I Stap na Wok Bilong Jisas

Planti Man i Save Long Dispela Tok

LUKIM Jisas−em i sindaun antap long maunten na autim tok long bikpela lain manmeri. Planti man tru i save long ol tok em i autim long dispela taim. Dispela maunten i stap klostu long Raunwara Galili, na ating em i stap klostu long taun Kapaneam. Long nait olgeta Jisas i bin beten long God, na long moningtaim em i makim 12-pela disaipel bilong kamap ol aposel bilong em. Na bihain, em wantaim dispela 12-pela man ol i go daun long maunten na em i go sanap long dispela stretpela graun long maunten.

Ating skin bilong Jisas i les na em i laik slip. Tasol planti tumas manmeri ol i kam. Sampela ol i bin kam longwe inap olsem 100-110 kilomita, long Judia na long Jerusalem. Na sampela ol i lusim nambis bilong Taia na Saidon long hap bilong not na ol i kam. Ol i kam bilong harim tok bilong Jisas, na bilong em i ken tekewe sik bilong ol. Sampela i gat spirit nogut i bagarapim ol.

Jisas i wokabaut i kam daun long maunten na nau ol manmeri i wok long i go klostu long em bambai ol i ken putim han long em. Em i mekim orait olgeta man. Bihain Jisas i go antap liklik gen long maunten na em i sindaun na em i kirap long autim tok long ol dispela planti tumas manmeri i kam bung. Olaman! Long dispela olgeta manmeri i no gat wanpela em i gat bikpela sik, long wanem Jisas i bin mekim orait olgeta man!

Ol manmeri i laik tru long harim tok bilong dispela tisa em inap wokim ol dispela mirakel. Jisas i kirap long autim tok na ol tok em i mekim em bilong helpim tru ol disaipel bilong em, ating ol i sindaun klostu tru long em. Tasol bilong helpim yumi tu, Matyu tupela Luk i bin raitim ol tok Jisas i autim long dispela taim.

Matyu i mekim bikpela stori long ol dispela tok, winim stori bilong Luk. Na sampela tok Matyu i stori long en, em Luk i tok Jisas i bin mekim long narapela taim. Skelim tok bilong Matyu 6:​9-13 wantaim Luk 11:​1-4, na tok bilong Matyu 6:​25-34 wantaim Luk 12:​22-31. Tasol yumi no ken kirap nogut long dispela samting, long wanem Jisas i kolim sampela tok planti taim, na Luk i stori long sampela tok olsem long narapela taim.

Ol tok Jisas i autim em inap tru long helpim ol man, long wanem em ol gutpela tok bilong spirit, na i no hatwok long save long en. Jisas i stori long ol samting i save kamap long olgeta taim na ol samting ol man i save long en, olsem na ol man i laik bihainim pasin bilong God ol inap kisim gut ol dispela tok. Bihain yumi ken stori long sampela tok Jisas i bin mekim long dispela taim. Luk 6:​12-20; Matyu 5:​1, 2.

◆ Jisas i stap we na em i mekim ol tok em planti man i save long en? Paslain liklik em i bin mekim wanem?

◆ Luk i kolim sampela tok Jisas i bin mekim long dispela taim na em i tok Jisas i mekim long narapela taim, tasol bilong wanem yumi no ken kirap nogut long dispela samting?

◆ Bilong wanem dispela tok bilong Jisas inap helpim tru ol man?