Wok Bilong Ol Spirit Nogut—Bilong Wanem Planti Man i Moa Tingim Long Nau?
FRANS em i bikman long wanpela misin Talatala. Sapos i gat sampela wok i kamap insait long misin bilong ol, Frans i go pas long mekim. Wilhelmina tu i save givim bel long God. Em i save tokim ol man: “Yu mas go long lotu.” Em yet i save go oltaim. Na Esta (Esther) tu i save go lotu oltaim, na olgeta de em i save beten. Na 3-pela hia ol i save mekim wok bilong ol spirit tu. Ol i wailis bilong ol spirit.
Dispela 3-pela manmeri i bilong Suriname. Na long olgeta hap bilong graun i gat planti manmeri moa ol tu i laik insait long sampela wok bilong ol spirit nogut, olsem marila na sanguma na posin samting. Long Amerika i gat 30 kain nius i save kamap, na long olgeta taim ol i save wokim inap olsem 10,000,000, na ol dispela nius i stori long ol samting olsem wok glasman na papait na majik na tambaran na marila samting. Long Englan 2,000,000 manmeri i insait long ol dispela samting. Long Holan planti manmeri i bilip long ol dispela samting, em sampela ol i bilong taun, na sampela i saveman, na sampela i yangpela. Long Afrika na Esia na Latin Amerika na Papua Niugini na planti ples moa, marila na posin samting i bikpela samting long i stap bilong ol man. Tupela man i raitim wanpela buk (em Occult Shock and Psychic Forces bilong John Weldon na Clifford Wilson) na tupela i tok: “Planti man i tok, nau long taim bilong yumi planti manmeri i moa tingim ol kain kain wok bilong ol spirit nogut.”
Pasin bilong lukluk long ol sta, na bilong kisim save long ol samting i stap hait, na pasin bilong majik, na painim insait bilong driman, na ol kain samting olsem−long nau kain kain man i kirap long tingting long dispela. Bilong wanem?
Wanpela as bilong en i olsem: Sampela misin i no gat tok long ol dispela samting, na sampela misin i orait long ol man i ken mekim. Ol i tok, sapos yu bungim ol dispela spirit, dispela bai helpim yu long painim God.
Izaak Amelo i gat 70 krismas na em i wanpela bisnisman long Suriname. Inap 7-pela yia em i memba bilong kaunsil bilong misin, na em i save mekim wok bilong ol spirit nogut tu; em i holim dispela tupela wok wantaim. Em i tok: “Long olgeta Sarere mipela ol memba bilong kaunsil bilong misin mipela bung ausait long ples na mipela toktok wantaim ol spirit. Mipela i stap inap tulait, na dikon i was long klok na long 5 klok moningtaim em i tok, Inap, na mipela no toktok moa wantaim ol spirit. Nau mipela waswas na senisim klos na go lotu long haus lotu Mi bin mekim olsem inap 7-pela yia, na pasto i no bin tok dispela samting i no stret.”
Profesa R. van Lier bilong Holan em i lukluk long ol dispela wok bilong spirit nogut na em i lukluk long of misin long Suriname, na em i skelim tupela wantaim na em i tok, planti man i tang wok bilong of spirit nogut i olsem helpim bilong misin na i olsem em yet i wanpela lotu. Na Yunivesiti Bilong Leiden i kamapim tok bilong dispela profesa, em i tok, wok bilong ol dispela spirit nogut i olsem wanpela bikpela lotu na i wankain olsem ol lotu ol i kolim Kristen.
Tasol ating nau bai yu tok: ‘Sapos ol misin i orait long wok bilong ol spirit nogut, ating God tu i mas orait long en, a? Olsem Wanem? Sapos man i go insait long dispela kain wok o bung wantaim ol dispela spirit, dispela bai helpim em long kamap wanbel wantaim God? Baibel i tok wanem long ol kain kain wok bilong ol spirit nogut?
[Piksa long pes 3]
Izaak Amelo i tingim taim em i stap insait long kaunsil bilong misin na ol i mekim wok bilong ol spirit nogut