I Stap na Wok Bilong Jisas

Harim Gut Ol Tok Piksa Bilong Jisas

JISAS i mekim planti tok piksa na skulim bikpela lain manmeri ol i stap long nambis, na bihain ol disaipel i kam askim em long dispela nupela pasin em i bihainim bilong skulim ol man. Ol i bin harim em i mekim tok piksa bipo, tasol nau long namba wan taim ol i harim em i mekim planti tok piksa olsem. Olsem na ol i tokim em: “Bilong wanem yu mekim tok piksa long ol?”

Em i mekim ol tok piksa bilong truim wanpela tok profet i tok: “Bai mi opim maus na mi mekim tok piksa. Bai mi tokim ol long ol samting i stap hait long bipo tru inap long nau.” Tasol i gat narapela as na em i mekim ol tok piksa−em bilong kamapim bel bilong ol man.

Planti man i amamas long Jisas, long wanem em i save stori gut na em i save wokim ol mirakel. Tasol ol i no laik daun long em, em i Bikpela bilong ol; na ol i no laik bihainim em. Ol i no laik senisim tingting o wokabaut bilong ol. Ol i no laik harim gut ol tok bilong em. Olsem na Jisas i tok:

“Bilong dispela mi mekim tok piksa long ol: Ai bilong ol i lukluk, tasol ol i no lukim wanpela samting. Ol i putim [yau], tasol ol i no harim tok na kisim save. Long dispela ol manmeri, wanpela tok bilong profet Aisaia em i kamap tru. Em i tok: ‘ . . . Bel bilong dispela lain manmeri i pas pinis.’ ”

Tasol Jisas i tok moa, olsem: “Yupela i ken amamas. Ai bilong yupela i save lukim samting. Na [yau] bilong yupela i save harim tok. Mi tok tru long yupela: Bipo planti profet na planti stretpela man ol i laik tumas long lukim ol samting nau yupela i lukim, tasol ol i no bin lukim. Na ol i laik tumas long harim dispela tok yupela i harim, tasol ol i no bin harim.”

Tru tumas, ol 12-pela aposel na ol man i stap wantaim ol, bel bilong ol i gutpela−ol i harim gut tok. Olsem na Jisas i tok: “God i soim yupela pinis as bilong tok hait bilong kingdom bilong heven. Tasol long ol dispela man nogat.” Ol disaipel i laik kisim gut ol tok, olsem na nau Jisas i kamapim as bilong tok piksa bilong man i tromoi pikinini kaikai long gaden.

Jisas i tok: “Dispela pikinini kaikai em i tok bilong God,” na graun i makim bel bilong ol man. Sampela pikinini kaikai i pundaun long rot na Jisas i tok, “Seten i kam, na em i tekewe dispela tok long bel bilong ol. Em i ting, ‘Nogut ol i bilip, na God i kisim bek ol.’ ”

Sampela pikinini kaikai i pundaun long hap i gat ston. Dispela i makim bel bilong ol man em ol i harim tok na ol i amamas long en, tasol tok i no go daun tru long bel bilong ol, olsem na taim hevi o traim i painim ol, ol i surik.

Na Jisas i tok, sampela pikinini kaikai i pundaun namel long rop i gat nil. Dispela i makim ol man i harim tok, tasol olkain hevi, na mani samting na olkain amamas bilong dispela graun i karamapim ol, na kaikai bilong ol em i no kamap bikpela.

Tasol sampela pikinini kaikai i pundaun long gutpela graun. Jisas i tok, dispela i makim ol man i harim tok na ol i gat gutpela bel, olsem na bel bilong ol i holimpas dispela tok na ol i stap strong na karim kaikai i stap.

Em nau, ol disaipel i bin askim Jisas long as bilong ol tok piksa bilong em na ol i kisim gutpela blesing−Jisas i kamapim as bilong en long ol! Jisas i laik bai ol man i mas kisim gut as bilong ol tok piksa bilong em; em i laik bai ol i save long tok i tru. Em i tok: “Ating man i save kisim lam i kam bilong putim aninit long wanpela baket o wanpela bet? Nogat. Em i save putim antap long tebol.” Olsem na Jisas i tok: “Yupela i mas lukaut gut, bai yupela i harim gut tok.” Matyu 13:​10-23, 34-36; Mak 4:​10-25, 33, 34; Luk 8:​9-18; Sam 78:2; Aisaia 6:​9, 10.

◆ Bilong wanem Jisas i mekim ol tok piksa?

◆ Ol disaipel bilong Jisas i mekim wanem na dispela i makim ol i narapela kain long ol planti man?

◆ Tok piksa bilong man i tromoi pikinini kaikai long gaden i makim wanem samting, olsem Jisas i stori long en?