I Stap na Wok Bilong Jisas

Em i Putim Strongpela Lo Long Lain Bilong Em

OL BIKMAN bilong lotu i ting Jisas i kalapim Lo bilong God na ol i pasim tok long kilim em i dai. Olsem na taim Jisas i stap long maunten em i tok: “Yupela i no ken ting mi kam bilong rausim lo wantaim tok bilong ol profet. Nogat. Mi no kam bilong rausim, mi kam bilong inapim tru.”

Jisas i tingim tru Lo bilong God na em i kirapim ol narapela man long tingim gut. Em i tok: “Olsem na sapos wanpela man i tekewe wanpela liklik tok tumas long lo, na em i lainim ol arapela man tu long mekim olsem, bambai nem bilong dispela man em i liklik tumas long kingdom bilong heven,” olsem em i no ken i go insait long dispela Kingdom.

Jisas i no sakim Lo bilong God. Nogat tru. Em i tok, sapos man i gat sampela tingting inap kirapim em long brukim lo, dispela i nogut. Jisas i kolim tok bilong Lo i tok, “Yu no ken kilim man i dai,” na bihain Jisas i tok: “Tasol mi tokim yupela: Man i kros nogut long brata bilong en, em i mas kamap long kot.”

Sapos yu kros nogut na dispela kros i stap i stap long bel bilong yu, dispela em i bikpela rong, long wanem em inap kirapim yu long kilim man i dai. Jisas i mekim tok piksa bilong kamapim klia olsem yu mas wok strong long stretim kros na i stap wanbel wantaim narapela man. Em i tok: “Sapos yu bringim ofa bilong yu i kam long alta, na yu ting long brata bilong yu em i gat tok long yu, orait yu mas lusim ofa bilong yu i stap klostu long alta. Na yu go pastaim na stretim tok wantaim brata bilong yu. Stretim pinis, orait nau yu ken i go na givim ofa bilong yu long God.”

Nau Jisas i kolim namba seven lo bilong ol Tenpela Lo, em i tok: “Yupela i harim pinis bipo ol i tok: ‘Yu no ken bagarapim marit.’ ” Na bihain em i tok, sapos wanpela man i tingting long mekim dispela pasin, em nogut. “Tasol mi tokim yupela olsem: Sapos wanpela man i lukluk tasol long wanpela meri bilong mangalim em, dispela man i kalapim pinis lo bilong marit long bel bilong em.”

Jisas i no toktok long wanpela tingting nogut i kamap long bel na wantu i go pinis. Nogat. Jisas i tok long man i ‘lukluk long’ wanpela meri bilong mangalim em. Sapos man i lukluk i stap bai bel bilong em i kirap na sapos em i gat rot ating bai em i kalapim lo bilong marit. Man i mas mekim wanem bilong abrusim dispela rong? Jisas i mekim wanpela tok piksa bilong makim olsem ating bai man i gat bikpela hatwok. Jisas i tok: “Sapos ai long han sut bilong yu i pulim yu long sin, orait yu mas kamautim na tromoi. . . . Na sapos han sut bilong yu i mekim yu pundaun long sin, orait yu mas katim na tromoi.”

Sapos ai o han bilong wanpela man i gat sik, ating em bai orait long ol dokta i kamautim ai o katim han bilong em na rausim bambai em i no ken bagarap. Tasol Jisas i tok sapos i gat wanpela samting i laik pundaunim yumi, maski em i gutpela samting tru olsem ai o han bilong yumi, em i bikpela samting moa long yumi mas “tromoi” bambai em i no ken pulim yumi long bihainim tingting nogut o pasin nogut. Sapos man i no wok strong olsem long sakim samting i laik pundaunim em, Jisas i tok bai ol i tromoi em i go long Gehena (em ples bilong kukim pipia em i stap klostu long taun Jerusalem), na dispela i makim olsem bai em i bagarap na pinis olgeta.

Jisas i stori tu long pasin yumi mas bihainim taim wanpela man i mekim nogut long yumi o em i bagarapim bel bilong yumi. Jisas i tok: “Yupela i no ken bekim long man i mekim nogut long yupela.” Em i tok, “Sapos wanpela man i solapim wanpela wasket bilong yu, orait yu mas tanim arapela wasket tu i go long em.” Tasol Jisas i no laik tok sapos wanpela man i laik paitim yumi, yumi no ken lukautim skin bilong yumi o bilong famili bilong yumi. Nogat. Man i solapim yumi, em i laik kirapim bel bilong yumi na bai yumi belhat. Na sapos yumi belhat bai yumi bekim pait long dispela man. Jisas i no laik bai yumi mekim olsem, olsem na em i tok, sapos man i solapim yumi o em i sutim sampela tok nogut long yumi bilong mekim yumi belhat, yumi no ken bekim pait.

Bihain Jisas i kolim lo bilong God i tok ‘Yu mas laikim wantok bilong yu,’ na Jisas i tok, “Tasol mi tokim yupela: Yupela i mas laikim birua bilong yupela, na yupela i mas beten bai God i helpim ol man i save mekim pasin nogut long yupela.” Na em i kolim strongpela samting i mas kirapim yumi long mekim olsem, em i tok: “Olsem bai yupela i stap pikinini bilong Papa bilong yupela em i stap long heven. Em i save mekim san bilong em i kamap antap long ol man nogut na long ol gutpela man wantaim.”

Bilong pinisim dispela hap tok, Jisas i tok: “Yupela i mas i stap stret tru, olsem Papa bilong yupela i stap long heven em i stap stret tru.” I no olsem yumi inap i stap stret olgeta, tasol Jisas i laik tok, sapos yumi bihainim pasin bilong God bai yumi mekim pasin sori moa yet−bai yumi sori long ol birua tu. Luk i kolim dispela tok bilong Jisas, olsem: “Yupela i mas sori long ol man, olsem Papa bilong yupela em i save sori long ol.” Matyu 5:​17-48; Luk 6:⁠36.

◆ Jisas i tok wanem na yumi save em i tingim tru Lo bilong God?

◆ Jisas i givim wanem tok long ol man bilong helpim ol long abrusim ol samting i save kirapim man long kilim man i dai o bagarapim marit?

◆ Wanem insait bilong tok bilong Jisas em i tok, “Sapos wanpela man i solapim wanpela wasket bilong yu, yu mas tanim arapela wasket tu i go long em”?

◆ Olsem wanem yumi inap i stap stret olsem God i stap stret?