Em “God i Save Mekim Kaikai i Kamap”!
“Man i planim pikinini kaikai, em i no gat nem. Na man i givim wara, em tu i no gat nem. Nogat. God i save mekim kaikai i kamap, em wanpela tasol i gat nem.”—1 KO. 3:7.
1. Olsem wanem na yumi i olsem “wanwok bilong God”?
OL “WANWOK bilong God.” Em tok aposel Pol i mekim long wanpela gutpela wok em yumi olgeta inap holim. (Ritim 1 Korin 3:5-9.) Dispela wok Pol i stori long en em wok bilong kamapim disaipel. Em i tok dispela wok i kain olsem wok bilong planim pikinini kaikai na givim wara long en. Bilong yumi ken mekim gut dispela bikpela wok, Jehova i mas helpim yumi. Pol i kirapim yumi long tingim olsem, em “God i save mekim kaikai i kamap.”
2. “God i save mekim kaikai i kamap,” na olsem wanem dispela i helpim yumi long kisim stretpela tingting long wok bilong yumi long autim tok?
2 Taim yumi luksave olsem em God tasol i save mekim kaikai i kamap, na i no yumi yet, dispela i helpim yumi long kisim stretpela tingting long wok bilong yumi. Yumi inap wok strong long autim tok na lainim ol man, tasol taim nupela disaipel i kamap, biknem i mas go long Jehova tasol long dispela samting. Bilong wanem? Long wanem, maski yumi trai hat, yumi no inap klia olgeta long olsem wanem man i kamap disaipel, na yumi no inap bosim samting i kamap. King Solomon i tok stret taim em i tok: “Yumi no inap save long ol samting God i mekim.”—Sav. 11:5.
3. Wanem samting bilong wok bilong planim pikinini kaikai na wok bilong kamapim disaipel i wankain?
3 Yumi no inap klia olgeta long ol samting i mekim na man i kamap disaipel, olsem na dispela i mas givim bel hevi long yumi? Nogat. Dispela i mekim na yumi amamas na laikim tru dispela wok bilong yumi. King Solomon i tok: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.” (Sav. 11:6) Tru tumas, taim man i planim pikinini kaikai, em i no save kaikai bai kamap gut o nogat. I gat planti samting man i no inap bosim. Na i wankain long wok bilong kamapim disaipel. Jisas i stori long dispela long tupela tok piksa long sapta 4 bilong Gutnius Mak i Raitim. Orait nau yumi ken skelim ol samting dispela tupela tok piksa inap lainim yumi long en.
Kain Kain Graun
4, 5. Stori liklik long tok piksa bilong Jisas long Mak 4:1-9.
4 Long Mak 4:1-9, Jisas i stori long wanpela man i tromoi pikinini wit na i pundaun long kain kain graun: “Yupela harim. Wanpela man i go tromoi pikinini wit long gaden. Em i wok long tromoi i go, na sampela pikinini wit i pundaun long rot, na ol pisin i kam kaikai. Na sampela pikinini wit i pundaun long hap graun i gat ston, na i no gat planti graun long en. Graun i no daun tumas, olsem na dispela wit i kamap kwik. Tasol taim san i kam antap em i kukim dispela wit. Na wit i no gat rop, olsem na em i drai olgeta, na i dai. Na sampela pikinini wit i pundaun namel long ol rop i gat nil. Na ol rop i gat nil ol i kamap na i karamapim wit, na wit i no karim kaikai. Tasol sampela pikinini wit i pundaun long gutpela graun, na wit i kamap bikpela, na i karim kaikai. Sampela i karim 30, na sampela i karim 60, na sampela i karim 100.”
5 Long taim bilong ol man i bin raitim Baibel, man i planim kaikai i save putim pikinini kaikai insait long laplap bilong em o long wanpela bek na em i planim long pasin bilong tromoi nabaut. Olsem na long dispela tok piksa, man i no go long kain kain graun na planim pikinini wit, nogat. Ol dispela pikinini wit em i tromoi ol i pundaun nabaut nabaut long kain kain graun.
6. Jisas i tok wanem long mining bilong tok piksa bilong man i tromoi pikinini wit?
6 Yumi no inap paul long mining bilong dispela tok piksa, long wanem, Jisas i kamapim mining bilong en long Mak 4:14-20: “Dispela man i planim kaikai em i planim tok bilong God. Tok i save pundaun long rot em i olsem ol lain manmeri ol i harim tok, na wantu tasol Satan i save kam na rausim dispela tok God i bin planim long bel bilong ol. Na sampela manmeri ol i olsem pikinini wit i pundaun long graun i gat ston. Ol i harim tok, na ol i save kisim kwiktaim, na ol i amamas long en. Tasol ol i no gat rop bilong ol. Ol i save stap liklik taim tasol. Taim ol man i laik daunim tok bilong God ol i givim hevi long ol dispela manmeri na mekim nogut long ol, orait bilip bilong ol i save bagarap kwiktaim. Na sampela manmeri ol i olsem pikinini wit i pundaun namel long ol rop i gat nil. Dispela lain ol i harim tok, tasol ol i tingting planti long ol samting bilong graun na ol i wari long bungim planti mani na ol i mangal long ol kain kain samting. Ol dispela samting i karamapim tok bilong God, na em i no karim kaikai. Tasol sampela manmeri ol i olsem pikinini wit i pundaun long gutpela graun. Ol i harim tok, na ol i kisim na holim, na ol i karim kaikai. Sampela i karim 30, na sampela i karim 60, na sampela i karim 100.”
7. Pikinini wit na kain kain graun i makim wanem samting?
7 Tingim, Jisas i no tok i gat kain kain pikinini wit. Em i tok long wanpela kain pikinini wit tasol na i pundaun long kain kain graun, na narapela narapela samting i kamap. Namba wan graun em i strong; namba 2 graun i no go daun tumas; namba 3 i gat ol rop i gat nil; na namba 4 em i gutpela graun na i kamapim gutpela kaikai. (Lu. 8:8) Wanem dispela pikinini wit? Em tok bilong Kingdom i stap long Baibel. (Mt. 13:19) Na kain kain graun i makim wanem samting? Em ol manmeri i gat kain kain bel.—Ritim Luk 8:12, 15.
8. (a) Man i tromoi pikinini wit i makim husat? (b) Bilong wanem samting i kamap long wok bilong autim tok bilong Kingdom i narapela narapela?
8 Man i tromoi pikinini wit i makim husat? Em i makim ol wanwok bilong God, em ol i autim gutnius bilong Kingdom. Olsem Pol na Apolos i bin mekim, ol i planim kaikai na givim wara long en. Tasol maski ol i wok hat, ol samting i kamap i narapela narapela. Bilong wanem i olsem? Long wanem, tingting i stap long bel bilong ol man i harim tok i narapela narapela. Long dispela tok piksa, man i tromoi pikinini wit em i no inap bosim kaikai i kamap gut o nogat. Dispela inap mekim gut bel bilong yumi, na moa yet ol bratasista em inap planti yia ol i bin autim tok na i olsem i no gat gutpela samting i bin kamap long hatwok bilong ol!a Bilong wanem dispela inap mekim gut bel bilong yumi?
9. Aposel Pol na Jisas i kamapim klia wanem tok i tru i mekim gut bel bilong yumi?
9 Bilong tok olsem man bilong planim kaikai i mekim gut wok bilong em, yumi no skelim dispela long ol samting i kamap long wok bilong em, nogat. Pol i stori long dispela samting taim em i tok: “[Ol] wan wan bai i kisim pe inap long wok [ol] i bin mekim.” (1 Ko. 3:8) Man bai kisim pe inap long wok em i bin mekim, na i no long samting i kamap long dispela wok. Jisas tu i kamapim dispela poin taim ol disaipel bilong em i kam bek long raun bilong ol long autim tok. Ol i amamas tru, long wanem, taim ol i kolim nem bilong Jisas, ol spirit nogut ol i bihainim tok bilong ol. Tasol Jisas i tokim ol: “Yupela i no ken amamas na tok olsem, ‘Ol spirit nogut ol i bihainim tok bilong mipela.’ Nogat. Yupela i mas amamas long God i raitim pinis nem bilong yupela long buk bilong en long heven.” (Lu. 10:17-20) Maski man i no lukim wok bilong em i kamapim planti nupela disaipel, dispela i no makim olsem em i no bin wok strong o mekim gut dispela wok olsem ol narapela i mekim, nogat. Bikpela samting i mekim na man i kamap disaipel o nogat, em tingting i stap long bel bilong em. Tasol bikpela samting moa yet, em God i save mekim man i kamap disaipel!
Wok Bilong Ol Man i Harim Tok Bilong God
10. Wanem samting i mekim na man i harim tok bilong God i kamap olsem gutpela graun o nogat?
10 Olsem wanem long ol man i harim tok bilong God? Yu ting God i makim pinis samting ol bai mekim? Nogat. Ol i kamap olsem gutpela graun o nogat, em samting bilong ol yet. Bel bilong man inap senis na i kamap gutpela o nogut. (Ro. 6:17) Long dispela tok piksa bilong Jisas, em i tok taim ‘sampela i harim tok, wantu tasol’ Satan i save kam na rausim dispela tok. Tasol i no olsem dispela samting i mas kamap. Jems 4:7 i strongim ol Kristen long “sakim Satan,” na em bai lusim ol na ranawe. Jisas i stori long sampela arapela ol i harim tok na ol i amamas long en, tasol i olsem ol diwai i “no gat rop bilong ol,” olsem na bilip bilong ol i bagarap kwiktaim. Tasol Baibel i tok ol wokboi bilong God i mas stap “olsem graun i save holimpas rop bilong diwai” na bai ol inap save long tok i tru “i bikpela tru, na i go longpela moa, na i go antap tru, na i go daun moa,” na save gut olsem “pasin bilong Krais long laikim tru ol arapela, em i winim olgeta save.”—Ef. 3:17-19; Kl. 2:6, 7.
11. Man i ken mekim wanem na bai pasin bilong tingting planti na wari long bungim planti mani i no ken karamapim tok bilong God?
11 Sampela moa i harim tok bilong God ol i “tingting planti long ol samting bilong graun na ol i wari long bungim planti mani” na ol i larim dispela i karamapim tok bilong God. (1 Ti. 6:9, 10) Ol i ken mekim wanem na bai dispela samting i no ken kamap? Aposel Pol i tok: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ ”—Hi. 13:5.
12. Wanem samting i mekim na hamas kaikai em ol man i olsem gutpela graun i kamapim, i no wankain?
12 Orait nau Jisas i tok ol pikinini wit i pundaun long gutpela graun “ol i karim kaikai. Sampela i karim 30, na sampela i karim 60, na sampela i karim 100.” Tasol maski ol i gat gutpela bel na karim kaikai, wok ol i mekim long autim gutnius em long narapela narapela skel, long wanem, sindaun bilong ol i narapela narapela. Olsem: Sampela i lapun o ol i gat bikpela sik, olsem na ol i no inap mekim bikpela wok tumas long autim tok. (Skelim Mak 12:43, 44.) Long dispela samting tu, man i planim pikinini kaikai em i no inap bosim dispela samting, tasol em i amamas taim em i lukim olsem Jehova i bin mekim kaikai i kamap.—Ritim Song 126:5, 6.
Man i Planim Pikinini Kaikai i Slip
13, 14. (a) Stori liklik long tok piksa bilong Jisas long Mak 4:26-29. (b) Man i tromoi pikinini kaikai i makim husat? Pikinini kaikai i makim wanem samting?
13 Long Mak 4:26-29, i gat narapela tok piksa bilong man i planim pikinini kaikai: “Kingdom bilong God em i olsem wanpela man i tromoi ol pikinini kaikai i go long graun. Na long olgeta nait dispela man i save slip, na long san em i save kirap na raun mekim wok bilong en. Na ol dispela pikinini kaikai i kamap na i go bikpela olsem wanem, em dispela man i no save. Graun yet em i mekim na ol pikinini i kamap, na bihain ol i karim kaikai. Pastaim ol lip i kamap, na bihain ol het i kamap, na bihain kaikai i kamap bikpela insait long ol het. Na taim kaikai i redi pinis bilong kisim, orait dispela man i save katim, long wanem, taim bilong kisim kaikai em i kamap pinis.”
14 Dispela man i tromoi pikinini kaikai em i husat? Sampela long Kristendom i bilip olsem dispela man i makim Jisas yet. Tasol nogat, long wanem, yumi no ken tok Jisas i save slip na i no save olsem wanem pikinini kaikai i kamap na i go bikpela. Pikinini kaikai i kamap na i go bikpela olsem wanem, Jisas i save long dispela! Dispela man bilong planim pikinini kaikai, olsem man long namba wan tok piksa yumi stori pinis long en, em i makim ol wan wan man bilong autim tok bilong Kingdom, em ol man i planim pikinini kaikai bilong Kingdom long rot bilong autim tok na ol i givim bel tru long mekim. Pikinini kaikai ol i tromoi i go long graun em tok bilong Kingdom ol i autim.b
15, 16. Long tok piksa bilong Jisas long man i planim pikinini kaikai, em i tok wanem long wei pikinini kaikai i kamap na i go bikpela, na wei man i kamap disaipel?
15 Jisas i tok long man i planim pikinini kaikai olsem: “Long olgeta nait dispela man i save slip, na long san em i save kirap na raun mekim wok bilong en.” Dispela man i no slek long mekim wok, nogat. Dispela i makim ol samting em klostu olgeta manmeri i save mekim long olgeta de i go inap longpela taim—long san ol i save mekim wok na long nait ol i save slip. Jisas i stori long samting i kamap insait long dispela haptaim. “Ol dispela pikinini kaikai i kamap na i go bikpela.” Tasol em i tok moa, ol i go bikpela “olsem wanem, em dispela man i no save.” Em i laik kamapim klia olsem “graun yet em i mekim na ol pikinini i kamap.”c
16 Jisas i laik kamapim wanem poin? Tingim, em i tok long pikinini kaikai i kamap na i go bikpela na dispela samting i kamap isi isi. “Graun yet em i mekim na ol pikinini i kamap, na bihain ol i karim kaikai. Pastaim ol lip i kamap, na bihain ol het i kamap, na bihain kaikai i kamap bikpela insait long ol het.” (Mak 4:28) Kaikai i no kamap wantu tasol, em i wok long kamap isi isi. Man i no inap subim o hariapim dispela samting. Na i wankain long taim ol man i kamap disaipel. Dispela samting i save kamap isi isi tasol, taim Jehova i larim tok i tru i kamap strong long man em bel bilong em i gutpela tru.—Ap. 13:48; Hi. 6:1.
17. Taim nupela disaipel i kamap, husat bai amamas?
17 Olsem wanem man i planim pikinini kaikai em i insait long wok bilong kisim kaikai, “taim kaikai i redi pinis”? Taim Jehova i mekim tok i tru bilong Kingdom i kamap strong long bel bilong ol nupela disaipel, pasin bilong ol long laikim tru God i kirapim ol long dediketim laip bilong ol long em. Ol i kisim baptais long wara bilong makim ol i dediket pinis. Ol brata husat i wok yet long kamap strong, isi isi ol inap kisim sampela wok moa long kongrigesen. Taim nupela disaipel i kamap, namba wan man i planim pikinini kaikai em bai amamas, tasol i no dispela man tasol, nogat; ol narapela i no bin planim dispela pikinini kaikai i kamapim dispela disaipel, ol tu bai amamas. (Ritim Jon 4:36-38.) Tru tumas, “man bilong planim kaikai na man bilong kisim kaikai, tupela i . . . amamas wantaim.”
Skul Yumi Kisim
18, 19. (a) Dispela stadi long ol tok piksa bilong Jisas i bin strongim yu yet olsem wanem? (b) Bai yumi stori long wanem samting long stadi i kamap bihain long dispela?
18 Yumi stori pinis long tupela tok piksa i stap long Mak sapta 4, na yumi kisim skul long wanem samting? Yumi inap save olsem yumi gat wanpela wok bilong mekim—em wok bilong planim pikinini kaikai. Yumi no ken larim ol eskius o ol hevi yumi inap kisim long pasim yumi long mekim dispela wok. (Sav. 11:4) Na tu, yumi luksave olsem yumi wanwok bilong God na dispela i wanpela gutpela samting tru. Em Jehova i save mekim man i kamap disaipel—em i save blesim ol wok bilong yumi na bilong man i kisim tok bilong Kingdom. Yumi save tu olsem yumi no inap subim man long kamap disaipel. Na tu, yumi no ken bel hevi sapos man i no kamap disaipel hariap. Em i gutpela samting tru long save olsem, samting i makim olsem yumi mekim gut dispela wok o nogat, em pasin bilong yumi long stap gut long Jehova na long wok bilong autim “gutnius bilong kingdom . . . bai olgeta lain manmeri i ken harim.”—Mt. 24:14.
19 Wanem samting moa Jisas i skulim yumi long en long wei ol nupela disaipel i kamap na long wok bilong Kingdom? Bekim bilong dispela askim i stap long sampela narapela tok piksa i stap long ol Gutnius. Bai yumi skelim sampela bilong ol dispela tok piksa long stadi i kamap bihain long dispela.
[Ol Futnot]
a Tingim stori bilong wok autim tok bilong wanpela brata (Georg Fjölnir Lindal) long Aislan, long 2005 Yearbook of Jehovah’s Witnesses, pes 210-211, na ol ekspiriens bilong ol Witnes i bin wok strong long Aialan inap planti yia na pastaim i no gat gutpela samting i kamap long wok bilong ol, long 1988 Yearbook of Jehovah’s Witnesses, pes 82-99.
b Bipo, Wastaua i bin tok, dispela pikinini kaikai i makim ol pasin bilong yumi na ol i mas kamap olsem pasin tru bilong yumi, na graun, olsem ol manmeri yumi poromanim, ol inap kirapim yumi long bihainim gutpela pasin o pulim yumi long bihainim pasin nogut. Tasol long dispela tok piksa bilong Jisas, pikinini kaikai i no senis na kamap kaikai nogut, nogat. Em i kamap na i go bikpela, na em tasol.—Lukim Wastaua, Oktoba 1, 1981, pes 10-12.
c Narapela tok i wankain olsem, i stap long Aposel 12:10, we em i stori long wanpela dua ain na dispela dua ain “em yet i op.”
Yu Inap Tingim?
• Wanem sampela samting bilong wok bilong planim pikinini kaikai na wok bilong autim tok bilong Kingdom i wankain?
• Olsem wanem Jehova i skelim man i autim tok bilong Kingdom olsem em i mekim gut dispela wok o nogat?
• Olsem Jisas i kamapim klia, wanem samting bilong wei pikinini kaikai i kamap na i go bikpela na wei man i kamap disaipel i wankain?
• Olsem wanem na “man bilong planim kaikai na man bilong kisim kaikai, tupela i . . . amamas wantaim”?
[Ol Piksa long pes 13]
Bilong wanem Jisas i tok man bilong autim tok bilong Kingdom Bilong God em i olsem man bilong planim pikinini kaikai?
[Ol Piksa long pes 15]
Ol man i olsem gutpela graun ol i save givim bel long wok autim tok bilong Kingdom inap long skel bilong ol
[Ol Piksa long pes 16]
Em God i save mekim kaikai i kamap