I Stap na Wok Bilong Jisas

Jisas i Mekim Gut Bel Bilong Meri Wanpis

JISAS i oraitim pinis wokboi bilong kepten na bihain liklik em i go long Nen, em wanpela taun i stap longwe long Kapaneam inap 32 kilomita long hap bilong saut-wes. Ol disaipel bilong Jisas na bikpela lain manmeri ol i go wantaim em. Long apinun ol i kamap klostu long Nen na ol i bungim sampela man ol i laik planim man i dai pinis. Dispela man i dai pinis em i wanpela yangpela man na ol i karim skin bilong em i go ausait long taun bilong planim em.

Tarangu, nau mama bilong dispela yangpela man i stap wanpis tru, long wanem em i gat dispela wanpela pikinini tasol, na man bilong em tu i dai pinis bipo. Taim man bilong em i dai, pikinini bilong em i stap yet, na dispela inap mekim gut bel bilong em. Ating em i givim bel olgeta long dispela pikinini, na em i ting pikinini bai helpim em long olgeta samting. Tasol nau pikinini tu i dai na em i no gat man bilong mekim gut bel bilong em. Em i bel hevi tru na em i krai na wokabaut wantaim ol lain bilong taun i go long ples matmat.

Jisas i lukim dispela meri na bel bilong em i sori long em. Olsem na em i tokim em: “Yu no ken krai.” Em i mekim dispela tok long pasin isi, tasol em i strong long mekim. Olsem na ol manmeri i kirap nogut na ol i putim yau long tok bilong Jisas. Na taim Jisas i go klostu, na i putim han long dispela bet man i dai pinis i slip long en, ol man i karim bet ol i sanap i stap. Ol i laik save, Jisas bai mekim wanem.

Ol manmeri i wokabaut wantaim Jisas ol i bin lukim em i oraitim planti sikman. Tasol ating ol i no bin lukim em i kirapim bek man i dai pinis. Tru em inap mekim olsem? Jisas i tokim man i dai pinis: “Yangpela man, mi tokim yu, yu kirap.” Na olaman! Man i dai pinis i kirap na i sindaun! Em i kirap long toktok na Jisas i givim em long mama bilong em.

Taim ol manmeri i lukim yangpela man i kirap bek na i stap laip tru ol i kirap nogut na ol i tok: “Wanpela bikpela profet i kamap pinis namel long yumi.” “God i kam pinis bilong helpim ol manmeri bilong en.” Kwiktaim stori bilong dispela mirakel i go nabaut long olgeta hap bilong Judia na long olgeta hap nabaut.

Long dispela taim Jon Bilong Baptais i stap kalabus yet. Tasol ol disaipel bilong em i go tokim em long olgeta samting Jisas i mekim. Jon i ting olsem wanem long ol dispela samting Jisas i mekim? Na planti man long ol hap Jisas i wokim mirakel long en, ol tu i ting olsem wanem? Wastaua bilong Me 1989 bai bekim ol dispela askim. Luk 7:​11-18.

◆ Taim Jisas i kamap klostu long Nen, em i lukim sampela man i mekim wanem?

◆ Jisas i lukim dispela samting na em i pilim olsem wanem? Na em i mekim wanem?

◆ Ol man i lukim mirakel Jisas i wokim na ol i mekim wanem?