok bilong ol, na long askim ol tu.” Na “ol man i harim tok bilong en, ol i kirap nogut long save bilong en na long tok em i bekim long ol.” Em i gat 12-pela krismas tasol, tasol em inap mekim ol askim long tok bilong God, em ol dispela askim i kirapim tru tingting bilong ol man, na em inap bekim gut ol dispela askim. Ating papamama i bin skulim em gut!−Luk 2:41-50.
Olsem wanem? Yu yangpela man o meri? Orait, yu ting yu inap bihainim pasin bilong Jisas? Yu inap tru long mekim! Long wanem, Jisas “i soim yupela dispela pasin bilong em, bai yupela i ken bihainim.”−1 Pita 2:21.
Taim yu yangpela yet em gutpela taim bilong kisim save long God na long Tok bilong em, em Baibel. Tru, ating planti narapela yangpela yu save long ol ol i save lusim bikpela hap taim long kaunim ol komikbuk na long lukim televisen o video samting. Tasol gutpela sapos yu bihainim pasin bilong Jisas. Taim em i manki yet em i amamas long kisim save long Jehova. Jisas i laikim tumas ol samting bilong spirit, olsem na “save bilong en i kamap gutpela tru.” (Luk 2:52) Save bilong yu tu inap kamap gutpela tru.
Olsem: Long wanpela skul long Saut Afrika, ol i tokim wanpela tisa: “Yu inap stori long sampela samting i makim olsem tok bilong Baibel i tru?” Tisa i tok, em i no inap mekim. Wanpela skulmanki em i wanpela Witnes Bilong Jehova em i tok: “Mi inap mekim!” Em i laik stori long wanem samting? Em i laik stori long sampela tok em i bin kaunim long wanpela Wastaua. Tisa i orait long em na em i kirap na stori long tok profet i stap long Danyel sapta 2. Em i kamapim as bilong ol dispela tok. Ol narapela skulmanki long klas bilong em ol i kirap nogut long save bilong em. Em i tok, tok bilong Danyel sapta 2 i makim narapela narapela bikpela gavman i bin kamap long graun, na bihain Kingdom bilong God bai bagarapim ol dispela gavman. Ol i toktok gut wantaim na ol wanklas i kamapim planti askim na em i bekim gut askim bilong ol.
Em i Kam Bilong Bihainim Laik Bilong God
Taim Jisas i yangpela yet em i kisim gutpela save long ol tok bilong Baibel, na bihain dispela i kirapim em long mekim wanpela bikpela samting. “Long dispela taim Jisas . . . i go long wara Jodan. Em i go long Jon, na i laik kisim baptais long han bilong Jon.” Taim i kamap pinis bilong Jisas i mas kirap mekim ol wok bilong em olsem wanpela wokman bilong God. Em i kisim baptais na dispela i makim olsem em i givim em yet bilong bihainim laik bilong God.−Matyu 3:13-15.
Ol Kristen i mas bihainim pasin bilong Jisas na ol tu i mas kisim baptais. Baptais i olsem wanpela mak na i makim olsem man i dediket o tok promis pinis long bihainim laik bilong God. Taim yumi laik wok long wanpela man o wanpela kampani, pastaim yumi laik save long ol lo bilong dispela man o dispela kampani; yumi laik save long ol wok samting yumi mas mekim na long pe yumi bai kisim. Ating bai yumi wokim kontrak. Tasol yumi mas sainim nem long dispela kontrak bilong makim olsem yumi bai truim ol tok yumi mekim long kontrak. Na i wankain tu long baptais−taim yumi dediket, yumi tok promis long bihainim laik bilong God na i olsem yumi wokim kontrak, tasol taim yumi kisim baptais i olsem yumi sainim nem long dispela kontrak. I olsem yumi mekim tok wankain olsem Jisas i bin mekim, em i tok: “ ‘God, . . . mi kam pinis bilong bihainim laik bilong yu.’ ” (Hibru 10:7) Long dispela rot yumi kamap wokboi o wokman bilong God!−2 Korin 3:5, 6.
Tasol olsem Jisas, pastaim yu mas kisim save long God. Ol Witnes Bilong Jehova inap helpim yu−wantaim ol pikinini bilong yu−long stadi na lainim ol tok bilong Baibel bambai yu ken kisim dispela save.
Tingim Wok Bilong God Pastaim
Jisas i kisim pinis baptais na bihain em i tambuim kaikai na em i wok long tingim gut ol tok long bel na em i beten. Dispela i redim skin bilong em na em inap sakim ol traim Seten i putim long em. Seten i tok long givim “olgeta kingdom bilong dispela graun wantaim ol gutpela samting bilong ol” long Jisas. Olaman! Sapos Jisas i kisim wok bilong bosim ol dispela samting em bai kamap bikpela man tru! Tasol Krais i save, dispela i bilong liklik taim tasol. Olsem na em i sakim Seten na em i kirap “long telimautim tok. Em i tok, ‘Yupela tanim bel! Kingdom bilong heven i klostu pinis.’ ” (Matyu 4:2, 8-10, 17) Bihain, inap long taim em i dai, long olgeta de em i mekim wok olsem wanpela wokman bilong Kingdom bilong God.
Olsem tasol long nau, Kristen i no larim ol samting bilong dispela graun bilong Seten i pulim em na bai em i givim bel long kisim bikpela wok i gat bikpela pe na dispela samting i kamap nambawan samting long tingting bilong em. Taim Jisas i singautim ol namba wan disaipel bilong em, “kwiktaim tupela i lusim umben na i go bihainim em.” (Mak 1:17-21) Sapos yumi larim ol wok bilong dispela graun i kalabusim yumi olsem umben, yu ting yumi bihainim gutpela tingting? Nogat, a? Jisas i tok yumi mas ‘autim dispela gutpela tok bilong kingdom.’ (Matyu 24:14) Tru, ating yu gat wok long lukautim famili o narapela wok yu mas mekim. Olsem na planti Witnes Bilong Jehova ol i save autim tok long apinun o long Sarere Sande samting. Sampela ol i stretim rot bambai ol inap mekim ol wok ol i mas mekim na mekim wok painia oltaim tu!
Long Saut Afrika wanpela yangpela man i tingting long i go long yunivesiti. Tasol em i dediket long God na kisim baptais na bihain em i pilim olsem em i mas mekim wok painia (olsem autim tok long olgeta de). Papa bilong em i no wanpela Witnes na pastaim em i no amamas long dispela samting. Planti taim tupela i toktok wantaim long dispela samting na bihain papa i orait long pikinini man bilong em i go mekim wok long brens-ofis bilong ol Witnes Bilong Jehova long Saut Afrika.
Em i mekim wok long brens-ofis inap 9-pela yia na em i marit, na bihain em i mekim wok painia wantaim meri bilong em. Bihain tupela i kamapim pikinini. Tasol tupela i beten askim Jehova long helpim ol bambai ol i no ken lusim wok painia. Ol i tingim tok promis bilong Jisas, em sapos yumi tingim Kingdom bilong God pastaim, orait “bai em i givim dispela olgeta arapela samting [olsem ol samting bilong skin] tu” long yumi. (Matyu 6:33) Na ol samting i kamap olsem. Dispela yangpela man i tok: “Mipela i skelim gut mani bilong mipela na mipela i no tromoi nating bilong baim planti samting, tasol mipela i gat gutpela haus na mipela inap lukautim gut pikinini meri bilong mipela long samting bilong skin.”
“Mi Save Mekim Pasin Isi . . . na Mi Save Daunim Mi Yet”
Jisas i tok: “Yupela ol man i mekim hatwok na i karim bikpela hevi, yupela olgeta i kam long mi, bai mi givim yupela malolo. Yupela kisim dispela diwai mi givim long yupela, na karim long sol bilong yupela. Na yupela kisim save long mi. Long wanem mi save mekim pasin isi long ol man, na mi save daunim mi yet. Na bai bel bilong yupela i painim malolo. Dispela hevi mi putim long sol bilong yupela, em i no hatwok, na samting mi givim yupela bilong karim, em i no gat hevi.”−Matyu 11:28-30.
Taim Jisas i wokim mirakel, olsem rausim, ol spirit nogut samting, em i no save litimapim nem bilong em yet. Nogat. Em i save tok stret olsem “Spirit bilong God” i helpim em na em i mekim ol dispela wok. (Matyu 12:28) Em inap autim gut tok bilong ol man “na ol i harim tok bilong em i gat strong,” tasol em i no litimapim nem bilong em yet. (Luk 4:32) Em i save tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.”−Jon 7:16.
Ol Kristen tru long nau ol i wok long bihainim wankain pasin daun. Olsem: Taim ol i lainim ol narapela man, ol i no save litimapim nem bilong ol yet. Ol i save litimapim nem bilong Jehova na oganaisesen bilong em. Ol i save tokim ol man, Jehova wantaim oganaisesen bilong em i bin lainim ol long autim gut tok. I olsem aposel Pol i tok, “Yu gat wanem samting yu no bin kisim long God?”−1 Korin 4:7.
Jisas i kamapim pasin daun bilong em long narapela rot tu−em i redi long wokabaut long lek inap planti tausen mail bilong autim tok long ol man; em i no raun long karis. Wanpela taim em yet wantaim ol disaipel bilong em i no gat taim bilong kaikai samting na ol i mas “malolo liklik.” Tasol bikpela lain manmeri i kam, em ol i hangre long spirit. Jisas i no tingim skin bilong em, olsem skin bilong em i les na em i hangre. Nogat. “Em i stat na i givim planti tok long ol.”−Mak 6:31-34.
Long Lesoto, long Afrika, wanpela wasman bilong raun lukim ol kongrigesen (em ol Witnes Bilong Jehova i kolim em olsem wasman sekit) em wantaim tupela poroman bilong em i bihainim dispela pasin bilong Jisas. Ol i wokabaut long lek inap 22 aua long ples maunten bilong i go lukim sampela brata Kristen ol i stap longwe long kongrigesen. Ol i wokabaut longwe na skin bilong ol i les, olsem na taim ol kamap pinis, wasman sekit i tingting long malolo long tumora. Tasol bikpela lain manmeri i kam bung bilong sekanim em na givim askim long em, olsem na em i kirap lainim ol long gutpela tok bilong Kingdom. Maski skin bilong tripela i les, tasol ol i lukim ol dispela manmeri i harim gut tok na ol i pilim olsem ol i kisim gutpela pe.
Bihainim Pasin Bilong Em!
Aposel Pol i tok, “Ai bilong yumi i mas lukluk i go long Jisas, em i as bilong bilip bilong yumi, na bihain bai em inapim tru bilip bilong yumi.” (Hibru 12:2) Yumi ken mekim olsem sapos oltaim yumi kaunim Gutnius em Matyu na Mak na Luk na Jon i bin raitim, na yumi tingim rot bilong bihainim ol gutpela pasin bilong Krais. Sampela gutpela pasin bilong Krais i olsem: Em i no pret long tokaut long pasin giaman bilong ol bikpela man bilong lotu maski em i save ol i bel nogut long em na bai ol i kilim em i dai. (Matyu 23:1-36; 26:3, 4) Taim ol man i sutim tok nogut long em na mekim nogut long em, em i bosim gut skin na i stap isi. (1 Pita 2:23) Taim em i lainim ol man em i kamapim long ples klia olsem em i save gut long pasin na tingting bilong ol man, na em inap kamapim ol bikpela tok i tru long tok i no hatwok long save long en.
Na nambawan gutpela pasin bilong Jisas em olsem: Pasin bilong sori. “Sapos wanpela man i lusim laip bilong em yet bilong helpim ol pren bilong em, i no gat pasin bilong laikim arapela man i winim dispela pasin.” (Jon 15:13) Na em i givim nupela tingting long yumi long pasin bilong sori, long wanem em i tok yumi mas laikim tu ol birua.−Matyu 5:43-48.
Jisas i makim gutpela pasin tru yumi mas bihainim! Tasol i hatwok long yumi bihainim na sampela taim bai yumi popaia. Tasol yumi no ken les long mekim gutpela pasin. (Galesia 6:9) Long wanem i gat planti milion manmeri ol i bihainim gut Jisas. Man i givim dispela nius long yu, ating em i wanpela bilong ol dispela planti milion manmeri, na bai em i amamas long helpim yu bambai yu tu yu ken bihainim GUT lek bilong Jisas!
[Rait long pes 5]
Taim Jisas i yangpela yet, em i laikim tru ol samting bilong spirit. Yu bihainim dispela pasin bilong em?
[Rait long pes 6]
Krais i no laik kisim bikpela wok o bikpela nem long dispela graun; em i laik mekim wok bilong God