Go Klostu Long God
Man Bilong Givim Bek Laip
OLSEM WANEM? Wanpela long famili bilong yu o wanpela gutpela pren i bin i dai? Sapos olsem, em wanpela bikpela bel hevi tru i bin painim yu. God i save long bel hevi bilong yu. Na tu, em inap stretim bek samting nogut dai i save kamapim. Em i bin putim long Baibel stori bilong ol man i dai na i kirap bek bilong soim olsem em i Man Bilong Givim laip, na tu, em i Man Bilong Givim Bek laip. Orait nau yumi ken stori long wanpela kirap bek we God i bin givim strong long Pikinini bilong em, Jisas Krais, long mekim. Stori bilong dispela mirakel i stap long Luk 7:11-15.
Em yia 31 C.E. Jisas i bin wokabaut i go kamap long taun Nain, long Galili. (Luk sapta 7 Ves 11) Ating em i apinun pinis taim em i kamap klostu long taun. Baibel i tok: “Em i kamap klostu long bikpela dua bilong banis i raunim dispela taun, na em i bungim sampela man i karim bodi bilong wanpela man i dai pinis i kam ausait long taun. Mama . . . i gat dispela wanpela pikinini tasol. Na man bilong en tu i dai pinis. Na bikpela lain manmeri bilong dispela taun i wokabaut i kam wantaim dispela meri.” (Luk sapta 7 Ves 12) Yu inap pilim bikpela bel hevi bilong dispela mama em man bilong en i dai pinis, a? Nau pikinini bilong em tu i dai pinis, olsem na em i no gat wanpela bilong painim kaikai samting bilong em na lukautim em.
Jisas i tingting long dispela mama i krai sori na i wokabaut klostu long bet em bodi bilong pikinini i slip long en. Baibel i tok: “Bikpela i lukim dispela meri, na em i sori tru long em, na em i tokim meri olsem, ‘Yu no ken krai.’ ” (Luk sapta 7 Ves 13) Jisas i pilim tru hevi bilong dispela meri. Ating em i tingting long mama bilong em yet, long dispela taim ating man bilong em i dai pinis, na klostu nau bai em i krai sori long Jisas.
Jisas i go klostu—tasol i no bilong wokabaut wantaim dispela lain. Em i wokim han olsem man i gat namba na em i “putim han long bet,” na ol dispela lain i stop. Orait nau, long nek olsem bilong man i bin kisim strong bilong daunim dai, Jisas i tok: “ ‘Yangpela man, mi tokim yu, yu kirap.’ Na dispela man i dai pinis, em i kirap na i sindaun, na em i stat long toktok. Na Jisas i givim em bek long mama bilong en.” (Luk sapta 7 Ves 14, 15) Taim dai i painim yangpela man hia, em i no bilong mama bilong em moa. Olsem na taim “Jisas i givim em bek long mama bilong en,” ol i kamap wanpela famili gen. Yumi ken save, bel hevi bilong mama i kamap aiwara bilong amamas tru.
Olsem wanem? Bel bilong yu i laik tumas long kisim dispela kain amamas—olsem bung gen wantaim wanpela bilong famili i dai pinis? Yu ken bilip tru olsem God i pilim bel hevi bilong yu. Pasin bilong Jisas long bel sori long dispela meri i soim pasin sori bilong God yet, long wanem, Jisas i bihainim stret pasin bilong Papa bilong em. (Jon 14:9) Baibel i skulim yumi olsem God i gat bikpela laik tru long kirapim bek ol man i dai pinis em ol i stap long tingting bilong em. (Jop 14:14, 15) Baibel i tokim yumi long gutpela samting yumi inap bilip na wet long en, olsem yumi inap i stap long Paradais long graun na lukim ol famili bilong yumi i dai pinis ol i kirap bek. (Song 37:29; Jon 5:28, 29) Mipela i laik bai yu kisim sampela save moa long dispela Man Bilong Givim Bek laip na olsem wanem yu ken bilip na wetim dispela samting i kamap.
[Piksa long pes 23]
“Dispela man i dai pinis, em i kirap na i sindaun, na em i stat long toktok. Na Jisas i givim em bek long mama bilong en”