“Ol Bai Kirapim Pait Long Yu, Tasol Ol i No Inap Daunim Yu”

BIKPELA King Jehova i bin tokim yangpela Jeremaia, Em bai strongim Jeremaia na bai Jeremaia i “stap olsem wanpela strongpela taun na olsem wanpela pos ain na olsem banis ol i wokim long bras,” bilong sakim ol birua ol i laik i kam bagarapim em. Na long taim bilong yumi long nau tu, yumi ol Witnes Bilong Jehova i kisim wankain tok long God bilong yumi, bilong strongim bel bilong yumi. Long wanem, Seten yet bai kirapim ol na ‘ol bai kirapim pait long yumi,’ tasol ‘ol i no inap daunim yumi.’ Long wanem, Jehova i tok pinis, “Mi stap wantaim yu na mi bai helpim yu.”—Jeremaia 1:18, 19, NW.

Ol man bilong wanpela ples long hap bilong bus long Ailan Solomon, ol i save birua long ol man bilong narapela hap, olsem na ol man bilong narapela hap ol inap kisim bagarap sapos ol i kam insait long dispela ples. Na sapos ol i kisim tok bilong wanpela nupela lotu i kam insait long ples, ol i mas lukaut moa yet! Dispela samting i painim tupela Witnes Bilong Jehova ol i mekim wok painia salim. Tupela i kam long dispela ples bilong autim tok na sampela man bilong ples ol i taitim banara na makim long tupela olsem ol i redi long sutim tupela. Pes bilong ol i strong olsem man bilong pait. Ol i kisim pinis tok long sutim ol man bilong narapela hap ol i laik i kam insait! I olsem tupela i nogat rot nau bilong abrusim bagarap, tasol wantu wanpela lapun i pasim ol man bilong ples na em i tok, ‘Tupela man hia ol i kam bilong lukim mi, olsem pren bilong mi. Yupela no ken bagarapim ol.’ Nau em i bringim tupela i go long haus bilong em, na ol manmeri bilong ples i kirap nogut na lukluk tasol i stap. Dispela lapun em i bin harim sampela stori long wok bilong ol Witnes, na nau em i kisim wanpela buk long tupela man hia, nem bilong buk Yu Inap i Stap Oltaim long Paradais long Graun. Long dispela taim stret tupela i kirapim Baibel-stadi long em. Long dispela taim em i kirap long wokabaut i go long ol miting. Nau ol brata inap autim tok long dispela ples na i no gat birua i painim ol moa.Ol i tenkyu tru long Jehova em i bin helpim ol na bagarap i no bin painim ol.

Na taim ol manmeri i luksave olsem yumi Witnes Bilong Jehova, planti taim dispela tu i save helpim yumi long abrusim bagarap. Ol Witnes i save go long haus bilong ol man na autim tok bilong Baibel long ol, na nau ol i save long ol Witnes na ol i save long bilip bilong ol, olsem ol i no save insait long ol samting bilong dispela graun. Long wanpela liklik ples long hap bilong Peru, sampela lain i birua long gavman ol i kam na sutim tok long ol man bilong ples na i tok ol i bin kamapim ol long gavman samting. Ol i kisim ol man bilong dispela ples na sanapim ol long lain na bai ol i sutim ol dispela man long gan. (Long sampela ples ol i bin mekim dispela kain pasin na kilim i dai olgeta manmeri bilong ples.) Tasol nau wanpela birua i luksave long wanpela brata em tu i sanap wantaim dispela lain, na man hia i tokim ol man i holim gan, ‘Dispela man em i no bilong dispela lain. Mi save long em. Em i wanpela Witnes Bilong Jehova, na ol i no save insait long ol wok politik.’ Em nau, ol i lusim brata na em i go. Tru tumas, Jehova i save lukautim lain bilong em!

Na Ailan Saipras i salim wanpela ripot i tok lotu Grik Otodoks i wok strong tru long daunim wok bilong ol Witnes Bilong Jehova long dispela hap. Dispela misin i tilim sampela pepa i sutim planti tok long ol Witnes na ol i laik pasim ol man bambai ol i no ken toktok wantaim ol Witnes. Sampela pris samting ol i stretim tok long raun na i go lukim ol manmeri ol i save stadi wantaim ol Witnes Bilong Jehova, na ol i laik sutim bel bilong ol dispela manmeri na bai ol i lusim stadi. Wanpela samting olsem i bin kamap long ples ol i kolim Pefos; long dispela ples yet Pol wantaim Banabas i bin autim tok long en na ol man i mekim nogut long ol. (Aposel 13:6-12) Wanpela pris em i wok strong long sutim bel bilong 3-pela man na bai ol i no ken kisim save moa long tok bilong Baibel wantaim ol Witnes. Orait dispela 3-pela man wan wan i kisim wanpela brata i kam bilong helpim ol long toktok wantaim pris. Nau dispela 3-pela man i save wok wantaim ol Witnes long autim tok bilong Baibel. Dispela pris i sotwin na em i tok, ‘Mi no ken toktok moa wantaim ol Witnes Bilong Jehova.’

Tasol sampela pris ol i belhat na ol i paitim ol Witnes taim ol i wok long autim tok long ol haus bilong wanpela ples. Tasol olsem wanem na tupela de samting bihain, bikpela raunwin i kamap long ples na i bagarapim kapa o rup bilong planti haus. Sampela man bilong ples i tingim dispela samting na ol i tok, ‘Dispela em i wanpela strafe bilong God bilong bekim nogut long ol pris ol i bin paitim ol Witnes.’ Long dispela ples, ol man i gat gutpela bel ol i wok yet long orait long ol Witnes i go long haus bilong ol. Wanpela brata i soim nius long wanpela man em i laik harim tok, na wanpela pris i bin paitim ol brata em i wokabaut i kam na i lukim dispela brata na em i tok, brata i no ken wok long pulim ‘lain sipsip bilong em’; em i mas larim ol. Tasol dispela man em brata i autim tok long em em i tokim pris, ‘Mi bikpela pinis na mi inap long skelim ol samting mi laik mekim.’ Olsem na maski ol pris i mekim pait long ol Witnes Bilong Jehova, tasol ol i no inap daunim ol; samting ol i mekim long ol Witnes, em i popaia na i mekim nogut gen long ol yet; na planti manmeri moa ol i wok long kam long lain bilong Jehova na mekim wok bilong Em.

I gat bikpela pait long wanpela kantri long Sentral Afrika, na ol soldia i pasim wanpela wasman sekit bilong skelim ol samting em i holim, olsem ol i mekim long olgeta man. Ol i kaunim wanpela pas em i holim na ol i no laikim wanpela hap tok bilong en. Olsem na ol i kisim em i go long polis-stesen na 3-pela soldia i paitim em nogut tru na givim bikpela pen moa long em. Ol i no toksave olsem em i bin brukim wanpela lo bilong gavman na ol i no mekim kot tu. Ol i mekim nating tasol na tromoi em i go long haus kalabus, na em i kalabus i stap inap wanpela yia olgeta. Inap 6-pela mun em i stap long wanpela rum wantaim 4-pela ten kalabus, na ol i pas pas. Olsem na long taim bilong slip, olgeta wantaim i no inap slip; ol i mas senis senis, na taim wanpela lain i slip pinis inap 3-pela aua, orait narapela lain i senisim ol na ol i slip. Ol narapela taim ol i mas sanap tasol. Taim dispela brata bilong yumi i stap long dispela haus kalabus, inap 137 kalabus ol i dai, na bos bilong kalabus i givim wok long brata long pulimapim skin bilong ol long bikpela bek bilong planim ol.

Dispela wasman sekit i wok long mekim ol samting bilong i stap strong long ol samting bilong spirit; em i lusim bikpela hap taim bilong em long autim tok long ol narapela kalabus. Em i salim ripot bilong dispela wok bilong em, olsem em i lusim 30 aua samting long autim tok long olgeta wan wan mun. Em i wokim 4-pela stadi long ol man taim em i stap long kalabus na wanpela stadi bilong em i kirap autim tok long ol narapela kalabus. Planti pen na hevi i painim dispela brata, tasol Jehova i lukautim em. Olsem na brata i laik toksave long ol narapela brata, olsem: “Taim yu stap kalabus, larim olgeta samting i stap long han bilong Jehova. Wet long em. Bilip long em. No ken tingting planti. Stap gut long Jehova.”

Long wanpela hap bilong Simbabwe, long hap bilong Afrika,ol i rausim ol pikinini bilong ol Witnes Bilong Jehova long ol skul, long wanem, ol dispela pikinini i no laik mekim sampela pasin bilong politik. Tasol sampela lain nogut long dispela ples ol i laik mekim nogut moa long ol Witnes na ol i kukim haus bilong ol papamama bilong ol dispela pikinini na bagarapim gaden kaikai bilong ol Ol dispela famili Witnes ol i mas kirap lusim ples na ranawe i go bilong abrusim bagarap, na ol i lusim olgeta lain bulmakau na ol narapela kago samting bilong ol. Tasol ol i singaut long ol bikpela man bilong gavman em ol i gat strong na bikpela namba, na ol i mekim gut long ol dispela famili na stretim rot bilong bringim ol i go bek long ples bilong ol. Ol i bekim ol bulmakau bilong ol dispela Witnes, na gavman i kirap pinis long mekim ol samting bilong bekim mani long ol brata inap long ol samting ol lain nogut i bin bagarapim. Ol Witnes Bilong Jehova i tenkyu tru long ol ‘gavman’ taim ol i mekim gutpela wok na ol i kamapim klia olsem ol i wokman bilong God bilong helpim ol na ol i stap gut.’ (Rom 13:1-4) Tasol dispela hevi ol brata i kisim, em i kamapim gutpela wok—ol manmeri bilong ples i lukim dispela samting na nau planti ol i save putim yau na harim tok bilong Kingdom. Olsem wanpela brata i tok: ‘Mipela save Jehova i save mekim wok long ol dispela kain hevi i kamap, na long dispela rot em i kamapim nem bilong em long ol man.’

Long yia bilong wok i go pinis, Jehova i bin blesim tru wok bilong yumi long hap bilong Malawi. Long wan wan ples tasol ol i biruaim ol Witnes na mekim nogut long ol. Tasol long ol narapela hap bilong Malawi, nogat. Wanpela ripot bilong ol i kamap, em i stori long dispela samting na i tok, ‘Long planti hap ol i stap gutpela na i no gat hevi i kamap. Tasol long wanpela kongrigesen sampela yangpela lain bilong ples ol i paitim tupela famili Witnes na mekim nogut tru long ol. Ol i paitim nogut tru papa bilong wanpela famili na em i dai i stap inap 4-pela aua. Bihain ol i kisim em i go long polis-stesen, na nau wanpela polis i kirap paitim em nogut na em i paitim tu ol narapela Witnes ol dispela lain i bin holim ol na kisim ol i kam wantaim dispela papa. Tasol bihain narapela polis i kamap long wok. Dispela man i gat pasin isi na em i mekim gut long ol brata. Em i salim ol i go bek long haus bilong ol, na ol i tenkyu tru long Jehova long em i bin wokim dispela rot bilong helpim ol. Bihain ol brata i kisim save long as bilong dispela birua i bin painim ol; sampela wanblut bilong wanpela brata i bel nogut long ol na kirapim dispela pasin birua long ol. Mipela amamas long planti manmeri ol i kam long bung bilong Memorial long 1986 bilong tingim i dai bilong Jisas. I gat 23,476 ol i bung. Olsem na yumi save, i gat planti man i stap yet em ol i gat gutpela bel, na yumi mas helpim ol long kamap disaipel bilong Krais Jisas hia long Malawi.’

Ol brata long wanpela kantri long Is Yurop i salim dispela pas i tok, ‘Mipela i laik tok tenkyu long wanem mipela i pilim olsem mipela i stap klostu long Lain Bilong Bosim oganaisesen bilong yumi. Jehova i wokim rot long oganaisesen bilong em long graun bilong helpim mipela. Long dispela pasin mipela inap lukim wok Papa bilong yumi em i mekim long rot bilong Pikinini bilong em na ol ensel, em i wok long bungim lain bilong em ol i gat pasin olsem sipsip, na mipela i amamas long i stap insait long dispela wok. Papa bilong yumi em i blesim wok bilong mipela na lain bilong mipela i go bikpela. Mipela lusim planti aua long autim tok,winim bilong narapela yia, na mipela i gat planti painia haptaim ol i wok strong long autim gutpela tok, na mipela i tilim planti buk long ol man, winim bilong bipo. Olsem na mipela save, blesing bilong Jehova i bin i stap long mipela.’

Long nau, krai bilong biugel bilong Taim Bilong Amamas, olsem Jubili, em i krai strong, na singaut bilong en i klia tru. Stori bilong ol dispela ripot yumi kaunim pinis em i soim yumi olsem ol Witnes Bilong Jehova long olgeta hap bilong graun ol i harim dispela singaut na ol i wok strong long mekim wok.