Kamap Wanbel Wantaim God Long Rot Bilong Dediket na Baptais

“Na Jehova i tokim [ol]:  . . . ‘Tasol ol man i gat mak yupela no ken i go klostu long ol.’”—ESIKIEL 9:4, 6, NW.

1, 2. (a) Olsem wanem na planti man ol i no stap wanbel wantaim God? (b) Bilong wanem i bikpela samting olgeta i mas kamap wanbel wantaim God?

KAMAP wanbel wantaim God? Bilong wanem yumi mas kamap wanbel wantaim God? Planti man ol i no ting olsem ol i stap birua bilong God, a? Tasol olsem wanem? Yu inap kamap birua bilong God na yu no save yu stap olsem? Aposel Pol i tokim ol Kristen long taim bilong em: “Bipo yumi olgeta  . . . yumi bihainim laik nogut bilong olpela bel bilong yumi tasol. Yumi bihainim laik bilong dispela olpela bel, na laik bilong tingting bilong yumi yet. Yumi yet stap olsem, na yumi inap kisim pe nogut bilong dispela, olsem ol arapela man.”—Efesas 2:3.

² Olsem tasol long nau, ating yu laik mekim ol pasin God i laikim, tasol sin yu kisim long Adam i paulim tingting bilong yu, na em inap kirapim yu long “bihainim laik bilong dispela olpela bel.” Olsem wanem? Yu save stadi long Baibel wantaim ol Witnes Bilong Jehova, o yu wanpela yangpela em papamama i Witnes, tasol yu no baptais yet? Olsem wanem? Yu save bihainim laik bilong yu yet tasol? Sapos olsem, orait yu stap longwe long God. Man i no lusim dispela kain pasin ‘em i hipim bikpela pe nogut bilong em yet.’ (Rom 2:5; Kolosi 1:21; 3:5-8) “Long de bihain belhat bilong God i kamap ples klia long stretpela kot bilong em,” long dispela taim bai God i kamapim tru belhat bilong em na bekim pe nogut. (Rom 1:28-2:6) Olsem wanem yu ken kamap wanbel wantaim God na abrusim bagarap long dispela ‘de bilong belhat bilong God’?

Rot Bilong Kamap Wanbel Wantaim God

3. God i mekim wanem na nau i gat rot bilong kamap wanbel wantaim Em?

³ Jehova yet i kirap wokim rot bilong helpim yumi. “God i marimari long yumi na i salim Pikinini bilong en i kam long graun bilong tekewe sin bilong yumi.” (1 Jon 4:10) Ofa bilong Jisas inapim stretpela lo bilong Jehova, olsem na Jehova inap lusim rong bilong yumi. Nau i gat as bilong tekewe sin. Bipo yumi stap birua bilong God, tasol bihain bai ofa bilong Krais i pinisim dispela pasin birua olgeta. Yes, olsem Pol i tok, ‘Pikinini Bilong God i dai, na long dispela dai yumi inap kamap wanbel wantaim God.’—Rom 5:8-10.

4. Esikiel i lukim wanem driman o piksa bilong dispela samting? Bilong wanem dispela i bikpela samting long yumi?

⁴ Tasol i gat sampela samting yumi mas mekim bambai ofa bilong Krais i ken helpim yumi. Ol samting Esikiel i lukim olsem driman o piksa i makim ol samting yumi mas mekim. Ol samting Esikiel i lukim i kamap tru long nau, taim ‘de bilong belhat bilong God’ i klostu pinis. Esikiel i lukim 6-pela man i holim samting bilong pait. Dispela 6-pela man i makim ol ami bilong God ol bai givim strafe bilong God long ol man nogut. Taim ol i no kirap yet long mekim dispela wok, God i tokim namba 7 man, em i holim pen bilong kuskus, olsem: “‘Yu wokabaut insait long dispela taun  . . . na yu putim wanpela mak long pes bilong ol man i krai na bel hevi long ol samting nogut nogut ol man i mekim insait long dispela ples.’ Na em i tokim ol [6-pela man]:‘Yupela i go bihain long em na i go insait long dispela ples, na yupela mas bagarapim ol man.  . . . Tasol ol man i gat mak, yupela no ken i go klostu long ol.”—Esikiel 9:1-6, NW.

5. Wanem samting i kirapim yumi long tanim bel?

⁵ Ol dispela man “i gat mak” bilong lukautim ol, ol i les tru long pasin bilong ol man ol i tok ol i lotuim God na “ol i mekim pasin pait na bagarapim man,” na ol i mekim pasin pamuk, na lotuim ol god giaman, na mekim kain kain pasin nogut. (Esikiel 8:5-18, NW; Jeremaia 7:9) Olsem tasol long nau, ol man i laik kisim “mak,” ol i mas stadi long Baibel na lain pastaim long laikim tumas stretpela pasin na lo bilong God, na bai ol i “krai na bel hevi” long ol tok na pasin i bagarapim nem bilong God. Ating sampela ol i no save na ol i mekim pasin i no stret, o ol i orait long ol man i mekim pasin i no stret. Tasol nau ol i kisim tingting wankain olsem bilong God, na long ai bilong ol, ol dispela kain pasin i kamap samting nogut tru! (Rom 1:24-32; Aisaia 2:4; Revelesen 18:4; Jon 15:19) Ol i kisim tingting olsem na dispela i kirapim ol long mekim wanpela samting ol i mas mekim pastaim bambai ol inap kamap wanbel wantaim God. Pita i tok: “Yupela i mas senisim tingting nogut bilong yupela, na tanim bel, na bai God i rausim sin bilong yupela [em i no ken belhat long ol].” (Aposel 3:19) God i tekewe sin bilong yumi na dispela samting i mekim yumi i amamas tru!

Kisim “Mak”

6. Sampela man long bipo, bilong wanem ol i gat mak?

⁶ Bilong abrusim belhat bilong God, ol dispela man i “krai na bel hevi” ol i mas kisim mak long pes bilong ol. (Esikiel 9:4, NW ) Bipo ol man i save putim mak long pes bilong ol slev i wok kalabus bilong makim ol i boi bilong husat. Na tu sapos man i gat mak long pes o long wanpela hap bilong skin bilong em, ating dispela i makim em i man bilong lotuim wanpela god.a (Lukim tu Aisaia 44:5.) Olsem na long taim bilong yumi, wanem dispela “mak” em inap lukautim man na bai em i no bagarap, na i kamapim long ples klia olsem ol man i gat dispela mak ol i man bilong lotu tru long Jehova na ol i slev o wokboi bilong Jehova?

7. Wanem dispela “mak” long nau?

⁷ Dispela mak long nau i olsem ol samting i stap ples klia, olsem wanpela mak long pes bilong yu i stap ples klia, na i makim olsem (1) yu wanpela disaipel bilong Krais Jisas na yu dediket na baptais pinis, na (2) yu kisim pasin bilong Krais na yu kamap nupela man. (Efesas 4:20-24) Ol man i kisim dispela mak, pastaim ol i mas dediket, olsem na yumi mas save long insait bilong dispela samting. Jisas i tok: “Sapos wanpela man i laik bihainim mi, em i mas daunim em yet, na em i mas karim diwai [pos] bilong em na bihainim mi.”—Mak 8:34.

8, 9. (a) Yu mas mekim wanem na bai yu ‘daunim yu yet’? (b) Yumi ken stori olsem wanem long pasin bilong dediket?

⁸ Insait bilong tok Grik ol i tanim olsem “daunim” i olsem “sakim olgeta” o “givim baksait long.” Olsem na bilong ‘daunim yu yet,’ i no olsem wan wan taim yu mas sakim sampela laik o amamas bilong yu. Nogat. I olsem yu no ken larim laik bilong yu yet i bosim yu moa. Bilong save gut long insait bilong dispela tok bilong Jisas, yumi ken skelim dispela tok olsem ol i tanim long sampela narapela tok ples: “Em i no ken bihainim moa laik bilong bel bilong em yet” (tok Tzeltal, Meksiko), “em i no bilong em yet moa” (tok K’anjobal, Guatemala), “em i mas givim baksait long em yet” (tok Java, Indonesia). Olsem na taim yu dediket long God, yu no mekim tok promis nating. Nogat. Yu tok promis long givim yu yet olgeta long God bilong mekim laik bilong Em tasol.

⁹ Wanpela meri Kristen, nem bilong em Susan, bipo em i save bihainim laik bilong em yet tasol na em i no laik bai narapela man i bosim em, tasol nau em i dediket long God. Em i stori long tingting bilong em long dediket bilong em na em i tok: “I olsem mi putim mi yet olgeta long han bilong narapela man. Nau Jehova i bosim mi na makim rot mi mas bihainim; em i tokim mi long ol samting mi mas mekim; em i makim wanem samting mi mas tingim i olsem bikpela samting, na wanem samting i nambatu tasol.” Yu laik dediket olsem na givim yu yet long Jehova wanpela tasol? Yu no ken lusim tingting olsem dispela “mak” i makim yu bilong God, olsem wanpela wokboi i amamas long mekim wok bilong Bosman bilong em.—Skelim Eksodas 21:5, 6; Rom 14:8.

10. Taim man i laik dediket long God, pastaim em i mas tingim gut wanem ol samting?

¹⁰ Jisas i tok: “Sapos wanpela man namel long yupela em i laik wokim wanpela longpela haus i go antap, orait em i save sindaun pastaim na i save tingim gut pe bilong dispela haus. Em i laik save, bai mani bilong en inap long pinisim dispela haus, o nogat.” (Luk 14:28) Olsem na taim yu laik dediket, yu mas tingting gut pastaim. Yu mas tingim ol wok yu mas mekim taim yu dediket pinis, olsem: Go oltaim long ol miting Kristen (Hibru 10:25); holimpas stretpela pasin God i makim bilong ol wokboi bilong em i mas bihainim (1 Tesalonaika 4:3, 4, 7); givim bel long mekim wok bilong autim tok bilong Kingdom inap tru long skel bilong yu; tingim laik bilong God pastaim taim yu tingim ol wok yu laik mekim (Matyu 6:33; Eklisiastis 12:1); lukautim ol wok bilong yu insait long famili. (Efesas 5:22-6:4; 1 Timoti 5:8) Yu redi long mekim ol dispela samting? Taim yu beten pinis long God na tokim em yu laik mekim laik bilong em, olsem yu dediket long em, orait i gat narapela samting yu mas mekim bambai ol man i ken save yu dediket long God.

Husat Inap Kisim Baptais?

11. Baptais i makim wanem samting? Na i mekim wanem wok?

¹¹ Jisas i tok ol disaipel bilong em i mas kisim baptais. (Matyu 28:19, 20) Ol i mas i go daun insait tru long wara na kam antap gen. I olsem ol i dai na kirap bek. Dispela i makim olsem yu lusim pasin bilong tingim laik bilong yu yet pastaim na yu kirap bek bilong mekim laik bilong God. Taim yu kisim baptais, nau yu kamap wanpela Witnes Bilong Jehova na yu insait long lain bilong God i stap long olgeta hap.b Taim yu kisim baptais, dispela i strongim tok promis yu bin mekim long God. (Lukim Eksodas 19:3-8.) Pasin bilong yu i mas stret wantaim ol lo bilong Em. (Sam 15; 1 Korin 6:9-11) Baptais i makim olsem yu kamap wanpela wokman bilong God, na yu “singautim God” bilong mekim bel bilong yu i kamap klin, long wanem yu save, nau yu kamap wanbel wantaim God.—1 Pita 3:21.

12. Wanem taim “mak” bilong papamama i lukautim pikinini bilong ol?

¹² Olsem wanem long ol yangpela? Ol i mas tingting long kisim baptais? Orait, tingim ol tok Jehova i bin givim long dispela 6-pela man i holim samting bilong pait, em Esikiel i lukim ol long driman o piksa. Jehova i tokim ol: “Maski husat husat—ol lapun, ol yangpela man, na yangpela meri singel, ol liklik pikinini, ol meri marit—yupela mas kilim ol i dai na pinisim ol olgeta. Tasol ol man i gat mak, yupela no ken i go klostu long ol.” (Esikiel 9:6, NW ) Tru, sapos ol pikinini i liklik tumas long mekim tok promis na dediket long God, bai “mak” bilong papamama inap lukautim ol, sapos papamama i wok strong long lainim ol pikinini long laikim tumas Jehova na ol pikinini i save bihainim tok. (1 Korin 7:14) Tasol sapos pikinini i gat tingting inap long em yet i ken tingim ol samting em i laik mekim na em “i save long mekim gutpela pasin,” orait yumi no ken ting “mak” bilong papamama inap lukautim em i go inap long taim bihain bihain. Nogat.—Jems 4:17.

13. Kolim sampela samting yumi mas tingim na bai yumi ken save, yangpela man o meri inap long kisim baptais o nogat.

¹³ Taim yangpela man o meri i laik dediket long God, pastaim em i mas i gat save inap long em i pilim tru ol samting em i mas mekim bilong truim dediket bilong em, na em i mas wok long save gut long Jehova bambai em i ken kamap pren bilong Em. Em i mas save long ol lo bilong Baibel na em i mas bihainim ol dispela lo; em i mas save, sapos em i brukim, em i mas kamap long kot. Em i mas i gat save long pasin bilong autim bilip bilong em long ol narapela man, na em i mas save dispela wok em i bikpela hap wok lotu bilong em; em i mas laik tru long mekim wok bilong God. Tru, em i no gat gutpela tingting na save olsem bilong man i bikpela pinis, tasol em i wok long kamap strong long spirit.

14. Wanpela man i dediket taim em i yangpela yet, bilong wanem em i ting dediket bilong em i olsem samting bilong lukautim em?

¹⁴ Sapos yangpela man o meri i ‘tingting gut pastaim’ na em i dediket long God, dispela i no ken nogutim em; dispela bai helpim em. Planti nupela Kristen, taim ol i baptais pinis, bihain ol i pilim na tenkyu moa yet long ol samting. Wanpela man, nem bilong em Devit, em i tok: “Mi kisim baptais taim mi yangpela yet na dispela i lukautim mi. Mi wok long i go bikpela na mi lukim sampela yangpela long kongrigesen, em ol i no baptais, ol i ting olsem ol i no gat wok long harim tok bilong ol elda, olsem na ol i kirap bihainim pasin i no stret. Tasol mi no bihainim pasin bilong ol, long wanem oltaim mi save tingim dediket bilong mi, olsem mi bin givim laip bilong mi long God. Laip bilong mi em i bilong God.”

15. (a) Olsem wanem yumi save sampela yangpela ol inap tingim gut lotu i tru? (b) Ol papamama i ken mekim wanem bilong helpim pikinini bilong ol?

¹⁵ Tasol sampela papamama i ting olsem: ‘Nogut pikinini man o pikinini meri bilong mi i baptais taim em i yangpela yet, na bihain em i no givim bel moa long God.’ Tru, pikinini i no ken kisim baptais bilong amamasim papa o mama; na em i no ken tingting long bihainim sampela pren bilong em na em tu i kisim baptais. Nogat. Tasol Josep na Samuel na King Josaia na Jisas ol i tingim gut lotu bilong God taim ol i yangpela yet, na taim ol i bikpela pinis ol i no lusim. (Jenesis 37:2; 39:1-3; 1 Samuel 1:24-28; 2:18-21; 2 Kronikel 34:3; Luk 2:42-49) Wanpela meri Kristen long nau, nem bilong em Jin (Jean) em i bin kisim baptais taim em i gat 10-pela krismas tasol. Planti yia bihain, ol i askim em: ‘Taim yu kisim baptais, yu save tru long as bilong dispela samting yu mekim?’ Jin i bekim tok olsem: “Mi save mi laikim tumas Jehova, na mi pilim tru ol samting Jisas i bin mekim bilong helpim yumi, na, mi laik mekim wok bilong Jehova.” Nau, inap olsem 40 yia bihain long baptais bilong em, em i stap gut yet long wok bilong Jehova. Olgeta yangpela i narapela narapela kain, olsem na i no gat wanpela man i ken makim hamas krismas yangpela man o meri i mas winim pastaim na bai em inap kisim baptais. Ol papamama i mas wok strong long putim tok bilong God i go daun long bel bilong pikinini bilong ol, na wok long helpim pikinini long bihainim pasin bilong God na givim bel long God. Ol i ken kirapim pikinini bilong ol long tingim gutpela wok ol i ken mekim, olsem ol i ken dediket long God na kisim baptais, na oltaim ol i mas strongim ol long i stap gut long wok bilong lotuim God.

Winim Ol Samting i Laik Pundaunim Yu

16. Yumi mas kisim save, tasol bilong wanem dispela samting tasol i no inap?

¹⁶ Yumi mas kisim save long Baibel, em bikpela samting. Tasol bilong kisim dispela “mak,” yumi no ken kisim save tasol. Long driman o piksa Esikiel i lukim, ol dispela lapun man i wokim smok smel na lotuim ol god giaman na 6-pela man i kilim ol i dai, ating ol i gat bikpela save long ol tok bilong Jehova ol man i raitim pinis. Tasol pasin ol i mekim long ples hait i makim olsem ol i no givim bel tru long God. (Esikiel 8:7-12; 9:6) Olsem na bilong kisim “mak” na abrusim bagarap, yumi mas “kamap nupela man. God i wokim dispela nupela man, na em i kamap olsem God yet. Pasin bilong dispela nupela man em i stret na holi tru.”—Efesas 4:22-24.

17. (a) Wanem samting i pasim rot bilong sampela man na ol i no kisim baptais? (b) Olsem wanem tok bilong Jems 4:8 inap helpim ol?

¹⁷ Bikpela samting bilong pundaunim yu em sin i stap long skin bilong yu. (Rom 8:7, 8) Sampela man ol i surik long kisim baptais, long wanem ol i no bosim laik nogut bilong skin o ol i laikim tumas ol amamas nogut bilong dispela graun. (Jems 4:1, 4) Ol dispela manmeri i lus long gutpela samting tru—ol i no kamap pren bilong God. Baibel i tok: “Yupela i mas i go klostu tru long God, na bai em i kam klostu tru long yupela. Yupela man bilong sin, bel bilong yupela i mas kamap klin, olsem man i wasim han bilong en na i kamap klin. Yupela man i gat tupela tingting, yupela i mas rausim dispela tingting nogut long bel bilong yupela.” (Jems 4:8) Ol i mas bilip tru na wok strong. Olsem: Wanpela man i stadi na lainim ol tok bilong Baibel. Inap 16 yia pinis em i bin mekim nabaut long dring na long drak na bikpela sik i kisim em long dispela. Tasol em i wok strong na em i lusim ol dispela pasin nogut. Em i tok: “Mi wok long kamap strong na mi laik dediket na nau wanpela meri i wok long pulim mi. I hatwok tru long sakim dispela samting i laik pundaunim mi. Dispela meri i ting olsem mi longlong, tasol mi tokim em: ‘Mi stadi wantaim ol Witnes Bilong Jehova na lainim tok bilong Baibel na mi no ken mekim dispela pasin.”’ Wanem samting i strongim em long tok olsem long dispela meri? Em i tok: “Mi tingim ol samting Jehova i bin mekim bilong helpim i stap bilong mi —em i bin helpim mi long lusim pasin bilong dring; na em i helpim mi long planti narapela rot tu. Dispela samting i wok long pulim mi i go klostu long em. Mi no laik mekim em i bel hevi.” Dispela man i go klostu long God.

18. Wanem samting em i bikpela samting bilong helpim yu long winim ol samting i laik pasim rot bilong yu?

¹⁸ Yu mas kisim save, tasol bikpela samting em olsem: Yu mas laikim tru dispela save yu kisim. Sam 119:165 i tok: “Ol manmeri i laikim tumas lo bilong yu, ol i stap gut tru, na i no gat wanpela samting inap mekim ol i pundaun.” Dispela ves i no tok ol manmeri i save long lo bilong yu ol i stap gut tru; nogat; em i tok ol manmeri i laikim tumas lo bilong yu ol i stap gut tru. Bikpela samting em olsem: Yu mas laikim tumas lo bilong God; yu mas pilim tru gutpela wok ol dispela lo i mekim bilong helpim yu long i stap gutpela.—Aisaia 48:17, 18.

19, 20. (a) I gat wanem ol samting i laik pasim rot bilong yumi o pundaunim yumi na yumi mas wok long winim? Yumi ken save tru long wanem samting? (b) Sapos yumi winim olgeta samting i laik pundaunim yumi, bai yumi stap olsem wanem?

¹⁹ Tru i gat ol narapela samting tu inap pasim rot bilong yu o pundaunim yu. Dispela brata yumi stori long en long paragraf 17, em i tok: “Wanpela bikpela samting i laik pundaunim mi na mi hatwok long winim, em olsem: Pasin bilong pret long ol man. Mi gat sampela ‘pren’ bipo mi save dring wantaim ol. I hatwok tru long mi tokim ol mi no laik poroman moa wantaim ol, long wanem mi laik dediket long God na givim laip bilong mi long Em.” (Provep 29:25) Sampela ol i kisim hevi long ol wanhaus bilong ol, ating famili bilong ol i tok bilas long ol. Wanpela Witnes em i baptais nupela na man bilong em i save birua long em, tasol em i winim dispela hevi. Em i tok: “Mi no winim wantu tasol; nogat; tasol mi wok long winim ol liklik hevi wan wan.” Sapos yu stap gut long God na yu wok long winim olgeta wan wan hevi i kamap, dispela bai strongim bel bilong yu. Yu ken save tru, ol manmeri i laikim tumas lo bilong God ol inap winim olgeta hevi!—Luk 16:10

²⁰ Taim yu wok long winim olgeta samting i laik pasim rot bilong yu na yu sanap strong, orait bai yu stap bel isi tru; bai yu “stap gut tru.” (Sam 119:165) “Bai yu wokabaut gut long rot  . . . Na long taim bilong slip bai yu no inap pret, na bai yu slip gut tru. Yu mas bilip strong long [Jehova] na bai em i banisim yu na lukautim yu.”—Provep 3:23-26.

[Ol Futnot]

Sampela Tok Bilong Tingim Gen

◻ God i mekim wanem bilong helpim yumi long kamap wanbel wantaim em?

◻ Wanem dispela “mak” bilong helpim man long abrusim bagarap?

◻ Olsem wanem dediket na baptais i bikpela samting?

◻ I gat wanem ol samting i laik pundaunim yumi? Olsem wanem yumi ken winim ol dispela samting?