Ating Yumi Stap Long “Taim Bilong Pinis”?

“Na yu, Danyel, yu mas haitim dispela tok na pasim buk inap long taim bilong pinis.”—Danyel 12:4, NW.

WANPELA man i sindaun long haus kaikai long Nu Yok na em i lukim 3-pela klok, wanpela i tok 11:28, na wanpela i wok bihaintaim na i tok 11:26, na wanpela i go pas na i tok 11:29. Nau man hia em i longlong.

Ating bai yu tok, ‘Wanpela o tupela minit i bihaintaim o i go pas em samting nating.’ Tasol sapos yu laik kisim balus samting na balus i ron stret long taim bilong en na yu kam sampela sekon tasol bihaintaim, i no minit, na balus i go pinis, ating yu no ken tok, ‘em i samting ating,’ a? I bikpela samting long yumi mas save long taim stret bilong ol samting. God i makim taim bilong olgeta samting i mas kamap, na yumi mas save, nau yumi stap long wanem taim olsem God i makim.

Ol i Ting Las De Bai Kamap

Inap planti handet yia ol man i bin toktok long “taim bilong pinis” bai kamap. Sampela i kolim olsem ‘las de’ o ‘taim bilong graun bai pinis.’ Inap 25 handet yia bipo profet Danyel i bin toktok long dispela taim. (Danyel 12:4, NW ) Tasol wanpela man bilong nau em i save raitim ol stori, em James David Besser, em i tok, ‘i no ol man bilong lotu tasol o ol man i gat strongpela bilip ol i ting las de bai kamap. Nogat. Sapos yumi lukim ol piksa i kamap long televisen bai yumi ting olsem tru tumas ating yumi stap long las taim na las de i laik kamap.’ Yu ting olsem tu?

Tru, televisen i kisim stret ol piksa bilong ol samting i save kamap na yumi ken lukim long haus bilong yumi yet, na taim yumi lukim yumi pilim olsem las taim em samting tru na inap painim yumi tu. Taim yumi lukim piksa bilong wanpela biktaun i bagarap long pait nuklia, o pasin nogut i kamap bikpela na ol i bagarapim pikinini man o pikinini meri bilong wanpela man, o ol man nogut i holim wanpela papa o mama—yumi save, ol dispela samting nogut inap painim yumi tu. Tasol ol dispela samting i no makim tru olsem las de i laik kamap, tasol em i mekim na yumi ting las de i klostu. Olsem nau yumi laik save gut, Tru nau yumi stap long “taim bilong pinis” o. . . ?

Jisas, na Danyel, na Pinis Bilong Ol Samting

Inap 19 handet yia bipo ol disaipel i askim Jisas: “Wanem mak bai i kamap pastaim, na mipela i ken save, yu laik i kam bek na dispela graun i laik pinis?” (Matyu 24:3) Jisas i kolim planti samting bai kamap olsem mak bilong em i kam bek na i stap, na i makim olsem nau yumi stap long las taim. Opim Baibel bilong yu long Matyu sapta 24 na sapta 25, na Mak sapta 13, na Luk sapta 21, na yu yet yu ken kaunim stori bilong dispela mak.

Ating bai yu kirap nogut, long wanem, ol dispela samting i wankain olsem ol samting ol nius na televisen i stori long en long nau. Em i toktok long bikpela pait, na bikpela guria, na sik, na hangre—ol dispela samting i kamap long olgeta hap bilong graun. Na Baibel i toktok tu “long graun bel bilong olgeta lain man bai i bagarap tru,” na “planti manmeri bai ol i tingting long ol samting i laik kamap long graun, na bai bel bilong ol i pret tru, na ai bilong ol i raun.” Ol dispela tok bilong Baibel i makim stret ol samting nau i save kamap na i wankain olsem ol stori i save kamap long nius na redio na televisen, a?—Luk 21:10, 11, 25, 26.

Yumi ken lukim ol dispela samting na yumi save, nau yumi stap long “taim bilong pinis,” tasol yumi ken tingim ol samting i bin kamap 500 yia paslain tu, long taim profet Danyel i bin stap. Jisas i bin kolim nem bilong Danyel, na Jisas i toktok long taim truim bilong tok profet bilong Danyel bai kamap. (Skelim Matyu 24:3, 15, 21 wantaim Danyel 11:31; 12:1, 4.) Olsem na Jisas i no ting ol tok bilong Danyel i samting bilong bipo tasol, na yumi tu i no ken ting olsem.

Lukim blok i stap antap hia na bai yu ken save, tok bilong Danyel na Jisas i wankain. Nau yu ken askim yu yet: “Ating tupela i toktok long wanpela samting tasol, a?”

Tru tumas, Danyel na Jisas i bin toktok long wanpela samting tasol, em “taim bilong pinis,” em taim Krais bai stap king. Na long pinis bilong dispela hap taim Krais bai pinisim ol birua bilong em hia long graun long taim bilong bikpela hevi. Tasol lain bilong God bai abrusim dispela bikpela bagarap na ol bai stap laip.

Yu laik i stap laip wantaim ol? Orait, skelim tok bilong Danyel, em i toktok long “taim bilong pinis.” Dispela bai helpim yu long save, nau yumi stap long wanem taim olsem God i makim.

[Blok long pes 4]

DANYEL

“Long taim bilong pinis . . . bai Maikel [Krais Jisas] i kirap sanap, . . . Na long dispela taim bai taim bilong bikpela hevi tru i kamap, winim olgeta taim bipo, kirap long taim wanpela lain i kamap na i kam inap long dispela taim. Na long dispela taim bai lain bilong yu i ranawe na i no ken bagarap.”—Danyel 11:40; 12:1. NW.

JISAS

“Wanem mak bai i kamap pastaim, na mipela i ken save yu kam bek i stap na pasin bilong dispela graun i laik pinis?

“Long dispela taim bai i gat bikpela hevi tru. Long taim graun i nupela yet inap nau, kain hevi olsem i no bin kamap bipo. ․․․

“Na sapos God i no bin sotim dispela taim, bai olgeta manmeri i lus. Tasol . . . bai em i sotim dispela taim.”—Matyu 24:3, (NW ) 21, 22.